飲食新手的个人专页

偶爾來到青衣，要獨自在這裡用餐。看了一下Openrice的食評，看不出甚麼好推介。只好隨意走進一家。在外面等了約十分鐘入座。不知怎麼，甫走進去，就總覺得這家店有種難以言喻的詭異，解釋不了。那店員領我到座位，隨手揮了一揮，就算是請我入座的意思了。人所共知，正常的招待手勢，是手掌往前攤開，並且停下至少一會。但那店員把手一攤的時間，連一秒也沒有，正確點說是連半秒也沒有，只有那麼四分之一秒。這就好像在說：「你要坐就坐下，不要坐就給老娘走吧。」當時我倒沒太在意這點，僅當係個別員工問題，加上我站得累了，只想快坐下，難道還要我費氣力去教對方手勢禮儀嗎。但詭異的事情不止於此：我既然只有一個人，按常理自然要把我安排到二人桌；但他們為我安排的座桌卻與鄰桌幾乎拍在一起，幾乎就等於跟別人搭檯。這時我想起了和民。和民的格局、餐單、模式都非常相似。相信他們兩家彼此就是主要競爭對手。換著是和民，他們一定懂得把餐桌分開。可是這家居然不會。只是把兩張餐桌一分，放多一套餐單，明明是那麼容易的事，他們竟也不願去做。如果我在這時，醒悟到這家店如何不配我光顧，立即轉身就走，那就不用有這麼一段貼錢買難受的遭遇了。可惜我沒有，於是就注定我要領受兩年多來最差的一趟餐飲經歷。在和民，為了讓員工不必時時為客添茶，他們每張餐桌都已設有裝滿茶的熱壺，十分方便。在這裡是沒有。本來這點影響不大，但是桌上那杯茶一喝下去，就發覺問題很大。那杯茶，雖然喝得出是茶不是水，可是卻淡到了跟水好像沒有甚麼差別。見微知著，這樣的細節也做得如此馬虎，對其他若還抱甚麼期望也真的不切實際了。不過既已入座，這時才走也未免太怪了。順道一提，同樣是黑筷子，這裡也沒有和民的精美。拿著餐單，看了好一會，拿不定主意。這時看似是女經理的人物走了過來，來意不善似的問我點了餐沒有。我覺得古怪極了，在其他店家不論我要看多久餐單，都沒有人走來催我。難道她是怕我走來白坐的？我忘記當時是怎樣反應，但最後我想反正我都想了個大概，於是對她說：「我依家直接order」。這七個音節我盡可能說得鏗鏘有聲，毫不含糊。可是在我說這句的同時，對方竟然就轉身走開，好像從未與我有過對話一樣。這樣的態度真的令我瞠目結舌。這個人是耳朵有毛病？還是溝通能力有問題？我心中有點氣，但我還不是個情緒化的人。如果是的那倒好，我立即離席抗議就不用再受到折磨，可惜我沒有。我再三要求點餐，才終於有人回應。那女店員表示收到訊息，然後安排了一個寒背的男店員來。寒背男店員貌似是有殘障，是精神上還是身體上真的說不出來。換著是在麥記，我會想這是一家會雇用殘疾人士的良心企業；但在這種食店，總覺得太過古怪。店裡的一切都真是太奇異了，奇異得讓我覺得跌入了陷阱一樣。現在才站起來逃去已經太遲了。於是我在這家以「地獄拉麵專門店」自居的餐廳點了牛肩麻辣地獄拉麵（$64）、另有千島沙律（$44）、餃子（$38）各一。等候其間，看到他們招待其他食客，當中更有衣冠楚楚之人，一律是用四分之一秒的招待手勢，如此一來更確定了原來不是個別員工或有針對性的動作。也不知是否刻意訓練出來，居然位位店員都這麼齊整。這樣的立即縮手手勢可以產生甚麼良好效果我就不知道了，我只知道這樣令我很反感。那位女經理，看到她胸前名牌，叫作Heady，名字很奇怪，也許係她是阿頭的意思吧。她對待其他食客都是那款不善的態度，幫人埋單的語氣一點也不客氣。從其表現可見，她對工作根本沒有絲毫熱情，甚至可說不滿，或許不知不覺的反映了出來。上樑不正下樑歪，其他員工的表現其實也不遑多讓。這間食店究竟出了問題，恐怕就不是一個只光顧一次的顧客能夠觀察得出來了。抬頭看看這店的裝修，只覺得觀感很差，完全沒有美感，無論是色彩還是材質，難以拼湊之處在所多有，就好像是胡亂苟且湊合而成，沒有一絲令人安然的感覺，只能說他們請的室內設計師一定水平很低，也許是認為無藝術感的港人一般都不會在意這些吧。的確，眼前許多人都似渾然不覺，只在意進食和談話。高處掛滿了很多宣傳單張，好像來到了甚麼選舉激戰的匯點一般。食客只想舒舒服服吃一餐，不是來看你自我宣傳的。選擇這家店明顯是個錯誤。五分鐘左右上了千島沙律。食材不俗，但醬汁過多，喧賓奪主。加上洋蔥不成比例的多，整盤沙律只感到滿口的千島醬和洋蔥，不感到是在吃一盤沙律。這道菜完全不合格。剛吃完沙律的一刻，就上了拉麵，timing完美，但大概只是巧合吧。這碗拉麵的湯底，一喝下去，不禁在心裡大叫一聲「好辣！」真的辣。但是除了辣之外，還有沒有其他味道呢？我喝了很多口湯，但喝到的除了辣味，就只有辣味，一點層次感也沒有。至於那麵，跟超市的麵餅水準沒有兩樣。我越吃越覺得，這種麵跟辛拉麵有甚麼分別呢。也許辛拉麵的麵還更加爽口彈牙。除了麵和湯，值得一提的材料只有生菜跟牛肉。那生菜嘛，就像是以前大學食堂隨頹飯附送的生菜一樣。還有那牛肉，韌得幾乎咬不開，吃進口更是一點味覺刺激也沒有。我在家裡吃的牛肉也比這要強多了。份量方面，就只有三四片，切得相當薄，吝嗇得很。不過也好，反正吃了跟沒吃一樣。麵吃到一半，上了餃子。這餃子該是煎的，但煎得完全不脆，沒有口感，基本水準也欠奉。記得在和民吃的餃子，雖然不算難忘，但仍是可口的。越在這店待得久，真是越後悔沒有先忍一忍去別處光顧和民。飢不擇食的後果，我現在深有體會了。中間又發生一件令人氣結的小插曲。當我的拉麵喝到只剩下湯底，有個女店員就極速要拿走，問也沒有先問過我。我還要喝喝湯底，嚐真一下除了辣味還有甚麼味，以給予一個中肯的評價，因此也只得極速反應，喝道「Ay！我重食緊架！」那女店員竟然連道歉也欠奉，放低後轉身就走。快餐店的阿嬸，也不至於無禮和欠缺修養到這種境地。我應該要覺得憤怒，可是我只知道自己如今身處在一個很不幸的處境，跟任人宰割的分別也許不大了。旁邊的小姐那邊，店員沒有為她們擺放獨立的牙簽。於是她把手跨過餐牌過來我的餐桌上拿，拿了三次。這就好像是入侵了我的空間一般，可是她卻若無其事。看來，古怪的不只是這家店，還有選擇這店的顧客。當人人都這麼古怪，我是否仍算正常真的不知道了。在過於擠迫的環境中，他們的心理某程度上遭到扭曲，大概也是正常的吧。菜吃了三道，是否算是飽都不知道，反正都沒有心情再吃了。這樣的一餐，我寧願在家泡辛拉麵來吃，還吃得比較舒服自在。走出店外，也沒有人說聲多謝慢走。門口的女店員卻反而造作的向正在入座的客人回頭大喊「いらっしゃいませ」（易啦嘥依媽蛇，意即「歡迎」），我進店時都沒有這種殊遇。是否歧視單人匹馬的顧客，就不得而知了。只知道我永永遠遠都會記住「別府」這個名字，與它的招牌至少保持三十呎的距離。…查看更多

下午茶時間食 food court 當 lunch，四處都係位。隨便點左客海南雞飯（檔名同樣叫海南雞飯）。啲雞幾滑，入得口，但唔算有咩特別，並且不見得有認真調味，顯得有些淡口，一大敗筆。有碗湯送，都飲得落，中中肯肯，唔會太好飲，味道亦單一。最可口係啲飯，真係好岩我食，粒粒煙韌，加埋個汁底，有陣淡淡香味，一流。我對米飯要求最高，即使其他只係中規中矩，米飯好食已經補返哂數。份量略嫌不足，唔夠飽肚，如果再多啲既我或者會畀佢一個笑臉。…查看更多

這間是我曾經喜歡過的餐廳，可惜近年水準嚴重下降，連我曾經至愛的焗薯也弄得一塌胡塗。理性上，明知它已無可救藥；但每逢經過，又偶然還會受到引誘。就好像，曾經愛過的人失常了，人格顛覆了；但你仍舊想去探望他，抱有一絲微渺的希望……這天一個人來到很久沒來過的沙田新城市廣場，以往每逢來到這裡用午餐都會習慣成自然的想到 Super Sandwich。如今縱使明知它已面目全非，但不知為何，就是有一股這樣奇妙的勇氣去再度看望。不敢再選焗薯了，那過往已經太令我失望。只是選了一個 C1 餐，三文魚蘑姑意粉甚麼的。就喺我買完餐搵張梳化坐低左嗰時，發生左少少插曲，只想睇食評者請 skip 左呢幾段。有個人確認左我對面既位無人之後坐低，係個女人黎。人多搭檯好閒，我完全無留意佢。但佢好奇怪，唔坐我斜對面，而偏要坐我正對面，重要成個身正面對到我正一正。彼此隔住張細圓桌只一步之距，而我既收據找贖重放左喺檯面執緊，佢卻似視若無睹。佢令我覺得我既 personal space 已被入侵，而且似乎係…出於一種目的既介乎有意同無意之間既入侵。可能我諗多左，但我確實感應到一股好唔自然既氣場，令我不但覺得有需要將個號碼座放返近自己多啲，重好自然地眼仔碌碌左望右望邊度有空位，想閃走，離開呢股怪異氣場。理性上我希望眼前呢個人係有人相陪，另一個人買緊野食，而唔係走黎唔知做乜齋坐，但又唔多似。不尋常既氣場仍無消散，喺某一刻，我只感到自己好被動地對嗰個女人既正面注目回望左一眼。我解讀唔到佢究竟想點，只知道自己眼神裡面肯定完全無「阿嬸你咪喺度齋坐啦」的指責或挑釁意味。對望後我都唔鬼理佢，挨後細用自己的平板電腦。但隨即呢個阿嬸唔知做乜突然發作，好嬲爆爆咁快速起身走人，走嗰時個袋重唔知有意定無意定妄顧性質地發左我一下。我受驚了。我甚麼都無做過呀。呢個社會，怪人真係無奇不有。劣質餐廳亦在所多有。在一間咁既劣質餐廳中，重有咁多捧場客，佢地又係咪怪人？定係佢地都係如我一般，念舊？上菜了，外貌平平的一碟意粉。麵條完全是超市貨色，一點可口也沒有。忌廉汁就如水般淡，無法感受裡面有蘑姑的存在。三文魚韌得令你全無食欲。夠了，這三樣已夠了！已不欲再細心回想這麼差的飲食體驗。亦不去評論它用紙杯裝湯的做法了。世上很多事無法解釋。一如這間食物令人食不下嚥的餐廳何以門庭若市至今。和在這間餐廳出現的齋坐怪人。起初細看收據時，就見到憑收據十四天內光顧早午晚都會有怎樣怎樣的優惠。難道這間東西就是靠這招，化腐朽為神奇？！…查看更多

一個人行到黎呢頭，見到綠揚坊呢度想食個 lunch，似乎除左麥記美心之外都無乜選擇。貪就腳，無睇 openrice 就入左黎呢間，位都唔使等。呢間野個格局配色幾得意，餐牌睇落都幾特別。尐店員（都係後生仔女）都著住件背後寫住「mesocool」既制服，好似好有 corporate culture，interesting。格局、文化、設計始終都係花巧野，食落肚東西既質素先實際。點左個 $48 的西京豚肉拉麵、豬骨湯底。上菜時發覺個碗既上面唔係平既，似乎各樣野都有花心思設計。除左筷子亦附有日式湯羮。碗麵既涵除左日式豬肉（係豬頸肉定咩我就唔知喇），重有半隻蛋、粟米、筍片、芽菜、芝麻。應該都無數漏架喇。以下逐樣品評下…基本上，尐豬肉只得個韌字，全無口感同味道可言，係全無。半隻蛋煮到半生熟狀態，形態幾少見，味道無特別。尐麵應係工廠貨，麵質粗糙，有即食麵聯想，不過都煮得柔韌適中，勉強算係爽滑。筍片係低成本貨色，淋而且咬落無汁。個湯望落似忌廉湯，飲落似即食麵味精湯。你想講根本就係味精湯？我信你。其他嗰尐唔使評啦，慳返啖氣。總評：差於學生飯堂貨色的麵食，但收五十以上（加一後）既價錢，你食唔食？…查看更多

本來係走黎荃灣廣場食和民既，但外面有成幾十人排隊。只好打開 openrice，搵到呢個次選。雖然都要排隊，但只十人以內，等三個字算係咁，是日周末無法啦。見到有人認為呢間餐廳既傢俬同氣氛唔襯。我就唔係咁睇，我可以寫包單間餐廳既佈置係有心思咁設計過既。加上裡面用沙發，外面用籐椅，造就左一種層次感；設計既野人人口味唔同，你可以唔欣賞，但至少人地有揼本去做。張沙發幾好坐，室內環境亦和諧。可惜我坐既位係最遠離窗邊，鑒賞唔到窗外環境係咪都如室內咁好。除左環境，重有野樣值得一讚，就係個餐牌既設計都別具特色，有花心思。扉頁更以餐廳名借題發揮道出對飲食的要求，當然好易引起食家共鳴啦。以下入正題講食物。凱撒沙律（跟餐）叫餐加 $28 有沙律，有三款揀，其中一款就係凱撒。口感不俗，酸味調配得當，重好過我曾多次光顧既 Super Oliver's Sandwich 既以往水準(我就覺得近來既水準下降哂嘑)。但尐麵包碎唔脆，係一大敗筆。我唔知正宗凱撒沙律點整啦，總之你畀舊淋淋地既麵包碎我就真係唔得。並且以將近三十，好多地方都可以買到碟飯既價錢，佢個沙律既份量咁吝嗇，食幾啖就無，對常人而言真係絕對唔抵。香淡咖喱忌廉汁焗田螺肉飯心血來潮想食田螺，於是試試。基本上呢個焗飯，我係食得 enjoy 既。如果呢碟飯係茶餐廳二三十蚊貨色，咁既水準係無得彈。但以佢碟飯超過六十文既價錢，我覺得要求可以高少少。而好可惜，佢未能達到我認為呢個價應該做到既水準。首先我相信叫得呢個飯既人都係想食田螺，唔通只為左要碟咖喱飯而叫呢味咩。既然如此，田螺既角色係有一定份量，應該用一種可以帶出田螺肉味既烹調方式，先算係上品。然而，呢味野名為「香淡」既咖喱忌廉汁，其實真係相當辣。我本身鍾意辣，亦食慣，再辣都唔覺一回事。但呢味野自己講明「香淡」，因此同實際比較起上黎，雖然唔算真係好辣，但聽完個「香淡」名再食，都可講係出乎意料的辣。而呢種辣，已經足以基本上蓋過哂其他食材既味道。不論碟飯有咩材料，其實你食完唔會覺得食左田螺或者其他野，你既享受係同食一碟尚好的咖喱焗飯無分別。只能結論，一係佢呢款菜色既設計就有問題，亂咁將咖喱同田螺 fuse 埋，但又眼高手低終成俗作。一係就係設計無問題，但執行嗰個唔係用原本既汁，令尐田螺味出唔到黎浪費哂。冧酒提子乾杏仁脆糖芭菲呢個甜品 $28，係三樣野中唯一我覺得完全值得既食品。入口滋味，口感一流，軟硬適中。有尐甜品食完可以令人覺得回味無窮，但呢隻雖然好，未至於咁神，食嗰時好歎，食完都好快忘記。要指出批評既係餐牌既參考圖片上有雜果但事實上無，略有誤導之嫌。（我知佢寫左「圖片只作參考」，再提下大家啫！）埋單 $127.5 唔覺肉赤，可能由於如果我食左和民，往往一人都食超過三百蚊，依家已經慳左。但客觀上，以一個純粹食家立場去睇，佢值唔值呢個價呢？大家可以判斷。當然，以荃灣區咁多人，食肆供不應求既情況，可能佢再收貴啲，匚經濟學上都不能算作不合理；但如果你唔係住嗰區，你會唔會入去食佢又係另一回事。題外話，佢地好喜歡收人餐牌。叫完碟飯就當你幫襯哂直接收去。叫完甜品後又想收去（我重要睇清楚尐名寫食評架！），被我喝停。我覺得佢先問清楚再收會有禮貌啲。綜合而言，間野環境好好，格局設計用心，座位舒適，予人休閒愜意感覺，食物質素上無太大過失，只係同因應價錢而生既期望值有點不符，其他各方面亦不過不失，其實亦可一試。如果問我將來重有無機幫襯呢間，我會覺得再幫襯我都可以接受，但試新野更加吸引。臨走時一影其門外餐牌供大家參考。…查看更多

呢間麵館以往留意過好多次，入去食就頭一次。一人點左夏味鱔糊麵。麵條相當爽，有咬口。尐鱔滑脫脫，亦好好噍。材料睇落有心思，似乎有尐筍絲之類既野配搭，整體感覺不俗。都無乜其他野要特別講，從我一個嘴刁之人搵唔到咩地方批評佢，重加上將碗麵食得咁清，就足以證明佢非一文不值。但同時亦有點可惜，搵唔到更多優點可以詳細說明。簡而言之，如果目的只係想食碗麵，呢度完全無問題。只是不能期待有好大驚喜。以後如果無心思左揀右揀其他餐館，或許會再光顧試埋其他麵，因為至少係一個 safe option。…查看更多

去新世紀食飯兼買嘢，見呢間好評比較多，嚟左呢度試，不過原來無乜料到。兩個人點左一個沙律兩個主菜：酸辣柚子沙律、海南雞、馬沙文咖喱牛腩。重有薄餅同雞香飯。上菜效率極高，一陣就即嚟，擺滿哂張檯。間嘢人流多，都幾嘈下。先講個沙律：我以為自己純粹食緊生果，無沙律感覺，啲酸辣 sauce 亦發揮唔到咩作用，都畀啲柚味蓋過哂，除左食柚之外還是食柚，一個生果盤。海南雞全無特別，完全無廚藝在其中可言。個咖喱牛腩方面，辣椒幾正宗，但薯仔好難食，食左一件就唔想食。成個餐啲牛腩最好味，口感岩岩好，咖喱又入味，唔係係人都整到。只食到半飽，牛腩食哂之後桌上已經再無其他嘢引起到我食慾。總括嚟講如果想食泰式感覺嘅話，個人除左沙律上面嘅少許酸辣 sauce 同咖喱裡面嘅辣椒之外，完全唔覺啲食物有何泰式可言。（牛腩味雖好，似港式多。）平均而言水準亦平庸。本想畀個喊面佢，念在上菜快同牛腩還好，正常返佢啦。話時話，我食完之後無幾耐即肚痾，跟住同食嘅女友第二朝又話佢肚痛加肚痾…唔知關唔關佢事。…查看更多

去深圳玩一日，女友揀左呢間食晚飯。個人唔係太經常食火鍋，所以難比較啲。感覺上啲肉食都幾好，牛肉夠新鮮，女友話啲羊肉好臊，但我其實唔知咩叫臊。啲湯底唔錯，料足有味道。加好似六蚊有得自助任飲，選擇有冬瓜蜜、麥茶、酸梅湯、五花茶等等。酸梅湯啲味好怪，又酸又甜咁用嚟配火鍋更加怪，女友飲左一啖就唔要，我唔想浪費唯有啃左佢…麥茶好特別，不過唔太好飲，最好都係冬瓜蜜，味道甜得嚟幾有層次。張檯每個位跟前都有個電磁爐，一人一鍋。不過啲爐有啲老舊（侍應本身都咁講），女友嗰個開極火都唔滾。叫個侍應嚟幫手，不過每個侍應照顧一檯人，顯得非常手忙腳亂，不斷咁東奔西跑，直到我地想叫第二檯嚟侍應過嚟搞，佢先過嚟幫手換爐。個侍應忙到一開始嘅時候唔記得畀個杯我地，我以為要自己出去攞，問開先知係個侍應畀，於是個侍應就畀人鬧。如果你想一邊食嘢一邊圍觀可憐嘅打工阿姐點手忙腳亂手足無措法，呢度實在係個好地方…重有，可能人手唔太夠，上菜極度慢…連埋單都極慢，今次唔係我埋，否則我找錢都唔要就走嚕。雖然服務差上菜慢人又迫又嘈（某啲位近喇叭音樂聲更嘈），但仍見到間嘢全場爆滿，可見啲飲食都有啲水準嘅。個人覺得最好係啲醬，我深深感受到火鍋嘅靈魂唔係湯、唔係肉，而係醬。放醬嘅碟可以放兩份，如果更多就更好，畢竟不同食物用不同醬料先顯得更鮮味。我最欣賞嘅係菌王醬，辣辣地得嚟好帶出到啲菌嘅美味，配肉食一流。…查看更多

一年一度書展，夜晚為左食完可以再入返去繼續，就揀左呢度。叫左一個意大利 pasta，一個日式便當，二人 share 食，之後再食左個甜品自助餐。分別飲凍檸同日本茶。個 pasta 味道可以，蕃茄同芝士味配塔得 ok。日式便當稍嫌普通，尤其是有樣只係雞蛋壽司。啲紅薑幾鮮甜醒胃下。日本茶係成壺畀你，不過都只係落茶包，如果係落茶葉嘅話就地道好多。甜品方面都係一般。各方面不過一失，無特別深刻印象。又唔會話差到唔配擺喺會展之類，不過的確係幾普通。另外如果書展期去嘅話，要預左外面啲人流不斷咁行。服務態度麻麻，呢度啲人會未食哂就收你啲碟，事實上我只不過係放低雙筷品下茗，好明顯啲侍應所受嘅訓練唔足夠。啲音樂好 rock，重要來來去去同一首，同間餐廳嘅格調本身好唔夾。難怪除左我地之外都好似無情侶檔。重有一點同飲食無關但令我印象深刻嘅，係隔離檯有人不停咁大聲講嘢，影響我食嘢嘅雅興。可惜呢度嘅職員，並無理會呢啲破壞間哂間餐廳格調嘅不文明行為。書展期內，我地見證住外面啲人流由六點到十點都川流不息，但點解呢間嘢喺晚餐時間都係只得嗰三四檯客架呢？我真係諗唔明。等我重驚啲書展人夜晚會迫滿呢度，一早 book 定位添。…查看更多

同屋企人去 megabox 食野，個個都無乜特別主意去邊。於是我好自然就用手機上 openrice 睇下邊度最多好評，嚟左呢間。各位食評家果然無介紹錯。三人食，叫左一個 Moroccan Chicken Salad，一個蒜香忌廉汁闊麵配雞肉，一個煎三文魚意粉配四季甜豆，一個芝士漢堡薄餅。同埋啤酒。個沙律啲料夠哂多，啲味撞起上嚟好得意，配塔得好好。因為有油醋同紅梅乾嘅成份，食起嚟酸酸地，係一種令人越食越開胃嘅酸。我諗平時嫌沙律好單調，唔鍾意嘅人，食左呢味之後實會對沙律改觀。個蒜香忌廉汁闊麵裡面嘅忌廉汁非常明顯地落左好多芝士，無論口感定味覺，都畀陣濃郁而自然嘅芝士味徹底征服。跟住嗰味配左四季甜豆嘅意粉，雖然都有芝士味，恰恰又同前一道成對比。啲四季甜豆甜得嚟都有一種酸味，同啲汁撞埋一齊嘅效果係令個味道好多層次，講唔出咁好食。可以話兩道菜各有千秋，如果真係要揀，多層次嘅味道應該比單純濃郁香醇嘅芝士味更加誘人。至於件屬於中品嘅煎三文魚，由於無啲意粉咁吸引，我寧願唔要舊魚畀多啲粉我。最尾嘅薄餅，有蕃茄同生菜等等嘅配菜，芝士同漢堡嘅份量亦適中，基本上都無得彈，不過因為之前食嘅意粉汁好濃味，經受完強烈味覺刺激之後再試比較上淡嘅薄餅，就唔會覺得太特別，所以未能深入評價佢嘅味道。下次應該先食薄餅再食啲濃汁嘅粉，如果唔驚食左薄餅先會太易飽的話。講下其他方面。環境唔使我講，呢度相都有。服務態度方面可謂一流，侍應接受過相當嘅訓練，見微知著，佢地拎走啲空碟都會講唔好意思知會，唔會似第度，個碟未空就似趕收工般幫你拎走，其實可能你都未食完。上菜速度相當快，真係會令人叫聲「咁快嘅」。即使晚餐時間亦非常少人，唔使同人迫。我係一個唔易滿足而且嘴好刁嘅人，自幼就畀家人不俗嘅廚藝縱到好[忄奄]憸 (「淹尖」正寫)，飯菜稍不如意就無胃口，不過食完呢餐之後，諗返起嗰種好味法，我竟然會好似一個攞到糖食嘅孩童般好天真咁笑出嚟，真係夠哂威力。可能我本身對芝士情有獨鍾啩，但點都好，唔同佢寫返篇食評都對唔住自己。…查看更多

就腳先入去，本來都不抱期望，不過食落真係覺得好唔掂，點可以難食到咁，真係難食到寧願肚餓啲都唔想食落去。兩個人食，點左個海鮮意粉，以及玉子豬扒鍋。啲海鮮意粉好唔正常，唔知佢用咩醬，但根本係連就咁求其點啲好食少少嘅茄汁都已經好食過佢，簡直過份。至於個玉子豬扒鍋，啲豬扒算係全個餐裡面最好食嘅一樣，但都好普通，叫做食得入口咁，但已經唔會特別想食落去。所謂嘅玉子鍋睇落似啲唔知咩水咁，更令人無咩食慾。綜合嚟講，真係低水平到爆炸，結果真係吃不下去，其實未完全飽，不過畀佢啲嘢搞到無食慾。事後係咁同女友討論點解一間咁咋嘅食店可以生存到。結論係嗰度係住宅區，好多無 taste 嘅街坊幫襯，啲街坊唔分好唔好食，求求其其就一餐，佢地又有錢可以出街食（相信多數係啲子女經已出身嘅長者）。真係去錯地方。…查看更多

服務態度好好，門面靚，有氣氛，好有食韓國嘅嘅感覺。可惜食物質素非常唔掂。兩個人點咗一個海鮮砂鍋飯，另外一個唔係好記得，應該係白飯配咩肉。但啲肉味道口感都非常普通，至於個砂鍋飯真係連美心嘅都不如，完全無味，根本唔想食。後來嗌左個豆瓣醬用嚟送飯，先叫做食得入口。飲品應該係叫左個薑茶，都 OK 啦。…查看更多