TunaBella1363's Profile

放咗工唔想煮飯，於是同老公去咗附近嘅新開茶餐廳試吓，估唔到有意外驚喜！首先覺得好得意嘅係，佢嘅drink Menu 有提供手工啤酒同埋葡萄酒🍷假如突然間想同三兩知己飲返兩杯，都可以係呢間茶餐廳滿足到你😂好入返正題先⋯同老公入到去，第一個感覺係地方細細，但係服務態度唔錯。侍應好有禮貌咁同我哋推介佢哋嘅set dinner。我同老公揀咗兩個主菜，包括係炸魚薯條同肉眼扒，仲要好放縱咁，set drink 叫兩杯紅豆冰(只係加$3）。餐湯到，已經眼前一亮⋯⋯蘑菇湯真係唔錯👍如果濃少少就比得上以前嘅Simplylife（大家記住佢只係茶餐廳嘅價錢）。另一個亮點係佢塊丹麥多士，真係好好食，好難得係焗到啱啱好👍（講真，淨係塊多士已經比到我個感覺佢哋好有心機做，而呢塊多士係會令到我哋再想食）再加上沙律菜係非常新鮮，淨係餐湯沙律同多士已經比到好大嘅驚喜我哋。跟住主菜到，個炸魚薯條真係分量十足！！！炸魚嘅表層炸得啱啱好（我最怕啲炸魚嘅炸皮過厚）而且食得出啲薯條係新鮮炸出嚟。我老公其實唔係太食魚，但係都讚不絕口！至於個肉眼扒，雖然個肉味爭少少，但係起碼口感係夠淋。而佢嘅配菜係薯條同埋蕃茄汁蘿蔔瓜。薯條就唔使講啦好好食，都係新鮮炸出嚟👍啲蘿蔔我都食晒，真係幾有心嘅製作。唯一美中不足係杯紅豆冰。其實可能係我哋嘅問題，因為最近有啲氣管敏感，但係又貪食想飲紅豆冰。我地叫咗少冰，而導致花奶嘅比例太多。我哋反映想要加多少少紅豆，服務員亦都非常之好人，幫我哋加咗👍雖然係咁，其實杯紅豆冰係好好味嘅👍👍👍今日食晚餐，怕影響夜晚瞓覺，所以冇試到咖啡同奶茶。如果，連咖啡同奶茶都好飲，我相信呢度會變咗我同我老公嘅飯堂😂😂（因為附近的餐廳，合格嘅奶茶真係唔多）下一次嚟到會再試，到時再同大家分享😉總括而言，今次呢間新餐廳比到好大嘅驚喜我哋❤️真心希望可以繼續保持到呢個水準啦🙏🙏🙏…Read More

星期五，諗住同老公開開心心食餐好嘅。見到佢食評唔差，於是Walk in入去，要求我40分鐘交枱（6:20pm入去，佢問我可唔可以7:00pm交枱)。咁星期五多客我哋都明，餐廳都係想盡量做多啲客，而我又真係好想試下新野，所以都冇所謂，照入去。開開心心叫咗個二人餐（$59x),首先個吉列牛嚟到，其實係見到個樣已經唔係太想食，色水差。夾左兩舊牛上去個鐵板加熱，再放入口⋯首先外層個皮一啲都唔好食，吉列牛冇肉味。其實食咗頭兩件，已經好失望。好啦咁同老公食另一件牛扒，希望可以補足到⋯咁另外嗰件個樣就靚好多嘅，不過一放入口，口感好硬。加熱左好少少嘅，但係一樣係冇肉味。全個餐最好食嘅，係個薯條⋯⋯其實我係唔介意俾錢食好嘢，但係連加一收到六百幾蚊，而係呢啲質素（我同老公都覺得，大家樂牛扒都好食過佢), 我肯定講一句唔會再黎。又或者嚟到呢度只可以order平嘅餐咁就唔會有任何期望食完之後完全冇開心嘅感覺仲要搵地方食個甜品先覺得係冇浪費星期五嘅晚上…Read More

呢個係今晩嘅第二個外賣，（第一個外賣係幫襯food court 另一間餐廳，因為難食到食唔落，所以只好再買第二間餐的外賣）今次選擇左泰式船粉，係唔錯👍首先，外賣包裝有heart, 粉同湯分開裝，所以粉並冇發大。湯味非常濃郁，不過要提醒，假如食唔到辣嘅朋友，呢個粉係會越食越辣。咁泰式船粉本身係應該重味嘅，呢個粉亦毫不吝嗇蒜同蔥，係加分。牛腩好林，肥瘦適中。油菜爽囗，冇overcook。整體而言，個粉係令我有身處泰國嘅感覺。下次可以再試👍…Read More

同老公喺K11 上面間酒店度假兩日，係呢間冰室叫咗外賣買上房食。當時我真係非常肚餓，其實只要佢個味道正常，我好肯定我係會成盒食晒。老實講，我真係食過好多地方嘅肉醬意粉，因為肉醬意粉算係我其中一個至愛。只係，真心冇食過一間咁難食。我食到第二啖真係食唔落去，實在係太鹹。我唔明白點解一個肉醬意粉都可以整得咁難食。個感覺好怪，我好肚餓，但係真係食唔落，你話真係難食到幾緊要呢？老公叫咗焗豬扒飯，叫做正常。而我，要再買過外賣。呢間野，三個字：「冇下次」！…Read More

平時有入去食開燒味，都叫正常。冇諗過小菜係咁難食。放咗工，係攰到唔想行嘅情況底下，選擇咗入去呢間太興食，極度後悔。心血來潮，叫咗個魚香茄子肉碎煲，雖然我明白，食得魚香茄子煲，都預咗啲茄子係好吸油，但係我冇諗過係咁誇張。啲茄子好似比半煲油浸住咗，而且半點魚香味都冇。夾硬夾左啲茄子，撈下飯食，簡直係一啖一口油。有努力想「畢」走啲油，真係越「不」越有。講真果句，我食過唔少地方嘅魚香茄子煲，真係未試油到一個咁嘅地步。唔會再有下次。…Read More

一直以來我也是UCC的fans, 自從銅鑼灣世貿廣場的UCC結業，只好轉去就近的ucc 。今天襯放假，就腳到銅鑼灣廣場1期UCC歎個lunch,order 左一個煙肉雜菇意粉⋯⋯非常失望⋯意粉乾爭爭⋯D茹少到可憐⋯我食左咁多年UCc，未食過咁難食的意粉。唯一咖啡未變，叫做係一柸standard嘅UCC咖啡。從少到大在UCC有不少美好的回憶，可惜餐廳食物退步到此等質素。對於食物大退步，我真的非常失望。不會再來。…Read More