pibulfoodie's Profile

去到新蒲崗，因為已經係下午茶時間唔想食太多嘢，同時間又想食啲特色少少嘅西食嘢，咁食西班牙點心 Tapas 絕對係不二之選。今次所介紹嘅 Tapas Brew 位於新蒲崗 Mikiki，位置非常之方便，而且環境都好好。前菜我叫咗個餐湯配麵包，味道還好，唔係話太特別，不過餐湯加麵包本身有冇得輸。Tapas 方面我叫咗個羅馬生菜包牛小排，原本我冇咩特別期望，純粹想有啲菜有啲肉清新啲。但係佢嘅醬汁同埋牛肉嘅鮮嫩係有驚喜嘅，食落去首先係羅馬生菜嘅水份同鮮香，之後感覺到牛肉嫩滑嘅質感，然後就係鹹味恰到好處嘅醬汁，使到整個菜式非常之有層次。之後我仲叫咗個 tea set 嘅希臘乳酪紅莓脆蛋糕，蛋糕表層酸溜溜嘅希臘乳酪配上唔會嘅鮮甜中和咗先前菜式嘅鹹味同埋油膩嘅感覺，為成個下午茶畫上完美嘅句號。另外，呢個 tea set 值得一讚嘅係飲品任飲，我叫咗個凍奶茶，甚至第二杯可以飲檸茶都得，服務非常之周到，絕對係加分位。…Read More

我唔確定 Mango Tree 嘅泰國菜式係唔係正宗啦，但係佢嘅味道絕對係非常之好食。呢度向大家介紹幾款菜式。菠蘿海鮮炒飯雖然份量並唔係好大份，但係相信各位單純係睇圖片都可以感受到呢一份菠蘿海鮮炒飯有幾咁足料。性價比例嚟講如果係講味道嘅話係幾抵食嘅，但係或者大家有個心理準備先，就係如果你大食嘅話應該未必夠你飽肚，當然如果你想食其他嘢都值得推薦。泰北胡椒燒春雞呢個燒春雞就真係值得推薦！首先，佢份量非常之大份，絕對係成隻春雞絕無偷工減料。其次係佢嘅口感，春雞嘅肉質非常之鮮嫩多汁，絕對唔會有乾柴柴嘅感覺，所以就咁食冇話配其他食物或者飲品都非常之惹味。味道方面燒春雞非常之香甜，我知好多其他地方食燒春雞或者會感覺到好油膩或者好鹹，但係呢度嘅燒春雞完全冇咁嘅感覺，就好似係炆煮出嚟嘅一樣，只不過皮上多咗一陣燒出嚟嘅芳香。芒果樹黃咖喱海鮮多士盒唔好睇佢賣相麻麻好似好多黃色液體溢出嚟咁，佢嘅味道真係好！好！好！食！黃咖喱絕無油膩感，佢非常之香，配上烘煮過嘅多士錦上添花，加上海鮮新鮮嘅感覺，使成為呢間餐廳嘅必食菜式。黃咖喱炭燒龍蝦撈麵呢個面又係值得推薦嘅。餐廳採用嘅龍蝦並唔係嗰啲好廉價冇咩味道嘅龍蝦，而係非常之有鮮味嘅。黃咖喱汁配上油麵互相輝映，加上海鮮嘅味道使整個菜式非常之豐富美味。…Read More

一直都好想去試吓墨西哥嘢，終於都喺 OpenRice 搵到呢一間位於 Soho 區感覺比較正宗嘅墨西哥菜。去到當然要一試兩味墨西哥代表菜式：Burito 同 Tacos。呢度嘅烤雞 Burito 份量非常之龐大，而且內餡飽滿一個技術都夠兩個人食。仲有好靚嘅芝士拉絲，Burito 嘅蔬菜配料亦都有助中和其好 Heavy 嘅感覺。一圖勝與千語，大家睇吓張圖都能夠睇得出呢一味菜式有幾咁吸引！至於烤牛肉 Tacos，今次叫咗脆皮嘅 Tortilla 殼。香脆嘅外殼加上香嫩嘅牛肉令第一次食墨西哥菜嘅我充滿驚喜。原本食 Tacos 嘅時候都諗住應該同 kebabs 或者西式嘅 wraps 冇咩大分別，但呢個脆皮粟米片外殼令我對食物另眼相看，原來嘢食係可以咁玩法架！重點係，佢真係好食，Tacos 上嘅醬料仲為菜式添上一點正宗嘅墨西哥風味。另外值得一提嘅係，Burito 同 Tacos 嘅伴碟，分別有墨西哥飯、黑豆同埋莎莎醬，並唔係裝飾咁簡單，佢哋令我更深入品嘗到墨西哥人嘅口味，提升食物嘅口感。呢間餐廳絕對係墨西哥菜擁躉嘅不二之選！…Read More

喺咁酷熱嘅夏天喺深水埗街上遊走的確好容易令到人覺得口渴，喺呢個時候到位於福榮街嘅Simply Tea（鮮茶）飲返杯消暑解渴嘅冰鎮飲品使人格外暢快。為咗解渴，我哋點咗杯蝶豆花青檸梳打，而因為佢哋而家（2022年7月）特別做緊推廣優惠，我哋花咗 $15就能夠換取一杯迷你嘅水果四季春，特別適合陪 friend 飲嘢但自己唔係特別口渴嘅你 XD講返杯嘢飲先，Simply Tea 嘅杯蝶豆花青檸梳打真係非常之特別。佢唔單止喺飲品入面加入咗新鮮嘅青檸提高飲品嘅鮮味，我必須要強調佢哋採用嘅蝶豆花精華真係非常非常之香！我喺其它地方所試過嘅絕大多數蝶豆花飲品都係純粹利用蝶豆花嘅藍色嚟令到杯嘢飲好睇啲，基本上飲落去嘅味道冇咩特別之處。但係呢杯蝶豆花青檸梳打唔單止賣相非常美觀，而且飲落去嘅時候有陣陣蝶豆花嘅香味（原本都唔知蝶豆花係咩味，飲到呢陣香氣覺得好特別，諗返起先意識到係喎呢杯飲料係有蝶豆花架喎），呢種香氣同青檸嘅鮮味配撘得非常之恰當。除此之外，梳打嘅起泡唔單止令人有清新解渴嘅感覺，配合上啱啱睇到青檸同蝶豆花嘅香味更大大提高飲品味道嘅層次感，令人喺炎炎夏日嘅時候感覺非常舒服清新。由於係推廣嘅優惠，呢杯迷你水果四季春冇得俾我哋選擇甜度同冰量。故此，迷你水果四季春嘅味道偏甜，所以未必適合唔太偏好飲較甜果茶嘅人士（不過優惠期內大家更可以選擇以 $10 換購迷你珍珠奶茶，相信會切合更多人嘅口味）。值得一讚嘅係，呢杯水果四季春雖然比較迷你，但係卻非常足料，又有橙又有蘋果，果然冇忽略到一杯正常水果四季春嘅精髓，就係喺飲完茶之後撕開封蓋享受鮮果嘅環節。總體而言，Simply Tea 真係非常之推薦，我知道佢哋仲有古早味鳳梨四季春同芒果乳酪沙冰等特色手搖飲品，相信都係非常之值得吸引嘅。於是，我哋俾出嘅評分如下：賣相：5／5味道：4／5（迷你水果四季春冇得甜度扣少少）價錢：3／5CP 值：4／5整體推薦程度：4／5*由於係手搖飲品店，服務、裝修等不設評分。…Read More

去到西灣河同朋友有啲嘢做，就去咗 Soho 東搵個地方填飽個肚。掛得 Soho 呢個名就當然係食環境架啦，而今次嘅呢間鮨玥環境確實冇令人失望，且食物質素非常之好。重點係，作為一間注重環境嘅 High End 日本餐廳，鮨玥嘅價格相比起同類型嘅日本餐廳價錢尚算相宜。所以如果大家係注重環境嘅，或者想靜靜地搵個地方同朋友傾下嘢，鮨玥絕對不失為一個唔錯嘅選擇。鍾意食吞拿魚嘅我點咗個本鮪赤身丼，佢嘅吞拿魚唔會話太肥膩，同時非常之厚身，完全唔會話有浸雪藏味，味道相當之濃郁，係吞拿魚愛好者必叫嘅菜式。主要嘅係，師傅非常之有心機，相信大家都可以透過相片睇得出師傅喺伴碟方便嘅細心，尤其是係烙印住「鮨玥」嘅玉子。我跟餐叫咗個抹茶可樂，唔知大家又有無飲過呢？坦白講，其實無咩驚喜，但如果大家係喜歡飲唔同類型嘅碳酸飲品嘅話都值得一試！…Read More

作為一個曾經多次喺香港大學內進食嘅一位食客，一念素食無疑係全個校園最好食嘅餐廳。一般而言，素食（或者話「食齋」啦）都俾人一種好寡淡無味嘅印象，但一念素食嘅「齋」卻一啲都唔 Dry，而且好美味，可以話係 HKU 學生嘅恩物。環境與價格一念素食同好多其它嘅齋舖好唔同，佢既定嘅落 Order 方式係自己夾然後按重量埋單，100克嘅食物大概 $17，但亦都有其他嘅套餐（例如係米線同下午茶套餐）供食客選擇。而因為有唔少嘅食物都比較多水份嘅關係價錢並唔算係好平，但勝在有無限嘅湯，且白飯任裝，所以無論食平啲食貴啲都可以保證你食飽飽。要注意嘅係而家由於疫情關係每次去裝飯畢湯嘅時候都要用新碗，夾嘢食嘅時候需要佩戴手套，可見呢間餐廳嘅細心之處。服務質素講到細心，一念素食嘅服務質素都有值得表揚嘅地方。你一定以為一間自助形式嘅餐廳無咩服務嘅質素可言啦，但咁就大錯特錯喇。嗰次去用餐嘅時候因為想欣賞下風景所以坐咗出面，但結果發現有好多蚊所以想坐返入去。當時餐廳嘅職員唔單止幫我哋手搬返啲嘢入餐廳，而且見我哋被蚊咬仲俾埋無比滴我哋查添！呢個位真係加爆分！食物質素講咗咁耐都未開始講食物。一念素食俾食客選擇嘅食物種類繁多，簡單之青菜豆腐、複雜至素肉丸同春卷都有，甚至有各種甜品比食客選擇。正如第一段所講，食物嘅味道真係好好，素肉嘅味道同真嘅肉類不相伯仲，且整體味道唔會太淡，亦都唔會太濃，恰到好處。雖然係自助嘅形式，但係食物嘅溫度亦都得到保持。係飯方面佢哋以紅米混合白米，使之更加有層次；至於湯，今次飲嘅冬瓜蘿蔔眉豆湯，味道非常之清甜，而且飲落口舒服，真係飲完一碗又一碗。雖然今餐以食齋黎講食得有啲貴，但係淨係個湯就已經值回票價！…Read More