kapo leung's Profile

對上一次來已經是超過半年前既事，今晚得一個人食飯，又想搵個地方慢慢坐下睇下書，想起難得糊塗，所以就過來糊塗一下。地方無乜點變，但見佢貼左好多舞台劇“小城風光”既宣傳卡，問返經理，發現係佢地免費比呢啲文化藝術團放宣傳品，以支持藝術創作，抵讚!今晚泥到時已開始多人，好彩我仲有位坐，無訂枱，只好同人搭枱，不個一個人無乜所謂啦～今日叫左羊架餐，質素比上一次來好左好多，湯係雜菜湯，味道比較清淡，都可以啦，不過羊架百五蚊的確抵食，出面食開絕對食唔到咁既質量，仲有大大顆許願樹，應該係炸公仔麵，非常有創意。最後加多杯熱朱古力咖啡就完滿了。…Read More

一直好喜歡台式小清新CAFE，早前響OPENRICE見到太子竟然開左一間如此風格既CAFE，咁就梗係要泥試下啦。一入到去，有驚喜喎，落地玻璃大窗，對面係英式建築既太子警處，好開揚，VERY NICE！但最令我感到驚喜既係，呢度竟然有個茶壇，仲係好認真果隻，而我去既時候，好好彩茶藝師有坐陣（茶藝師講佢唔係成日響度），見朋友未到，而我作為一個八掛精，梗係唔客氣不斷試茶同問下茶既知識啦，茶藝師好有心教左我點分生熟普洱，茶既好多特質，真係好開心啊！問左人地咁多野，我當然識做叫返一SET茶泥飲啦，今次試左隻唔記得左乜乜普洱黃片，茶味好清幽，聞落去仲有一陣陣人蔘味，同平時酒樓飲既普洱真係好唔同啊！P.S. 感謝茶藝師借左隻紫砂壼比我照相啊！進入正餐，初時以為通常CAFE無咩食，應該都係得三文治沙律之類，點知原來佢餐牌食物總類都幾多，我覺得其實呢度更類似一間意式西餐廳多過CAFE。本來我同朋友想叫二人套餐，因為價錢好抵，但侍應不斷推介我地試佢地既特式菜可樂焗春雞，咁我梗係試下啦。呢隻雞一上枱，我同朋友都忍唔住嘩左一聲，見佢成隻雞企左響度，都幾震撼，哈哈！隻雞出爐好鬼熱，雖然跟手套同鉸剪一齊上，但熱辣辣真係有啲難控制，不過都幾有趣既。隻雞外層無乜可樂味，但味道YIM得好好，成隻雞好軟滑，一啲都唔鞋，而通常好唔鍾意食既雞殻部份，因為入左可樂甜甜地既味，竟然都不知不覺得食晒，仲係兩個人搶住吃，正！另外叫左一個焗豬扒飯，中規中矩，唔差，又唔太特別，可能隻雞太好味，呢個飯就比下去左了。朋友食完叫左個普洱奶茶，佢話味道好特別，有花香味，等我下次都試下先。總括而然，呢度既食物同飲品性價比一流，約朋友食飯既好去處，唯一係二人／四人餐無得跟個雞，咁想食雞又得兩個人就焗住散叫了。…Read More