二三三's Profile

去到兆康站想搵野食，見到呢間比較多like 所以入嚟食。入到去2:00都算多人，揀左張近水吧嘅枱，坐低一陣，有個阿叔叫我坐過一兩個位，我就即刻照做，然後食物到，我食食下，佢一手張我放袋嘅櫈推入，完全無同我講聲，俾佢嚇一嚇。都算，俾多啲位佢哋出餐，點知過咗幾分鐘，後面張枱坐左個後生仔🤦🏻‍♀️ 難道咁樣唔係仲窄咩？點知同一個阿叔行過隻手仲撞到我，sorry 都無聲。唯有我自己轉左另一張枱。點知後尾有一對夫婦坐左我第一張枱，佢話阻住出餐嘅位。😫😫😫我淨係想安靜食餐飯，阿叔點解要咁做。…Read More

喺美麗華行完之後，就去咗附近嘅呢一間餐廳，見佢啲卡位幾舒服，又係茶餐廳，我只要求一般茶餐廳質素就OK了，所以入咗去食。點知真係好伏，我叫咗一個常餐叉燒意粉，配炒蛋火腿多士。炒蛋勁凍，火腿超級油，叉燒意都係好多一pat pat雞油喺上面。塊多士真係一絕，硬到好似食樹皮，炒蛋同火腿油到好似d油好似唔使錢買咁。我老公叫咗一個午餐粟米斑塊飯，鼻涕咁嘅 汁，魚就唔使講一定係雪藏，有雪藏味啦。不過我哋都覺得求其食飽就算啦，點知就出事。先係我老公屙咗幾次到夜晚都仲係好唔舒服，然後到我返到屋企又屙又嘔嘔咗三四次，半夜個胃痛到醒咗，起身再嘔過。我而家真係好辛苦，但係我都要完成埋呢一篇食評，唔想再有人中伏，自己小心啦！…Read More

如題，d炒蛋係好好味，但d伙記真係次次嘅服務都好一致同平均地差。好奇怪咁多人肯受氣去食。今次因爲夜去，差不多9:30，所以不用等位。叫左個餐有叉燒意粉，d叉燒浸到無晒味，d粉又淋，不好吃。炒蛋係無得輸，好香好味。杯熱好立克好淡，不過有奶香味，咁啱我喜歡淡味，所以覺得幾好。今次去坐卡位，對面係一對台灣遊客，d伙記普通話又聽唔明，d遊客問多句又嫌煩，真係好差，我身為香港人都好唔好意思。不過咁多年d態度都係咁，大家繼續受罪啦！…Read More

去攞回鄉證預約左都勁多人，於是去左隔離扒王之王食午餐。環境懷舊，老待應表現專業。全部食物包括湯、飯、餐包、飲品，極速喺落單後8分鐘內到齊。👍🏼我叫左午餐B蜜糖雞扒飯、忌廉湯、奶茶。原本無諗住寫呢篇食評，所以無影雞扒飯嘅相，但因為食物質素太差，所以不得不寫......雞扒一般茶餐廳質素無特別，但配菜煮到淋晒無味，飯多啱男人食，但得一塊扒，相對少餸。忌廉湯「杰」到好似糊仔。😖奶茶係我飲過咁多不同鋪頭最差嘅頭三位之一。總括來講，我不會再去，也不會推介，如果唔係等辦證，一定唔會去。如果你睇到呢篇文，而你嘅籌號仲有70個先到你，你絕對有足夠時間去附近其他餐廳食飯！50蚊仲要加一，即係55蚊，咁嘅質素......P.S. 時間參考：我等70個號碼等左一個幾鐘，食完午餐都仲等左over 半小時，夠你去影埋即影即有相。另外，即影即有有得影印埋身分證，回鄉證，共4元，平過喺櫃枱影（2蚊張）…Read More

中環有不少出名餐廳，但胃就得一個，揀左一輪，決定去「勝香園」，希望不會浪費我一番苦心。叫左：凍奶茶，澀左啲:(出名嘅茄牛，可惜賣晒通粉，只好叫麵。碗麵充滿左茄醬同蕃茄，如果偏好茄嘅人最啱，可惜我對茄只係一般。牛方面，韌左啲，感到失望，只係平同量多，不要要求質素。帶住失望嘅我，好想試埋個脆脆，於是外賣左個「檸蜜脆脆」，回家後和家人分享。竟然超級好味，而且仲係脆，味道又好夾，真係出乎意料脆脆絕對可以encore, 其他就免。…Read More

葵廣有多間壽司店，左諗右諗，始終揀左大滿足。叫左「大滿足山」先發現原來加左價了，由之前28變左30元，不過都仲食得過嘅。魚生同之前差不多，但今次食得出啲飯好硬，好似冷飯擺左好耐咁......希望有改善啦平日下午6點左右，等左十分鐘有得食。感覺上叫手卷等候時間會短啲。…Read More

附近開左間新麥當勞，即刻去幫襯下。一入商場見到，整個商場即刻有生氣左，亦都旺左。由於之前入左麥樂會，所以想用左張優惠卷，點知一入去格局十分奇怪。眼見有四部自助買餐機，再行入兩步，就有收銀機，但無職員負責收銀於是立即問下個路過嘅職員，一問之下佢先話「好丫，咁我幫你」再一次O咀，不過唔關職員事，佢地好nice,奇就奇在無安排職員喺收銀。我就好彩有人行過可以問到，咁其他人呢？話口未完，有個中年男士講電話「我等左個半字都無人幫我買餐呀」而且自助買餐機都無人幫手，有人又問另一位顧客部機點用。我都明初開幕係會有混亂，希望之後有改善啦。雖然有未完善地方，但其實餐廳都有可取之處，就係環境同設備。環境方面，餐廳比同區其他麥當勞大間，又有大玻璃窗感覺開揚，坐得舒服啲。而設施又係最新，自助機如果識用真係好方便。另外又有齊麥cafe同雪糕bar，一應俱全！是次用卷換左熱朱古力，細粟米同麥樂雞，再叫左一個脆香雞翼。食物質素同其他麥當勞無乜分別。午餐時間買，撞正附近學校放lunch, 幾乎成間餐廳都坐滿學生了。好多人買餐，但因為設備新，所以買完攞飛等叫號，所以都節省唔少時間，又唔駛排隊人貼人好迫咁等。如果熒幕大啲仲好。…Read More

一早食完飯，到9點左右又餓，咁晏school food已經無人等位了，可以即刻入坐。一入去即刻叫我摰愛「烏卒卒」$68，墨魚加上泡菜的壽司卷，少少辣又不會過分。就咁食就dry d，所以叫左杯熱「韓國柚子蜜」$28，偏甜，一邊飲一邊自己加水，但味道很好，飲品本身有一片檸檬，醒胃之餘同壽司卷好夾。值得一提係服務很好，很細心，大家做到就收工咁攰，都有咁好態度，抵讚啦！不過枱與枱之間好近，隔離講乜完全聽到晒要傾密計就最好搵第二間。建議：如果真係叫「韓國柚子蜜」，記得另叫一杯水，因為太甜要加水。溫馨提示：雖然間鋪收10點，但9:30左右會last order, 想食就唔好太晏了…Read More

10點未食飯，又唔想刻薄自己，於是衝去旺角一壽司食黑夜壽司，即係半價嘆壽司！去到全場幾乎滿座，不過等幾分鐘安排入坐就得。三文魚壽司都對版👍🏼芝士飛魚子蟹棒，偏咸黃金花枝海膽，海膽色澤奇怪，有潺凡立貝三食，乾:(花之戀👍🏼全部壽司偏細件，不過半價左$111左右埋單，算係咁。如果下次又咁夜未食飯，會再幫襯！提一提，每人最低消費為90元。…Read More

去到葵芳，除左係女人購物天堂外，食都係重點活動！短短幾個月開左n間壽司鋪，但當中最多人買同食，應該就係呢間「大滿足」。之前試過海膽手卷，好食又抵食，最重要係食完無肚痛今次就想試另一人氣食品「大滿足山」即係迷你壽司丼。賣相很好，魚生果然係多到成坐山咁，不過師傅要等幾張單一次過做，我等得比較耐，都有20分鐘以上。有三文魚，青瓜，蟹子等，當然都有海膽。不過今次海膽有腥臭味，比上次差。另外又叫左「帶子三文魚手卷」帶子同三文魚都幾新鮮，飯都夠晒多，不過紫菜較淋。總括嚟講，以呢啲價錢(大滿足山應該係30,手卷就2幾)，食到咁豐富壽司，已經好好。…Read More

去完崇光血拼，手軟腳攰，未到晚餐時間，但又好想休息一下，望下附近有coffee shop, 第一時間衝入去。星期五下午五點幾，入面都坐左唔少人，如果一至兩位，都容易搵位，多人就可能要等下喇。點左一杯cookie n'cream jollies, 對我嚟講就係一杯甜甜地好有咖啡香嘅沙冰。我認為杯飲品不是一個重點，重點係坐位！後面位置有幾張梳化位，剛好有一枱客人走左，我可以坐。將一切戰利品放低，然後嘆一嘆冰凍飲品，再同朋友send 下msg, 感覺超放鬆......…Read More

去到沙田想吃壽司，諗起呢間常常大排長龍嘅純壽司。由於平日晚去，而且6點已到達，所以不用等位。坐落立即單點我最愛嘅壽司，厚切三文魚，人氣三點盛，呑拿魚。好喜歡純壽司季節性嘅壽司推介，一向頗有創意同水準。今次就叫左秋季推介嘅「旬海鮮紫菜包」試下。「旬海鮮紫菜包」其實就係將幾款魚生連飯，放喺紫菜上面。賣相一流，食落海鮮都算新鮮，不過筋子較咸，建議豉油份量要小心，紫菜都比較淋。賣$32(另加一),都可一試嘅。人氣三點盛同呑拿魚壽司就不過不失。飯始終比較少，對比起價錢嚟講，多啲飯會成返正比例。而成餐最愛，當然係「厚切三文魚壽司」，無得輸！新鮮嘅三文魚，加埋厚切嘅口感，非常滿足。呢個就係一再光顧嘅原因。食飽飽就離開了，全程侍應態度都唔錯呀。順帶一提，6點半左右已經需要等位了，不過等嘅人不算多。另外，秋季限定到11月30日止，想試要快！…Read More

去到銅鑼灣，想一試秋光嘅天丼有幾滋味。心諗咁多媒體報導過，應該好多人啦，應該要等下位掛，於是6:15去到。一入到去o咀了，因為入面空無一人，變相包場了。二話不說，點一個招牌五目天丼($250,未計加一), 應該係即叫即炸，等大約20分鐘，食物終於嚟喇！ 賣相100分，五目天婦羅包括了穴子，元貝，蠔，南瓜，蟹腳。熱騰騰天婦羅加左特制醬汁，好味，再試埋個飯，都係好好味嘅。個人其實喜歡個飯比較多，因為飯吸左天婦羅嘅油，又要醬油嘅味，而且可免費要多一碟醬汁，啱晒喜歡濃味嘅我，正！不過食得十幾分鐘，開始覺得唔對徑。事關小妹只吃了一半份量，而且開始覺得飽。始終成碗炸野，又油飯，食物仲開始凍左，變得無咁好味了，結果拼命食晒啲天婦羅，剩左啲飯。奉勸一句，要量力而為，大夥兒吃會比較易預份量，始終天婦羅熱食最好味。…Read More

約九點半想食野,諗起「夢」有九點半後碟碟6元,一於試下。坐低先知原來只限迴轉帶上食物。但係帶上都有差不多6、7款,還可以啦,因為我只要有三文魚食就ok。我男友就鍾意食吞拿魚壽司,據佢所講,都幾好食。見到你想食0既就要快手喇! 手快有手慢無。一試無妨,但唔好咁大期望。迥轉帶上有三文魚、吞拿魚、鮑魚、加洲卷...…Read More