FionLee2016's Profile

呢間幫襯咗一段時間，我住康城，係由中環放工特登行好遠去買返屋企同家人食，有次仲同老細好好傾。奈何，班員工睬你都傻。因為鍾意多汁撈飯，但好多次外賣都唔夠汁(落單已講多汁)，所以之後加$1要求汁另上。今日攞外賣時發覺汁無另上，入去同師傅講，師傅態度差，話太多單漏咗做唔到，亦堅持唔肯補番。其實呢間次次都好好生意，我哋都算熟客，自己漏咗都唔肯做番俾你，仲要話多單搵藉口。一個鐘之後返到屋企，果然係完全唔夠汁，個檸茶仲離譜，完全冇少冰，淡到好似水咁(因為住得遠，冇少冰，啲冰融晒，個檸茶就溝淡晒)，真係好嬲囉！香港依家經濟環境咁差，好多食肆都做唔住，但呢間就串啦，有生意但態度差，其實你補番個汁俾我咪OK，點解咁都拒絕呢？同埋當初如果佢夠多汁，我根本唔需要汁另上再額外加$1。…Read More

之前食過兩次，鹽酥雞滷肉飯係正常的，少少厚粉，但起碼食到雞肉(唔係細細嚿），同埋係即炸，所以先有下一次。今次食，非常非常之差，幾乎全部係雞皮、厚粉，仲要係一早炸定，得兩嚿好細粒嘅雞肉；同店員反映完，換咗幾粒都係差唔多。食熱氣嘢會有上火嘅代價，但呢堆咁垃圾嘅雞皮同粉漿根本食唔到，最後只能靠食嗰個飯嚟醫肚，個廚房/廚師真係好過份！奉勸大家唔好中伏，連埋嘢飲$79，上火熱氣之餘，仲要食到一肚氣🤬🤬🤬…Read More

8點打電話去問，店員(定老闆)答8:30或9點都有位，見9點有7折就book實。專程去太子，其實8:40已到附近，唯有行吓先。8:58準時到達，竟然無位，店員就話好快有，無奈只好等等，再過一陣又有兩位客人到店；等咗差唔多20分鐘，終於有兩個位，最嬲嘅事情發生～店員竟然俾遲來嗰兩位入先，大家都係book 9點，我哋仲要早到過佢哋㗎，原因係佢哋book先喎。咁唔該你哋電話回覆時講明要等，客人可以諗下食唔食，而唔係要客人專登嚟到等餐懵。你哋都知自己間舖得好少座位，空間細坐位又逼，價位唔平㗎，個蕃茄加到$78(見9月其他食評及餐牌圖為$58)。大家有緣睇到，book前要考慮清楚。嬲都要搵食，我哋過隔籬泰聚食泰菜，坐得舒服，服務又好，食物質素都非常好，值得推介。…Read More

由開業幫襯到而家，個水吧好有問題，同經理都反映過好多次，每次叫檸茶少冰，啲冰都係勁多落到杯底，搞到個檸茶勁淡味，尤其係買外賣，太難飲要倒咗佢。都唔明香港啲食肆，係都要落好多冰畀個客，寧願你畀細杯啲，點解唔可以檢討吓、改善吓？下次唔會再幫襯呢間木兆，寧願去隔籬新嗰間茶記。…Read More

路過搵食，阿姐推介我哋叫小菜，好鍾意食西檸雞，就叫嚟試吓。上枱嚇一嚇，成碟八成係雞皮(圖左)，得幾舊肉仔(圖右)；叫咗阿姐三次先肯過嚟(當時已經無乜客人)，同佢講唔對路，佢話西檸雞係咁㗎，死撐話係肉嚟㗎，睜大眼講大話而面不改容。明白要上粉，亦唔係唔食雞皮，但唔係齋皮囉，要賺都唔好太過份，收$80至低限度要畀六成肉呀！…Read More

見好多人讚呢間食肆，又近屋企，所以book咗枱撐吓枱腳。晚餐叫咗個二人前餐$278(每位)，諗住樣樣都試吓，費事逐樣揀。剌身好差，油甘魚好薄身完全無味，吞拿魚肉質「梅梅」哋唔新鮮，同員工反映完無任何跟進; 串燒亦好普通，絕對唔會encore; 連主食M7和牛小牛柳都非常唔新鮮，失望之餘，食完返屋企仲痾咗幾次！埋單$651，食物唔得，茶係凍㗎，環境亦好一般，無乜服務可言，感覺貼錢買難受，真心唔明點解有咁多好評？？？！…Read More

$82套餐 沒有最衰 只有更衰$70沙薑雞 + $12轉套餐碟雞得五舊雞胸肉，又乾又”鞋”，其中一舊係皮包骨，再搭一開五嘅雞翼一隻，份量絕對少過/差過一般茶記$40-50嘅油雞碟頭飯，離晒譜!高瘦男經理之前乜都得，客多就睬你都儍; 同佢講質素差咗好多，佢好cool咁話: 「係咁㗎啦...」，態度好到呢！另外，有個侍應阿嬸仲話:「不過不失」，將心比己，你哋認為碟餸真係無問題? $82咁嘅份量同質素，加送一肚氣，真係無下次了!…Read More

只有肥膏及排骨的京都肉排😰賣相以為okay，一咬就知瀨嘢，一係淋pat pat嘅肥膏，一係無嘜肉嘅排骨，得兩舊係正常肉，平時細食嘅我，食完都覺得肚餓，陰公!收得$75，毫無良心，咁我寧願去隔離嘅大家樂，或者差唔多價錢嘅太興好過😤…Read More