手瓜起展's Profile

餐廳位於老蘭嘅心臟地帶，內裏環境相當有 feel，仲有歐多牙嘅位置，放便喜歡頻繁呼吸嘅朋友。Kirin Ichiban Frozen Beer，麒麟一番搾 Frozen Beer 柚子果蓉味，啤酒上面獨有嘅零下 5 度啤酒泡沫，結合柚子嘅清新鮮甜香氣，清爽怡人，令人回味。紙鳶雞皮，廚師用竹纖將雞皮穿到好似一隻紙鳶咁樣因而得名，雞皮夠薄，燒到好似薯片咁脆，但係多咗雞油嘅香味，餸酒一流。自家製和牛棒，和牛棒牛味濃郁，點一點隨付嘅蛋漿，風味更佳。Mateus，Mateus 係一種由葡萄牙出產嘅帶泡沫酒，入口甜微，風味清新，風格平易近人，帶有精緻而濃烈嘅櫻桃氣息，口感令人愉悅。燒娃娃菜，串燒咁多肉肉，點都要嗌番啲菜均衡一下，娃娃菜燒得香之餘仲保持住水份，非常 Juicy。明太子玉子燒，玉子燒Q彈，上枱嘅時候仲係微微辣口嘅狀態，蛋嘅甜味加上明太子嘅提鮮，讚。招牌無骨白鱔串，白鱔新鮮，入口彈牙，特別鍾意佢燒得薄脆嘅魚皮，令到整體嘅食感更佳。燒羊架，羊味令人滿足，點埋薄荷醬更有層次。燒明太子多士，串燒店食過好多，用明太子嚟做多士都係第一次食，烘得脆身嘅多士原來同明太子嘅鹹鮮原來係絕配。…Read More

置樂秋香個名震天下嘅白鱔煲仔飯我一直都躍躍欲試，估唔到今個禮拜同阿仔嚟黃金海岸 Staycation 有個咁嘅機會有幸一親香澤，我都係今次入嚟先知道原來佢喺黃金開咗分店。餐廳嘅裝潢同置樂分店同出一轍，以綠色同埋金色作主調，係好有特色嘅輕奢風格，整體感覺良好。味噌湯、漬物，味噌湯係令人最滿意嘅溫度，漬物有韓式泡菜同埋日式酸蘿蔔，仲有呢一個咁特別嘅味醂鰹魚汁鹵鵪鶉蛋，味醂嘅甜同鰹魚汁嘅香充分發揮喺呢一粒小小嘅鵪鶉蛋之內，非常特別。黎明來到，呢一杯咁有詩意嘅特飲係由檸檬汁、橙汁同埋石榴汁糖漿調配而成，味道酸爽清甜，除咗可以打卡之外仲非常開胃。自家釀西柚檸檬話梅伯爵茶，飲品以有齊西柚檸檬話梅以及伯爵茶的味道，整體感覺極富層次，特別鍾意飲品底下以粒粒西柚作堆砌，連口感都照顧埋，讚。威士忌燒蠔，落單嘅時候侍應提醒個燒蠔係大約燒到兩三成熟，半熟燒蠔嘅美味令人十分期待，入口係夾雜住生蠔嘅鮮味同熟蠔嘅蠔味，加上面頭嘅三文魚籽同埋香蔥點晴，非常出色。秋香鹽燒白鱔煲仔飯，卒之嚟到呢個我期待已久嘅白鱔煲仔飯，見到面頭厚揼揼嘅燒脆鱔轆同埋隻動L嘅窩蛋已經令人食指大動，夾起啲脆鱔，將隻蛋同啲飯撈勻，再用個鐵匙羹摷起煲底嘅飯焦，白鱔入口彈牙，肉質紮實，明顯係新鮮貨，加埋面頭嘅鰻魚汁搭少少嚟撈飯，招牌果然係招牌。…Read More

今天入咗沙田探朋友，就試下呢間喺麗豪酒店入面嘅自助餐，餐廳位於麗豪酒店三樓，外邊有唔少兒童遊樂設施，適合餐前餐後俾啲老闆放下電，餐廳以澳門街作主題裝飾，侍應小姐安排咗我地坐池畔位置，望住出面個泳池嚟食自助餐，係時候超吓。餐廳食品種類繁多，冷盤有長腳蟹、凍青口、海蝦、海蜆、各式日本刺身、沙律、芝士拼盤、巴馬火腿、沙樂美腸、而熱葷、池畔BBQ、飲品、甜品等各自亦都有十幾廿款，以每人唔洗四百蚊嚟講，的確相當超值。首先嚟回吓本先，夾咗大量嘅長腳蟹、凍青口、海蝦、海蜆，長腳蟹口感清爽，帶有微微嘅海水味，青口同海蜆肉身飽滿，最令人驚艷嘅係海蝦，蝦肉新鮮彈牙而且極富甜味。跟住就食吓 HAM，COLD CUT 同芝士，我特別鍾意呢一隻包住酸青瓜條嘅燒牛肉，酸青瓜同燒牛肉個味道非常配襯之餘又開胃，我忍唔住係咁攞嚟食。芝士燒龍蝦，龍蝦任攞，REFILL 得又快，攞到埋枱面都仲係熱辣辣，繼續回本之選。熱葷方面以呢個印度咖哩同小炒皇最為出色，咖哩味道正宗，充斥住滿滿印度香料嘅香氣，忍唔住送咗幾啖飯。戶外池畔範圍有多種 BBQ，豬扒、牛扒、雞扒、羊架、豬頸肉、腸仔、燒蔬菜等等都一應俱全。最後除咗 MOVENPICK 之外仲有不定時供應嘅火焰雪山，每當呢個童年回憶火焰雪山推出嘅時候廚師都會敲鐘提醒火焰雪山嘅推出，確保客人唔會錯過。…Read More

我地揀咗個宮崎A5桜花極上燒肉放題，一嚟即刻有廚師發辦嘅和牛限定及放題部位送上，場面非常震撼，計有西冷、和尚頭、壽喜燒，仲有任食嘅肩里肌、肩口肉、牛肋肉、五花腩，內後腿肉同埋外後腿肉，加上仲有成六十款嘅放題單品，真係未出發先興奮。漬物三品，一陣一輪肉肉嘅放題當然要有啲酸may嘅漬物嚟間吓場，三款漬物都相當高質，特別鍾意中間嘅酸蘿蔔，同和牛嘅油脂香味真係絕配。白桃乳酸梳打，酸甜味道平衡，隱隱滲住白桃嘅香味，讚。西冷，見到西冷嘅格仔網紋就令人食指大動，入口果然份外焦香，以一塊西冷嚟講油脂爆標，同肉味相輔相成。壽喜燒，壽喜燒雪花分佈均勻，店員將日本蛋黃同壽喜燒汁攪勻，蛋香加上壽喜燒汁嘅清甜味道，唔洗講嘢。和尚頭，和尚頭係一個極稀有嘅部位，點少少 wasabi 嚟食，相當唔錯。北海道一汐赤魚，魚味極到濃重，每一口都可以感受到魚肉嘅纖維，滑溜得呢仍然保持應有嘅口感。蟹味噌甲羅燒，嚟到呢度食完咁多靚和牛都已經飽咗大半，就揀咗樣比較輕擎啲嘅，蟹膏蟹肉三文魚子加上鵪鶉蛋嘅鮮味撈埋一齊，無械可擊。…Read More

今日同個仔去完太空館又掛住呢間餐廳嘅環境同埋食物，就又過嚟坐下，餐廳環境依舊都係咁文青風，都係咁靚。燒美國牛側腹溫泉蛋藜麥沙律配蜂蜜蘋果油醋汁，粉紅色嘅牛側腹鮮嫩得令人無法抗拒，配以溫泉蛋令成個沙律嘅口感更加滑溜，蜂蜜蘋果油醋汁層次豐富，入口先係蜂蜜嘅香甜味，然後有油醋汁嘅酸味刺激味蕾，結尾再帶啲蘋果嘅餘香，非常美妙。蒜香法國雞翼配紐奧良風味蛋黃醬，呢個蒜香法國雞翼係屬於必需翻兜嘅項目，個雞翼本身淨食都已經相當出色，炸得香脆，蒜香味濃，雞肉嫩滑，點埋個紐奧良風味蛋黃醬簡直係如虎添翼，蛋黃醬帶有少少甜味同少少辣味，非常開胃。菠菜蓉蘑菇南瓜蓉燴巴馬臣芝士意大利飯，意大利飯嘅賣相平平無奇，但係味道原來非常之好，口感非常 creamy，parmesan cheese 味道相當香濃，菠菜、蘑菇同埋南瓜嘅味道平衡得相當之好。…Read More

科學園係假日一家大細輕鬆下嘅好地方， 呢度除咗地方大， 同埋定期有各種科技展覽之外， 亦進駐咗好多唔同種類嘅餐廳。呢一間位於w座天台嘅西餐廳Hunky Dory，帶有少少韓國風，餐牌上都有韓國食物選擇。同行的朋友叫咗呢一杯《 Baileys chocolate 》， 本身凍朱古力已經相當好味， 仲加入咗baileys甜酒， 帶出淡淡嘅酒香同 焦糖香氣。 絕對係生酮人士嘅最大誘惑。不過今次就試咗近期大熱嘅ketone food，睇下滿唔滿足到飯氣，先叫咗一個好似意大利飯嘅《 野菌菠菜燴西蘭花飯》， 西蘭花會用上西蘭花上面嘅花， 切成碎粒之後再用牛油炒香， 煮法意大利飯相似， 口感當然較為爽身， 食落冇飯咁黏， 但粒粒口感可以滿足到對飯嘅咬口同慾望， 如果煮得可以再淋多少少就更加perfect。《精選烤拼盤》同樣是生酮飲食之選， 拼盤裏面有齊牛雞同豬。 烤雞用上咗脂肪低嘅雞胸肉， 雖然未至於嫩滑， 但口感亦唔算太鞋。牛扒方面不過不失， 對得起拼盤嘅價錢， 帶有微微炭香。燒烤拼盤仲有幾款蔬菜配搭， 食落夠健康。總括而言， 餐廳環境夠開揚， 又有戶外座位， 所以吸引咗好多家庭客， 絕對係親子friendly。…Read More

餐廳位於海港城最出嘅”貴翼”，我稱之為貴翼係因為呢邊啲餐廳無五百以上一位我估都好難落到樓，適逢糧尾俾我搵到呢間一樣都望到靚景嘅正嘢，係佢喇，入去啦。鰻魚忌廉芝士美人卷，美人卷嘅外層係米紙卷，裏面包住鰻魚、cream cheese、玉子同埋生菜，估唔到 cream cheese 個味同鰻魚係咁夾嘅，跟機嘅醬汁有啲似花生醬，但味道經過調配，點嚟食都幾好食。南蠻炸雞，特意上網 google 了一下南蠻的定義為何，感激藍朗兄的賜教。三國時代相傳諸葛亮七擒七縱的孟獲屬南蠻族，但日本人所指的南蠻不是這個南蠻，而是形容南歐的葡萄牙及西班牙這兩國人民。早於十六世紀，葡萄牙船隊抵達日本進行貿易，當時的日本人看不慣這些異國人的樣貌及服飾，稱他們為南蠻人，具南蠻特色的食物就是南蠻料理。南蠻雞，說穿了即是炸雞，與普通炸雞的最大分別是蘸他他醬等酸味醬汁來吃。雞肉嫩滑，他他醬味道經過調配，非常開胃。沖繩大島魷魚配豬肉炒麵，炒麵炒得極乾身，底部嘅麵條仲有微微嘅焦香，十分香脆；魷魚好似有水魷又有土魷咁，有啲爽脆，有啲又煙靭，唔洗揀我兩樣都要；特別鐘意佢落埋子薑落去炒，起到提味嘅作用。三文魚親子鹽昆布炒飯，侍應放低鐵板後先至喺圍邊淋上蛋漿，睇住蛋漿慢慢變熟成炒蛋感覺非常治癒，炒飯嘅味道帶啲大阪燒嘅影子，配住滑蛋一齊食令人相當滿足。埋單四百零蚊能夠喺呢邊箱落到樓，係扺食嘅。…Read More

餐廳位於怡和街22號3樓，交通方便，可以喺渣甸街入，又或者用東海堂隔離嗰條捷徑巷仔入都得。餐廳環境格調高尚，甚有情調，嚴如一間西班牙私房菜。Sangria，呢度嘅 Sangria 好特別， 比坊間其他嘅西班牙餐廳用多咗好多柑橘類嘅水果，酸度亦都相對提升，整體層次感豐富，亦都啱哂我呢一類好酸嘅朋友，另外原來重酸係可以將份酒味遮蓋得咁緊要嘅，入口以為怇無乜料到，點知隔一陣就 feel 到佢嘅酒精勁度。炸西班牙青椒仔，青椒仔炸得香脆，唔會好辣，作為一個前菜，非常開胃。自家製煙燻三文魚，三文魚上枱嘅時候有個罩罩住啲煙，上到枱先至打開，帶點驚喜；三文魚帶有微微嘅煙燻香氣，黑色一粒粒好似珍珠奶茶啲珍珠嘅係富份子意味嘅黑醋，加埋三文魚子同埋蕃茜，整個味道相當配合。炭燒新鮮魷魚，呢個燒魷魚係新菜式，新到都仲未加入餐牌裏面，魷魚一上檯香氣就撲鼻而來，一啖入口，嫩滑得不可開交，配以面頭煮淋咗嘅紫洋蔥同埋紅椒，我選呢一個為今晚之最。黑毛豬肋條肉燴西班牙飯，西班牙飯味道正宗，打破一貫以海鮮嚟做配襯嘅慣例，將黑毛豬肋條切粒拌飯，口感創新。巴斯克焦香芝士蛋糕，芝士蛋糕入口輕身，唔會話好漏，甜度係我至愛嘅微甜，好啱我口味。…Read More

Green Love，呢杯 cocktail 用咗冧酒、雲呢拿、綠茶同埋椰奶調配而成，入口椰奶味重，後續品嚐到少少雲呢拿同埋冧酒嘅味道，餘韻由綠茶擔當，層次感豐富。嗌咗個 5-course dinner set，up grade 咗多一款精選甜品，廚師精選餐湯係青豆薯蓉湯，同是日沙律一齊送上，賣相精緻，青豆薯蓉湯口感 creamy，同新鮮嘅沙律菜為是夜揭開序幕。自家製特式蟹肉燒賣，套餐嘅 starter 揀咗餐廳自家製嘅特式蟹肉燒賣，外層黃色嘅係類似班戟皮嘅一塊薄片，薄薄一層而富有蛋味，裏面係一梳梳新鮮嘅生拆蟹肉，新鮮清甜，係非常特別嘅一道前菜。燒西班牙黑毛豬鞍 8oz，將黑毛豬鞍一刀切開，內裏仍然係嬌嫩嘅粉紅色，非常誘人，入口散發著令人滿意嘅豬味，配菜有蕃薯角、粟米芯、蘆筍同埋車厘茄，特別鍾意佢啲配菜都有煎香過，足見餐廳之用心。Gluten Free Flourless Moist Chocolate Cake，甜品揀咗呢一個無麩質嘅朱古力蛋糕嚟試下，蛋糕無用到麵粉同埋奶嚟製造，特別適合對麩質敏感嘅朋友，以無麩質嘅蛋糕嚟講，呢度做得相當不俗。…Read More

得悉之前試過嘅一堂隔離有一間 cafe 啱啱新開張，有聞裝橫相當別緻，今日就過嚟試下，門口除咗一幅粉紫色嘅花花 feature wall 之外仲有唔少綠色嘅植物，淨係嚟呢打個卡位都值回票價。凍朱古力，朱古力味道非常香濃，但係仍然能夠保持好強勁嘅奶味，有牛奶味又有朱古力味，最欣賞佢用 on rock 嗰啲大粒冰，除咗賣相更靚之外，仲可以溶得慢啲又唔會飲到碎冰，高質嘅程度令人非常懷念。牛油果大啡菇全日早餐，全日早餐陣容鼎盛，材料有大啡菇、牛油果、煙肉、薯餅、茄汁焗豆、牛角包、炒蛋同埋沙律菜，牛油果極厚切，大啡菇上面有炒香過嘅洋蔥同埋焗過嘅芝士，實屬餐廳用心之作。食完之後行番去天水圍站都只係兩三分鐘，下次如果想 chill 呢個係一個唔錯嘅地方。…Read More

今日食厭咗平時食開嘅外賣飯盒，就轉下口味食下土耳其菜，餐廳位於巧明街同鴻圖道交界嘅鴻圖中心，鴻圖中心嘅地下裏面有為數不少嘅食肆，但係講到土耳其菜就只此一家， 一個 kebab 最平五十幾蚊有交易，圍起上嚟同個飯盒都係差唔多價錢，就有一個成尺長嘅 kebab，都幾抵食。Chicken Kebab，Kebab 外皮烘得微脆，內裏餡料多到爆哂出嚟，有燒雞肉、青紅椒、紫洋蔥同埋生菜，醬汁美味，味道層次非常豐富，原來成尺長係真係會食到好飽嘅。…Read More

餐廳環境寬敞舒適，近窗邊嘅係六人卡座，地方相當整潔。調味料區域應有盡有，雪櫃亦都有無限量嘅飲品供應，比較特別嘅係餐廳會有自家製洛神花茶、菊花露等一類飲品，夠哂健康。呢度嘅食法有別於一般嘅任砌打邊爐，首先會嚟個頭盤，可以揀雞煲或者酸菜魚，之後會再換過個湯底打邊爐，唔會好似出面咁就咁加湯，溝到個味道淡哂，有雞煲又有火鍋，一次過滿足哂兩個願望。前菜雞煲揀咗韓式芝士雞鍋，味道酸甜平衡，加上面頭有海量嘅芝士覆蓋，絕對唔比城中有名嘅韓式烤雞餐廳遜色。藥膳養生牛奶鍋，食完雞煲之後就開始轉湯底打邊爐，湯底呈奶白色，香氣非常誘人，藥膳味道濃重，睇嚟相當滋補。點菜後侍應先送上一盤靚牛肉，分別係高級雪花肥牛、嚴選牛下肩、牛板腱、精選金錢展同埋特級牛胸爽，其中雪花肥牛油脂豐富，牛下肩同牛板腱有好重嘅牛尾，牛胸爽口感特別，值得一試。另外火鍋料裏面比較出色嘅係鮮蝦同埋粟米餃，前者爽口彈牙重任叫任食，後者內餡飽滿，令人非常滿足。…Read More

已經唔係第一次嚟呢間印度菜餐廳食飯，近排得到新德莉莉嘅加持令呢度嘅人氣更加鼎沸，餐廳環境骨子，好似一間西式嘅酒吧餐廳一樣。嗌完嘢食之後店員隨即放低脆餅同埋三款醬汁，最左面嗰個非常重口味；中間嘅薄荷醬就比較溫和；最右手面紅色嗰個汁酸酸甜甜，十分開胃。食咖哩又點少得啤酒呢！？嗌咗杯 Stella draft 生啤，爽滑順喉，同啲辣嘢最夾。Vindaloo chicken，呢款咖哩口味正宗，辣得有勁度，令嗜辣嘅我非常滿足，雞肉極其滑溜，配合埋裏面嘅香料一齊食，非常滋味。Garlic naan，蒜蓉薄餅，薄餅上枱蒜香撲鼻，外面脆身但係內裏口感煙韌，本身都已經相當好味，點埋個咖哩雞醬一齊食，簡直係畫龍點睛。…Read More

今晚喺老闆嘅帶領之下嚟到呢一間上環蘇杭街天賦酒店2樓試下個商務晚餐，餐廳嘅環境光猛新淨，用嚟招呼客人就最好不過喇。沙律，沙律菜新鮮，醬汁有少少 Caesar salad 嘅影子， 清新嘅感覺為今晚呢餐餓媽加些揭開序幕。前菜三點，分別係水雲醋漬昆布、鰹魚汁秋葵同埋慢煮八爪魚，醋漬昆布酸酸地非常開胃，慢煮八爪魚經慢煮過後份外軟嫩，同個醋漬昆布間住一齊食就啱哂。刺身三點，赤貝、右口魚同埋間八魚。赤貝上面落咗少少青檸汁同埋櫻花鹽，櫻花鹽嘅鹹度只係有普通鹽嘅四分之一，再加上淡淡嘅櫻花香味，非常特別；右口魚薄切，師傅提議點埋個酸汁一齊食，右口魚濃重嘅膠質口感同個酸汁相當平衡；間八魚嘅賣相最為矜貴，喺刺身上面有大大份嘅海膽，海膽上面有少少魚子醬，最上面係高貴嘅金箔 ，海膽同間八嘅味道十分配襯。鮑魚壽司、鰤魚，鮑魚經過慢煮處理，口感份外軟嫩，鮑魚上面嘅係醬油粒，啱啱好吊起鮑魚個味道，壽司飯帶有微微嘅咖啡色，原來裏面撈咗少少鮑魚肝醬，首尾呼應，十分美味；鰤魚其中一塊有被深度火炙過，表面有成兩至三毫米係火炙到熟咗嘅，廚師建議先食無被火炙過嘅嗰塊先，無被火炙過嘅鮮味比較強，火炙過後魚味又比較濃郁，兩者平分秋色。帶子刺身，帶子刺身肉身飽滿，相當肥美，微微火炙過後更添香氣，用脆卜卜嘅紫菜包住，相當好味。真鯛壽司，廚師喺做好壽司之後即席喺面頭灑上一啲柚子皮，柚子同真鯛個味道好夾。新鮮北寄貝壽司，新鮮嘅北寄貝唔係度度都可以食到，我都好耐無食過，北寄貝喺新鮮嘅時候口感爽脆，並非平時熟食時嘅煙韌口感，我好鍾意呢一份爽脆嘅鮮味。毛蟹壽司，呢一件咁特別嘅毛蟹壽司由新鮮嘅蟹肉拆成， 係一梳梳食得出嘅鮮味，壽司當中混入埋少量蟹羔，鮮上加鮮。金目鯛，全身鮮紅嘅金目鯛，愈大條油分愈甘香，魚肉呈淡淡嘅櫻花粉紅色，入口鮮甜嫩滑。野生拖羅，拖羅即係吞拿魚嘅魚腩位置，由於運動量少，最容易積聚脂肪，係成條魚最肥美嘅部分，魚肉呈粉紅而帶白色網紋狀嘅筋，中間肌理分明，入口鬆化即溶，肉質油潤而軟滑，有如和牛般嘅霜降效果，魚味濃郁，令人回味。利尻島海膽軍艦，喺寬闊嘅北海道之中，以利尻島嘅海膽最鮮美可口，因為利尻嘅海膽係食可口美味嘅利尻昆布長大，粒粒都係海洋嘅味道，餘韻悠長。葱吞拿魚腩飯、新鮮筋子，廚師介紹所用嘅新鮮筋子乃係自家調味，入口發現比起坊間嘅更為鮮甜而且少鹹，好啱我嘅口味。麵豉湯，呢度嘅麵豉湯加入咗新鮮嘅蜆同煮，蜆嘅鮮味悉數混和咗喺麵豉湯當中，份外鮮味；令人驚喜嘅係湯裏頭竟然發現到有韮王，認真少見，估唔到麵豉湯加韭黃都幾好味。益力多雪糕，清甜嘅乳酪味道為今晚畫上圓滿嘅句號。…Read More

餐廳位於北角邨重建新盤海璇底下嘅北角匯商場，新商場一行入去嘅感覺已經特別舒適，餐廳裏面仲有一列靠窗嘅座位，臨海嘅氣勢非常吸引，可惜已經俾人坐滿哂，唯有下次有買要趁手。濟州燒肉套餐，呢個餐有特選黑毛和牛上貝身肉、食堂黑毛豬五花肉、豪快和牛燒、壺漬牛肋骨、大紅蝦、墨魚同埋薯仔排骨湯，材料豐富，陣容鼎盛。首先嚟嘅係荔枝梳打同埋梅子青檸梳打，前者有清香嘅荔枝味，上面仲有粒粒嘅新鮮荔枝肉添；後者係傳統嘅青檸梳打加上酸梅嘅味道，對味蕾夠哂衝擊。薯仔排骨湯，估唔到一個普普通通嘅薯仔排骨湯呢度都可以做到咁出色，裏面除咗豬骨同薯仔之外，仲有為數不少嘅蕃茄，湯底味濃，有滿滿嘅豬骨味道，加上蕃茄味道嘅加持，係一個非常出色嘅番茄薯仔豬骨湯。特選黑毛和牛上貝身肉，牛味道濃郁，脂肪分佈均勻，一啖一口，油脂傾刻爆發，用啲生菜同埋 kimchi 嚟包住塊牛肉一齊食就係最高嘅境界。壺漬牛肋骨，牛肋骨喺個壺入面被牛肉燒汁醃漬過，牛肉被醃製過後極度軟嫩，口感嫩滑 ，啖啖都咁入味。墨魚，估唔到佢個墨魚嘅味道咁令人驚喜，口感爽口彈牙，用料新鮮，連墨魚食落口都可以有海水嘅味道，讚。食堂黑毛豬五花肉，五花肉肥瘦均稱，燒香咗嘅肥肉部分 惹人垂涎，同個爐圍邊嘅芝士粟米味道非常之夾。…Read More