為食熊貓佳's Profile

三人行去打邊爐，帶位姐姐帶緊我地行去張枱嘅途中，見到有一半人食雞煲，坐低只見有打邊爐嘅菜單紙，無嗰啲雞煲嘅宣傳推廣單張，於是就開口問侍應啊姐：「係咪有雞煲食呀？幾多錢呀？」，啊姐答：「有呀，X8」（因為宜家唔記得清楚，不過當時好肯定係聽到68定78定88架，我仲同男朋友話，嘩，咁抵，就叫雞煲啦），啊姐就話係咪要個雞煲呀，個雞煲係羊腩雞煲黎，得一種辣。叫咗雞煲做鍋，同一啲其他打邊爐配料，出面有醬料、嘢飲、甜品自助區俾你自己攞嘢。個雞煲有半隻雞嘅份量，仲有幾嚿幾大件下嘅羊腩，心諗呢個價，味道都算過得去，真係幾抵食。羊腩幾「林」，雞一般般，味道唔會太差。到最後出去買單，結果雞煲收128囉，呢個時候我地至見到收銀機附近有個張介紹雞煲嘅宣傳單，寫住雞煲128，9點幾後X8（啊姐講嗰個價）Oh！心諗，信錯人了。啊姐都無提過有兩個價同埋有時間分段呢回時囉。不過都已經飲飽食醉了，男朋友話算啦。下次無親眼睇到列明寫明幾多錢嘅嘢，都係唔好叫，費事大家有咩誤會，好似俾人呃咗咁。…Read More

對佢啲食物印象係食完會唔記得囉，唔覺得啲嘢好食，唔值得再去。啲位好逼，同隔離枱好近。魚湯湯飯試咗啖，勾唔起我嘅食慾，食飯時間人多好求其，湯飯裡面啲飯仲有一啲係「痴」埋一小嚿一小嚿，咩食慾都無啦。:(…Read More

車仔麵啲配料選擇正常多，而且試過嘅大部分料都幾入味，味道算中上，最值得一提嘅係酸辣粉，食到好味嘅酸辣粉之餘又可以同樣享受車仔麵配料，正，食中辣都唔會好辣，酸味方面調教得幾適中，唔會過酸，幾醒胃，飲埋啲湯亦唔會過鹹。最常叫鹵水雞翼、雞翼尖、魷魚鬚、螺肉、蘿蔔做配料，都唔錯。仲有煎釀三寶賣，不過一般。…Read More

樓下最近嘅選擇就係大快活同大家樂，有時懶起上黎真係食黎食去呢兩間架咋。連鎖大集團淨係識賺錢，不停咁密密加價，啲嘢食又越黎越縮水，食物味道質素方面又唔覺有咩進步，唉，宜家咩都貴，食個快餐都咁，人工就黎追唔上啲物價，再係咁落去，遲啲連快餐都食唔起😂有燒肉嘅燒味飯，我覺得燒味飯真心好食過大快活嗰啲，燒肉皮都幾脆，半肥瘦適中，不過當然無佢啲廣告咁勁啦，廣告成日都誇大件產品。仲有佢嘅一人一火鍋都係做得比大快活好少少，起碼嗰個有海鮮嘅雜錦鍋，樣樣料有啲，選擇多啲啲，而且沙爹湯底唔錯。焗豬扒飯食過兩次都焗到好乾，汁又唔夠，搞到好乾好難啃咁，反而鐘意大快活嘅比較濕潤多汁。…Read More

食過幾次，啲煎餃皮算幾薄，味道ok，不過未至於好食到令你成日會諗起想食。反而嗰麵線真係正，好好味。我對啲羹類杰杰地嘅嘢無咩好感，不過呢個麵線濃稠度適中，唔會太水汪汪，亦唔會好稠好杰，食落口好舒暢。配料內嘅香菇貢丸粒好香，大腸雖然切到好幼，不過食得出佢鹵得「林」有入到味，有少少咁丁丁嗰啲食碗仔翅嘅醋味，同芫荽香味，吊出個味幾開胃，會令你想再食一碗。…Read More

第一次去食係去觀塘分店食晚飯的，幾多人等位下，印象唔錯，味道幾好。今次行megabox就試下食晏，吉列豬扒蛋飯，蛋好滑好好食，日式叻喱汁甜甜地，「送」飯食一流。吉列豬扒過得去，不過不失。不過唔知點解覺得觀塘分店好食啲。…Read More

雖然呢間酒樓舊舊地，而且又多老人家去，不過其實真係幾抵食。去嗰啲商場新裝修大酒樓當然光鮮啲，不過價錢貴之餘，都唔包一定味道超好。反而呢啲做街坊生意嘅，平嘅同時味道又過得去。平日一有時間就會同屋企人去呢到食晏或下午茶，就算成日去都唔會負擔重。平日有較多嘅特價優惠點心同飯/粉，好抵食，味道唔會太差。普通嘅 金錢肚 、鳳爪、山竹牛肉 都幾正常，而且算入味。 排骨 - 就有時肥肉部分有啲多。潮州粉果 - 皮薄通透，好易一夾就穿，餡料好香。 鹹水角 - 同樣餡料香，好食。皮蛋瘦肉粥 - 好綿。鴨腳紮 - 就要等較耐時間，通常都係其他嘢食晒，最遲至黎。蝦腸 - 皮唔算太薄，不過亦未至於厚到好難食，每條有2大隻彈牙大蝦仁。炸BB乳鴿 - 十幾廿蚊就有一隻，一般般，有時炸到過咗少少，顏色好深。有時又炸得皮唔夠脆，不過次次都熱辣辣上枱的。牛栢葉 - 味道幾好，係切得大嚿咗少少，連墊底嘅蘿蔔粒都好味，嗰汁撈飯食一流。特價燒味飯 - 平得黎，份量都可以接受，唔錯。不過如果揀燒味米線的話，好明顯個米線無咁好味。最推介係 藥膳雞腳 - 味道好好，藥材味又夠，雞腳夠「林」夠入味，我食親都飲清啲湯汁。 …Read More

幫襯過好多次啦，佢嘅湯頭唔係道道食到，所以會令你念念不忘，耐唔時就要去翻兜佢。係啲位「紮」啲逼夾啲，人多要搭枱啫。每次必點孖寶有，淨豬什鬚 + 蠔仔湯飯。兩個個湯都好飲到要飲清，湯頭有甜味，唔會好似其他鋪頭咁死鹹似味精湯，就算飲晒之後，都唔會好快口乾。豬什好乾淨，墨魚鬚無咩味道，不過爽脆。蠔仔雖細細粒，不過份量多，亦唔會有腥味。仲有肉碎、方魚碎、芫荽葱，好香。如果唔使睇價錢，以我鐘意食湯飯嘅程度，我想食兩三碗。另外佢嘅墨魚丸同出面大大粒好彈牙嘅嗰種唔同，佢地家係偏細粒少少，「林」身一啲嘅，唔會實的的、唔會好膠好彈，但都幾好食。油菜蠔油芥蘭同炸魚皮一般。之前已經聽人講TVB啲人成日幫襯，唔知係唔係，只記得TVB夜消磨有介紹過呢間嘢。當日有幸撞見葛民輝和一女子（似助手）黎食嘢。…Read More

蝦子撈麵 - 幾好味，彈牙，有口感，同我喺澳門食過嘅好味蝦子撈麵差得唔遠。粉腸粥 - 粥好綿，粉腸夠軟身，唔難咬開，無異味。粥味道一般，唔算好特出。炸雲吞 - 佢隻皮係炸到會鬆化膨脹嗰種，我比較鐘意食硬身啲春卷皮嗰種。…Read More

遲來的午飯魚香茄子餐 - 配白飯同豆漿，茄子夠「林」，味道適中，送飯一流，差唔多下午茶時份至去食，略嫌佢啲飯唔夠熱。隔離嗰間好似食茶餐廳菜式的店，見佢下午茶餐包嘢飲 $ 28元有炒粉食，試咗個，沙茶牛肉炒河粉 - 以為下午茶餐一定縮水好細份，不過又唔算喎，都幾正常份量，炒得幾均勻，夠味，唔錯。包豆漿/銀菊露一杯。仲見到沙爹雞串先 $ 20一份，咁抵緊係試埋佢啦，有5串定6串。嗰醬味道過得去，雞肉量都好足，啖啖肉，唔會得少少。不過略嫌啲雞無咩煎香，但以 $ 20咁足肉量黎講，抵食，食得過囉。當然無得同六十幾蚊一份嗰啲燒到香味十足嘅黎比較啦。…Read More

雲吞雞套餐 - 都幾大份，可以同人一齊分享，菜太生，如果可以煮「林」少少會更好。三餸飯 - 有例湯， 茄子嗰汁好黑，不過味道還可以。咕嚕肉，炸粉都幾厚下。叻喱雞薯仔，唔好食。人蔘雞湯 - 湯太清，無咩雞味可言，雞還雞，湯還湯。越做越唔好食，淨係識加價，裝修到好新咁，不過食物味道質素就無好到。…Read More

如果唔計要行過去牛池灣街市嗰邊，坪石邨夜晚9點幾之後仲開嘅食肆只有呢間，都算係獨市，好似開到1點。好在都不過不失，唔算太過難食，尚可接受的。佢嘅 鹵水鵝 都幾入味，唔會太過死鹹。大腸墨魚 - 大腸有鹵水香，軟「林」，容易咬，唔會「𡁻」唔到，乾淨，無其他異味。墨魚彈牙。韭菜豬紅 - 啲豬紅好多，嗰汁用黎撈飯食好正。小炒皇 - 樣樣料都有啲，炒得剛剛好，唔錯。豉椒鵝腸 - 一般般，醬汁幾夠味。味菜鮮魷 - 亦屬一般。沙爹雞煲 - 雞有雪味，建議食沙爹金菇肥牛煲好過，佢啲沙爹會加少少菠蘿粒落去調味，我唔食菠蘿，所以覺得唔落可能仲正。薑葱魚頭煲 ， 椒鹽鮮魷 - 都幾香口。魚香茄子 - 正正常常，好送飯，不過有時人多，茄子會煮得唔夠「林」。京都骨 - 酸酸甜甜，醬汁夠味，醒胃，不過略嫌太大「舊」，好難咬，如果斬細件一點會容易食啲。唔多推介嘅有蠔仔粥同例湯，蠔仔粥雖然蠔仔幾大粒，不過幾腥下，啲冬菜粒又大粒得滞，搞到好鹹，個湯底唔多好食，唔會有人地嗰啲大地魚湯嘅香味。例湯好假，有時飲就䶢到味精湯咁，有時又好似溝水溝出黎咁。而且食碟頭飯至免費送一碗，叫餸的話無論你叫幾多餸，都無得免費，都要收錢。不過間中唔知係咪無咩生意，有多湯剩，又會好間唔中一次半次免費送你一碗。另外豉椒排骨炒麵，麵夠脆，不過排骨無咩味，入唔到味。…Read More

食咗個牛肉米堡，洋葱牛肉餡啲味就係日式牛肉飯啲味咁，不過牛肉無牛肉飯咁「林」，嗰米漢堡以為佢表面會略為煎香脆，不過係「軟身」的，似係叮熱嘅，如果係略為煎香脆個表面，應該會好味一啲。唔大個，食唔飽的。不值再試，寧願去食日式牛肉飯好過。…Read More

朋友介紹試呢間食雞煲。地方唔大，得十張枱左右，屬小店類，所以食材應該會較為新鮮。朋友點的雞煲，唔知有無分咩辣呢，如果有，佢地唔多食得辣，應該點咗小辣掛。對於唔食得辣嘅朋友黎講，佢地覺得唔錯，幾好。而對於鐘意食辣嘅我，就覺得一啲辣味都無，如果佢無分幾多辣，得一種辣度，鐘意食辣嘅朋友，一定會失望了。啲雞斬到幾大件下，醬汁包裹雞嘅外層，食真啲其實唔多入味，得表面有醬汁至有味，煲嘢唔夠香。有其他加蟹定海鮮嘅煲都幾受歡迎。打邊爐嘅食材配料幾新鮮，唔錯，絕無雪味。值得推介有即炸魚皮同魚片頭，炸得金黃香口，魚片頭彈牙。蟹籽墨魚滑，亦是彈牙。餃，足料。有個唔知係咪墨魚丸裡面包鹹蛋黃，食嘅時候要好小心，經朋友提醒，已經比平時吹多陣至入口，點知咬開佢，都仲係俾佢裡面啲汁熱親個嘴。四人如果唔算好大食，只叫半隻雞，再加一堆其他配料打邊爐都食得好飽。如果想叫少啲配料，叫一隻雞至夠。四人食咗九百元左右。推介俾唔多食得辣而又想食雞煲的朋友試。…Read More

朋友生日聚餐，訂咗房食呢間。9人行，食咗三千九元。要咗兩個鍋，一個豬骨煲，一個辣雞煲。食辣嘅朋友仔都滿心期待個辣雞煲，不過一黎到有啲驚訝，竟然係成煲湯的。我地大家都以為係一般坊間的辣雞煲，先食雞後加湯的那種。可惜原來呢到唔係，朋友好奇的問服務員啊姐，呢個辣雞煲喺咁架？啊姐回答話辣雞煲緊係咁架啦。服務員都係一啲啊姐啊叔。上湯底幫我地開爐竟然又唔幫我地調溫度，我地等咗好耐都唔見滾，至知原來淨係開咗機無幫我地調高溫度。食辣嘅朋友食呢個辣雞煲，一開始唔辣，雞唔入味，食到好後期至有啲辣味出。亦有朋友話啲雞「鞋」，早知佢個辣雞煲係咁，唔使專登叫辣雞煲，叫碟雞黎自己碌好過。豬骨煲好正常，好多料。象拔蚌刺身 - 好新鮮，爽脆。其他海鮮，蝦、大蜆都幾新鮮。炸魚皮、響鈴 - 都夠脆，唔會好似擺咗好耐咁見晒風變「林」。其他打邊爐配料都唔錯，唔會好似某啲鋪頭咁啲食材雪好耐，一陣雪味。有個服務員啊叔好求其咁大力擺低碟嘢，力度大到碟嘢啲水彈到去張大枱嘅對面我朋友塊面到囉。另一小插曲就係，菜單紙有普通平價白牛栢葉，同較貴的新鮮黑栢葉，點咗黑栢葉，點知碟貴價新鮮黑栢葉比佢「乸」到變晒，問啊姐又話新鮮黑栢葉嘅？啊姐話係黑栢葉呀，我地洗得乾淨嘛。我地話平時我地叫嗰啲黑栢葉唔係咁，啊姐就話人地洗得唔乾淨。😓「乸」到色都無，咁食平價白牛栢葉好過啦，都好樣過佢。咁人地嗰啲真係新鮮黑栢葉唔通真係唔乾淨架咩😓見到佢嗰啲所謂乾淨黑栢葉就唔開胃啦，「乸」成咁，結果叫佢取消呢碟。整體黎講，都ok嘅，中價以上打邊爐。…Read More