raymond17's Profile

下午茶時間，求其搵間餐廳入， 見佢買啲食品幾特別就去試下，初初驚住要等位，點知入到去得兩台客，已經心知不妙！首先，冷氣唔夠，一路食一路流汗， 叫咗小籠包、生煎包、 雞絲涼拌粉皮、招牌豬扒菜飯，所謂招牌生煎包唔熱嘅！ 小籠包同生煎包內餡一樣，實滴滴！ 涼拌雞絲粉皮唔凍嘅！ 麻醬淨係得麻味，唔咸又唔甜，招牌豬扒菜飯，個豬扒係一般吉列豬扒，還可以吃得吓，個菜飯又爛又冇味，難食！叫咗三樣嘢139蚊，只收現金， 我唔會再嚟囉！…Read More

同朋友晚飯，都係三聖邨， 不過今次試新嘢， 去咗間新店叫‘’薈廷‘’， 第一要讚係訂位時候，店員態度親切； 星期五晚唔算多人，叫了網友推介燒鵝半隻， 味道唔錯， 另外有五個海鮮 ，樣樣都做得幾好味， 鹽焗膏蟹、 豉椒炒蟶子米粉底、 砵酒焗蠔、 炆龍躉腩，樣樣水準都幾好，特別稱讚蒜蓉粉絲蒸貴妃蚌， 唯一要彈嘅就係帶酒去開要收錢開瓶費， 每支50 ，我開咗兩支酒，佢收咗我一支； 整體收費上算合理 ，千二蚊海鮮， 店家總收費千三蚊 ，值得再次光顧。…Read More

朋友飯聚， 隨便響openrice 搵間評分高啲嘅，見佢係主打西班牙菜，香港比較少有， 就去試下。首先叫咗個前菜 ‘’蟹肉他他‘’， 外觀係靚嘅，味道ok嘅，不過蟹肉係罐頭嘅！ 叫咗個四人套餐 ，老實講所有食物都好一般， 西班牙海鮮飯，真係唔好同西班牙嘅比較， pizza完全唔得 ，燒春雞係最好食嘅一樣， 黑毛豬扒係鞋嘅！ 另外一樣要批評嘅係冷氣真係唔夠！全晚飲咗四支紅白酒 ，埋單二千三百幾 ，唯一可以讚嘅係其中一位waitress嘅服務態度 ， 每次飲唔同嘅紅白酒，都同我哋換一套杯。你問我會唔會再去，應該唔會！…Read More

朋友遠渡回港約埋飯局，由佢揀咗呢間回味軒， 我哋從來未食過。不過首先講服務就已經唔係好滿意！ 因為我哋想帶支威士忌去，所以打去問下要收幾多錢，但係打電話去冇人聽，佢有個whatsapp熱線，咁我响食飯當日下午一點幾留言查詢，但要等到第二日嘅四五點先覆，仲一句唔好意思都冇！講到食物，我哋四個人叫咗個四人套餐， 一千三百幾 ，裏面包括有西班牙豬、和牛同埋海鮮拼盤，麵、烏冬、菜、餃子等， 首先講和牛一般般水平，細細碟，西班牙豬ok啦，當然冇日本 豬咁好食 ，海鮮拼盤個賣相係ok嘅， 但係帶子係冰鮮嘅，個殼係裝飾㗎咋 ， 蠔係一般桶蠔 ，蝦係新鮮嘅，不過都係普通貨色， 波士頓龍蝦係新鮮嘅，不過啲肉好削， 麻麻地！全餐飯最好食係嗰幾隻餃子，其餘火鍋嘅嘢，最緊要新鮮啫 。埋單四個人連埋加一1500幾 ，你話係咪貴又唔算太貴 ，但係係咪好好食我又唔覺囉！ 會唔會再幫襯？應該唔會呀！…Read More

上星期去食咗個午餐，本身好少幫襯，果日路經此地，貪佢易揾位，就食個午餐。午餐原全冇得選擇，只得一味 沙嗲烤雞飯，心諗應該都穩穩陣陣！飯到了一食，依……酸嘅，揾個侍應問吓有冇攞錯咗，個侍應問完廚房出來話: 個雞扒用沙嗲奄過，但個汁係酸汁！！！話……咁都得！下次我叫咖啡，你咪可以比柸奶茶我，話個杯用咖啡冲過啦！食好野要排隊真係定律！…Read More

今日放假，諗住去嘆個 All day breakfast，途中撞到個朋友，都話呢間野麻麻，但反正一個早餐啫，都去試吓！老婆叫個雞肉意粉，我叫最貴果個早餐，兩柸咖啡上枱個心已經涼一涼，我諗住呢hea吓㗎，你用兩個紙柸裝咖啡比我，用$82買個早餐，杯咖啡實在唔得囉！雞肉意粉上枱，賣相一般，意粉偏硬，我麻麻，雞肉死實實，低水平!早餐來了，㸃解會有支沙律漿放咗响d炒蛋旁邊，個樽乾唔乾淨㗎！成個set即刻cheap晒！所謂 All day breakfast，每間餐廳都應該有自家特色，但這裡只是把一般早餐都會岀現嘅食物放咗上個木盆倒，$82 唔值囉！side咗我一個美麗嘅早晨!…Read More

好耐無去 Pizza Hut，因為佢地除左個pizza叫做好少少之外，其它野真係唔食得!上個星期有一天lunch，因為人多想易揾位d，有同事建議去，咁就跟大圍啦！反正一個午餐唔會高要求，$72 一個set lunch 七折後加一，$50+一個set都可以丫!成間餐廳好大好多位，午飯時間果區間間爆，得佢咁易揾位都係有鬼!等咗好耐，而同事碟什麼白汁雞肉飯終於上枱，一睇真係想X，以為整咁耐會有什麼好野，點知個賣相仲衰過茶餐廳，先唔好講味道，賣相係對顧客最基本嘅尊重，全碟飯得四條雞絲，因為唔係我食，所以味道不評了，但起碼我同事都食晒成碟飯，只可以話呢碟飯係食得嘅！到我碟肉碎炒意粉，一上枱真係火都呢！根本就係雜豆火腿意，雜豆火腿就係早餐那通粉的貨色，一物兩用好識計數! 雜豆火腿同意粉是完全分開的，根本是各有各做好，有order就合併上枱了事，至於味道，一樣衰過食茶餐，根本冇落鑊炒過，又點會好食!真係一次就夠! 不過睇佢地如果繼續用現時，只求gimmick、不求實力嘅經營手法，應該都唔會好得去邊!…Read More

差不多兩年冇寫食評了，今晚心血來潮，又重岀江湖!其實呢間餐廳想幫襯好耐，但因為餐廳只限吃個半鐘，心諗，你估你鑲金咩！我就唔食!今日同老婆兩個人，時間不需太長，所以即管去試吓！。黑糖面包(免費): 黑糖香，面包也軟，不錯!但那冇味冇道的忌廉，多餘!11oz 紐約牛排: 叫完待應問我要黑椒汁還是磨菇汁，我個心涼一涼，好食嘅牛排根本就唔需要汁，只要加上鹽或少許黑胡椒已相當美味! 隨意叫了磨菇汁，正在想佢會唔會識分開上! 要了medium，希望不會差太遠。上枱一睇，磨菇汁分開上，good 丫，中間切開，雖然熟咗ddd，但都已很好，不㸃汁先吃一口，已經有咸味，有肉感, 肉味也不錯，就是筋多了㸃。白汁蝦濶條麵: 芝士香，蝦肉也不錯，只是不夠味道，不合格!加兩杯飲品，埋單$500+，好飽也幾滿意，可以再幫襯。…Read More

昨晚朋友生日，他提意去九龍城竹園，雖然都聽過呢間野好唔得，但壽星公開到聲，又即管去試下，所謂好唔好都一餐姐，點知食完即刻就同自己講，咁差海鮮點解仲有咁多人食，一定要爆！八條仔食飯，我去到已經開始上菜1) 白灼蝦 - 係細隻d，但都無嘜問題。2) 椒鹽瀨尿蝦 - 唔夠味，細隻無肉！ :( 3) 炸子雞 - 好咸！ 4) 蒜蓉粉絲蒸帶子 - 呢味就經典啦！帶子係梅，個殼係舊，好明顯係將d急凍帶子放落個舊殼到蒸！！！！ 5) 芝士焗龍蝦 - 還可以。6) 薑蔥炒蟹 - 成碟最大果隻蟹蓋都無三寸長，邊有肉食架，好心啦，養大少少先啦！ :( 7) 蒸鮑魚 -唔太新鮮，又係成碟最大果隻都無兩寸！ :( 8) 蒸魚 - 呢味係另一經典！我未試果外邊食過條魚可以咁細條，由頭度到尾應該得八寸長左右，味道我唔知，因為我見到都唔想食！！！ 最後加兩碟青菜、一碟炒飯、三橙汁、八支啤酒，成為$2100。其他環境、服務都可以。睇個價錢其實唔算貴，但食呢d肥料就唔值囉，呀蘇話齋：「嘟」左佢啦！…Read More

早兩日同老婆食lunch，搵下搵下，見到呢間，門口有張poster，午市套餐 $26，有無咁旬呀？好耐無食過上海客飯，幾十元試下無防！五個選擇，選左兩個最常食的回鍋肉及糖醋魚柳。回鍋肉：雖然唔可以話非常好，但以午市套餐加上呢個價錢，算幾抵食，半肥瘦豬肉份量足，唔會好似有d鋪將貨就價，肉就得兩三片，仲係全瘦肉。糖醋魚柳：都係果句，以午市套餐加上呢個價錢，都可以話無野好彈，雖然明知唔係即叫即做，但味道賣相都幾好。仲有個湯，一般餐湯我都唔會飲，但佢地個湯又幾ok，睇得出係有誠意之作。:)一飯一湯一送，環境ok ，招呼ok， 價錢 $26+$3茶錢，共$29埋單，值得推！…Read More

上星期一班朋友飯聚，歡天喜地搵左間位於九龍城 衙前塱道 的 渝薌烤魚，去到門口，大大個招牌閃閃下非常搶眼，門口見到都幾多人在內，以為會有餐好食！打開餐牌，大部份東西都好似湘菜的前菜，叫了很多種類，包括口水雞、魚皮、青瓜、雞絲粉皮、八爪魚仔、燒茄子等，還有幾款我食完都忘記了食過什麼，因為每碟份量都好少，每人都只得一、兩舊，味道實在普通到不得了。口水雞：骨多過肉，味道不夠濃魚皮 ：無味道，每人得一小快青瓜 ：普通雞絲粉皮：一般食店都好過佢八爪魚仔：就好似食白灼八爪魚點wasabi燒茄子：睇落好食，食落無味最後當然有食招牌菜燒鯇魚，其實都係噱頭野，食之經驗話我知，通常好食就唔使搞花神，搞花神就因為佢唔夠好食，果然又一次中，有d似泰式燒魚 x水煮魚的混合體，無味無道，無野講。食完第一轉想再叫野食，因為實在好似無食過野，但睇晒個餐牌實在無野好叫，最後一致決定去隔離街食泰國菜，咁大個仔都係第一次要食兩餐晚飯，一次過、無下次。…Read More

屯門區都算多壽司店選擇，但呢間就特別多人，只因佢出名，我唔多鍾意排隊，所以極少試呢間，但又想睇下佢水準有幾高，所以今日決定等！:(等左45分鐘，以為會有餐好野食，order左好多野，正等住食，店員同我講話無海膽，有無搞錯，咁大間咁出名，只係七點幾就話無海膽賣！無辨法，又繼續等，同朋友傾計之際，前面個黑衫仔唔聲唔聲就放左碟壽司向檯上，等左一陣我先知原來係比我，咁無禮貌架！壽司到了，一睇個賣相就想退貨，如果係間二打六店，我會好受d，話晒都叫板長呀！味到唔算好、亦都唔差，食食下見到另一個黑衫仔無帶手套在bar 檯後"R痕"，即刻影響食慾，跟住見到佢向檯面收回一個用過的紙兜+保鮮紙，佢竟然拉一拉張保鮮紙就放回櫃上番用，我實在睇唔過眼，就跟住海報上的電話號碼打左比佢地管理層！雖然唔知咁做會唔會有幫助，但希望佢地老闆會係一個正面的老板，否則 "摺左佢啦" ！…Read More

半年無去過，琴晚約埋5個friends，又去試下d 野有無up or down！睇下個餐牌，依！又多左好多款野窩，店員特別推介「紅燒大頭蝦」，話係以前唔知邊間出名越南餐廳大廚「老趙」的私家菜，睇張相又好似幾ok，就一人要半邊試下，再加幾個新、舊(必食)菜式！好、開飯！ 蒜蓉包：必吃之一，而且一次比一次進步，雖然係好簡單的食物，但經常 被忽略，要做到外脆內軟、味道濃淡適中，雖然唔係話好難， 只係好多時好多餐廳都無用心去做！ 芝士焗青口：必吃之二，唔使講，你自己去試下！ 馬拉盞炒通菜：必吃之三，我鍾以佢香得尼又唔咸。 生蝦剌身：必吃之四，實在太抵食，每次都會叫兩、三楪。 炒牛柳粒 ：驚喜之作，我唔知佢用左邊種牛肉，但做到剛剛熟，入口香 軟，size真係剛剛好，男人就可以一啖過，女士們就可能要分 兩啖食，咁先致有咬口，我最鄫有d 餐廳會切到粒骰仔咁細， 食藥咪！ 橙香骨：我不丑對用檸檬、橙等做菜式無好感，今次都唔例外，不過個fd話想試下，無計，再加上條骨又無肉，下次都米搞！ 紅燒大頭蝦：推介菜式，一送出尼，嘩！真係好大隻，剩係隻腳都有成尺 長，做法界乎焗與椒鹽之間，撥開面頭快脆皮，d橙紅色蝦膏 即刻流出，又香又肥美，真係一滴都唔想"晒"，蝦身啖啖肉， 雖然就無龍蝦咁爽口，但配合爆香蒜鹽等，都好野味，果然 無介紹錯。…Read More

約左兩個friends 食晚餐，揀左屯門的佐敦咖哩，以為會有餐好食，點知係失望到飛起！7:30 到達，只得一、兩台客，望入廚房，以………？ 點解唔係印度人主理？ 唔緊要，好食就得啦！！四個人叫左：一客辣咖哩雞、一客咖哩羊肉、一份薄餅、燒羊腿、唔知什麼炒蝦球及炒雜菜。「平」-兩客咖哩：都還可以，但唔可以話好。「平」-薄餅：都係一般，完全無印度燒薄餅風味。:(「差」- 燒羊腿：只得三支骨，但都算幾大支，不過跟本就唔係燒，只係焗，重要係生歐歐，我地食左一支半，其它的太生不能吃。「好差」- 炒雜菜 : 本來炒雜菜應該好單簡，點知都可以咸到食唔落！「最差」- 唔知什麼炒蝦球：果d唔可以叫蝦球，最多只可叫蝦仁，重要又係咸到食唔落口，一食就知係放左向雪櫃醃左幾日果隻，我地只係食左幾粒，差不多全碟都無郁過！全餐飯都無野可以食，不過都算，橫樹都唔會有野好食，但我個fd就話點都要同老板講下，就同左個貌似老板娘的講，佢又好熱誠咁要幫我地整過，我地都話使，但佢係都要收入去，好啦，點知唔整好過，整完重覺得佢地小家。收返兩支大骨入去，就整番一支小骨出泥，全碟蝦差不多無食過，整完出泥得番十粒，好心啦，都唔知佢地點做生意！埋單起身走人，個貌似老板娘的話唔好意思，但我就真係好有誠意咁贈左佢一個字…………. 「差」！！…Read More

呢間野都想去試好耐，但次次去到都成棚人向門口等，今日專登收工後即去！七點左右到達，以為都要等下，點知無人排隊不特止，重有大把位剩，選坐吧位，一坐低，嘩！點解條運輸帶咁高架，睇得唔清楚、拿食品又難，失敗！開始食前工作，筷子係膠的，Good！:)夠環保，裝茶發覺d水唔熱的，失敗！我地通常都會order條帶上無的食品，因為會新鮮d，寫完紙仔，周圍望都見唔到個服務員，有無搞錯，人都唔夠！終於搵到個後生仔過呢，比張紙仔佢，佢即刻問我一個無呢頭問題：「係唔係兩位？」超！我叫野食同幾多位有什麼關係，心想：「唔好high咁多野啦！」。服務都唔合格！野食到，明明係即叫即做，點解d紫菜係「林」，唯一解釋係佢地一早就做定d飯包定紫菜，所以「林」晒，失敗！ 海膽壽司：料夠足，亦鮮甜，唔錯！:) 牡丹蝦壽司：蝦就幾大隻，不過唔夠甜！ 蟹膏壽司：都唔知係mud，難食！ 和牛壽司：件牛肉好細快，重有d冰冰地，但就幾有牛味！ 蔥花吞拿魚壽司：蔥花點解係白色，又無蔥香味，不過不失！ 火焰鰻魚：都ok！ 三文魚刺身：連咁基本的三文魚都唔夠肥美！:(總括呢講，呢餐好失望，重以為佢有幾好食！！…Read More