阿驊佬's Profile

我住喺大角嘴，某日一家四口落街搵食，行過大同新邨見到呢間嘢試業，於是膽粗粗貢入去試吓新嘢。（原來佢哋24/12號先正式開張，而我哋就早咗兩日去幫襯佢個晚餐）以下係嗰晚晚餐嘅內容：窩蛋牛肉煲仔飯牛肉好香嫩，美中不足係隻蛋熟咗少少，應該係上檯時先至打隻蛋落去，咁先至做到「金鑲銀」（蛋黃蛋白包住每粒熱飯）嘅效果，依家咁只能當熟蛋咁撈飯。 豉汁白鱔煲仔飯鱔肉食落口感好鮮，唔似雪藏或隔夜貨。唔錯！ 臘腸排骨煲仔飯又一唔錯嘅煲仔飯。請留意！最重要係佢哋伴煲仔飯嚟嘅豉油，乃自家調製，絕對係點精之作，不能不試！ 功夫湯海南雞飯套餐淨係睇陣容就知有誠意。其實佢嘅「功夫」係指個湯，或者有人覺得用個功夫茶壺嚟裝湯，仲要用功夫茶杯一口一口咁飲，會唔會過份姿整？但我就十分鐘意！一來佢的確可以令湯有保溫作用，二來佢個湯嘅內容唔係講笑，非一般例水之流，值得用杯仔慢慢㗳其滋味。----------同場加映：過咗兩日開張去食個午餐。焗豬扒飯 我不嬲對茶記嘅焗豬好抗拒，不過睇匀嗰日啲午餐冇乜對到口胃，就即管試試佢個焗豬...... 哈竟然出奇地唔錯喎！芝士同茄汁配得夠香，用上幾好味嘅吉列豬扒，唔係咬唔郁嘅柴皮豬，再加分，只係個人嚟講就嫌個飯乾身咗啲。但整體我覺得係有驚喜嘅，推薦！---------服務嚟講，個主管俾人感覺好緊張，好崩緊，可能係老闆都唔定，某啲員工或者係新做，有啲蝦碌，不過總括都唔差，而且又唔需要對佢哋有太高要求，都係茶餐廳嚟嗟。最後想講，喺大角嘴開茶記，仲要喺條人流唔多嘅街裡面開檔，要發圍真係唔容易，不過呢間嘢啲出品睇得出係幾有誠意，對於一間茶餐廳嚟講，啲食物竟然可以令人喜出望外，都算係大角嘴之福，所以我特地將佢哋提交嚟「開飯」分享俾大家，更第一個幫佢哋寫食評，希望佢哋可以保持甚至再提高到個質素，繼續為區內區外添口福就好嘞！…Read More

今日一家大細突然興起想出外食蒲飛，本來想去大角咀某酒店的自助晚餐，點知該處臨時問話爆咗冇位，立即上網摷料，終於搵到小飛象葡國餐廳原來依家有半自助，個接電話的男仕"好老實"咁話今日（星期日）天氣唔多好，仲有位可以訂咁咁咁，好熱情的感覺，於是訂咗七點開餐。（"好老實"係佢自己講的 ）門口個水牌寫話佢新張冇耐，咁又好似係，因為我記得好耐以前去兆萬小飛象係要撳電梯上，依家只要沿手扶電梯上到三樓，一個U Turn就見到。我哋一家三口搵埋我老友一行四人喺1900前去到，即刻可以入座。一坐低我就問佢啲任食出得快唔快，個女侍話：好快咖放心啦！（都果然幾快，可能唔爆檯有關吧？）其實佢係有散叫，咁當然試下佢個半自助係咩料先，至於呢個半自助原來係點玩法呢？佢個半自助餐限時90分鐘，有所謂任食鵝肝生蠔，另外包一個主菜，因為費事涉及商業機密，所以唔影佢餐牌，主菜係有共十一款，其中有：燒乳豬炒飯，燒葡式豬手，煎龍脷魚柳，燒肉眼扒，燒羊架，葡國雞，辣非洲雞....等等，而你的單價就視乎你叫咩主菜而定，例如你叫豬手，咁你單價就係$188+10%，如你叫雞（兩款一樣價），咁你埋單單價就係$158+10%，如此類推。至於個鵝肝生蠔任食，實情係同之前有人講的類同，即係一檯人只可叫一種任食，咁到時就共識要揀定全體任食生蠔，抑或全體任食鵝肝，如果想雙拼其實亦可以，但就冇得任食，變咗每人只有六件的限額，例如我哋四個人，即係總共可以任意叫24件，冇咗任食。老實講其實任食都食唔到幾多件，因為個主菜都咁大份，況且個我估係經理的＂好老實＂男仕話齋，佢哋想啲客人樣樣都試吓佢哋的食物，唔好全攻一兩味，咁我覺得又係道理，所以我哋都揀咗雙拼。生蠔比較瘦，唔係好大隻，但都算鮮，應該係即開的。個鵝肝就唔算肥，少少乾，叫做不過不失。自助部份有兩個湯：菌類白湯，及龍蝦湯。個人覺得個龍蝦湯好味，龍蝦頭精華出哂，但其他人就覺得個龍蝦湯偏淡，反而個菌湯好啲，各有各口味。仲有壽司盤同埋沙律吧，及有類似天婦羅的炸物，好似仲有個飯定意粉，及生果。三文魚要落柯打，每次每人叫四件，四人合共十二件，食完再叫，因為佢用冰鎮關係，唔夠碗用吧？（一笑）另外有張紙仔可以剔幾款任食的食品，似係即叫即製，個芝士燒帶子我覺得係最好，芝味濃，帶子唔會靭；芝麻雞全翼少少乾，但都幾入味；個好似叫海鮮酥盒的乒乓球大小的小東西，一啖一個，出奇地好味！至於個燒秋刀魚就燒得太乾啦，兩條擺喺碟上好似兩把＂尚方寶劍＂咁挺直硬淨，難以入口。炸馬介休球整得唔會好肥漏也唔太鹹，OK！講到主菜，四人分別叫咗一隻豬手，乳豬炒飯，非洲雞，龍脷柳。龍脷柳開一邊，都好大條，有十吋左右咁長，但偏乾，口感一般；隻燒豬手真係大件！塊皮Lok lok脆，帶點脂肪的肉也唔會好漏，值得一試；乳豬飯個燒乳豬仔就真係冇得頂！皮脆肉嫩，香口到不得之了，跟個炒飯都好大兜，也好香口惹味；至於個非洲雞..........先講吓我坐個位比較昏暗，個女待一嚟放低只講：＂雞嚟了＂，我見幾件雞一些配菜及大量汁的焗兜在面前放下，就奇怪點解非洲雞乜唔係深色啲咩？點解個汁咁淺色？黃黃白白咁，覺得葡式的非洲雞的確有點令我失望而唔係好想食，於是決定先繼續攻其它食物，諗住轉頭再慢慢處理，點知過咗差唔多廿幾卅分鐘，到我終於拿起支叉撩咗一吓個底睇吓個＂非洲雞＂有咩配菜，扁咀究竟食唔食好的時候，突然有個女侍走埋嚟問我哋隻非洲雞嚟咗未，吓？乜我面前呢兜唔係.....咩？佢話係葡國雞！原來係上錯檯.........上錯檯成半粒鐘先知？咁我又＂好老實＂話我用叉撩過，我驚一陣撩過佢又攞返入去，轉頭俾咗第二檯客咪食我口水尾？橫豎價錢一樣就唔換啦。而事實上個葡雞我唔係好識欣賞，因為我本身真係唔係好鐘意，所以最後剩咗要攞盒拎走，味道如何我也不便評價。甜品我唔知係咩（據聞係雪糕），因為食得太急，臨走竟然忘記了；然而我好在意我至愛的西瓜，其實我見就只有蜜瓜及西瓜，每次出都唔係好大量，點知有兩檯客次次一砌好攞上檯佢哋就衝出去搶，攞親就一大半，排到我攞時只剩兩三塊冇乜肉的西瓜皮。西瓜都要搶，真係唔明白。夠鐘前半小時就會有人嚟問仲有冇任食部份要落單，所以想食多啲就要注意一下；而主菜部份就唔限你食的時間，你可以坐到食完先走都冇問題。個女侍講的。…Read More

我本身住大角咀，成日行過見到呢間泰屋喺酒店樓下個招牌，話試話試都冇上過去，卒之喺食之前的早幾日，路經團購網見到有推佢個自助午餐，用餐時間為1200-1430，於是喺26號星期六晚膽粗粗打去問吓翌日有冇位，有就即刻上網買團購券，一問之下竟然有位，仲點知原來佢本身都做緊同一個優惠，即係$128+$18（星期六日公假之的價錢，$18話係原價之10%），另外每人送燒大虎蝦一隻，包一咖啡或茶，同團購完全一個模樣，咁洗咩印團購券？即訂位！地點在酒店上２字樓，一上就見到，門面唔算好豪華，大玻璃窗吸取自然光，座位檯數唔多，我諗日日滿客應該唔難；佢前身係意式餐廳，冇乜大改動，似西式餐廳多過泰式，想食泰國氣氛？搵第二間吧。1200準時開餐！先攻傳聞中最滋味個冬蔭湯，是日係冬蔭計（雞），畢竟唔係用功（蝦）去煮，少咗份蝦頭蝦羔的味道，但都果然好滋味，成個餐我總共隊咗佢四個碗！另外仲有一個中湯，不過因為冇飲，已經冇留意佢係咩。再嚟係沙律吧，一般嘢，火箭菜生菜茄仔青瓜粟米。。。等等；三個醬汁：香草汁，千島醬，沙律醬。小食有三款：泰式沙律，泰式牛肉沙律，泰式鳳爪。是日精選熱葷只有下列幾款：炸雜菜天婦羅，炒雜菜，泰式炒青口，青咖喱鴨胸，燒一呎爭兩吋秋刀魚，花生豬腳，炒麪，白飯。可惜小弟咀刁，除咗炸南瓜天婦羅同炒雜菜，其它全部唔！啱！食！囉！ （說好的咖喱牛腩...泰式炒蜆...甜酸煎蝦...肉碎生菜包...泰式燒雞...香茅雞翼...炭燒魷魚/椒鹽鮮魷...琵琶蝦...炸魷圈...蝦醬炒飯......呢呢呢？？？）個即製湯河粉有兩個湯底：清湯及勒沙湯；粉有金邊粉及河粉。至於啲配料我唔記得全部了，大概有六至八款，有：蝦肉，魷魚，肥牛，蟹柳....仲有的，不過冇咩印象囉。講真個勒沙湯係好濃好惹味，但不及用清湯加調味料咁正，啲咩糖呀，九層塔呀，指天椒粒呀，浮幾粒紅辣椒的白醋汁呀，炒蒜粒呀咁，自己認為適度地將之加落個清湯河粉度，竟然可以整到個幾泰的湯河粉，有返啲feel，而且幾好味！甜品有西瓜，兩三款切到一般麻將咁大件的糕點（好似有芝士糕，馬豆糕，椰汁糕咁上下嘢），兩款用白咩氏冰糖燕窩...個樽咁款的小玻璃瓶，裝住的奶凍物體，一白一啡，都唔錯。（你就想囉有白咩氏冰糖燕窩俾你食哩～ ）可能要分開燒一檯一檯上的關係，個大虎蝦到差唔多臨尾先出嚟，都有成約莫七八吋咁長，不過燒蝦啲肉始終係有少許鞋鞋哋，也算係咁。最後咖啡或茶冇乜好講啦吧？成個自助午餐就係咁。------------------------------總結：係有點失望囉，其實間間都係每次喺餐牌入面精選幾款食品上檯，而我明白地方細人唔多的餐廳，自助餐出太多款式係會浪費好多食物，但佢出完一款唔換第樣的話，咁我只好慨嘆嗰日唔係我的日子，因為我想食的泰式美食都冇出，大部份都唔啱食，之所以點解冬蔭計都啪咗四個碗。服務員招呼都可以啦，話哂酒店背景，服務有返咁上下。至於個價錢公唔公道就見仁見智，我遇唔到想食的美食，自然覺得唔抵了，也因此令我有點唔敢再去，寧願貴少少去正宗泰菜館單點，起碼食到我想食的泰菜。…Read More