hk.foodpath's Profile

一早睇中左個火山排骨，放寬防疫措施後第一餐揀左銅鑼灣呢間泰菜。入座後聽到廚房嘅師傅用泰文溝通，似乎幾正宗呢，果然食物質素相當不錯，屋企人都話值得二訪。(w/ 10% service charge)🍽 火山排骨 ($208)火山排骨呢度嘅招牌菜，上枱嗰下大到嚇親，三大塊堆成一座小山，店家會提供手套方便客人動手食，老闆見我地無從入手親自教我地點撕開舊骨。拆肉後份量夠三四人分，肉質滑嫩，完全唔乾柴，淋上泰國香料同辣製成嘅醬汁，酸辣過癮。🍽 黃咖哩炒大頭蝦($248)呢碟同樣份量驚人，有三隻大頭蝦。店家已開邊，可輕易將蝦肉剝落，蝦肉新鮮彈牙，泰式咖哩落左蛋同椰汁，香濃得黎辣度比排骨低。🍽 蒜蓉包 ($43)叫得咖哩當然要配蒜蓉包啦，個包焗到外脆內軟，蒜香十足，比平時食嗰啲硬法包好得多，點咖哩汁一流。🍽 芒果糯米飯 ($78)臨尾食埋甜品，芒果鮮甜多汁，糯米飯有咬口唔會黏埋一舊，椰奶甜度不高，好食。🍽 椰青 ($48)食親泰菜都會叫嘅飲品，食完辣野飲返啲清甜嘅椰汁無得彈。餐牌：…Read More

佐敦呢間咖啡店設戶外用餐區，到訪當日都有鍾意享受日光浴嘅朋友揀坐出面，室內就擺滿植物，感覺簡約舒適。呢度嘅食物選擇豐富，餅櫃放滿自家製凍餅同甜品，見隔離枱食芝士杏仁豆腐餅幾吸引，估唔到店員話仲有Keto版本，除左蛋糕外亦有Keto主食同飲品，適合on diet嘅朋友～🍽手撕慢煮鴨腿肉配水煮蛋酸種麵包 Pulled Duck Leg Poached Egg Sourdough ($88)食厭左牛油果多士嘅可以試下呢款慢煮鴨腿肉，鴨腿肉唔乾唔鞋，水波蛋時間控制得宜，酸種麵包係硬脆型，包身煙韌，酸味明顯，配蛋漿、荷蘭醬同大量紫椰菜食味夠晒滋味。餐牌列名酸種麵包全人手製作，天然發酵，包保顧客食得安心。🍽牛油果蟹肉意粉 Avocado Crab Meat Spaghetti ($108)牛油果熟透，醬汁creamy，蟹肉份量多，帶少許海水鹹鮮味，埋檸檬汁會清新啲。
☕️伯爵拿鐵 Early Grey Latte ($50 跟餐$25)平日午市指定飲品有半價優惠，試左朋友呢杯一啖，聞已經覺得伯爵茶味非常濃郁，味道亦然，非常出色。☕️水果茶 (菠蘿百香果) Iced Fruit Tea (Pineapple Passionfruit) ($56)呢杯係signature drink所以無半價優惠，落單時店員亦貼心提醒，不過當日天氣太熱想飲啲清涼啲嘅飲品就試左呢杯，酸酸甜甜幾順喉，仲有果肉喺底。對佐敦呢間cafe有啲印象，除左因為純白設計喺廟街特別顯眼，亦因為好少cafe會開埋晚市(當然而家因疫情暫停)，不過呢段期間推出左唔少晚市外賣優惠，包括主餐牌所有食品8折、餅櫃蛋糕75折，兼送4隻炸雞翼或$40以下飲品1杯，附近嘅朋友可以支持下～餐牌：…Read More

二訪呢間位於美麗華地庫嘅日式木系洋食店，將店名調轉就知佢係同區Atum嘅姊妹店。店內有唔少植物，空間感十足，環境一流，行到最入仲有榻榻米座位，好似去左轉日本咁。店員非常殷勤有禮，見我地有選擇困難咁主動推薦菜式，食物亦有水準(w/ 10% service charge)~🍽壽喜燒牛肉蛋汁燉飯 Beef Sukiyaki Risotto ($168)Encore嘅菜式，燒牛肉薄片份量兩人分卓卓有餘，腍得黎帶油香，壽喜燒汁甜甜地加埋日本雞蛋，用黎撈飯啱晒。🍽帕爾馬火腿．朝鮮薊，毛豆馬鈴薯丸子 Parma Ham • Artichoke • Edamame Gnocchi ($158)馬鈴薯丸子煙煙韌韌，烘乾嘅parma ham鹹香脆身，醬汁好重芝士味。唔知大家食過朝鮮薊(雅枝竹)未呢？口感軟軟地有少少似未煮腍嘅茄子，帶微酸，令整道菜無咁膩，配搭唔錯。🍽月見雞肉棒串 Meatball Yakitori with Teriyaki Sauce & Egg Yolk ($78)雞肉棒外層搽左一層燒汁，炸至焦脆香口，裏面嘅雞肉一啲都唔鞋，仲加左雞軟骨增加口感，點埋蛋汁味道更豐富，推薦。☕️ 抹茶拿鐵 Matcha Latte ($52)抹茶拿鐵無粉粒，微苦有回甘，除左抹茶外仲有板栗同烤甜番薯拿鐵好特別。☕️血橙果粒茶 Blood Orange Tea ($46)由於兩款主食都非常飽肚，朋友揀左熱茶，血橙味明顯，酸度十足，清新解膩。餐牌：…Read More

放假想食個late brunch，又想傾耐啲，就揀左百樂中心呢間cafe。雖然樓上舖地方唔大，但特登劃分左地氈區，有一隻大熊仔同其他擺設畀大家打卡，不過當日有客人坐緊就冇影到畀大家睇。小店食物同飲品選擇豐富，店員態度友善，客人慶生仲會一齊唱生日歌呢~ 🍽鴨與蛋 Confit Duck and Egg ($208)呢度嘅整法同英國過江龍唔同，油封鴨腿軟腍有肉汁，唔會乾爭爭，窩夫係厚實型，加埋蛋汁都唔會腍，面頭嘅糖漿可以中和鴨肉嘅鹹味，配菜有脆薯餅，蘑菇同車厘茄。 🍽焦糖脆餅牛角酥窩夫 Lotus Biscoff Croffle ($68)Croffle牛油香重，比一般窩夫煙靭，面頭唧滿cream，再加上焦糖醬、原塊Lotus餅同餅碎，啱哂螞蟻人，由於有cream係面，記得要趁熱食，擺多陣就冇咁酥脆架啦。 🍽牛油果忌廉芝士牛角酥窩夫 Avocado Cream Cheese Croffle ($68)Croffle近期食得多，鹹食版好似第一次試，估唔到實物比menu嘅圖片更吸引，除左鋪面嘅牛油果片外，忌廉芝士都加左牛油果蓉，牛油果熟度剛好。 ☕️Avocoffee (Layback Exclusive) ($68)牛油果咖啡源於澳洲，本身只係gimmick，挖空牛油果黎裝咖啡，後來香港唔少cafe將佢改良，融入自己的特色，呢度嘅版本就似牛油果沙冰加咖啡，飲落無想象中咁唔夾，反而令咖啡口感更豐盈順滑，鍾意新奇配搭嘅朋友要試吓。 ☕️Espresso Tonic ($62)食完甜膩嘅野飲expresso tonic簡直透心涼，視覺效果亦一流。餐牌：…Read More

📣注意：店家暫時售麵包布甸，並調整營業時間，去之前記得check清楚📣近日嘉多利推出左抹茶紅豆口味嘅麵包布甸，再次牽起搶購熱潮，我未有幸試到新口味，但之前親戚就送過原味畀我食，終於一嘗呢個要排半個鐘先食到嘅布甸。留意各分店嘅出爐時間唔同，我呢轉係油麻地16:30。
🍽法式麵包布甸 $15/個賣相真係唔錯，挖空農夫包後注入蛋漿，常溫時個餡好似燉蛋嘅質地，法包較硬，要撕扯先咬得開，我同屋企人都覺得就咁食有啲蛋腥味，非常建議加熱。以180度焗6分鐘後，法包變得脆身，而個餡未完全熱晒，流心程度加倍，絕對好食啲。$15黎講性價比幾高，不過要排隊就要諗吓啦。…Read More

今次要介紹嘅良心cafe離apm10分鐘左右，係桔梗嘅姊妹店，牛頭角都有分店。位置唔算好方便，但地方闊落，枱同枱之間唔太近，仲有室外座位。最好係無限用餐時間，而且價錢合理。餐廳採用QR code落單，食物好快就送到黎，記得晏啲先叫甜品。🍽台北燉牛肉意粉 ($98)見好多人推薦呢款，果然有驚喜，呢度嘅意粉煮得較有咬口，個醬辣辣地幾惹味，比起意粉感覺似食拌面，牛肉粉量多亦夠嫩滑。🍽嫩煎干貝忌廉意粉(松露醬汁) ($108)第二款主食就叫返啲大路嘢，帶子大大粒，兩面煎香，松露忌廉汁好creamy，意粉亦掛汁，都唔錯但我地覺得燉牛肉嗰款好食啲。🍽提拉米蘇 ($50)一場黎到梗係試埋甜品，tiramisu仲有抹茶味，但見圖嘅顏色偏啞黃就試返原味穏陣啲。份量好足，三個女仔分都夠，有滿滿嘅mascarpone cheese，lady finger夠濕潤，幾重咖啡香，酒味就唔太明顯。🍽白桃烏龍撻 ($48)賣相好靚，可惜撻皮較硬，茶味唔太食得出，白桃醬唔知點解有啲似黃莓醬，麻麻地。☕️Dirty ($42)佢嘅中文名係白上一片啡，咁樣形容dirty都幾貼切，底層嘅奶夠晒凍，隔左幾分鐘閒開始融合。雖然餐牌寫呢杯係打卡專用，但隻豆都幾啱我心水。☕️Matcha Latte (48)幾順滑，有少許回甘，無粉粒。☕️Flat White ($34)朋友點嘅，無試到。餐牌：…Read More

“Heima” 係冰島語「家」嘅意思，呢間小店位於離碼頭15-20分鐘路程嘅西灣，遠離人群，周圍環境寧靜，店內佈置亦有家嘅感覺。老闆好友善，見我地飲完點嘅飲品即刻遞上暖水。留意每款蛋糕數量有限，有時三四點幾去已經賣淨一兩款，感謝同行朋友願意陪我食左蛋糕先搵正餐。🍽海鹽焦糖咖啡卷蛋 Sea Salt Caramel Coffee Roll Cake ($55)朋友鍾意嘅款式，蛋糕軟綿濕潤，忌廉嘅咖啡味道相當明顯，中間兩粒咖啡凍幾彈牙。🍽日本蜜柑卷蛋 Japan Mikan Roll Cake($55)呢度嘅名物，賣相好吸引，一大片蜜柑佔據卷蛋嘅中心，蛋糕同樣鬆軟，忌廉輕盈，蜜柑清甜多汁，好食！🍽楓糖栗子焙茶蛋糕 Maple Syrup Chestnut Hojicha Cake($55)切面好靚嘅蛋糕，栗子蓉同焙茶蛋糕層層相間，栗子味好濃郁，焙茶喺呢度係配角，由於另外兩款食材甜度較低，面頭嘅楓糖漿負責增添甜味。☕️傳統手打抹茶Matcha ($42)用茶碗上別有風味，餐牌寫明選用小山園抹茶粉，澀度較高，如果選用鮮味重啲有回甘嘅茶粉就好，價格相應提高都冇問題。☕️鮮奶抹茶/鮮奶焙茶 Matcha Latte/Hojicha Latte ($38)朋友點嘅，正常發揮。蛋糕好高質，下次入長洲會試埋其他款式！餐牌：…Read More

小店位於荔枝角工廈，設計簡約，以木系為主，睇其他人嘅post話有榻榻米，唔知係咪因為到訪當日係Boxing Day，多人攞原個蛋糕，入舖後只見靠牆嘅木長椅，亦無須除鞋，中間就有一張擺滿陶藝餐具嘅木枱。本身想試週末限定嘅士多啤梨蛋糕，但當日只有兩款蛋糕供應，餐具亦換成即棄，希望下次黎可以試埋卷蛋。**現時實體店休業中，仍接原個蛋糕訂單。
🍽海鹽焦糖芝士蛋糕 Sea salt Caramel Cheese Cake ($55)海鹽焦糖醬食到粒粒海鹽，鹹甜交織，配軟滑嘅芝士蛋糕竟然唔滯，推薦！🍽焙茶芝士蛋糕 Hojicha Cheese Cake ($55)雖然賣相好平實，但芝士味同焙茶味都食得出，而且甜度偏低，口感出色。 ☕️Hoji Dirty ($45 + Oat Milk $6)Dirty愛好者見到有Hojicha dirty就叫黎試下，店主提醒呢杯唔適合打卡，要飲個層次感，我覺得茶比啡融合得更快呢哈哈。焙茶粉似香月園嘅出品，偏黃而且有焙煎香，好飲嘅，不過我傻傻下唔記得叫左焙茶芝士蛋糕，所以都係嗰隻味，應該試咖啡先啱。 ☕️Chocolate ($50)聖誕樹拉花好靚，朋友話幾濃香。餐牌：…Read More

長洲近年開左好多新cafe，呢間好近碼頭，餐具以至枱凳都係露營用具，幾有特色，cafe設室外位置，不過當日門口有人吸煙，坐左陣我地就轉左入室内。本身想試佢地嘅髒髒撻，可惜16:00去到嗰陣已經賣哂。 🍽巴斯克芝士蛋糕 Basque Burnt Cheesecake ($55)蛋糕質感偏實淨，中間位置較外層軟滑少少但未到軟心，甜度適中，加埋忌廉食口感會較順滑，幾鍾意佢落檸檬皮喺面。
🍽伯爵茶戚風蛋糕Premium Earl Grey Tea Chiffon Cake ($55)蛋糕軟熟，有好多茶葉碎，所以口感較粗糙，忌廉茶味頗濃。
☕️檸檬汽啡Lemon Black ($44)本來想飲奶啡，但店家無哂oat milk，只好叫杯檸啡，記得唔好咁快攪匀，唔係啲泡會湧上黎㗎，呢杯酸酸甜甜襯蛋糕都唔錯。餐牌：…Read More

之前去HeySoNuts喺旺角嘅姊妹店Black Coffee覺得個貓耳朵幾好食，今次就試下本店。我同朋友等第一輪，開店前已有人排隊，店內有約30個位，不過都好快坐滿。(w/ 10% service charge)
🍽提拉米蘇日式梳乎厘鬆餅 Tiramisu Cream Soufflé Pancake ($102)甜品當主食嘅我一早鎖定左呢款，店家嘅梳乎厘鬆餅同旺角店一樣主打空氣感，偏濕同軟熟，唔係有彈性嗰款，帶微微蛋香。鬆餅面頭灑上大量可可粉，咖啡酒另上，按個人接受程度落，我鍾意落多啲中和返個甜度。🍽自家製煙燻豬腩肉芥末籽意大利粉 Homemade Pancetta Spaghetti w/ Mild Pommery Sauce ($136)見呢款個配搭幾新鮮就叫左，意粉口感煙韌，煙燻豬腩肉都幾瘦所以用啲力撕扯，落左芥末籽酸酸地幾開胃。🍽Dirty($45)幾好飲嘅dirty，入口有果香，同凍奶融合後口感順滑。🍽Hazelnut Latte ($42)朋友叫嘅無試到，拉花幾靚。…Read More

食盆菜唔駛酒店級嘅，平民小店都有正嘢。作為沙田地膽已經食過盛記好多次，試晒盆菜、粉麵同午市飯餐後終於的起心肝出post，趕喺新年前幫手宣傳下。佢地嘅午餐真係平靚正，雖然話喺熟食中心，但其實係舖位好大同企理，唔止得露天位，係好多沙田友嘅飯堂。佢地仲向露宿者送上一人盤菜，係有良知又有實力嘅小店，值得支持。
🍽柱侯牛腩鮮蝦雲吞麵 ($48)第一次去嘅時候係星期日，只供應粉麵同蒸餸餐。圖二嘅雙拼係午市食嘅。個人覺得幼麵比粗麵掛湯，而牛腩不愧係招牌，淋得黎柱侯醬又濃，腩汁撈湯好味，不過油左少少。雲吞嘅皮好薄，餡料就只有一隻蝦同少許肉碎，鍾意餡多嘅呢款唔啱你。屋企人話牛雜同魚皮都唔錯。🍽無骨豉油雞 ($48)另一樣盛記名物，無骨啖啖肉，肉質滑嫩，雞髀位固然正，雞胸都唔鞋，雞皮下面又唔會成層肥膏，甜豉油撈飯一流，呢個價錢仲仲包凍飲。🍽梅菜蒸肉餅($43)午市人流多所以餸菜整定嘅，上枱時微暖。肉餅大大碟，仲配烚菜真係抵到爛，肥膏嘅比例啱啱好，口感未算好滑但都係中上質素，不過可能配梅菜所以鹹左啲。🍽盆菜(大盆 $1580)冬至時訂左，大蝦彈牙，髮菜又多，已經無得彈啦，比起其他盆菜，佢嘅汁清甜啲無咁膩，腩肉淋得黎入味，墊底嘅枝竹、豆卜同芋頭索晒汁好正，nancy親戚都話可以翻兜，人少少嘅話可以試2-4人嘅迷你盆。(食材如下：古法白切雞、明爐大鴨、冬菇、髮菜、蠔豉、西蘭花、茄汁大蝦、鯪魚球、圍村腩肉、門鱔、鹹菜木耳、枝竹、豆卜、蠔汁豬皮、荷香蓮片、清甜蘿蔔、酥炸荔芋、高湯津白、爽滑馬蹄)屋企人打過邊爐都話正，等有返晚市要去試下先得！…Read More

難得一次趕上熱潮，開業第一個星期就試到呢間採用有機抹茶嘅過江龍，琴日五點幾去人龍長到轉彎，好彩佢只做外賣，而且店員都好快手，排左三個字就到我地，嗰時已經無晒croffle，但就出左matcha basque cheesecake，想買走的話有抹茶長崎蛋糕、抹茶豆乳餅、抹茶醬等。🍵Matcha Soft Serve Ice-cream ($42)軟雪糕以北海道牛奶混合抹茶製成，面頭再灑上抹茶粉，質感軟滑，奶同茶味平衡，甜度唔高。個cone就似脆地嘅老麥新地筒，如果轉隻好食啲有蛋香嘅筒應該加分不少。🍵Matcha Latte Float ($52)香港限定款，睇介紹話house blend係鹿兒島加京都自家茶園嘅抹茶，澀味中等，回甘唔算明顯，甜味靠北海道牛奶雪糕帶出，無額外落糖。值得一讚嘅係質地厚滑，飲到底都無粉粒。🍵 Espresso Matcha Latte ($48)呢杯打卡一流，上層咖啡漸變到底層嘅抹茶，不過人地始終主打抹茶，咖啡真係麻麻，建議試軟雪糕。餐牌：…Read More

應該無乜人唔識呢間長洲良心小店，佢地以蛋入饌，菜式好有創意。店內只坐到約10人，平日去都等左3-4個字，今次試左三款招牌菜，是蛋但不是但呢！🍽 松露是蛋炒配煎薯餅 Truffle Scrambled Egg on Pan-fried Hashbrown ($60)薯餅類似瑞士rösti嘅做法，刨好薯絲後壓平煎香。可能因為要將炒蛋疊成塔，所以比平時早餐食嘅滑蛋結實少少，但絕對唔係鞋，而且落左好多松露醬。🍽 土製炸蛋 Scotch Egg($49)香港版scotch egg，豬肉碎包住流心蛋再炸，一切開蛋汁即刻流出，豬肉碎炸完都唔乾，好食，有薯條伴碟。🍽 真·卡邦尼意粉 Real Carbonara ($80)越黎越多人知正宗嘅卡邦尼唔會會落忌廉，呢度都只係用左蛋黃同芝士，所以要趁熱食，唔係會痴埋一舊。上枱後店主即席刨巴馬臣芝士，同埋介紹佢地用豬面頰肉取代煙肉，更鹹香惹味，幾有誠意，意粉幾有嚼勁，不過我同朋友都覺得鹹左啲。餐牌：…Read More

喺佢開左幾個月嘅時候已經去過一次，但拖延症發作，二訪後先出文，都好嘅試多幾款同大家分享。佢係少數飲品同食物都有質素嘅cafe，亦因為咁熱潮過後都要等位，而家仲有意粉食呢。記得要入舖留電話，唔係喺出面排隊架。🍽新奧爾良烤卡疆雞腿 ($125) 要等25分鐘嘅即製雞腿，少貴但真心好食，皮脆肉嫩有肉汁，紅椒Cajun汁好惹味，伴碟嘅蘆筍同蕃茄仔都唔會焗到乾晒。🍽抹茶紅豆麻糬芝士蛋糕 ($55)用小山園抹茶粉製作，濃度足有少少回甘，蛋糕口感紮實，自製麻糬非常軟糯，唔錯！🍽焦糖布丁 ($45)
布丁震騰騰但無想像中咁軟滑，用羹𢳂完唔會碎散嗰種，布丁嘅焦糖味好濃，蛋香好似無第一次食咁出。☕️Cold Brew ($50)當日係Ethiopia嘅豆，一入口就有果香，酸澀度剛好。 ☕️手沖牛奶烏龍 ($50)本身想帶朋友試下呢度嘅單品朱古力，可惜週末好早賣晒，就叫左杯茶，佢比烏龍茶清同淺色啲，飲落有淡淡嘅牛奶香氣，非常滑身，幾特別。以下係第一次到訪時食嘅：🍽oma 早餐 ($110)呢個早餐好豐富，有滑嫩嘅炒蛋、脆皮煙燻香腸、煙燻三文魚、煙肉、多汁嘅大啡菇同沙律菜，仲有放係鐵絲網上嘅橙花蜜蜂牛奶厚吐司，外脆內軟，牛奶味重，好食但我覺得雞腿驚艷啲。🍽開心果芝士蛋糕 ($55)Menu寫明唔係巴斯克蛋糕，所以唔係軟心嘅，厚實得黎算滑，開心果味好濃郁，仲會灑上開心果碎。☕️Flat White ($45)當日嘅豆係Colombia Finca El Paraiso，帶熱帶水果同蜜糖嘅香氣。☕️單品巧克力-伯利茲($55)上次同同事試飲覺得好出色，朱古力味非常濃郁，而且真係有頗明顯嘅花香。餐牌：…Read More

週末到訪呢間曾經要排長龍嘅日系cafe竟然可以直入，人流少左，可以慢慢飲杯茶食件餅更寫意。白色牆壁配木系傢俬感覺舒服，佢地有室外用餐區，客人可以帶埋毛孩黎。🍽自家製作牛角窩夫 Homemade Croffle ($88)第一次食croffle，雖然壓成窩夫嘅模樣但都食得出牛角包嘅酥脆，配雲尼拿雪糕、芒果、士多啤梨同黃桃醬，個人覺得個醬甜膩左啲，就咁食更正，croffle嘅味道好似唔固定，之前見過有抹茶版本。🍽小山園焙茶卷Hojicha Tea Roll Cake ($50)蛋糕鬆軟濕潤，唔係走彈牙路線，焙茶味主要黎自厚滑嘅忌廉，如果size大返啲就好。☕️抹茶特調 Matcha Special ($60)呢杯賣相一流嘅飲品係抹茶+燕麥奶+豆腐，記得小店剛開幕時有食評話佢一味得個苦字，店家用嘅抹茶粉的確以澀味為主，但比例明顯調整過，有足夠嘅甜度平衡返。我飲開燕麥奶所以唔覺比用牛奶淡口，反而可以突出豆香，同埋飲飲下食到豆腐碎都幾得意。☕️拿鐵 Latte ($45)一上枱見到個拉花即刻心心眼，朋友話偏nutty風味，正常質素。☕️焙茶拿鐵 Hojicha Latte ($50)有比較有傷害，朋友話拉花隻馬好似中左輻射咁，不過係好飲嘅，濃得黎甜度偏低，粉感唔重。餐牌：…Read More