今日過嚟呢邊啲雜貨舖搵即熱邊爐，原本諗住去南記食，不過見時日無多，又見到門口有皮皮，就膽粗粗九衝咗入去呢間一碗車仔麵度試吓。
餐廳嘅牆身非常復古，不只限於所張貼嘅 poster，連嗰個油漆剝落嘅殘破感都還原到周璇嗰個年代，入場聽到楊采妮嘅不會哭於你面前，我諗播番天涯歌女應該會更加夾，我未能夠分辨到牆身個殘破感係歲月嘅洗禮定係名師嘅設計，睇番OR最舊嗰篇食評係2017年，又唔多以係百年嘅老字號喎。
餐牌上極多餸揀，數番一共有45款餸，仲未計小食，真係好多，有水吧嘅車仔麵檔係有分加嘅，雖然我今日無飲到，兩餸28三餸33，喺今時今日嚟講都算幾抵。
揀咗個香茅豬頸肉牛筋豬腸甜酸齋河粉，甜酸齋分上阿姐無黑面，辣度揀咗大辣，豬頸肉要加兩蚊所以有多少期望。河粉基本嘢，個湯都係，跟住試啖牛筋，炆得極腍，心中暗喜；跟手嘅香茅豬頸肉，把你迅間落地獄、硬到癲之餘仲同香芧沒有半點關係；跟住試舊豬腸，難得嘅充滿豬味，好耐無食過咁有豬味嘅豬腸喇；隨後將個辣撈勻，又令我有少少懷疑人生，個辣有陣怪味，食多十幾啖至諗到嗰陣味有少少似南孔味，得嚟又有少少鹹香，係奇怪，不過都夠辣嘅；甜酸齋於我嚟講從來都係用嚟解吓辣，呢度嘅甜酸齋甜咗啲又酸咗啲，不過不失。
呢度嘅餸份量好多，人間代表豬腸有成七八舊，牛筋有五六舊，地獄系嘅豬頸肉都有四五舊，不過食完有少少口渴，但係屬於可接受嘅程度。
