HAYDEN911's Profile

今日同屋企人諗住飲茶食點心，去咗中環嘅一間老字號蓮香樓，入邊仲係用傳統推車仔嘅模式，懷舊感十足😆入場之後人山人海，就算係平日下晝都堆滿咗客人，十分熱鬧。我哋周圍攞咗幾款點心，每樣都好出色。蟹籽燒賣大大粒，餡料豐富，有大大粒嘅冬菇、蝦仁。菜苗餃外皮有著軟糯嘅口感，裡面亦都好足料，有豆苗、鮮蝦等。懷舊蝦多士炸到金黃酥脆，十分香口，令人回味無窮。花膠魚翅灌湯餃湯底清甜，刺開灌湯餃嘅外皮裏面嘅花膠、魚翅、豬肉等餡料湧出，食完大滿足😆馬拉糕熱辣辣，咬落鬆軟，亦都唔會過甜，份量都好大嚿，夠哂飽肚。成餐飲茶最出色就係呢個燕窩椰皇燉蛋白，上枱嘅時候已經聞到一陣好香嘅椰香味，入口蛋白十分滑嫩清甜，冇諗過喺酒樓都食到咁出色嘅甜品😆下次會再試吓其他點心😌…Read More

今日同朋友去左銅鑼灣一間中菜廳食晚飯，叫咗一個夏日精緻套餐，食到唔少有驚喜嘅菜式😆✨紫砂功夫燉湯✨是日嘅燉湯係人參瘦肉湯，湯底清甜滋補，有淡淡嘅人參味，倒出嚟細細杯咁飲，好得意❣️✨前菜四小碟✨四小碟分別係香煎蓮藕餅、青瓜海蜇頭、子薑皮蛋凍，同埋黑魚子煙燻流心蛋。蓮藕餅煎得香脆，海蜇頭酸甜開胃爽口，皮蛋凍晶螢剔透，流心蛋煙燻味濃，一啖咬落去特別滿足。✨金鈎蒜蓉蒸勝瓜✨清清哋嘅一道菜，勝瓜新鮮，蒜蓉味濃，蝦亁大大粒，提升左整道菜既鮮味。✨香馥秘製脆皮燒鵝✨呢餐飯既戲肉，燒鵝皮脆肉嫩，肉帶甘香，調味適中，十分出色。…Read More

今日同女朋友慶祝紀念日，book 咗位於ICC 101樓嘅法國餐廳Odyssee，望住個無敵大海景，環境十分浪漫💕我哋叫咗一個$980嘅套餐，店員首先送上 cheese ball同埋幾款麵包俾我哋選擇，有酸種麵包、軟麥包等，款款都好好食😆首先嚟嘅係前菜三小碟，有春卷、牛肉他他同埋紅菜頭撻，十分精緻😍最欣賞係紅菜頭蛋白餅，面頭綿滑嘅紅菜頭mousse配上脆脆嘅蛋白餅，食落去好清新，非常特別 👍 之後嚟嘅係burrata cheese配無花果，burrata cheese十分絲滑，配上無花果嘅果香，層次感十足，打開味蕾，連平時唔食芝士嘅我都食哂😄之後嚟嘅會係法式洋蔥湯，上枱嘅時候比明火燒住，飲落去有浸煙燻嘅味道，唔會過鹹，整得好出色😋女朋友就叫咗藍龍蝦，採用咗慢煮嘅方式，龍蝦特別鮮嫩，配上龍蝦湯，鮮味十足🤩跟住嚟嗰度菜係煎馬友魚配蜆肉同西蘭花，魚肉煎到皮脆內嫩，沾上海鮮湯汁後，層次更上一層樓😆之後嚟嘅會係海鮮意大利飯，有八爪魚、蜆肉等配料，意大利飯整得好 creamy但同時亦唔會好滯，份量亦都係啱啱好😆另一個主菜就係美國牛柳，牛柳肉汁飽滿，配上旁邊嘅雜菜嫩牛肉，格外豐富。甜品送上士多啤梨疏乎厘配草本味雪糕，疏乎厘十分鬆軟，配上旁邊嘅雪糕，冰火相容。最後嚟咗個Petit Four，為晚餐畫上完美句號❤️…Read More

今日同朋友食咗一間唔錯嘅泰國菜，嘢食都幾抵食😆蒜茸包（4片）$48.0蒜蓉包焗得香脆，亦好厚，都算抵食。泰式虎蝦金邊粉 $138.0金邊粉好煙靭，每啖都好有咬口，醬汁酸酸甜甜好開胃。兩隻虎蝦又大又啖啖肉，好新鮮。配料方面，有豆腐、芽菜等等都好充足。整體份量好夠飽。藍蝶花蟹肉菠蘿炒飯 $138.0呢碟炒飯最有特色嘅位係粒粒藍色嘅飯，因為用咗藍蝶花炒，好有新意。菠蘿又大嚿又新鮮，仲好多汁。炒飯嘅配料都好充足，亦都提升左個飯口感同埋風味。斑蘭椰汁糕（4件）$48.0一食落口，斑蘭味好突出，味道好清新。之後椰奶嘅香味令斑蘭椰汁糕嘅味道好多層次。楊枝甘露奶蓋 $48.0呢個真係大推，鍾意楊枝甘露嘅朋友唔好錯過！奶蓋creamy 又唔會太甜，楊枝甘露嘅料好夠，最有特色嘅係入面有好多芒果啫喱同埋芒果果肉，食得好滿足。菠蘿熱情果茶 (凍）$34.0果茶有熱情果嘅香味，清新得來唔太甜。…Read More

今日同朋友去左中環一間中菜廳食飯，環境闊落，職員服務亦十分友善。我哋兩個人叫咗一煲飯同兩個餸，食物質素都好高，食得出係正宗嘅潮州菜😆⭐ 滷水雙拼—滷水鵝片及白烚大墨魚⭐作為一道潮洲招牌菜，鵝片同大墨魚都鹵得十分入味，配上豆腐吸收哂啲滷水精華，簡直大滿足❣️鵝片唔會過靭，肥瘦均勻，又唔會太肥膩；墨魚清爽彈牙，咬口十足。⭐潮州蠔烙⭐另一道招牌嘅潮流菜，蠔餅煎得金黃酥脆，入面亦都好足料，充滿著蠔仔既鮮味，加上適量嘅芫茜同胡椒粉再作昇華，更添風味。⭐芋頭香飯煲⭐上枱打開蓋嘅時候芋頭嘅香氣撲鼻而來，份量亦都好大，夠兩至三人分享。香飯煲鑊氣十足，粒粒分明，配上雞粒、豬肉粒、芋頭等材料，層次感十足😆🌟 綠豆爽及功夫茶🌟用餐完畢後送上綠豆爽以及功夫茶，綠豆爽唔會過甜，清甜解渴，最後嘅功夫茶可以消消滯，為此餐畫上完美句號💕。…Read More

我同朋友去咗沙田嘅 Here Thai Market，想試下佢哋嘅泰國菜。呢間餐廳環境舒適，裝潢簡潔而富有泰國風情。1. 牛肉船麵（米粉）湯底濃郁、米粉好掛湯好好食。配料亦都好充足，有牛肉、牛筋、炸豬皮。特別係牛肉，質感滑嫩2. 泰式豬頸肉炒金邊粉金邊粉好彈牙，酸酸甜甜仲有啲微辣，非常開胃，特別啱夏天食。豬頸肉好彈牙，唔韌，同金邊粉好夾。份量唔算大，一個人食啱啱好3. ⁠泰式炒椰菜椰菜炒得好腍，淋上蒜味嘅醬汁，用嚟送飯好正4. ⁠雙芒椰奶西米冰呢個西米冰上層係香甜嘅芒果西米，下層係濃郁嘅椰奶，口感層次分明，食落去非常清新5. ⁠龍眼冰（加仙草）&泰式奶茶龍眼冰好特別，飲落好清新，龍眼肉又好爽甜，加埋仙草口感仲豐富。至於泰式奶茶，味道濃郁，唔會過甜Here Thai Market嘅嘢食好高質又地道。鐘意泰國嘢嘅朋友一定鍾意，唔好錯過呢間餐廳呀🙃…Read More

今日同屋企人去左觀塘一間餐廳食西餐，環境同食物質素都唔錯，集齊扒房、cafe於一身，食完大滿足😆🌟 Lychee Rose Ale 🌟荔枝玫瑰梳打飲落清新，亦都唔會太甜，飲落解暑解渴。🌟 雜莓乳酪碎冰🌟份量幾大杯，碎冰整得十分綿密，夏天飲落好舒服。🌟蘑菇松露忌廉湯🌟上到枱嘅時候仲係熱辣辣，忌廉湯濃郁，好重蘑菇嘅香味，仲要打哂泡，飲落好順滑。🌟Cobber Noodles 🌟微辣嘅茄醬意粉配上爽彈嘅大蝦，十分惹味，食完一啖又一啖。🌟美國安格斯肉眼🌟叫咗五成熟嘅肉眼，食落去鮮嫩多汁，咬落去啖啖肉無筋，配上蒜片、兩款醬汁同埋鹽粒，多種風味，多種體驗，大飽口福😆🌟黑松露醬薯條🌟薯條份量勁多，配上滿滿嘅黑松露醬，十分邪惡，但係亦都好滿足。🌟白桃荔枝忌廉配新鮮無花果梳乎厘班戟🌟梳乎厘入口即溶，配上白桃荔枝忌廉同埋新鮮無花果，充滿住花香同埋果香，為晚餐劃上完美嘅句號。😆…Read More

今日同朋友去咗銅鑼灣嘅Vol1 Cafe食晚餐，價錢合理，食物質素高，值得推介。🌟 卡邦尼手工圓粗麵🌟餐廳嘅招牌係手工意粉，而呢一個卡邦尼手工圓粗麵好正宗，手工意粉有咬口，配上非常濃郁嘅芝士醬，同輕輕炒過嘅煙肉，值得推薦。🌟慢煮白松露雞胸配南瓜意大利飯🌟呢個南瓜意大利飯亦都係另一招牌，risotto嘅質地做到啱啱好，配上綿滑嘅南瓜蓉，慢煮白松露雞胸食落亦唔會好嚡，整體嚟講非常值得一試。🌟Vol.1脆皮地瓜薯條🌟地瓜薯條比較少見，大大碟，炸到金黃酥脆，令人一啖接住一啖，停唔到口。🌟荔枝玫瑰寒天梳打🌟飲品亦都好高水準，賣相非常之靚，飲一啖充滿荔枝味同埋玫瑰花香，非常清新。🌟抹茶巴斯克蛋糕 🌟 蛋糕上面有一層奶蓋，令到蛋糕食落更順滑，巴斯克蛋糕質地做得十分綿滑，抹茶味都唔會太苦。總結嚟講，呢間係一間非常高水準嘅Cafe😆埋單仲要要$500有找，性價比極高❤️…Read More

今日同女朋友去咗尖沙咀厚福街樓上一間居酒屋食串燒，價錢合理，食物選擇多元，質素亦都唔錯😆我哋叫咗幾款串燒、小食、同埋一個炒烏冬，每款都好出色😋🌟串燒類🌟一口牛舌芯串：牛舌芯十分厚切爽口，牛味濃郁，回味無窮。三色雞頸肉：比雞腿肉肉質更結實，咬落爆哂汁，值得推薦。蘆筍豚肉卷：清甜爽脆嘅蘆筍配上薄薄的豬肉卷，口感豐富。柚子胡椒雞腿肉：最欣賞嘅一串，飽滿嘅雞腿肉配上清新惹味嘅柚子胡椒中和油膩感，十分出色。焦糖菠蘿：鮮甜嘅菠蘿配上微微焦脆嘅焦糖，一直都係食串燒嘅必點😍🌟小食類🌟爆脆噴汁吉列蠔：炸物係即刻炸起，咬落去熱辣辣爆曬汁，鮮味十足，蠔亦都幾大隻。明太子芝士玉子燒：滑亂充滿蛋香嘅玉子燒卷住滿滿嘅芝士，配上明太子醬，邪惡得嚟又特別滿足🌟主食類🌟黑松露雜菌炒烏冬：份量幾大份，鑊氣十足，烏冬採用咗比較幼身嗰一種，入口滑溜，配上黑松露同埋各式嘅菇菌，係飽肚嘅好選擇😆埋單用咗六百幾蚊，性價比亦都算高，用來聚會一流。…Read More

今日約咗一個好耐冇見嘅中學同學敘舊，去咗銅鑼灣Sugar+ 食鐵板燒。😆我哋叫咗一個鐵板燒餐，食物款式多樣，而且食材質素極高🤩🌟 自家製醬汁煮南非鮑魚🌟微甜嘅自家製醬汁配上軟腍入味的鮑魚及蘿蔔，打開味蕾，為此餐開啟序幕。🌟 季節刺身三款 🌟 三款刺身包括油甘魚、深海池魚以及右口魚，全部都十分新鮮，最欣賞既係右口魚，輕輕炙燒過，逼出魚油嘅香味，格外深刻。🌟海鮮茶碗蒸🌟滑嫩嘅蒸蛋配上滿滿嘅蟹肉同帶子肉，鮮味十足，份量亦都不少。🌟金䱽魚腩手卷🌟與一般既手卷不同，使用脆餅作為基底，配上微辣嘅金䱽魚腩蓉以及醋飯，十分特別。🌟季節吸物🌟是日吸物為大蜆清湯，有著淡淡嘅海鮮鮮味，暖胃一流。🌟野生生猛龍蝦🌟之後來到鐵板燒嘅部分，首先送來嘅係從餐廳魚缸即捉即劏嘅澳洲龍蝦，配上蒜蓉、胡椒、特製醬汁調味，蝦肉十分彈牙新鮮，係今晚嘅MVP😆🌟香煎鵝肝配自家製醬汁 🌟肥厚既香煎鵝肝配上脆多士，配上自家製嘅黑醋汁中和油膩感，入口層次感十足。🌟日本宮崎和牛🌟厚切日本和牛入口即溶，充滿著滿滿嘅肉香，伴上蒜片同沙律作為配菜，十分豐富。🌟煙肉香蒜炒飯🌟師傅用蛋漿、蒜粒、蔥花、煙肉等炒飯，配上半熟既太陽蛋，食完呢碗飯已經好飽🤣🌟炒什菜🌟食完炒飯後會有碟炒什菜，夠哂鍋氣，配上旁邊既蒜末，更添惹味😝🌟甜品🌟是日甜品係綠茶紅豆布甸，茶味濃郁，為此餐劃上完美句號。…Read More

今日去咗灣仔動漫展，完咗之後同朋友去左修頓附近食飯，發現咗呢間港式粉麵店，聽聞係已經傳承咗50多年嚟嘅味道。我哋簡簡單單叫咗一個坑腩四寶撈粗同埋湯河，除咗牛腩之外，有齊魚蛋、魚片、牛丸、雲吞。魚蛋魚片爽口彈牙，魚片更是標榜每日新鮮炸好，真材實料，食落真係同出邊唔同，更有魚香味。牛丸牛腩亦都十分出色，牛丸彈牙有咬口，牛切腩炆得好入味，口感外爽內軟，亦都有整整五塊，十分滿足。雲吞都好大粒足料。對比湯河，撈粗麵吸收晒豉油嘅甜香，配上爽彈嘅麵條，個人更加欣賞。另外朋友係「多士控」，我哋帶齊餐廳兩款唔同嘅多士，分別係鮮油奶多士同埋西多士。多士配上鮮牛油同埋煉奶，加倍邪惡；西多士炸得香脆，配上滿滿嘅糖漿，幸福感倍增。另外我哋都嗌咗蠔油時菜，一杯雜果賓治，同埋一杯忌廉紅豆冰，亦都十分不錯。總括而言，呢間粉麵店性價比高，食物質素不錯，值得推薦。…Read More

前排約咗朋友喺太子行街，行到攰就去左覓食，發現左一間好有文青風嘅cafe，裝修新淨，食物質素亦都十分唔錯😆我哋叫咗一個$478 嘅雙人套餐，包哂兩款飲品、一款小食、兩款主菜同一款甜品，夠哂豐富🤩🌟白桃芒果冰茶🌟冰茶充滿果香，入口清新，甜度適中，配上薄荷葉作點綴，解暑解渴一流。🌟是日餐湯🌟用金寶湯罐裝住嘅餐湯，好特別，玩味十足😆當日係南瓜湯，入口順滑，有淡淡嘅南瓜同忌廉香，份量亦都唔少🤤🌟柚子蜜糖雞翼🌟雞翼沾上酸酸甜甜嘅柚子蜜糖醬，打開味蕾，好開胃，食完一隻又一隻😋🌟黑松露雜菌粗管通粉🌟上枱嘅時候已經聞到好濃郁黑松露嘅香氣，配上唔同嘅菇類，口感層次豐富；粗管通粉好有咬口，吸收晒啲黑松露醬，係一道十分出色嘅主菜。🌟香煎味噌比目魚🌟比目魚外皮煎得焦脆，內裏肉質好嫩滑，而且無骨，配上側邊嘅香橙醬，層次更上一層樓❣️🌟宇治抹茶牛角窩夫🌟牛角窩夫整得好脆口，仲有微微嘅芝士香；配上抹茶雪糕、紅豆麻糬，為呢一餐畫上完美嘅句號😆…Read More

最近同朋友行完街之後，喺深水埗發現咗一間質素超高嘅火鍋店😋我哋叫咗一個精選二人套餐，$468包哂小食、鍋底、肉類、丸滑類、時菜、主食，簡直物有所值🤩🌟竹蔗茅根 🌟 餐廳首先會遞上飲品，我哋叫咗竹蔗茅根水，清熱解毒😆🌟 黃金炸魚皮🌟魚皮炸得好脆，配埋鹹蛋黃醬，雖然好邪惡，但係真係好食到停唔到😋如果想冇咁熱氣仲可以浸一浸湯底😆🌟芫荽皮蛋豆腐湯🌟芫荽味好濃郁，睇得出係攞真材實料；啱晒芫荽控嘅我😆仲有超多滑豆腐😍🌟極品封門柳（大）🌟上枱嘅時候夠晒震撼，有足20片牛柳，脂肪比例均勻，每片碌八至十秒，全部都好嫩，牛味濃郁，食完一片又一片🤩🌟 手打丸雙拼 蝦丸 墨魚丸 🌟 丸類全部都好彈牙，食得出墨魚粒和蝦粒，手工製造，絕對落足料😆🌟 自家製餃子雙拼 鮮蝦雲吞、黑松露豬肉餃 🌟 雲吞皮薄餡靚；黑松露豬肉餃之前冇乜食過，都幾特別，黑松露味好突出😌套餐入邊仲有時菜、豆腐同埋稻庭烏冬，夠晒滿足😋🌟卜卜蜆🌟套餐之外，我哋仲點咗卜卜蜆，隻隻都新鮮大隻，抌落鍋開晒口，全部都鮮甜冇沙，值得一讚 👍 整體而言，呢間餐廳食物質素高，值得再訪。…Read More

今日同朋友去左旺角附近覓食，平時冇乜留意到女人街旁兩側有唔少餐廳，今次俾我發現到一間西餐廳，性價比極高。🌟酥皮湯🌟我哋前菜叫左兩個酥皮湯，送上嚟嘅時候熱辣辣，酥皮嘅牛油香配上綿滑順口嘅粟米忌廉湯，份量都幾大碗，飲落十分暖胃。🌟白布烏冬配油封鴨髀🌟喺香港比較少見，份量都有十幾片白布烏冬。一片片滑捋捋嘅烏冬配上冷凍嘅芝麻醬，解暑開胃，啱哂依家出面熱辣辣、冇乜胃口嘅我哋。油封鴨脾都幾多肉，以鹽、胡椒等調味，調味恰好，不會過鹹，唯獨略嫌肉質較硬。🌟威靈頓牛柳🌟一大塊嘅威靈頓牛柳，配上粟米、翠肉瓜等，以鐵板送上，保證熱辣辣。牛肉叫左五成熟，外面嘅牛油酥皮十分脆口，內面嘅牛肉則十分軟嫩，熟度恰好，點上特製嘅黑椒汁，無比可口，但唯獨欠缺了中間磨菇醬嘅香氣和味道，但以$98嘅價錢，收貨有餘。🌟飲品🌟兩杯飲品分別為Sky Blue和Fruit Punch，前者為一種藍色西柚嘅沙冰，後者為一種芒果同菠蘿汁混合嘅水果賓治，兩款都十分解暑。🌟甜品🌟甜品叫咗焦糖燉蛋，外面焦脆嘅焦糖配上內裡軟滑嘅嫩蛋，唔會過甜，為晚餐劃上完美句號。…Read More

今日同朋友去咗尖東食燒肉，食物質素不錯，最重要嘅係服務一流🤩我哋叫咗個$298二人餐，食物款式都好豐富😝牛肉方面，有老太太特色肥牛、瘦牛；肥牛食落油脂豐富綿滑，但略嫌過油；瘦牛肉質鮮嫩，入口即溶；調味適中。雪花肋條油脂分布均勻，咬落無筋，肉味濃郁；特味雞腿肉帶微辣，調味較濃，但十分惹味。餐廳嘅特色招牌菜係香翁鳳梨牛排，新鮮整大片嘅牛排肉加上酸酸甜甜嘅菠蘿一齊放上鐵盤上燒，菠蘿嘅鮮甜中和咗牛排肉嘅油膩，食落十分特別，值得一讚。另外餐裡亦都包括咗小磨菇一份，燒好嘅磨菇中間會出咗水，飲落好清甜。餐入面亦都入唔同嘅調味料，任添生菜，同埋牛肉海帶湯，食完滿載而歸。值得一提嘅係，店員全程會幫你燒嘢食，完全唔使擔心燒過龍或者生得滯😆…Read More