One More More (Closed)

朋友介紹試呢間食雞煲。地方唔大，得十張枱左右，屬小店類，所以食材應該會較為新鮮。朋友點的雞煲，唔知有無分咩辣呢，如果有，佢地唔多食得辣，應該點咗小辣掛。對於唔食得辣嘅朋友黎講，佢地覺得唔錯，幾好。而對於鐘意食辣嘅我，就覺得一啲辣味都無，如果佢無分幾多辣，得一種辣度，鐘意食辣嘅朋友，一定會失望了。啲雞斬到幾大件下，醬汁包裹雞嘅外層，食真啲其實唔多入味，得表面有醬汁至有味，煲嘢唔夠香。有其他加蟹定海鮮嘅煲都幾受歡迎。
打邊爐嘅食材配料幾新鮮，唔錯，絕無雪味。
值得推介有即炸魚皮同魚片頭，炸得金黃香口，魚片頭彈牙。蟹籽墨魚滑，亦是彈牙。餃，足料。有個唔知係咪墨魚丸裡面包鹹蛋黃，食嘅時候要好小心，經朋友提醒，已經比平時吹多陣至入口，點知咬開佢，都仲係俾佢裡面啲汁熱親個嘴。四人如果唔算好大食，只叫半隻雞，再加一堆其他配料打邊爐都食得好飽。如果想叫少啲配料，叫一隻雞至夠。四人食咗九百元左右。推介俾唔多食得辣而又想食雞煲的朋友試。