super yummy's Profile

今日過開嚟西環，本身食咗個魚生飯，但唔係好夠飽，行過呢間漢堡包店，非常之香，見到人哋食到好滋味咁，忍唔住要試吓，我叫咗一個黑松露芝士漢堡配薯條，老公叫咗歐陸漢堡配水牛城雞翼。一咬落去真係不得了，漢堡超級多肉汁，有牛味，完全唔鞋，個黑松露醬加埋啲芝士超香，同漢堡好夾，麵包質地似係法式軟包嗰款，唔會𠝹損口。薯條係粗身嗰隻，好實在薯仔味好香濃，唔係啲急凍咗10年嗰啲，仲有個水牛城雞翼雖然唔係好傳統嗰隻味，但佢呢隻味都好好，雞翼又保留到肉汁！ 而老公個歐陸漢堡其實係多咗隻煎蛋，當然有「強」嘅嘢通常都加分！睇相，不解釋。…Read More

東京好出名嘅拉麵店金色不如帰，我自己反而冇食過東京嗰間，一來就試呢間係香港嘅過江龍。當日5:30入去食完全唔使排隊，座位都唔算太逼。我哋兩個人叫咗佢哋最出名嗰兩款拉麵，貝汁鹽味拉麵同貝汁醬油拉麵，湯底好有海鮮味，但係唔油膩又唔漏，上面有少少黑松露醬，本身自己都鍾意黑松露味嘅，但總覺得同拉麵有啲唔係好夾，麵條聽聞係自家製唔係來貨，我幾鍾意佢個麵條質地， 彈牙清爽，叉燒係淋嘅但唔覺得有啲咩特別。佢碗麵無跟糖心蛋，要另外追加，糖心做得幾好好流心，但豉油同蛋味略嫌淡左啲。我哋仲帶叫咗碗叉燒飯，都好食嘅但係冇乜特別。想講一講餃子，佢啲肉切得好細粒又有啲散唔係好似平時食開嘅餃子，又唔係唔好食嘅，係有啲得意囉。最後仲叫多咗個炸雞，炸漿唔太厚幾好，但個炸漿同雞本身冇調味咁，要靠個沾醬喇。整體來講都好食，喺IFC來講唔想食到好貴，但又唔想食快餐，呢個算係幾唔錯嘅選擇。…Read More

自從唔再食千兩後，成日周圍搵啲好食壽司做lunch，因為係lunch所以又唔想食到omakase咁長時間，呢間無二真係啱晒，食材高質新鮮，我個人比較好魚味濃啲嘅魚生（好多人應為係腥味），我叫十二貫壽司定食時想特別要求啲濃味魚，佢哋嘅師傅都好好會盡量安排，每件都好新鮮，飯粒粒分明，而且握得好適中，老公通常都係食蔥吞拿魚腩飯，魚油加上蔥嘅嘅香，真係好正。之前係第二間食過白子，但香港食白子始終麻麻，但呢間嘅白子好新鮮又好香，之前試過想叫，但師傅話唔靚，好專業唔會為賺錢就求其唔靚都俾你食，之後轉咗食鮟康魚肝，一樣好好食，個汁酸酸地，中和返魚肝嘅漏。整體嚟講呢間係一間好高質嘅日本餐廳，雖然唔係咩好出名嘅日本師傅駐場，但質素一啲都唔會差過嗰啲只係招呼熟人同名人嘅omakase 壽司店㗎，你懂的！…Read More

每逢星期日都同開阿媽去某某皇宮酒樓飲茶，不嬲都覺得等位好麻煩，就算之後有得用apps攞飛，但有時叫過咗人又未到就真係係咁先。所以而家都不斷搵啲新嘅地方同阿媽飲茶，今日就揀咗依間張公館。一入到去已經比個環境震懾，由銅鑼灣望過去可以睇晒成個維港景，待應們嘅服務係一般酒樓嘅程度，冇乜特別讚或彈。重點係食物方面質素非常之高，一嚟個叉燒係用鐵板上，嚟到吱吱聲，好有霸氣，叉燒非常淋，調味好好，肉味夠但又唔會有豬膻味，連墊喺下面啲豆都好好食。再嚟我阿媽讚不絕口嘅蝦多士，佢話係佢咁多年食過最好食，因為好多地方都會炸到好油，佢係完全冇，蝦又爽又彈！其他點心仲有麻辣燒賣都幾得意可以試吓，就算係個好普通嘅淨腸粉混醬都做得好好，睇得出啲腸粉一層層，一啲都唔會痴牙，仲有淡淡米香。老公叫咗個水鴨燉湯，非常足料。最未仲有個龍蝦湯泡飯，龍蝦湯好鮮甜，飯粒有脆米後加落去，口感更有層次。其實點心價錢都係好正常，如果唔叫龍蝦湯泡飯，應該唔會太貴，食得過～…Read More

歷史悠久嘅Hugo’s，位於尖沙咀K11嘅凱悅酒店，以前嘅凱悅酒店嘅地址就係依家嘅iSquare。呢啲咁歷史悠久嘅地方，帶啲阿爸阿媽嚟懷緬一下就最啱，所以今日帶咗阿媽食咗個lunch。佢啲lunch係3個course，有頭盆、主菜同甜品。頭盤可以揀湯或者沙律，我推介食佢啲沙律，因為佢會有一架車仔推過嚟任你揀，有起碼10幾款嘢，老人家會揀得好開心（除非老人家唔食凍嘢啦，如果係咁其實帶去飲返茶算🤣)。主菜有魚、龍蝦同埋要預留嘅燒牛肉，佢個燒牛肉非常好食，好淋，好juicy，有牛味，脂肪比例好好，個肉汁調得好好味，配埋佢個yorkshire pudding，係絕配，因為有啲地方整呢舊嘢會好重油益味。甜品都係推一架車仔埋來俾你揀，我覺得拿破崙係佢哋咁多個最好食嘅。除咗以上嗰啲，都有叫多咗少少，想試多啲，叫咗生蠔同生牛肉他他，生蠔好新鮮，生牛肉他他係會出嚟即場喺你面前整，調味調到你滿意為止，低讚👍🏻整體來講，以一個食物咁有質素，招呼又咁好嘅午餐來講，算係唔太貴，咁酒店餐廳差唔多都係呢啲價，最緊要老人家食得開心！…Read More

本來對旺角樓上食魚生飯冇咩特別期望，點知意外地質素唔錯。我哋用咗open rice訂位，所以午市都唔洗等，坐低要等咗都幾耐先有茶飲，但都明嘅，真係唔係好夠人，我叫咗自選丼，油甘魚腩好新鮮，蔥吞拿魚腩就唔係好夠肥美，但都好食，赤貝唔算太鮮，但都夠爽嘅，三文魚子都幾好，唔係好假嗰啲，壽司飯係有得揀白醋飯或者紅醋飯，紅醋飯酸啲，所以我揀咗白醋飯。老公就叫咗個牛肉溫泉蛋飯，係招牌嘢，牛味好夠，溫泉蛋都好有蛋味，值得一試。整體價錢唔屬於太貴，套餐跟一個麵豉湯，可惜麵豉湯唔夠熱，臨走仲有粒雪米糍送俾你…Read More