lorraineyk's Profile

依加坊間甜品款式愈黎愈多，愈黎愈有特色～有時飯後都有啲口痕想食下甜嘅嘢，如果附近有間創意甜品舖就最好～前幾日就喺呢間位於旺區銅鑼灣新開嘅甜品店食咗幾款特色甜品，味道相當唔錯，有機會會再去過！桂花桃膠雪燕燉梨 呢款甜品材料有桂花、桃膠、雪燕、蓮子、紅棗同埋枸杞，整體食材呈現健康養生嘅理念～味道方面飲落偏淡香鮮甜，唔錯，感覺好有滋補效果！芋圓芒果仙草奶凍滑嫩嘅仙草涼粉，大粒新鮮嘅芒果粒，煙韌嘅芋圓，淡淡嘅奶香，冰涼嘅口感，呢道甜品好適合炎炎夏日去食～榴蓮腸粉 呢碟腸粉皮薄餡多～一口咬落去滑溜得嚟，榴蓮味非常新鮮濃郁，味道係口入面迴盪，良久不散。對於榴蓮迷嚟講，呢款甜品絕對係不可錯過！…Read More

之前嚟過呢間餐廳食佢哋嘅雞翼放題，印象中幾好食，口味又多。前排口痕想食，於是前幾日再revisit，睇下佢哋嘅水準保唔保持到～當晚去到叫咗個「雞 全部都係雞」嘅拼盤，包24隻雞翼（4款口味）同埋2款配菜($398)。成餐食到我舐舐脷，下次再encore！加勒比海香辣雞這道雞翼配以菠蘿粒，醬汁濃厚鹹辣之餘還帶有菠蘿的酸甜，口感層次相當豐富。加洲風情雞翼表皮覆蓋住厚厚嘅芝士絲，濃郁嘅芝士味與大蒜味相互融合，形成一種獨特嘅香味，食落又幾夾幾可口。水牛城醬呢碟雞翼展現經典美式風味，雞翼肉質滑溜，淋上充足嘅醬汁，其酸鹹又微辣嘅味道相當突出，適合鍾意口感豐富又濃味嘅朋友。蒙古燒烤 這道乾身雞翼表皮撒上豐富嘅孜然粉、四川花椒和芝麻粒，風味十足。每一口都釋放出香料嘅層次感，雞翼不單至味道好惹味，口感仲好酥脆，推薦呢款～黑松露芝士忌廉汁通粉通粉嘅Q彈口感令人滿意，而黑松露、芝士和忌廉的濃郁味道更讓這道菜變得無比奢華。每一口都充滿了creamy嘅幸福感，表面亦撒上適量嘅麵包糠，為菜餚增添了變化，好食！火炙牛油果 這道菜搭配豉油汁同埋青檸，不過個人鍾意淨食牛油果，唔加任何調味去品嘗牛油果原味。而呢碟牛油果新鮮美味，燒味並唔太重，灑係果嘅表皮嘅黑椒為整體味道增添咗一絲趣味同變化，整體口感相當清新！百香果檸檬梳打 清新可口，檸檬的酸味十足，並且冰涼舒爽，搭配濃厚嘅熱情果味，令人感受到夏日的活力～蔓越莓青檸梳打 蔓越莓嘅果香濃郁，青檸的酸味同樣突出！…Read More

之前行Airside 商場，已經好想試下呢間餐廳。因為成日都見到好多人排隊點餐，而且有啲啲出嚟嗰陣手都拎住雞蛋仔，搞到我都好想試下～近排終於去咗～點咗佢哋嘅西式item同雞蛋仔。雞蛋仔嘅味道原來係雙皮奶，都幾好味幾特別。成餐味道都唔錯～雙皮奶雞蛋仔外皮質感相對柔軟，雙皮奶香氣馥郁，甜度亦恰好，幾好味，令人想一口接一口。英倫炸魚(4OZ)配薯條 炸魚外脆內嫩，香氣撲鼻，搭配濃郁的蕃茄汁與自家製嘅他他醬，口感豐富，而份量十足，好夠食！招牌單骨雞翼配香草番茄意粉 6隻蒜香風沙雞翼炸至金黃酥脆，肉質鮮嫩，肉味香醇而蒜香誘人；而意粉彈牙，蕃茄味道相對柔和，唔會太濃郁同酸，恰到好處。奇異果原個檸檬果汁清新，味道酸酸甜甜，奇異果同檸檬味嘅互補，飲完好神清氣爽哈～玫瑰西柚原個檸檬果汁西柚香氣濃郁，伴隨檸檬的清爽。呢杯野尤其口感冰涼！…Read More

平日好少去食車仔麵，因為香港冇幾間車仔麵係整得好食。本來去呢間車仔麵食都係因為佢嘅裝修風格幾有以前舊式香港嘅味道，嘢食麻麻嘅話都可以影幾張靚相開心下。點知味道都唔錯，驚喜咗๑˃́ꇴ˂̀๑以後想食車仔麵嘅時候終於有選擇啦！清湯米粉 ($36)湯底微微清甜，入口清新可口，米粉($12)嘅彈性唔錯。搭配嘅食材中，汕尾馬鮫豬肉丸($12)同魷魚丸($12)各有特色：魷魚丸入面亦加入咗魷魚粒，整體口感柔軟又彈牙，而豬肉丸則散發住濃郁嘅豬肉香，味道微鹹，同清湯粉麵搭配得宜，幾好食。清湯公仔麵 ($69)公仔麵($12)煮得非常爽身，口感滑順。材料選擇方面，揀咗豬皮($12)、特級瀨尿牛筋丸($12)、豬大腸($15)同埋豬腩肉($15)。豬皮滑溜Q彈；豬腩肉肥瘦適中，口感柔軟又煙韌。特別值得一提嘅係豬大腸，通常出面餐廳嘅豬大腸會有腥味，但呢度嘅卻毫無異味，滑嫩彈性十足，令人驚喜。而瀨尿牛筋丸嘅質素都好好，咬落去第一下就爆汁，牛肉味鮮香又油潤，肉質細嫩，口感極佳。另外佢哋自製嘅麻辣汁($3)辣味十足，食一啖已經辣到我嗶眼水，撈埋粉麵一齊食，更惹味！瑞士汁雞中翼 ($28)有四隻雞中翼。淋上豐富嘅瑞士汁，好入味，肉質算係嫩滑。咖喱三寶 ($45)三寶包括魚蛋、魷魚同牛柏葉。魷魚同牛柏葉口感都相當爽身。咖喱魚蛋更加Q彈。成碟咖喱汁好香濃，每一口都都非常滿足。滷水蛋 ($12)滷水蛋配上蔥油汁，呢個搭配幾有創意。既有滷味嘅香氣，又有蔥油嘅清新，味道相當惹味。低糖有機豆漿 ($18)豆味清香，係我未飲過嘅。微甜嘅口感，飲耐咗唔會太膩，十分好飲。凍奶茶 ($8)奶茶滑順，茶味濃郁。凍檸水 ($8)清涼而酸酸甜甜嘅口感。…Read More

依加啲麵包款式愈黎愈多變～但我仲係停留喺十幾年前嘅記憶！前排嚟咗呢間主打日式手工麵包嘅舖頭，令我大開眼界，依加啲麵包可以有咁多款咁多味。而超鍾意食包嘅男朋友食完都表示幾滿意，日式手工嘅麵包食落特別新鮮柔軟！鍾意食包嘅你唔好錯過啦～·焦糖可可布丁包 燉蛋滑嫩微甜，蛋香濃郁。包嘅表皮口感扎實，增添咗整體嘅咀嚼感。·迪拜朱古力千層撻 撻皮酥脆，內餡滑口，濃郁嘅朱古力味令人陶醉，呢款都幾好食！·吉士爆漿三角菠蘿包 外皮同內餡都同樣帶有淡淡嘅抹茶味，內餡非常creamy，口感豐富，好味～· ‘’淡雪”草莓乳酪軟包 外觀整到好似士多啤梨咁，都幾可愛 ♡ 入面嘅餡係cream cheese同士多啤梨果醬，士多啤梨味尤其濃厚～·火腿太陽蛋包 呢款麵包嘅外皮略硬，但內部卻鬆軟可口，同樣略增層次感。微鹹嘅火腿加上灑咗胡椒嘅煎蛋完美結合，搭配得宜，蛋香四溢。·宇冶抹茶冬甩 冬甩鬆軟可口，外層裹住一層砂糖，增添咗層次感。入面嘅抹茶味cream淡淡地散發住清香，口感滑順，整體味道唔錯～…Read More

本來以為呢間只係普普通通嘅西餐廳，點知食物質素出奇地好，食到我津津有味～唔怪得之平日都咁多人幫襯～大家有機會嘅話絕對要去試下！近排荃灣同旺角店都有早鳥優惠，平日7pm前離座嘅話有八折優惠，認真幾抵食( ˶ˊᵕˋ)੭♡ ✎ 法式龍蝦海鮮濃湯 濃郁龍蝦味，非常鮮美可口。入面材料有多種海鮮：爽身魷魚、大細蝦、蜆同青口，海味十足。濃湯配上炸脆且牛油勁香嘅酸種麵包，勁好食！✎ 蘭王蛋卡邦尼意粉 滿佈芝士條，香濃芝士味。意粉彈牙兼好creamy，煙肉香嫩。之後將流心蛋篤穿撈意粉食，成碗就充滿蛋香芝士香ꈍᴗꈍ✎ 秘製北京烤鴨薄餅清新嘅絲狀青瓜同蒜喺Pizza表面，入面就有味道較重嘅烤鴨同芝士，兩者加埋一齊食味道相對較平衡，唔會過鹹，口感更佳！而Pizza表皮脆口，烤鴨嫩滑，食落令人驚艷～✎ 滋味小食拼盤 配有鹹香蛋黃醬同埋酸到好開胃嘅蕃茄醬。拼盤有炸雞塊，吉列腐島蠔，芝士醬薯條同埋吉列魚手指。蠔炸得幾酥脆，咬落淡淡蠔香；薯條脆身而且充滿薯仔味；雞塊炸皮幾薄，肉質滑嫩；吉列魚手指口感好滑溜，炸皮同樣薄脆。✎ 海鹽抹茶芝士奶蓋海鹽同芝士味都好重，而抹茶味道淡淡地但好清香，整體搭配得宜，正！…Read More

前幾日我同朋友去咗呢間餐廳打邊爐，佢安排咗間包房俾我哋，入面有電視，可以一路打邊爐一路睇電視，正！而佢整體帶俾我感覺都幾好，首先食物質素唔錯，係個種即使唔沾醬都好好食，另外服務亦都好周到，所以大家想打邊爐都可以考慮下呢間( ˶ˊᵕˋ)੭♡✎ 螺肉青瓜 餐廳送嘅小食。青瓜爽脆可口，鮮甜無比，搭配彈牙嘅螺肉，口感豐富，唔會過鹹，好味～✎ 古法沙爹鍋湯底 沙爹味香濃四溢，帶有淡淡甜味，食落幾開胃嘅湯底。唔似坊間有啲沙爹湯口感咁油膩！✎ 手切鮮肥牛 嫩滑無比，油花分佈均勻，入口即化，牛肉嘅鮮香味喺口中迴盪，配上沙爹湯底，好惹味 ♡✎ 貴花蚌入口質感爽口滑溜，海水味勁濃！✎ 美國桶蠔 有四隻蠔，口感鮮味滑嫩，濃郁嘅海水味～( ˘ ³˘)♥ ✎ 手打芝士墨魚丸外皮厚實，亦彈性十足，完全冇偷工減料，手工果然係手工～✎ 青檸梳打 青檸味十足，酸酸地，又夠冰涼！…Read More

就黎萬聖節，除咗出去玩，都要食個萬聖節甜品for fun下～呢間餐廳就出爐咗個精緻甜品稍微應下節！一入去，裝修主打淺粉紅同深綠作為主調，座位採用呈U形嘅椅子，再配以略昏暗嘅燈光，甚顯高貴感，平日黎relax下食下西餐都唔錯。而今次黎食萬聖節甜品，用呢度既裝潢做背景影下相打下卡，出黎嘅圖片效果都幾靚～✎ Creamy Mentaiko Seafood Fettuccine成碟相當creamy，麵條柔軟黏滑，再加入咗鮮美嘅明太子，入口濃厚奶油香再帶點微辣，食落都幾惹味。食材方面仲有細蝦、魷魚、蜆同西蘭花，呢幾樣海鮮都幾爽口彈牙，質感滑嫩～西蘭花仲非常新鮮清新！整體質素唔錯！✎ Haunting Nightmares甜品幾可愛精緻，用黎輕輕應下節都唔錯～落單個陣有得揀呢碟甜品既組合，我地揀咗French Kiss、Triple Storey、Forest Fairy同埋Hojicha Caramel Choux。呢個甜品套餐有配埋嘢飲，係一杯溝有濃郁芝麻味同淡淡藍莓味嘅飲品，由於藍莓味唔太重，所以配合埋芝麻味，味覺上都唔會有大嘅沖擊，組合都幾夾嘅。蛋糕就有三款：野莓味嘅蛋糕、抹茶紅豆蛋糕同埋焦糖朱古力蛋糕。野莓味嘅蛋糕味道清新微酸，蛋糕底鬆軟；抹茶紅豆蛋糕嘅抹茶味同紅豆味好香濃，但係食起上黎冇違和感，相互融合，你中有我我中有你嘅感覺；焦糖朱古力蛋糕甜而不膩，好香醇～蛋糕上面嘅裝飾主要由略甜嘅朱古力片同棉花糖組成。甜點中間仲有一個焙茶焦糖泡芙，其外皮酥脆到不得了，而入面係滑溜嘅焙茶吉士醬，愈食愈令人停唔到口，十分香口！…Read More

本人超鍾意復古味道嘅事物˘ ³˘♥ 或者因為生活喺現代，對舊時嘅一切都會覺得新奇有趣！而呢間Wozi Cafe 嘅內部環境嘅裝修正正走懷舊風格⁍̴̛ᴗ⁍̴̛ 綠色牆身，掉漆嘅櫃桶，架上亦放滿濃厚復古味道嘅擺設，好有feel～嘢食嘅質素同樣good good ，同朋友約食飯嘅話，呢間方方面面都真係值得試！✎ 野菌松露油忌廉扁意粉 ($98) 9/10相對夠味，鹹度適中，松露同忌廉簡直perfect match，味道仲好出！正！另外好多野菌片，足料～而意粉好彈牙有口感。好食到完全感受到廚師嘅用心烹煮！✎ 慢煮三文魚意大利飯($138) 9/10三文魚唔會煮到好熟，火喉岩岩好，用刀一切就見到啲汁慢慢滲出，果然係慢煮嘅效果，入口幾嫩，飄散住三文魚味～三文魚皮好脆，成塊炸魚皮咁脆！好味！而意大利飯唔係硬身個種，岩哂香港人胃口，相對軟腍同creamy ，個白汁味偏出，微酸，好開胃惹味！✎ 慢煮手撕豬腩窩夫三文治($116) 9/10呢個真係創意料理，以窩夫夾住入面嘅餡料，似漢堡包/三文治咁。手撕豬腩勁多汁，鹹鹹地，入口充滿豬腩味，夾埋表層個塊芝士一齊食，豬腩味中帶點芝士燒焦味，可以想像到個味道幾獨特香口！ 如果連埋蕃茄片同新鮮嘅生菜一齊，減膩得嚟又多咗重fresh感！窩夫表皮亦脆到不得了！冇令人失望嘅一碟，值得一試～ ✎ 熱情果手搖冰茶($46) 8/10淡淡熱情果味，茶味相對濃！清涼感十足！✎ 菠蘿汁($40) 8/10濃郁菠蘿味，偏酸，好fresh～…Read More

我從來都唔鍾意食太甜膩太heavy嘅蛋糕，近呢幾年發現戚風蛋糕幾岩我嘅口味！呢間蛋糕舖除咗主打戚風蛋糕底之外，佢仲成日出新口味，呢樣同樣岩哂我呢啲鍾意試新野嘅朋友仔呀！๑˃́ꇴ˂̀๑我哋試咗幾款之前未食過嘅口味，分別係皇牌士多啤梨($60)、日本日向夏蜜柑($65)、宇治抹茶椰香($60)、意式芝士($60)。皇牌士多啤梨蛋糕表面鋪咗層帶點淡淡士多啤梨味嘅膜，蓋住五粒士多啤梨，呢個設計提升咗蛋糕嘅美觀程度( ˶ˊᵕˋ)੭♡口感方面微酸，戚風蛋糕底就充滿士多啤梨味，而蛋糕入面有一部份係cream，相當綿滑，令到個底冇咁dry，整體味道都唔錯～日本日向夏蜜柑嘅蜜柑就甜甜酸酸，個蛋糕底都帶住濃郁密柑味，所以整體口感偏酸！宇治抹茶椰香同意式芝士令我較深刻，抹茶味濃郁得黎滲出淡淡椰香，好香濃，仲有粒朱古力波波，入口微甜嘅感覺，成件事口味好豐富～意式芝士同樣都有粒朱古力波波，不過係牛奶味，更甜膩，而整體味道幾似Tiramisu，咖啡味及酒味香氣撲鼻～呢三款蛋糕中間都同樣有軟滑嘅cream，中和番個戚風蛋糕底帶嚟嘅乾枯感覺，體驗感上升ꈍᴗꈍ…Read More

呢間餐廳位於瓊華中心嘅樓上舖，店內裝潢得體雅緻，唔知嘅人以為佢係食精緻粵菜，其實係主打極具風味嘅大排檔小炒菜式～呢個反差大呢ꉂꉂ(ˊᗜˋ*)ʬʬ初初都唔期望有幾好食，點知每碟都勁有火氣勁惹味ꈍᴗꈍ有冷氣嘆又有風味小炒食，大家有機會真係要嚟試下！✎ 招牌脆皮BB鴿呢碟震撼味蕾！外脆內嫩，一啲都唔韌，皮油而且多瘦肉，入味透骨，另附上淮鹽調味。食完成口都好香鴿嘅鹹香味，好正！✎ 獲氣豉椒炒蜆呢碟係另一碟我最鍾意食！一上菜，香氣誘人的味道飄散到每個角落咁制。蜆冇咩沙，味道鮮甜，成碟好有豆豉味同蒜味，加埋青椒、紅椒、洋蔥一齊炒，味道更香口，好適合做下酒菜´꒳`✎ 蒜香風沙雞中翼炸蒜味濃郁，有辣椒一齊炒，味道帶點微辣～肉質嫩口。表皮鋪滿炸蒜，口感鬆脆而更豐富，十分有火喉～✎ 風雲特色香辣炒飯成碟都辣辣地，中辣程度。飯粒煙靭有咬口，微油，入口唔會太乾，軟硬乾濕適中，淡淡飯香味。加咗蛋、細蝦同豆角粒入去炒。蛋香味、辣醬味、花椒味三合一，香氣撲鼻！✎ 大大杯水蜜桃雜果茶勁大杯，足似係大陸嗰啲飲品舖嘅大杯嘢飲咁嘅份量。入面有蘋果切片，橙切片，青檸切片同埋普通檸檬切片，入口冰涼清甜，成杯較重檸檬、青檸味，配淡淡果香～✎ 菠蘿冰入面有幾塊菠蘿片，底下應該有啲果漿，較暈之後一飲甜入心，濃郁果甜味出哂嚟～配淡淡菠蘿味同埋梳打味，味道岩岩好，唔會太淡。…Read More

呢間餐廳係日本第二大嘅連鎖拉麵店，終於開到嚟香港啦！唔使去日本都食到！佢開張第二晚我即刻去咗試吓，人流好多，仲要排隊，但好彩排左半個幾鐘就入到～不過唔知係咪太多客人，出餐都幾慢，一碟都要等至少15至20分鐘… 大家嚟食要預鬆啲時間～ 味道方面都唔錯嘅，都值得花時間嚟食！✎ 日式炒飯炒飯鬆軟香口，充滿蛋香味，都多蛋塊，只係略帶油份，所以入口唔會乾身，微微油潤感覺。叉燒粒/肉粒質感都軟嫩，配搭軟身嘅炒飯，整體係入口即溶感覺♡✎ 辣味噌拉麵材料有鵪鶉蛋、叉燒、肉碎、椰菜、銀耳、紅蘿蔔絲、鳴門卷等。叉燒相對薄身，肥瘦相間，入口嫩滑，冇渣亦唔嚡身；肉碎溝咗啲辣椒粉，帶出咗香辣肉味嘅味道；麵條爽口；而鵪鶉蛋同其他配菜嘅口感提升層次感。成碗都幾好味，唯獨美中不足嘅係湯底太少，多啲湯就好´꒳`✎ 橫浜終極max拉麵材料有叉燒、鵪鶉蛋、紫菜、菠菜同埋糖心蛋。叉燒同樣好好味，肥瘦相間；菠菜唔夠爽口，偏稔；糖心蛋攞咗醬油嚟浸，濃味滑口；麵條偏軟身略有咬口。同樣湯底都係太少…係豬骨湯，味道夠香濃但唔會太鹹。呢碗都幾惹味，可以encore～…Read More

香港有咁多主打國家料理既餐廳，以我觀察，日本同韓國菜相信應該係最多人鍾意食～而我都好鍾意食韓國料理！知道近排觀塘工業區附近新開咗間韓國料理既餐廳，間中都會口痕想食韓國野既我，當然要物色下邊啲餐廳整得好味，即刻去試下味道如何！✎ 蔘雞湯白飯及前菜套餐($105) 8/10叫之前其實都幾驚個蔘味會好濃，味濃會好難食，但係反而呢個湯既人蔘味冇呢個問題，味道甘甜清香，相對淡淡的，再帶點雞味，湯口感幾濃稠～好好飲同好易入口！入面有啲雞肉、豆芽同埋一啲飯粒。飯相對黏同軟滑，冇咁乾身同粒粒分明。套餐仲包一份細份小食、前菜同嘢飲。前菜有菠菜同泡菜，菠菜加咗蒜粒，鮮甜爽口，入口充滿蒜味，而泡菜相對較酸同埋辣辣地，都幾好食。小食方面，我地叫咗韓式煎餃2隻。煎餃外皮酥酥脆脆，咬起上黎喀滋喀滋，入面餡料飽滿，好多冬粉，鹹鹹地，軟腍可口。再叫咗罐忌廉溝鮮奶，解下暑～成個套餐份量都幾多，夠哂一個女仔食！✎ 芝士炸雞套餐($93) 8/10中間有啲芝士，如果份量再多啲就好！炸雞表皮似係加咗蜜糖牛油醬，甜甜地鹹鹹地嘅味道嘅醬料，食完第一啖就會再想食，令人垂涎欲滴嘅感覺～炸雞嘅炸粉非常薄，肉質勁細嫩軟滑，唔錯唔錯！小食有炸薯格，炸到香脆，加埋酸辣味道嘅蜜糖芥末，好惹味刺激！ 同時亦好開胃，呢個配搭出色～嘢野揀咗罐裝青提子汁，好清甜！…Read More

香港真係各國美食嘅匯聚地～有日本料理、韓國料理揀，如果想食得特別啲，去食印度菜、意大利菜、法國菜都得！´ε` 而今次就同朋友嚟到呢間餐廳食湘菜，試下個味道係點，岩唔岩我哋香港人食先！✎ 長沙臭豆腐呢款係一款傳統特色小食。外表墨黑而口感焦脆，裡面細嫩而多汁，整體有咬口，亦非常酸辣，臭氣撲鼻～表面有好多蒜同辣椒，用嘅醬料似係秘製，味道好惹味，岩哂用嚟撈飯～✎ 鐵板魷魚成碟應該事先炒過嚟，中途放上鐵板，用蠟燭保持食物溫溫熱熱，所以魷魚都有番咁上下香口，口感略硬同乾身。成碟都係豆角同辣椒偏多，所以整體食落爽口同時幾香辣。✎ 梅菜扣肉扣肉嘅肥膏偏多，瘦肉少，偏薄身，帶嚟入口即溶且肥膩嘅感覺，鮮美香口。扣肉鋪係面，梅菜係底，兩者都非常入味。✎ 米飯 粒粒分明，恰當濕潤。…Read More

觀塘真係好多好嘢食( ˶ˊᵕˋ)੭♡ 近排新開咗呢間主打日本菜嘅餐廳。喺門口行入去，就見到一道畫上日本風景油畫嘅牆，周圍掛住一串串小燈泡同五光十色嘅霓虹燈，環境略昏暗，幾有feel，坐係入面享用晚餐成件事好浪漫～嘢食好食，環境裝修又正，兩樣加埋勁加分！✎ 照燒蘆筍豚肉卷配天使麵餐($108) 8.5/10甘荀燒得好香口，偏軟稔；豚肉煎到微微焦脆，香氣四溢，油脂味重，當中仲灑上胡椒粉，格外惹味～天使麵煮到細緻滑嫩，唔軟爛，沾上煎過嘅醬料，可口程度大大提升！餐湯係菠菜忌廉煙肉湯，入口濃濃煙肉味，鹹鹹地，伴隨淡淡菠菜味同奶香味。套餐仲包切粒嘅飯後水果，有藍莓、火龍果、蜜瓜同埋橙，都幾新鮮爽口，食完清清腸胃～嘢飲方面叫咗凍檸水，夠冰凍夠解暑～✎ 豚肉生薑燒味噌忌廉烏冬餐($148) 8/10值得一提呢碟嘅醬料令人垂涎，令到整體嘅味道質素提升，加咗唔少分！而其他材料，好似溫泉蛋嘅配搭，令到本身滑嫩嘅烏冬更加滑口，同時入口包裹住蛋香味同埋豚肉香，非常誘人。呢個餐都同樣包埋菠菜忌廉煙肉湯同埋飯後水果。嘢飲叫咗杯夕焼け，係香濃咖啡同橙汁嘅混搭，味道酸酸地，同時略苦澀，非常清爽醒神！另外亦order咗碟炸雞軟骨，呢碟都好值得食，加左七味粉調味，香口之餘口感爽口炸脆！…Read More