Esthevel的個人專頁

土瓜灣人必食小食店，同區開分店。正如一眾高手所講，最大既對手就係自己。 分店最大既標杆就係本店。驟眼望落去，本店主打食品好似都有齊，而且仲有幾樣分店限定。 至於營業時間，好似比本店開早少少。簡簡單單，試試韭菜餅，同炸豆卜。 韭菜餅外皮煎得好香脆，好乾身。 餡料仍然保持濕潤。 韭菜同肉亦都好平衡，係雙主角，而唔係主角配角嘅關係。至於炸豆卜，依舊香脆。 不過係淨炸豆卜，而唔係豆卜釀魚肉，但依然好食。整體嚟講，都應該算有本店既八、九成水準。 如果想行少幾個街口，都可以考慮。…查看更多

一直聽聞呢間既 pizza 好食，而家仲越開越多，好似差唔多區區都總有一間喺左近。 不過有太多其他選擇所以一直都未試。 今次總算試下。Pizza 有大或者細，即叫即整，冇整定一片片賣。 餅底用上 sour dough，食落比一般餅底厚實而煙韌。 餅邊烤得香脆，而中間有餡料覆蓋嘅部分薄而軟熟。 餅底有好香既 sour dough 麥味，同一般麵粉做既完全唔係同一個層次。 而且，成個 pizza 充滿橄欖油香味。餡料方面，揀咗有芝士、蕃茄、辣肉腸等等，用料新鮮，口感豐富，味道飽滿。整體質素嚟講，已經超過晒一般連鎖店既水準，甚至開始接近由主廚打理精品 pizza 店既水平。…查看更多

紅磡區新舊交集，中、西、fusion 都幾多選擇。招牌手打牛肉漢堡，份量中等唔算特別大份，但用料新鮮，造工亦頗為精緻。漢堡用既包係特別訂製，帶有一份穀物既味道。 食落有彈性而亦幾有質感，質地介乎一般麵包與穀物麵包之間，用嚟做漢堡幾有特色。 包煎香咗好有牛油味。漢堡扒新鮮有肉味，保留一定既鬆厚度唔係壓得太實。 有助於保存肉既鮮味同鎖住肉汁。 但另一方面，香脆度就會較低。配料既生菜、蕃茄等都好新鮮。 帶來一分清新平衡油膩感。 另外，仲附有兩圈炸洋蔥，表面炸得香脆而入面洋蔥仍然新鮮爽口。另外，跟餐蕃茄湯熱朱古力都有唔錯水準。整體上，食物質素唔錯，可算區內想舒服坐低食個牛肉漢堡既好選擇。 除非唔一定要坐低，又或者唔一定要牛肉漢堡啦。…查看更多

由灣仔搬到中環，仍然保持高水準。漢堡質素取勝，無需搞甚麼花巧款式。 要揀既，主要係要唔煙肉、芝士等等。 同埋漢堡扒要一片厚還是兩片薄 （或者大漢堡兩片厚 / 四片薄）。漢堡扒內質出色。 厚扒外脆內嫩，香脆得嚟又鮮嫩有肉汁。 而兩薄換一厚 （或者四薄換兩厚）就更香脆，各有長短。包滿滿牛油香，烘到香脆而有彈性。 煙肉好脆，生菜、洋蔥等等配料都好新鮮。漢堡以外，其他小食都好出色。 水牛鷄翼表面炸脆，肉質仍保鮮嫩。 汁醬辣度唔高，酸酸甜甜帶有濃濃既芝士味。整體嚟講，都應該可算係全港其中一間最出色嘅漢堡。 如果什麼全港漢堡名單上面冇呢一間，咁果個名單可以不理。…查看更多

多年隱世餐廳，發現頂手轉咗名。 食物質素同服務都令人滿意。南瓜湯軟滑綿密，滿滿清新既南瓜味。 多士亦頗香脆。主菜擺盤相當精緻。 牛柳表面煎得好香，內裏生熟程度掌握恰到好處。 配菜露筍、羽衣甘藍、蘑菇都新鮮可口。 蘿蔔蓉很滑，微甜。腩肉煮得相當淋及入味，調味有少少似東坡肉既風格，幾有趣。 加埋新鮮配菜，食完都唔覺膩。小食既雞翼炸得香脆，而肉質仍然保持鮮嫩。何文田街隱世綠洲，轉名後重生。 環境保持一貫既舒適寫意，鬧市之中暫時逃離煩囂，渡過一段休閒時光兼食個好西既地方。…查看更多

鋪面以公仔麵做主題。 公仔麵從來唔係咩高檔美食，但有時就係想食下當 comfort food。餐牌上其實仲有蛋包飯，茶餐常餐等等。 但一場嚟到，就跟主題叫個炸髀撈丁。 店員話生炸要等 15 分鐘，咁如果真係好食都值得等。上枱炸髀表面薄薄一層粉漿，炸得好乾身。 肉質唔可以話鮮嫩，但未到於嚡。 內外都十分香口，十分熱氣。 同健康精緻完全無關，但作為 comfort food 又幾符合預期。至於撈丁，麵質軟硬尚算適中，撈既蔥油、豉油等等，都係屬於越邪惡越快樂嘅類型。整體嚟講，好難講話點樣特別好食，但係又幾符合到 comfort food 既預期。…查看更多

睇間舖裝煌，都預咗比較街坊路線。 而價錢亦都大致上街坊價，咁當然亦都好難要求什麼高級食材啦。試過夜晚嚟，多人都爆，直接放棄。 晏晝路過見開左門，以串燒嚟講都算早。 咁就係咁意試幾樣野。串燒即叫即燒，係要等既。 晏晝人少，照理應該好心機過夜晚做到爆晒廠既時候。串燒嚟到，都燒得幾香。 雞全翼同中翼表皮香脆，而入面雞肉仲係鮮嫩既。 孜然粉調味都唔錯。蜜糖腸，腸衣雖然未至於好脆但都爽，腸本身甜甜地幾好味。雞腎燒得好香口。肥牛韭菜卷好大串，同都有多少肉汁。整體上，街坊價串燒，食物水準交到貨有餘。 仲要晏晝時間，唔使同人迫食到串燒，都唔錯。…查看更多

紅磡後街小食檔，售賣各式街頭小食。腸粉蒸得幾滑，一條條層次分明，冇黐埋一舊。 豉油、甜醬、麻醬等等亦都落得好慷慨。燒賣大大粒，幾有彈性。辣魚蛋夠入味，亦都相當有彈性。螺肉、魷魚等等亦都好食。其實，呢類街頭小食，稍為肯俾心機做，通常都唔會差得去邊。 但又好難話做到點樣好食到驚天動地，全港難求。 但求食得開心，抵食，衛生情況合格，咁就已經好好啦。 亦無需過份強求什麼。當然，都有啲真係做得非常之差既，咁咪自己避開嗰啲囉。…查看更多

崇潔街係紅磡區內有名食街，中西日韓咩都有，而呢間就相當多支持者。餐湯正常水準，唔係差，亦冇驚喜。招牌梅肉扒，大小厚度還不錯。 豬扒表面煎得好香，生熟程度剛好。 梅頭扒肉質以豬扒而論算嫩滑，有多少咬口而肉味亦不錯。 配菜既薯蓉幾香, 南瓜都好淋。肉眼扒份量比梅肉扒再大一圈。 表面煎得幾香而中間生熟程度都適中。 肉味還可以，但感覺肉質比較鬆。 兩者中比較推梅頭扒。跟餐有份小甜品，仲有幾樣選擇。 以呢個價錢都算係咁啦。即磨咖啡以非精品咖啡店而論都算還可以。整體上，都算係食物水準中上而尚算抵食既西餐。…查看更多

麵得四種餸㨂，今時今日都可謂非常有性格，同對自家出品有一定信心。揀咗三併，雲吞、鯪魚球、鮮牛肉。 麵煙韌有彈性，冇鹼水味。 湯底十分清甜，結果成碗飲晒。 雲吞好大粒，入面飽滿地充滿鮮蝦。 蝦肉夠新鮮，鮮甜彈牙。 鮮牛肉肉質嫩滑。 鯪魚球亦都相當大粒，質感食落係貨真格式既鯪魚肉。 下次要試埋墨魚丸。另外，加咗個腐乳通菜。 通菜食落鮮嫩，腐乳份量亦算慷慨。整體嚟講，唔算十分平，但食物質素係好既。 可以咁有性格，果然係有佢既原因。…查看更多

土瓜灣舊區中心，有不少傳統舖頭。 呢間就主打傳統中式糕點、茶果、砵仔糕等等。茶果有多種口味，鹹甜都有。 鹹既有菜甫蝦米同眉豆蝦米。 茶果質感煙韌。 菜脯蝦米味道較特出，菜脯既爽夾埋茶果即煙韌口感較豐富。 而眉豆就比較重豆蓉味，整體上較淋身，喜唔喜歡見仁見智。 甜茶果有花生、奶黃、芝麻、紅豆等等選擇。 加入甜餡料，相比口味較傳統既鹹茶果，較少沉重感。糕點方面，西米糕、紅豆糕等等，甜量適中。呢類傳統糕點店，而家可能越嚟越少。 唔好等佢唔做先嚟幫襯。…查看更多

位處勝利道，旺角邊陲地帶。餃子可以選傳統灼或者煎，較推介灼。 一來較能帶出餃子鮮味，二來呢度有大量小食選擇。 餃子有多種口味，津白、蕃茄、香芹、西洋菜、羊肉等等各有特角。 想一次過試齊可選十三厶。 餃子大小中等，相當鮮味。煎蟹粉餃，餃子皮煎得好香，餃子餡就有濃鬱既蟹粉味。 一如預期係邪惡之選。紅油蒜葱白肉，白肉鮮甜爽脆，紅油蒜葱亦相當惹味。煎黃金孖寶，包左煎黃金糕同豆腐芝士餅。兩者都煎得好香，黃金糕口感有彈性，而豆腐芝士餅就由外層既豆腐包住中間既流心芝士。 一份小食兩種口感。醉雞翼夠酒香，相當入味。整體呢講，餃子固然係好食既，但仲有多種小食都好值得推介。…查看更多

位處黃埔稍稍外圍既位置，但都有相當多嘅支持者嚟捧場。餐牌有各式星馬菜選擇，睇相好多野都好似好吸引。 最後揀咗檳城蝦麵同串燒。檳城蝦麵既重點絕對係個湯。 個麵上枱時已可聞到相當濃蝦味。 試飲一口，湯味鮮甜，有頗濃蝦味而唔油膩。 配料方面，有蝦、魚片、芽菜等等，份量滿意。 麵係跟參參，即係油麵同米粉一半一半。 油麵食落較有口感，而米粉吸收湯味較強，一半一半互補長短啱啱好。跟餐有小食，揀咗個粉卷。 幾清新，口味略淡。鷄肉串燒大大串，燒得好香而唔會過熟。 沙嗲汁味道亦校得唔錯。整體上食物水準都相當高，肉骨茶同喇沙睇落都好似幾吸引下次可以再試。…查看更多

土瓜灣單睇外觀冇咩特別既麵鋪，走街坊路線，但都有好野食。 甫魚蝦子撈麵，非常澎湃地鋪滿蝦子。 撈埋麵時，濃烈既蝦子味撲鼻而來。 蝦子既量足夠撈晒成個麵灼灼有餘，反而可能要諗下點樣撈得晒啲蝦子唔好嘥。 呢度用既蝦子屬非常之濃味既類型，怕口味太濃既，可加少少湯。 撈麵跟既湯相當鮮甜。 麵質亦都煙韌有彈性。蜆介鯪魚球，雖未至於超級巨大，但都尚算大粒。 鯪魚球表面炸得香脆，魚球肉質有彈性有魚味。 蜆介鮮味但味道略鹹，點少少已足夠。整體上食物水平都唔錯，路經附近想搵嘢食可以一試。…查看更多

土瓜灣米線老店。招牌名物南乳炸雞球，雞球大大件，整體份量亦好豐富。 雞球上枱辣辣，表面炸得十分香脆。 入面雞肉生熟程度剛好，雖然未至於鮮嫩到流出肉汁，但都可算剛剛熟唔嚡口。 加埋南乳醬汁，十分惹味。 不愧為招牌名物。至於米線，大致上中上水平。 菜肉雲吞幾飽滿，餡料菜肉比例滿意，鮮甜程度亦都中上。 柱侯牛筋煮得相當之淋，而牛筋仍然有足夠彈性。 但柱候味就比較淡。 米線湯底唔算特別濃，有少量雪菜調調味。 作為湯底算稱職，不過唔係特別特出。 整體嚟講，南乳雞球係必食，而米線都叫中上水平還可以啦。…查看更多