everybodyshares's Profile

放工行開觀塘買羽毛球鞋袋, 買完都7點, 已經好飢餓. 要搵間店醫醫肚!一入店門就覺得店面風格好簡約舒服乾淨, 餐單也沒有太多選擇, 我就係鍾意咁簡潔.店舖牆壁安置黑板, 寫上自家招牌菜, 仲有小插畫. 好獨特, 唔似連鎖店咁裝潢一模一樣.我選擇南蠻炸雞+¬醬油蛋飯+配山葵八爪魚粒. 炸雞外形有啲似巨大化嘅美式快餐店”名物”, 食落味道竟然都相似. 個炸皮好薄好脆, 肉質滑腍無雪藏味, 唔會好實同難咬, 就算凍咗都又香又脆, 係好食版嘅”名物”. 醬油蛋撈飯就一定係好食, 毫無懸念食哂成碗飯.男朋友揀慢煮安格斯封門柳+¬醬油蛋飯+配中華海草沙律, 慢煮安格斯唔洗講都知唔會失望，雖然接近全熟但肉質非常軟熟，醬油蛋飯似足高級日本味道一粒都冇食淨。玉子燒配菜唔算出色有d乾，可能一早整好，但味道整體來講都好滿意～明明有位, 但店員安排入座都係隔住坐, 唔會太擁擠, 膊頭撞膊頭. 套餐份量剛好, 食得好滿足. 神奇嘅係, 有一刻, 以為自己去咗日本. 用一餐飯時間幻想吓, 都唔奢侈吖.…Read More

難得疫情稍緩, 3月頭終於得知露台餐廳開返晚市嘅自助餐, 即刻打電話去留枱, 等3月尾完咗midterm test可以去享受一餐.因為疫情同衛生為由, 無特登行近公共空間的食物影相, 將心比心大家都想食物曝露空氣嘅時間縮短, 所以夾咗返埋位先慢慢影啦📸✨熱食選擇有限, 基本嘅中式蒸魚蒸雞、咖哩、西冷扒都有嘅, 只係我興趣不大😛第一輪就集中食海鮮啦! 龍蝦扇貝蝦球其實都一般, 同埋唔夠熱. 刺身好新鮮, 廚房頻頻捧出新鮮嘅剌身, 食得好放心. 磯燒鮑魚一流, 好腍好入味! 應該係當晚我的最愛, 我添食咗2次! 超級推介! 咖哩, 原來都好辣吓, 要狂飲水😛雞肉忌廉湯無雞肉, 羊酪芝士批好羶橄欖銀目魚薯仔杯有驚喜, 西班牙奄列淡而無味重頭戲甜品環節, 無得彈啦, 件件質素都平均, 要數賣飛佛就一定係好hit嘅巴斯克芝士蛋糕! 雖然食物質素一般, 但環境舒適, 食客之間保持足夠距離; 侍應服務禮貌好好, 拎完食物返位, 舊碟收咗, 食具被放好, refill好水, 又主動問你要唔要幫手影相; 運送食物嘅手推車仔個轆無聲. 因為種種細心所以服務質素高, "半島酒店"呢個名對我仍然好有吸引力.…Read More

之前食過新蒲崗友利坊嘅叉燒, 實在太好味, 我直情覺得係香港最好食叉燒. 今日年初三暨情人節, 不如去"食過翻尋味" !3點開始排隊, 等半小時就入得, 初三都開工為香港人服務, 抵幫襯呀❤️叫咗一個叉燒炒🇺🇸蛋飯, 冚家雞餐+椒鹽燒賣, 同男朋友share食. 叉燒切得好薄, 但份量一啲都唔少, 而且質感同友利坊一樣, 絕對係香港數一數二好食. 炒蛋唔會太老或者太生, 好嫩滑. 飯汁同叉燒蜜汁一齊, 如果平時食得比較清淡可能會覺得有啲重口味, 對大部份人應該都係啱啱好!椒鹽燒賣唔夠熱, 不過上面灑滿味粉, 我估係七味粉加燒烤味粉, 好惹味! Nuggets炸得好脆又夠熱, 裡面好滑竟然仲有汁. 最驚喜係個甜酸醬汁, 除咗重mustard味, 仲有啲花生醬味, 成個感覺好似烘烤過咁, 好得意好特別!成間舖都畫有滿有共鳴嘅壁畫, 色彩斑斕, 置身當中感覺熱鬧有生氣. 希望, 未來的香港也同樣充滿光芒, 大放異彩.…Read More

最近有涼意, 想食碗熱騰騰嘅湯麵! 呢日去三星台菜食堂試試麵食啦. 唔洗一百蚊有個麵餐, 有涼菜有配菜有飲品一杯, 一定夠飽! 我點咗台式炸雞扒牛肉湯麵配桂花烏龍茶. 雞扒皮唔脆, 但夠鹽酥味, 雞扒肉質嫩滑. 牛肉湯有點太咸, 都夠香夠惹味. 麵條粗身, 質感煙韌實在, 我幾鍾意呢種口感. 配菜滷豆干咸咸香香, 有少量蒜味, 好食. 最後三催四請先奉上嘅涼伴四季豆, 蒜味太重, 而且有好辣嘅後勁.整體而言麵餐性價比高, 唯一係涼菜太濃味了, 個餐有杯桂花烏龍茶清一清口腔都搞唔掂. 就算飯後𡁻香口膠, 整個下午都喺口罩自作自受返🤕…Read More

店舖外驟眼一看, 裝潢簡約舒適, 一直都好想試吓呢間餐廳. 無book位之下去食午餐, 都有位可以直入. 我哋3人坐得比較入, 無咩人來人往, 相對舒適, 燈光柔和, 不過冷氣真係好凍. 今餐想食泰式海南雞飯, 配熱泰式咖啡, 而2位同行友人揀咗牛肉船麵. 落單不出5分鐘, 海南雞飯就送到. 海南雞全是雞胸肉, 放入口凍冰冰的, 不過至少都算滑. 但個黃薑飯都係凍嘅, 少少微溫也沒有, 咬落飯粒中心都係硬嘅...是不是隔咗一夜忘記翻熱了?! 食多兩啖試吓杯咖啡, 味道唔錯, 但唔知係咪被冷氣風吹多兩吹竟然成杯都凍咗...可能其他餐會好少少, 不過餐單只有一頁的選擇實在太少, 雖然朋友話個牛肉船麵味道唔錯, 但我都係等個心理陰影面積細返少少先會再去試喇. 最後埋單個個凍到磨拳擦掌, 冷氣真係太凍喇! …Read More

今日去試試位於沙田, 古色古香, 充滿七, 八十年代色彩嘅榮樂茶餐廳. 老友嚟搵我食晏, 又唔想食常餐咁平凡, 一於唔怕肥膩叫個葱油雞扒飯食(不過叫咗半飯)!   葱好翠綠, 脆卜卜, 我超級鍾意! 一啖油葱一啖飯已經好香好夠滿足. 炸雞扒肉質滑溜, 值得再食! 老友點嘅葱油豬扒就比較多肥, 佢都覺得雞扒正啲, 鍾意肥豬肉嘅朋友可以試吓個葱油豬扒.最後嘆埋杯港式茶記咖啡, 一邊同老友傾吓近況, 舒服自在, 正. …Read More

過江龍餐廳通常都好受歡迎, 呢間嚟自韓國嘅馬場洞都不出所料, 好多人lunch嚟朝聖!雖然用app預先拎位, 去到都要等20分鐘先入座, 照舊有侍應即時送上前菜.我今餐揀咗牛肉牛骨濃湯配飯, 個湯一嚟到仍然係沸騰狀態, 好想試一啖! 湯裡面仲有一束麵, 不過感覺多餘. 個湯飲落無乜牛味, 束麵亦都唔配襯湯底. 但牛肉份量都算多, 有大概10-11塊, 肉質偏瘦, 健康之選.兩位同蓆嘅朋友點咗風味牛排骨肉湯配飯, 賣相吸引, 佢哋都異口同聲話好好味, 有成七大舊排骨, 食唔哂. 其實之前都嚟呢間店食過兩次韓式牛肉嘅午餐, 覺得足料牛嫩抵食! 但今次試新嘢試咗食牛骨濃湯呢個餐, 喺過江龍店嚟講, 略為令人失望喔. 咁當然梗係食韓燒烤肉先係最遠近馳名啦…Read More

今日放工咁早, 一於去灣仔接男朋友放工, 順便食蝦麵店! 上年2019年11月食過1次, 呢次好想回顧吓個味道.6點半到埗, 店面改變不大, 但可能安裝有防疫隔板, 場面難免變得冷清.餐單也沒有大改變, 同樣係嗰4款招牌湯底.我照舊選擇蝦湯底配海鮮搭河粉底, 魷魚翼軟熟易咬, 其他都一般, 可取係濃郁蝦湯入味搭救, 食得出有蝦殼碎. 男朋友揀咖哩喇沙湯配雞絲雞蛋搭米粉底, 餤菜簡單, 但一樣都係湯底carry哂整碗粉. 著白色裇衫嘅佢食咖哩喇沙湯, 後果估都估到.食物價錢喺灣仔來講算平. 唯一無咁好既係店內坐位都幾迫, 不過疫情關係食客相距要有1.5米, 而家迫呢個問題唔大. 如果想食lunch唔建議week day去，因為多數都滿座要等位.…Read More

吃不到原本想試的餐廳, 誤打誤撞嚟到kitchen 429食個late lunch.門面雖然不吸引人眼球, 但係食物同服務質素有驚喜!我哋點咗兩個餐, 分別係香辣烤春雞配燒烤汁同香煎安格斯牛仔骨配黑椒汁, 當天每一個set lunch都有跟蘑菇湯, 沙律同飲品(洛神花茶). 牛仔骨不過不失, 醬料似乎太多, 肉質勝在唔韌. 而另外烤春雞係必試! 肉質非常腍滑, 好味到要同廚師講聲烤春雞真係整得好好食呀! 仲有, 啲薯條係蕃薯條嚟, 甜甜脆脆好特別, 一條接一條食食吓就清哂性價比好高, 環境舒適, encore-able!…Read More

疫情由2020年頭開始肆虐, 返工一直都乖乖帶飯. 最近疫情稍稍放緩, 今日不如同同事出去食! 報復式食好啲! 報復式食豐富啲! 由office出發行20分鐘去德美壽司啦!我點咗德美刺身壽司便當, 最先上嘅係miso soup同沙律菜, 平平無奇. 再來茶碗蒸, 白果香味重, 蛋質滑溜入口即溶.重點來了, 琳瑯滿目嘅擺盤好亮眼! 先食壽司, 特別一提鯛魚壽司, 魚味好甜好新鮮. 再食三文魚, 刺身厚切, 師傅一啲都唔輕手! 三文魚魚子魚蓉卷物不過不失, 驚喜欠奉. 而今次MVP一定係醃漬魚乾合桃, 如果有一碗白飯我一定光速送飯清哂! 再來海鮮雜菜天婦羅, 唔知海鮮在哪裡, 但天婦羅外形完整, 味道惹味, 幾好食!而同事嗰個係壽司定食配牛肉細烏冬, 個招牌德美玉子燒好搶眼呀! 望落啲牛肉片肥同肉平均, 應該幾正. 呢個set有壽司又有暖暖嘅烏冬熱食, 下次試呢個.食到飽飽好滿足, 最後仲送上香芋味雪糕糯米糍, 感覺圓滿了🤗 (要返去開工了😫)…Read More

星期日嘅觀塘工廠區, 很多餐廳都唔開門營業. 大街行入兩條巷, 就有一間別緻嘅café. 全店滿座, 看來十分受歡迎. 等到有位, 因為唔係太餓, 我哋點咗安格斯牛肉芝士漢堡配沙律同吞拿魚忌廉芝士貝果試試. 漢堡麵包皮脆口, 味道唔重; 牛肉漢堡肉質鬆軟, 伴菜只有沙律菜有啲單調, 大食嘅朋友可能唔夠飽, 整體價格較高.貝果質感實在, 好有嚼勁, cream cheese薄薄一層啱啱夠味, 吞拿魚餡份量略為少.特別喜歡cafe內部嘅裝潢, 天花用幼鋼線高低不一地垂吊十數本翻開刊物; 牆紙都是書籍漫畫內頁, 餐桌上印上香港近來運動的照片… 靜靜進餐, 感受種種悲喜雜陳.…Read More