troubleki's Profile

同媽咪早餐食到好飽, 午餐買個撈撈冷麵, 加幾件壽司就夠哂!呢間壽司仔係外賣店, 但店內都有張高枱比你响度食, 估唔到幾蚊件壽司都會有意外驚喜! 同市面上一般嘅機製壽司完全唔同, 呢個嘅壽司飯係手握嘅, 口感完全唔同, 價錢亦相當便宜, 好多款都係$3-$4一件, 帶子、劍魚腩或火炙系列都係$6一件, 連有三片三文魚嘅花之戀都只係$8, 就算每款都只係買一件都得, 真係好抵食!中華沙律($3) - 正常味道芥辣八爪魚($3) - 好鍾意個陣芥辣味, 剛好!螺肉($3) - 切得好碎, 無乜咬口三文魚($3) - 唔算`厚, 但都幾肥美鰻魚($3) - 慣咗成條鰻魚咁食, 咁樣切... 好似好薄劍魚腩($6) - 再肥美D會更好帶子($6) - 幾鮮甜喎~海膽($9) - 比想像中新鮮, 雖然海膽唔多, 但味道都唔錯!花之戀($8) - 有三片三文魚包住舊飯, 抵! 三文魚都幾新鮮, 但略嫌太多沙律醬, 多番D蟹籽會更好!!總括嚟講, 抵食得嚟, 真係有驚喜! …Read More

同老公兩個人晚飯, 叫咗三個餸香檳汁焗龍蝦($28) - 龍蝦爽口, 應該係先走油後入焗爐, 個香檳汁好好味, 連個殼都想食埋!豉油雞半隻($38) - 另一特價菜式, 有雞味, 亦夠滑, 豉油汁亦好香, 好入味菠蘿咕嚕肉($68) - 脆漿較厚, 但上芡汁後仍脆身, 芡汁份量剛好, 只係均勻包住咕嚕肉同D配菜, 加上咕嚕肉大大件, 正!!埋單計埋茶介加一都要差唔多一百八十, 不過酒樓晚飯算差唔多喇!…Read More

呢間運星點心小廚外表一D都唔起眼, 位置亦唔旺, 所以就算住大埔都好少人知道佢存在! 雖然無一般酒樓坐得咁舒服, 亦無任何裝修可言, 但係出奇地「便宜」+「好食」!下午茶係1點半入座起計, 只係星期一至六有下午茶, 茶錢只係$1/位, 點心大部份都係$7/籠, 湯粉麵, 盅頭飯都係$9/碗, 但今次無食, 主攻點心, 兩個人叫咗5個點心:蝦餃($10) - 唔太大粒, 中size, 皮薄唔黏筷子, 一啖一粒, 蝦爽+少少肥油, 好香口燒賣($7) - 冬菇味+豬肉味+少少肥豬肉香, 正流沙蔴蓉飽($7) - 而家好少地方有得食, 久違咗嘅味道, 雖然唔係流沙, 但都好正!雞扎($8) - 滑雞+魚肚+火腿+粟米, 用腐皮包住, $4一札, 大大札南瓜蒸排骨($7) - 蒜蓉味唔夠香, 純蒸排骨, 下次會試其他野!食到飽飽都只係$40, 真係未試過飲茶埋單咁平!!…Read More

同老公兩個食個午餐, 一人叫一個碟頭飯, 鹽焗雞飯($30) - 好正, 個雞汁都可以撈碗飯! 超多雞, 見住佢用一碟例牌雞分三碟飯, 絶對唔係得幾件仔, 我仲好好彩, 有雞脾位! D雞雞味重, 咸味剛剛好, 送飯一流! 一食就知係用新鮮雞整嘅, 絕非超市雪藏貨可比!!咕嚕肉飯($32) - 晚飯時段個菠蘿咕嚕肉(原個菠蘿上)正D, 午市個咕嚕肉都好, 肉多脆漿薄, 無骨淨肉, 啱我老公呢D懶人, 但係唔知係唔係失咗手, 個酸甜汁個味有少少怪, 酸得有點刺鼻, 撈飯都係雞汁好D!!! 加兩蚊有飲品, 但只有凍咖啡奶茶, 無熱飲, 唔駛加錢有豆漿, 叫咗兩杯, 但豆漿無味嘅... 總括黎講, 兩個都係好好味嘅碟頭飯! 水吧就差少少....…Read More

除夕夜唔想同人迫, 叫咗外賣番屋企食, 呢間Pizza Hut只做外賣, 打電話或網上落訂單都得, 原來上網落單滿$180會送多一個薯蓉+一個飲品/湯, 如果打電話落單就只會送一個飲品/湯, 咁梗係試下網上落單啦! 點知原來除夕夜無呢個優惠... 唔緊要, 來日方長, 下次實要試一試個免費薯蓉! 兩口子叫咗一個二人套餐, 有最新嗰個帆立貝星芝批, 海鮮寬條麵, 金粟芝士釀雞翼拼秘製雞搥, 一個蘑菇忌廉湯+一罐百事, 都係$219 !可惜今日無飲品同薯容送, 如果唔係仲抵!!帆立貝星芝批 - 批中間好大陣帆立貝味, 可能會有人話腥, 但我覺得幾鮮! 比起其他Pizza, 呢個特別多芝士, 批中間有大量芝士, 愛芝士者必食! 批邊有一舊舊麵飽, 內有腸仔, 腸仔面有芝士同蜜桃汁, 個批邊少食就多滋味, 兩個人食呢個批... 就好似食咗好多好多個腸仔飽!! 海鮮寬條麵 - 呢次夠熱! 天氣咁凍都夠熱, 抵讚!!! (試過唔夠熱個汁結哂好難食), 好香奶油味, D海鮮都焗得好香口! 果然係最愛! 金粟芝士釀雞翼拼秘製雞搥 - 個芝士釀雞翼唔係好好味, 可能已經食咗太多芝士... 食落口個感覺好漏, 雞搥個香草醃料味幾好味!蘑菇忌廉湯 - 已經飽哂, 留番第日煮西蘭花做個汁, 一流!…Read More

由細食到大, 細個都唔知佢叫成仔記, 淨係叫佢做大大粒雲吞, 見住佢由細細間舖頭仔, 開到越黎越大間, 真犀利!雲吞依舊保持水準, 大大粒, 超多蝦, 都只係$16蚊/ 6粒! 湯底好有特色, 應該仲係用傳統方法, 用蝦殼拗湯, 所以同雲吞好襯!熟客仔都知唔好飲豆漿, 因為成日都會有陣燶味. …Read More

好開心, 好鍾意食雲南桂林米線, 估唔到大埔都會開分店!!第一日開張已經急不及待要黎試一試, 呢間分店都唔錯, 保持一貫水準!本來想安在家中叫外賣, 打電話落去, 點知接線生話:「唔好意思呀, 小姐, 麻煩你可唔可以落黎買呀? 」我心想, 可能第一日開張, 未請到人送外賣, 又或者新開張太忙, 好, 就親自落黎買個外賣!企咗响櫃面想叫外賣, 但櫃面姐姐掛住幫個伙記落單(員工晚餐), 唔理我... 叫咗一碗豬潤鳯爪筋小鍋米線, 中辣, 走芫茜,豬潤 --> 切得薄, 剛熟, 唔錯唔錯!鳯爪筋 --> 好多, 以為得一兩粒, 點知食極都仲有, 好爽脆, 好味, 中辣小鍋米線 --> 比起其他分店, 呢間分店中辣唔算好辣, 我下次可以食中大辣!我明明叫咗走芫茜, 同番櫃面姐姐講, 但佢繼續同伙記弟弟打牙較, 唔理我...食物唔錯, 但服務要改進呢!!…Read More

我住大埔, 細細個就會去大尾篤燒野食, 大個咗嫌麻煩, 所以燒野食一定黎燒烤王!!以前唔駛收開爐費, 好鍾意兩個人拍拖拖黎燒野食, 兩個人任食都係$116, 超抵!!而家兩個人要都要收$135, 再加$30開爐費, 計落貴咗好多, 就少咗兩個人閒日去食, 但仍然係大伙兒聚會嘅首選!!我覺得任食最抵食, (但任食只有星期一至五供應)任食食物有: 咖喱魷魚翼, 黑椒牛仔扒, 蒜茸雞中翼, 洋蔥豬扒, 黑椒雞全翼, 山渣肉排, 多春魚,廚師腸仔, 脆皮芝士腸, 玫瑰紅腸, 爽口魚蛋, 墨魚丸, 彈牙牛丸, 黑椒牛丸, 貢丸,麵包, 再加每人一樣飲品, 佢會比張飲品券你自己揀, 加錢要啤酒汽水都得。 肉類全部都整得好好味, 好入味, 最愛魷魚翼, 我一個人起碼食4塊!!…Read More

夜晚偷懶唔煮飯, 買外賣番屋企同老公一齊食, 同一般食肆一樣, 外賣要加一蚊。叫咗兩碗牛肉麻辣米線, 老公要小麻辣, 我要中麻辣。牛肉係雪咗好耐嘅雪藏貨, 無牛味, 亦煮得過熟, 但每碗都有好多牛肉!中麻辣同小麻辣一樣, 都係「唔麻」「唔辣」!!廿幾蚊有咁多牛肉同米線都算抵嘅, 好又一餐, 唔好又一餐!…Read More