BBBon's Profile

同朋友慶祝生日，晚餐食居酒屋，因為餐廳收切餅費$100，所以我哋就決定食完晚餐轉場，book咗呢間去食蛋糕吹蠟燭。我哋三個女仔order咗三個小蛋糕，先試佢嘅招牌草莓西瓜蛋糕，可能因為本人唔係好食西瓜嘅關係，所以覺得普普通通。第二個食嘅係香蕉焙茶蛋糕，♥︎♥︎非常喜歡，陪茶味香濃，配上甜甜嘅香蕉，呢個組合非常夾✩✩雖然三個蛋糕裏面賣相最普通係佢，但我覺得係最好味✌︎✌︎最後我哋食喺希慎鋪獨有嘅碟豆花藍莓芝士蛋糕。坐我隔離嘅朋友講到明係唔鍾意食呢個，對於我來講就唔錯嘅，淡淡嘅忌廉芝士味，配上粒粒藍莓果肉，整個蛋糕都充斥住碟豆花嘅味道。另外飲品方面，我叫咗一杯朱古力奧利奧咖啡奶昔♥︎♥︎♥︎好好味呀，如果你唔怕肥的話，係必點嘅飲品✌︎✌︎今次我哋冇食熱食，但眼見隔離枱嘅熱食賣相非常之吸引，下次一定要去試佢嘅熱食。蛋糕賣相吸引，慶祝生日係唔錯嘅選擇，不過味道方面未必款款都可以滿足到味蕾。…Read More

本來想去Lagom Kaffe食晏，點知佢要去到12:00先有熟食，當時我哋去到只係11點，所以就轉左去隔離呢間日日香鵝肉飯店。佢餐牌上面配有精選套餐，我哋就揀咗一個鵝肉飯同一個鵝片瀨粉。一試有d驚喜，每一啖都充滿鵝油嘅香味，每食一啖鵝片或者鵝肉，之後再配一口飯或者瀨粉，喺口腔內混合鵝油香味，好惹味。另外配菜方面嘅鹹酸菜份量非常大方，食幾口鵝肉之後再配一口鹹酸菜，可以中和口腔內嘅油膩感。套餐可以配一碗例湯，當日嘅例湯係茶樹菇湯，一飲就知並唔係味精湯，飲完亦唔會覺得口渴，不過味道偏淡少少。整體來講，鵝肉充滿鵝油香氣，而滷水嘅味道亦唔會蓋過鵝香，雖然價錢唔算平，一個午餐需要大約$80，但偶爾食下，滿足一下味蕾都係一個唔錯嘅選擇。…Read More

Fumi 係我放咗入to-go-list好耐嘅一間餐廳，高級日本菜放題，價錢合理，所以就決定母親節去呢度慶祝。一入到去就收到一支玫瑰花，員工非常殷勤，一坐低就解釋放題嘅運作。上網book枱附送每人一隻生蠔，口感creamy，不過個人係鍾意食爽口嘅生蠔，所以就唔係好啱我食啦。刺身有三文魚，吞拿魚，帶子，油甘魚，甜蝦。除咗油甘魚比較腥之外，其他都唔錯嘅。特別係甜蝦，好鮮甜。由於我哋係第一次去，所以每樣食物都有試過。前菜唔算太特別，值得一叫嘅係鮮茄沙律，當食到有少少膩嘅感覺，就可以叫一份鮮茄沙律清一清口腔。烤牛肉配柚子汁都值得一試。冷盤嘅北海道鱈場腳蟹非常鮮甜，每條都啖啖肉，係必食之選。壽司卷物就唔建議叫啦，因為每款都好普通，我食完都唔知邊一款打邊一款。炸物方面，海蝦天婦羅好鮮甜，炸粉好薄，我哋都食咗三碟。但係炸雞就唔建議點啦，因為好普通。燒物唔知係咪我哋叫嗰碟佢冇落鹽，所以好普通。主菜方面我哋叫咗兩個牛，一個就係用sukiyaki汁煮嘅安格斯小牛排，另一本係A4宮崎和牛野菜小鍋，兩款都不過不失。茶碗蒸係必點， 小B都好鍾意食。甜品方面士多啤梨好有驚喜，好鮮甜。其他甜品都非常唔錯。整體來講每人$680 係值得嘅。食物質素唔錯，不過唔建議每樣都試，因為某幾款食物真係太普通，例如燒物，炸雞，壽司。去之前，不妨熟讀一下佢個Menu，然後去到再決定必食嘅食物，以免被一啲唔啱食嘅款式頂住個胃。…Read More

一直以來都係芽莊同安南嘅fans，都好少食其他連鎖嘅越南餐廳。難得地要去奧海城，又突然間想食湯麵，所以就試吓BEP。一試發現有啲驚喜，一直都覺得其他連鎖式嘅越南餐廳質素一般，但BEP嘅河內湯河湯頭清甜，感覺唔似味精湯。牛丸有牛油嘅香味，淡淡的黑椒味，好惹味。生牛肉配上是拉差加海鮮醬，甜甜辣辣，好味。食完面，將油炸鬼浸落湯一段時間再食，都唔錯，不過如果浸得唔夠就會偏硬。隨餐附送送嘅飲品就不過不失。雖然如果有得揀，我都係會揀芽莊或者安南，不過BEP都係一個唔錯嘅選擇。…Read More

因為疫情關係，已經好耐冇約朋友出街食飯。眼見疫情開始好轉，就約咗兩位成年冇見嘅朋友食飯。睇咗一輪OpenRice之後就決定去食蝦蝦放題。一去到已經見到有一半嘅枱已入座，入到去嘅感覺係密麻麻，有啲迫☹︎一坐低，就已經有一碟蝦同一碟送嘅鮑魚加海鱔。鮑魚鮮甜，海鱔沾上椒鹽好惹味。而奉送嘅蝦就一般般。反而自己夾嘅蝦味道鮮甜爽口，不過食到尾嘅時候，水缸內嘅蝦好似都已經死死地ᜊ所以記得一定要夾識郁嘅蝦。至於其他食物，海鮮類有扇貝，蜆，蠔，螺等等。其他食物例如肉類丸類選擇繁多，質素亦都唔錯，特別一讚係肥牛金菇，沾上椒鹽，好惹味♥︎♥︎整體來講食物質素唔錯，不過由於我哋掛住傾偈，所以其實食嘅份量唔多，感覺有啲蝕。同埋餐廳入邊確實係人山人海，即使你同隔離枱隔住一個水缸，大家夾蝦嘅時候個距離其實係非常近。對於而家疫情嘅時期，我諗都係可免則免。…Read More

BB一歲生日，所以想買個一字蛋糕慶祝。睇咗好幾間之後決定買sift ☻︎事實證明，蛋糕係絕對好睇又好食。餅底鬆軟，甜度適中，馬卡龍亦一樣出色，甜中帶酸♥︎♥︎因為知道蛋糕細細個嘅關係，所以我仲訂咗幾個Mini size嘅cupcakes。今次我只係食咗red velvet，個cream cheese frosting 實在太好味啦。其他味道之前都食過，都係好好味。個人認為必點嘅有s’mores & red velvet。每個Mini cupcake都係bite size，絕對係啱晒而家疫情，一人一個，保證衛生。如果大家想搵有質素嘅蛋糕，Sift dessert絕對係一個好選擇。…Read More

鼎王麻辣鍋嚟咗香港已經一段時間，終於等到熱潮減退，唔使等都可以食到。是日有要事要去將軍澳，所以就順便去試吓台灣過江龍火鍋。第一次喺台灣食，其實已經好鍾意，係台灣嘅水準好高，每次去台灣都必定會去鼎王或者無老鍋☻︎☻︎坦白地講，見到價錢已經有啲失望，因為一個字，貴。今日我哋叫咗個限定優惠，一碟180g牛頸脊+180g日本黑豚肩肉已經要$528∴∴∴份量亦都唔多，立即有啲掛住港式火鍋嘅本地手切牛ᜊᜊ不過其實肉嘅質素係唔錯嘅。我哋叫咗鴛鴦鍋，辣度同酸度都有得揀，呢個亦係賣點之一。由於有無限量供應嘅鴨血同豆腐，再加酸菜，其實唔使嗌太多食物都已經可以好飽。另外我哋仲有叫魚皮，配麻辣湯底一流。其他食物例如芝心丸，魚皮餃，就不過不失。最後兩個人叫咗少少野買單要$9xx...整體來講，食物係有質素，但係如果有得揀，喺香港我會揀返港式火鍋，鼎王麻辣鍋，我諗我都係留返係台灣先食啦✌︎✌︎…Read More

Pici餐廳已經食過幾次，每次都相當滿意。每次去新城市廣場都會係首選，不過亦都因為受歡迎而需要等位。當日去到Pici門口已經見到好多人，不過為咗滿足我嘅意粉慾，唯有等🤣食物方面一如既往意粉有咬口，彈牙，亦富有蛋香。醬汁唔會太過重調味，味道天然可口。特別推介Beef Pappardelle，絕對可以媲美我係意大利食到嘅Tagliatelle Bolognese！:)前菜甜品不過不失。Homemade Meatballs 可以話係必點之一！整體黎講Pici 嘅意粉絕對可以令我回味係意大利食到嘅味道…Read More

非常難得8:00準時入到慈山寺網站，順利登記到參學位置。當日我哋10:30到達，大概12點參觀完，由於地點同三門仔好近，所以就楂車去皇朝漁苑飲茶。侍應非常有禮，我哋有BB，所以佢建議我哋坐室內位置。室內位置寬敞，枱與枱之間有足夠嘅空間，唔會覺得逼夾。我哋3大1B叫咗唔少點心，每樣都唔錯！最深刻係方魚肉碎蠔仔泡飯，連BB都要追住飲湯♥︎♥︎ XO醬蘿蔔糕好惹味，叉燒包包與餡料比例均勻，食完鹹點之後再叫一個經典嘅芒果布丁，兒時回憶返晒嚟，仲要多花奶，好正✌︎✌︎總括嚟講雖然價錢唔算平，但係環境清幽寬敞，有露天位置，亦有泊車位，食物質素唔錯，係假日飲茶嘅好選擇☻︎☻︎…Read More

又係一個帶狗帶BB嘅星期日晚上，為免等位，一早book定枱先！今次嚟到西貢呢一間泰國餐廳，佢嘅好處係有露天位置，適合帶狗狗人士。相信呢度日頭景色會比夜晚靚。一去到其實都好多人等緊，即使book咗枱，我哋都等咗一陣先可以坐低。服務員嘅態度好好，有求必應☻︎☻︎食物方面點咗一條酸辣青檸明爐魚配大量粉絲，味道酸酸帶鹹香，好惹味開胃♡♡冬陰功就算叫小辣對於我哋來講感覺係中辣，味道唔錯。最驚喜嘅係馬莎文咖喱牛坑腩配薄餅，非常惹味，送飯一流！下次有機會再去係必點之一♥︎♥︎而小食拼盤，炒金邊粉同埋椰汁西米糕就中規中矩。整體來講，餐廳有露天位置，亦都有泊車位，非常適合帶寵物同駕車人士。食完飯之後仲可以喺海邊散吓步，絕對係週末嘅好去處✌︎✌︎…Read More

是日帶咗狗仔同埋BB去山頂，所以就決定去金玡居食午餐，因為佢有露天位置。我哋有book枱，所以去到唔需要等位。眼見到我哋食完後已經多人喺門口等緊，所以建議去之前book定枱。店舖裝修簡潔乾淨，服務員非常有禮貌，有問必答唔會覺得唔耐煩。食物方面我哋點左原味清燉雞湯面配豬頸肉，花雕雞湯麵，花椒半筋半肉湯麵，安格斯牛肉麻醬拌麵同埋蝦醬炸雞翼。麵質方面質素有所不同，譬如花雕雞湯麵嘅麵煮得過火，好淋，但係花椒半筋半肉湯麵嘅麵則偏硬。味道方面花雕雞湯富有酒香，好適合需要進補嘅人士。而花椒湯麵亦非常之富有花椒香味，值得一讚係滷蛋，好惹味♥︎蝦醬炸雞翼火候啱啱好，不過味道就麻麻。其他食物就不過不失。飲品方面雪蓮杏仁牛奶可以話係必點！✌︎整體來講，金玡居係非常適合帶狗或者帶BB嘅人士，雖然食物質素有待改進，但仍然都係山頂上唔錯嘅選擇。…Read More

上網搜尋一輪後，選擇咗呢間餐廳慶祝老公生日。Lunch Menu選擇唔少，價錢亦非常合理，而且佢可以揀2 courses或者3 courses。我同老公分別選擇左Paris Set同埋Tokyo Set，因為Paris有beef tartare而Tokyo有Scallop✌︎✌︎食物水準相當高，酸酸甜甜嘅柚子汁配帶子非常開胃，而Pairs Set嘅beef tartare就不過不失。可能係因為老公唔食洋蔥，所以個醬汁另上嘅關係。主菜方面Paris嘅香煎鱈魚口感嫩滑，火候剛剛好！而Tokyo嘅鹿兒島肉眼扒亦都非常多汁同鮮嫩。甜品方面Tiramisu 同Apple Crumble兩款都不過不失。順帶一提，佢餐前提供嘅餐包實在太好味，我哋食完要再加多一盤♥︎♥︎總體而言，食物質素好，環境舒服清靜，服務態度非常好，值得回頭再食。下次要試吓晚餐☻︎☻︎…Read More

自從生完BB後，好耐都無去小店食飯飲咖啡。而家小B終於1歲，我可以自己放鬆一下✌︎✌︎今次會選擇去呢間咖啡店最大嘅原因係因為店舖營業至晚上，除咗有咖啡之外，仲有做日式料理，不過就唔提供甜品，只有鹹食。咖啡Latte中規中矩，但就非常欣賞隻杯♥︎喺店舖有售，今次我冇買到，下次要去買一對！食物方面吉列豬扒三文治水準唔錯，炸得剛剛好，帶少少粉紅色，夠juicy。當日去到有兩款special dish，而我哋就叫咗其中一款清酒煮蜆。蜆肉肉質實淨，湯頭好甜，略嫌調味重手咗少少。另外蒲燒鰻魚漢堡亦都偏鹹，一邊食要一邊飲水...總體來講環境舒服，特別要讚賞店舖嘅廁所，非常乾淨同寬躺。服務態度亦都好好，夜晚唔需要等位，可以一試☻︎…Read More