sakaneko's Profile

約了同朋友一齊食飯傾偈，朋友話呢間嘢的意粉幾好食，我不嬲都鍾意食肉醬意粉，所以自問對意粉嘅要求都幾高。舖頭嘅裝修走一個歐洲木質田園風格，差唔多三點先去到食，可能過咗高峰期人數唔算多。環境舒適，二人/多人聚會都冇問題。我哋叫咗一個主菜，兩個小食，兩杯嘢飲同一個甜品。作為招牌的Cobber Noodle果然冇令我失望，意粉相當入味，蕃茄肉醬酸甜適中，口感濃郁但唔算十分濃稠，醬汁在味道同黏度上都攞到一個很好嘅平衡。馬蘇里拉芝士焗薯蓉帶子，芝士味道濃厚，帶子很滑，薯蓉奶油味重，口感亦都很順滑。蜜糖芥末雞翼都好食，外皮有啲脆脆，裏面雞肉嫩滑，調味適中，好味～甜品叫咗蜜瓜配竹炭糯米窩夫。本人除咗係個意粉控之外，都係個蜜瓜控😂 之前特登去日本就係為咗食蜜瓜，但我估唔到係香港餐廳都可以食到差唔多甜度嘅蜜瓜，有點意外。窩夫裏面有糯米，咬落又脆又軟，配埋上面嘅雲呢拿雪糕同焙茶醬一齊食，認真好夾好好味🥹簡單總結：Conner Noodles 必叫竹炭糯米窩夫+雪糕+焙茶醬 必叫…Read More

位於觀塘鱷魚恤中心的秋田冰室，提供舒適別致的用餐環境，將經典香港茶餐廳風格與創意融合菜式巧妙結合。明明店名很日式，但菜式都係香港茶餐廳普遍可以見到的，除咗入面啲招財貓之外，感覺同日本冇乜關係😂 吃的時候剛好是晚市，餐廳上菜速度很快。服務員態度良好，基本上都有求必應。第一次食，試了蒜蓉紐西蘭西冷牛扒配餐湯＋自家製餐包+薯菜，牛扒五成熟，蒜蓉汁。餐包上的時候已經切開一半並塗了牛油。羅宋湯盛在簡單白碗中，作為開胃湯品，呈現深紅色澤，每一啖都充滿蔬菜的豐厚口感，酸甜平衡。等了一陣鐵板牛扒終於來了，焗薯仔切開一半，中間塗有焙麻醬，質地很軟腍。西蘭花味道比較清淡，冇特別調味。作為主角的西冷牛扒，肉塊厚實嫩滑，外層焦香誘人，脂肪適中。不得不說的是牛扒份量超級大，大概有三個成人手掌咁大，而且厚度有大概2cm，一個人食講真有點勉強，如果兩個人share就應該啱啱好。至於紅豆冰，店家牛奶用3.6北海道牛奶，紅豆甜，夠大杯。總括而言，冰室嚟講價格唔算特別平，但食物份量冇同你慳的，質素都唔錯，普通一餐茶記黎講值得一試，可以多幫襯的。聽朋友講小炒都幾好味，下次再試😂…Read More

位於黃埔的杉玉Sugidama HK，巧妙詮釋了傳統日本居酒屋的精髓，其室內設計以木質傢俱為主軸，輔以柔和的照明系統及溫馨的裝飾元素，營造出親切而舒適的用餐氛圍。這種環境不僅適合下班後的輕鬆小酌，亦能為友人小聚增添幾分日式風情的愜意。侍應生態度熱誠且具專業素養，無論是菜餚推薦抑或服務流程，皆能確保賓客享有順暢而愉悅的體驗，從點餐至結帳環節均顯得井井有條。菜餚方面，今次品嚐的品項涵蓋多樣小食與主菜。首先，南蠻炸雞堪稱亮點之作，其外層酥脆金黃，內裡肉質柔嫩多汁，完美鎖住雞肉的鮮美原味；調味方面，酸甜醬汁精準協調，帶來平衡的口感層次，避免了過度油膩的缺憾，令人回味無窮。接著，西班牙風蒜油帆立貝伴法式麵包，蒜香濃郁撲鼻，帆立貝的鮮嫩質地與蒜油的豐富風味相互交融，配以鬆軟的法包，構成一道風味獨特的開胃前菜，適合用作餐前暖身。另一道赤貝裙邊拌青瓜，則強調清脆新鮮的口感，赤貝裙邊的脆度尤為突出，拌入青瓜絲後增添了爽快的蔬菜脆感，整體調味清新不膩，作為涼菜極為適宜。明太子玉子燒則以滑順質地見長，蛋香濃郁中夾雜微甜滋味，明太子的鹹鮮點綴其中，創造出多層次的味覺體驗，適合搭配清酒享用。至於豆腐沙律及枝豆，則維持標準水準，前者以豆腐的細膩搭配新鮮蔬果，後者則以簡單蒸煮保留枝豆的自然甜味，雖無明顯驚喜，但作為配菜已足夠稱職，無明顯缺失。總體而言，杉玉Sugidama HK的菜餚表現中庸穩健，無重大瑕疵，價格定位合理，適合追求日式居酒屋氛圍的食客前來。無論是獨酌還是小團聚會，此處皆能提供一個放鬆的空間，讓賓客在忙碌的都市生活中尋得片刻寧靜。若欲提升整體體驗，建議搭配店內的不同清酒，以增添風味。…Read More

去沙田行街睇戲，發現咗呢間幾隱蔽嘅「KOKA 小野人」，專門做串燒同特色炊飯，環境走舒適路線，有好多卡枱位，坐得幾自在。店員服務貼心，會主動介紹菜式同優惠，今次我登記做會員，仲送咗3串大漠燒羊肉串，感覺好抵！整體嚟講，呢間店唔洗過大陸都可以食到高質四川串燒，選擇有走辣同小辣，適合唔同口味人士。食物質素唔錯，雖然有啲細微地方可以改善，但總體值得一試。大漠燒羊肉串（$19.8 / 2串）羊肉燒得香濃，微辣嘅調味帶出肉汁，食落惹味又爽口，肉質柔軟唔太乾身。不過有淡淡嘅羊臊味，如果介意羶味嘅人可能會覺得稍嫌，但整體水準唔錯，尤其係會員送嘅額外3串，食得多都唔膩。蒜蓉烤新鮮生蠔串（$53.6 / 2隻）生蠔新鮮大隻，size適中，一啖可以食曬。落咗好多蒜蓉燒到金黃香脆，配微辣味道，突出蠔嘅鮮美同海水味，完全唔會蓋過蠔肉嘅肥美。連汁一齊食，鮮味爆棚，真係呢道菜嘅亮點！小野人手打檸檬茶（$28 / 跟餐）都好飲～杯份量勁大，酸酸甜甜，好解串燒嘅油膩感。食重味野之後嚟一杯，感覺清新好多，但加錢都要28有少少貴。燒牛肉湯面（$59.9）湯底味道不錯，正常水準，牛肉似日式肥牛，嫩滑易入口。跟餐送咗小茄子，都幾好食，增添咗少少變化。不過整體冇太大驚喜，算係中規中矩嘅一碗。小野人係沙田一個舒服嘅串燒選擇，環境好、服務周到，食物新鮮有質素，特別適合想食串燒又唔想太飽嘅時候。雖然羊肉有啲羶味，但其他菜如生蠔串真係令人念念不忘。下次encore機會大，尤其係會員優惠又可以儲分換野食咁吸引…Read More

最近同朋友行經朗豪坊，見到「霸王 · 烤鴨 · 小館」門口標明免茶錢免加一，呢類餐廳喺香港真係好少見！睇埋餐牌，所有食物都好平民價，2個人決定試下，點知一試就真係覺得唔錯！片皮鴨一上枱就已經好吸睛！鴨皮賣相脆卜卜，食落去真係脆口又香，鴨肉嫩滑唔乾柴，仲配埋山楂條包住嚟食，感覺好開胃，超正！最細心係下面有個熱水保溫座，鴨餅同鴨肉都保持住暖暖的，唔會凍得快，食到最後都一樣美味👍🏻食到最後有啲濟，但可以免費茶飲黎解油膩感～另外，鴨肉湯好鮮甜一定要叫，可以免費飲添，暖笠笠好解渴。整體份量夠飽，2個人食晒都好滿足！呢間小館真係CP值唔錯！片皮鴨唔錯，服務貼心，無任何附加收費，埋單$188，仲無限食飯時間，食得舒服又唔趕。下次一定再黎試其他菜式，推介畀鍾意烤鴨嘅朋友可以試試～…Read More

究極丼（$218）咁大個人未試比二百幾蚊食一碗丼飯，心諗：下？一碗飯仔要二百幾？食唔食得飽架？但試過之後發現其實係我眼淺，呢碗丼飯，抵比。首先擺盤靚，打卡影相po story經營生活，等啲鍾意食日本野既囡囡dm你問係邊到黎，即刻就有機會約人地食飯了。就算唔講呢個，講返啲餸啦，個丼有好幾款刺身海鮮，望落去新鮮肥美，叫得出名既就海膽三文魚蝦同帆立貝，其他都唔太肯定😂 （非專業食家）全部都係一致地無違和地好食，食小小放埋堆紫菜同蛋黃落去撈，真係一流。啲飯原本已經有味，撈埋落去口感就更加豐富了。雖然未發達到可以鍾意食就叫黎食，但係呢碗丼飯，我覺得一生人點都要試一次，幫你重新定義一下「好味既海鮮刺身丼飯」。…Read More

首先第一樣野：環境十分唔衞生，洗餐具個陣發現竟然可以洗出油，我嚴重懷疑佢哋為左慳錢冇請到洗碗工人。上菜個部分先係最恐怖，食食下先發現佢碟野入面送原隻大曱甴，場面核突至極，極度嘔心，完全不能夠接受，告知店主後，佢地表示會打折，最後只係平左二十蚊，你當我地係咩？乞衣？同埋碟蟹完全唔新鮮，啲肉又乾又化，成碟野得個幾舊蟹肉，其餘全部都係配料。我本身腸胃差，淨係買藥食都用成舊水，第一次食飯食到咁委屈，完全唔推薦，見到呢篇食評既你哋千祈唔好去食啊😭😭😭😭…Read More