beeperlove802's Profile

隔咗幾個月又開始有少少掛住4號烤吧，今次佢新出咗一個大豐盛套餐，只係368蚊就有半隻雞煲、兩份小食、6串串燒同埋兩罐啤酒添，咁抵即揀。香辣雞煲，辣度揀咗中辣，雞肉嫩滑，醬汁香濃，係每一次都要番兜嘅 item。酥炸雞軟骨，雞軟骨炸得相當酥脆，而且個熟度掌握得非常之好，咬開內裏重保持住極度嘅 Juicy，加埋面頭為數不少炸香咗嘅蒜粒，送酒一流。燒韮菜，韭菜選料上乘，入口完全無渣，非常惹味。串燒豬頸肉，豬頸肉醃得入味，外皮燒得焦脆，我選呢一個為必點嘅項目。燒娃娃菜，娃娃菜以甜鼓油同埋椒鹽輕輕調味，配合得非常之好。…Read More

今日嚟開旺角，試下呢間同事介紹話相當有特色嘅越南餐廳，餐廳位於旺角銀座式大廈彌敦道726嘅一樓，座位寬敞，環境舒適。焦糖雲朵咖啡，呢個焦糖雲朵咖啡味道相當特別，下層係湯力汽水，同上層嘅越南咖啡撞埋一齊，風味獨特，值得一試。南越蟹肉醬配脆球餅，脆球餅有少少似印度嘅其中一款脆餅，不過做成中空球形，等你可以不啲蟹肉入去一齊食， 蟹肉味道鮮甜，裏頭有少少甘筍絲同埋香草，有少少似沙律，同個脆餅味道好夾。脆米紙薄餅，米紙薄餅上面嘅係蘿蔔青瓜同埋一隻好似臘腸嘅肉粒，面頭灑滿炸蒜同埋番紅花，個肉粒勁好味，加埋啲配菜酸酸地，相當開胃。嫲嫲南越湯招牌金邊粉，碗金邊粉一嚟到見到個湯嘅顏色已經覺得有少少似泰式船河，即刻呷一啖湯底，果然有少少似，帶有好濃烈嘅肉香，呢個招牌金邊粉有好多餸，分別有牛肉片、牛面珠、牛筋、牛尾、牛肉丸同埋油條，牛尾嘅香酥脂質感覺，我到執筆嘅呢一刻都非常回味。…Read More

西菁街嘅呢一間老掌櫃開咗唔係好耐，猶記得佢當初喺大角咀開店一直都躍躍欲試，今次分店開到入嚟元朗，係機會喇小志強。口水雞，口水雞上面佈滿密密麻麻嘅豆豉、香蒜、薑蓉同埋辣椒，味道正宗，惹味非常，雞肉嫩滑，認真無敵。豆角燒茄子，豆角同茄子經過爆炒，每一條都被濃濃嘅醬汁重重包圍，重口味嘅朋友表示高興。排骨擔擔麵，排骨炸得香脆，鍾意佢分開上唔會俾啲湯浸到腍哂，若然厚切一啲相信個口感會更加好，擔擔麵麵條口感爽身，湯汁香中帶辣，屬水準之作。…Read More

米芝蓮今日公佈咗必比登推介名單，必比登推介即係用四百蚊能夠嗌到三樣嘢嘅 "平民" 美食餐廳，咁啱喺大圍呢頭要搵食，又嚟碰碰運氣睇吓要罰幾耐企。到逹時為平日1319，門口有五六個人等緊位，好明顯米芝蓮效應未到，最終等咗十五分鐘入得，喺門口等位期間，見廚師係四季酒店法國餐廳嘅大廚，喺大圍一碗陽春麵賣過百蚊，不無道理；由諗住去到等位到坐低到等碗麵嚟都一直思考緊人生，究竟過百蚊食一碗陽春麵，係戇定係值呢，不過人生苦短，還是及時行樂吧。揀咗第二貴嘅海龍皇湯，盛惠130個大元，上枱係有氣勢嘅，兩隻大海蝦、兩隻北海道帶子同為數不少嘅藍蟹肉，加上撲鼻嘅龍蝦香氣令人食指大動，先呷一啖湯底，龍蝦味係濃，但係不至於驚為天人，麵條口感少腍夠彈；海蝦極度新鮮，從蝦頭啲膏就可以領略得到；北海道帶子煮到八分熟，係半溏心嘅狀態，雖則唔係我至愛嘅五成熟但係食麵食到半溏心嘅帶子令人喜出望外；藍蟹肉可能因濃湯關係鮮味未能盡嚐。整體感覺初時覺得都係一試無妨，但係再試又未至於投降嗰隻，及後試埋友人嘅棉花雞湯底，雖然雞嘅嫩滑程度絶對要再下苦功，但係個湯底有如城中我最愛嘅花膠雞湯底一樣有咁高嘅輸出，食碗麵有打咗個花膠雞湯底邊爐一樣嘅感受，再回頭過番去個海龍皇湯，未知係咪因為無啱啱上枱咁滾燙嘅關係，個龍蝦味竟然再出多兩倍，此時，便覺得物有所值鳥。睇番介紹，呢度嘅湯底要用半日時間，以五六十斤材料煮成，客人嗌唔同湯麵，廚房再喺湯底中加入不同嘅配料如牛骨湯、牛尾汁、牛臉肉等再煮；成本高，價錢自然貴，每碗麵賣過百元仍然客人不絕，仲經常喺下晝四五點賣哂。由於湯底數量有限，每日所有湯麵合共只係賣二百至二百五十碗。今次意猶未盡，仲有嗰堆好頭好尾雙冬羊肉想試，令我未行出呢個門口已經諗緊下次要幾時再嚟，第一次俾米芝蓮搞到我有咁高嘅滿足感，係時候認真咁硏究吓全個必比登推介名單喇。…Read More

Follow 開 DE ODD 見佢有幫呢間餐廳嘅老闆影相，走入去佢 OR 睇下見啲米線又幾似樣喎，之前 bookmark 咗一直想試，今日過開嚟大圍做嘢，機會嚟喇飛雲。餐廳喺大圍田心嘅一條小街，唔係陀地嘅話相信都要做定啲功課，到達時為星期六1252，門口已經有兩個人喺度等緊位，小店坐位唔多，為數十零個，不過咁早個 flow 都尚算ok，等咗大約十分鐘就有位。今日氣溫大約十八度，但係一入到去餐廳就好似帶咗你去咗八月咁，我好鐘意食辣，我食辣係會出好多汗嘅，就算得幾度都會出汗，曾經一度掙扎好唔好嗌外賣即蓆喺門口長櫈度食，以享受番個十八度嘅清涼天氣，不過因為唔捨得張枱同付出咗嘅等位時間而打消咗呢個念頭，初時以為係冬天有人怕凍而熄咗個冷氣，及後睇番其它食友嘅食評，見佢八月去都話間舖又係熱辣辣嘅，作為一個西伯利亞人，實在極為難受，希望佢去到第伍年唔會都係長年 keep 住喺八月呢個溫度啦。揀咗佢哋嘅招牌滷鴨片，湯底揀咗酸辣中辣，個辣度同譚仔相若，面頭層油極厚，自然比譚仔更香，不過亦都更見邪惡，葱嘅份量好多，啱 feel；湯底好味，夠酸夠辣，心裏不期然將佢同四陂坊及香車街街市比較；肉碎比坊間一般大粒，亦異常咁入味，係全碗米線令我最驚喜嘅部份；到佢地嘅招牌滷鴨片，肉質鞋靱仲要加上厚切，同滷沒有半點關係，屬地獄中嘅地獄，對於位列招牌感到十分費解。初次到訪加咗個小食麥芽滷大腸拼雞腎，小食比米線早到幾分鐘，架撐跟米線先嚟但見店員忙緊都係不便打擾，就等埋個米線先一併品嚐，架撐一如之前食友所述攞到嚟係濕立立嘅，係少見嘅核突，不過呢個滷味將分數挽回，雞腎應該滷咗好耐所以有啲硬，但係亦可能因為咁而更加入味，雞腎能夠入味到咁真係少有，雞腎比大腸滷得更甜，正中我鐘意滷得夠甜嘅下懷，坊間好少滷店會較到咁甜嘅，果然麥芽。另外仲打包咗個麻香酸菜雞絲同麻辣口水雞翼，前者個辣油辣中帶甜，風味獨特；後者個雞翼係滷過再口水嘅，比起坊間九成白烚純粹靠個口水汁亦都更見誠意，唯一可以扣分嘅就係個外賣碗同蓋油淋淋，拆完個外賣對手油哂。離開時為1350，有十幾人喺門口等緊位，我估我仲會嚟試埋佢個麻辣湯底同其他小食，鐘意滷得嚟 sweet sweet 地嘅朋友一定要嚟品評一吓。…Read More

喺公司附近嘅呢個位又有新餐廳開咗，開咗兩個零禮拜經過幾次次次都無乜人，無乜人通常唔係貴就係難食，不過疫情底下嘅無乜人就會變得有啲吸引，even 要有中伏嘅準備。餐廳裝潢簡約，帶點無印風，係幾舒適嘅，今日嚟試吓個早餐，價錢都有番咁上下，最平嘅堂食食物古早炒米粉 30 蚊，單點蛋餅最平 35 蚊，套餐最平 41 蚊，包個炒米粉、刈包同飲品。因為想試吓個刈包嘅關係我揀咗起司爆蛋刈包餐，貪心加咗五蚊雞絲米粉湯，刈包上面鋪咗啲花生碎同菜圃，不過淨係喺中間有，唔咬中間先啲碎就會跌到週圍都係，咬中間先咁你就淨係得第一啖有花生碎同菜圃，我想問係預人點食嘅呢 ?菜圃有少少酸，都幾好味，不過可惜得第一啖有，起司份量好少，而且集中哂喺底部，爆蛋就 ok 嫩滑，不過個包咁厚始終都唔係好夠味送，剩低啲包太淡食唔到；雞絲米粉湯味道清淡，要問哥哥仔拎啲辣椒油先夠味，哥哥仔好似未有客問佢拎過辣椒油咁要問廚房，而個辣椒油又真係由廚房不出嚟喎，攞個辣椒油都要驚動廚房，咁個廚房咪好唔得閒 !?睇番其他食友午市啲相，佢呢度啲飯麵都好似幾靚嘅，搵日食商務午餐可以再俾多一次機會佢，而早市無乜人嘅原因，我估係因為CP值低。…Read More

今日過嚟呢邊啲雜貨舖搵即熱邊爐，原本諗住去南記食，不過見時日無多，又見到門口有皮皮，就膽粗粗九衝咗入去呢間一碗車仔麵度試吓。餐廳嘅牆身非常復古，不只限於所張貼嘅 poster，連嗰個油漆剝落嘅殘破感都還原到周璇嗰個年代，入場聽到楊采妮嘅不會哭於你面前，我諗播番天涯歌女應該會更加夾，我未能夠分辨到牆身個殘破感係歲月嘅洗禮定係名師嘅設計，睇番OR最舊嗰篇食評係2017年，又唔多以係百年嘅老字號喎。餐牌上極多餸揀，數番一共有45款餸，仲未計小食，真係好多，有水吧嘅車仔麵檔係有分加嘅，雖然我今日無飲到，兩餸28三餸33，喺今時今日嚟講都算幾抵。揀咗個香茅豬頸肉牛筋豬腸甜酸齋河粉，甜酸齋分上阿姐無黑面，辣度揀咗大辣，豬頸肉要加兩蚊所以有多少期望。河粉基本嘢，個湯都係，跟住試啖牛筋，炆得極腍，心中暗喜；跟手嘅香茅豬頸肉，把你迅間落地獄、硬到癲之餘仲同香芧沒有半點關係；跟住試舊豬腸，難得嘅充滿豬味，好耐無食過咁有豬味嘅豬腸喇；隨後將個辣撈勻，又令我有少少懷疑人生，個辣有陣怪味，食多十幾啖至諗到嗰陣味有少少似南孔味，得嚟又有少少鹹香，係奇怪，不過都夠辣嘅；甜酸齋於我嚟講從來都係用嚟解吓辣，呢度嘅甜酸齋甜咗啲又酸咗啲，不過不失。呢度嘅餸份量好多，人間代表豬腸有成七八舊，牛筋有五六舊，地獄系嘅豬頸肉都有四五舊，不過食完有少少口渴，但係屬於可接受嘅程度。…Read More

一直都好鐘意食南記，由重口味嘅小鍋酸辣到清湯招牌河 (清湯先可以落辣椒油，小鍋酸辣落咗都遮哂，同埋佢本身都夠哂味) 我都好鐘意，雖然餸方面我淨係鐘情腩肉 (唔知點解近年餐牌改咗叫辣豬肉) 同埋春卷，幾乎來來去去都係揀呢兩樣餸咁滯，但係都無損我對佢嘅熱情，自從年零前嘅新湯底麻酸辣 (我覺得呢個湯底太鹹) 之後，今日如常去南記發現又有新湯底喇，就係酸菜魚湯底，酸菜石班魚米線套餐跟杯豆漿盛惠53，呢個湯底味道夠哂酸，非常頂癮，本身唔係好辣所以有條件落辣椒油，落完之後嗰個酸度同辣度係我至愛嘅水平，餸菜方面，收得你嗰53蚊，個”石班”魚係點相信都會有心理準備，比較特別嘅係入面有花生芽(雖則我唔係好好) 同幾舊醃過嘅酸蘿蔔，夠哂誠意，暫時呢個酸菜魚湯底成為咗我喺南記嘅飛佛。…Read More