frenchfries_foodie's Profile

鍾意試新餐廳，所以成日都會上OpenRice睇吓有咩好食。見到呢間餐廳大比數好評，而且裝修好特別，所以就同朋友去試吓。首先嗰度樓底高，本來空間感大應該係優勢，但鋪面太細門口又大，開晒冷氣旁邊有埋風機，坐咗一陣都覺得完全唔涼，一路出緊汗。而家啲天氣未係好熱都已經咁，夏天唔知點算。唔講食物，淨係呢樣嘢都令我卻步。跟住睇Menu，知道呢度主打食pizza，唔期望會有好多其他選擇，但肉類連最普通嘅牛都冇，唯有失望地叫雞扒 。本身見佢係炸雞扒其實都唔會好大期望，嚟到塊雞扒仲要紙咁薄，食落有啲柴，真係覺得茶餐廳仲好食過佢……除咗雞扒，另外嗌咗啲pizza沙律同埋意粉，前兩者正常，但個卡邦尼意粉咸到不得了 。食咗咁多唔同餐廳嘅卡邦尼，從未如此咸過🤢，仲要份量好細 。總括嚟講，呢個價錢完全唔值。餐廳環境係好重要，但如果只有外表吸引，打卡一次就唔會回頭，食物質素其實先至係真正留住客人之道 。…Read More

之前都幫襯過肯尼好幾次，無論係海鮮，定係刺身壽司都非常不錯，家人都食得出同一般壽司外賣有分別，所以一直有回購。上星期熱辣辣唔想出街，於是又叫外賣。可惜，質素已不復再…. 😮‍💨首先，刺身壽司黎到已經唔凍，更莫講話要如佢落單時所講要回溫1小時先至食得，食落唔夠新鮮，尤其而家天氣咁熱，感覺不太良好。另外，刺身亦比較乾身，唔夠肥美。最差係個鰻魚飯，完全唔好食，仲要有啲腥😣以後似乎又少咗個選擇😢而家咁多人北上食嘢，香港嘅餐廳同外賣真係要維持好質素，先至可以留住客人。…Read More

之前經過呢間大排檔，見到門口好多人等，心諗一定好好食，決定要搵日黎會一會佢。早兩日朋友吹雞食飯，我就特登提議呢間，小炒多人食，可以叫多啲餸😎。我哋叫咗好多個餸，上枱個樣都好唔錯，但食落啲味道竟然好麻麻。大排檔通常都會重口味啲，但佢就好多都冇乜味道❓❓好似豉椒炒蜆咁，個蜆感覺似係用水灼，跟住先至炒，冇蜆味又比較水。金磚豆腐粒個精粹係皮要薄+脆，入面豆腐要熱+嫩滑先至好食，但佢個炸皮好厚身，食落完全唔香口。本身叫嘅餸其實唔係好夠食，但見咁嘅情況，都冇意欲再加餸了。可能期望越大，失望越大。見到咁多人等位，對佢嘅食物好有期望，但出到嚟竟然係咁，好不解點解咁多人會幫襯。…Read More

早兩年食呢間餐廳覺得水準都可以，冇食一排，嗰日兩大一小去幫襯，叫咗平日午市一人套餐+小籠包+嫩雞煨麵。個套餐有一個小食，一個主食，同埋一杯豆漿。小食要咗鎮江骨，一食落去好大浸雪味，肉質又靭，啲糖醋味完全入唔到舊排骨裡面。主食要咗酸辣湯麵，叫做正正常常。上海店小籠包應該係精粹，但個肉餡做得比堅x號同其他小店更差。至於個嫩雞煨麵就仲離譜， 人哋通常有一湯碗，佢$83仲要細細碗，雞肉都唔多一條，好過份！真係好難再幫襯！…Read More

媽咪鍾意食潮州嘢，適逢母親節諗住同佢出去食返餐，上網搵餐廳見到洪記一面倒的好評，所以book位去試吓😋。我哋六大一小，都叫咗好多食物，可惜掛住食，完全忘記咗影相😆。有幾個餸非常出色，值得特別推薦👍🏻：炸蠔仔一般打冷都係食炸蠔餅，但呢度係炸蠔仔，又叫黎試吓。一上菜就已經好吸引，蠔仔粒粒都好大隻，睇得出好飽滿。嗰炸漿唔厚身，食落好鬆脆，有鮮味兼且完全唔腥，亦冇食到蠔殼或者成口油。自己本身都試過好多地方嘅炸蠔餅/炸蠔仔，呢度係最好食嘅一間👍🏻。滷水鵝件滷水味道豐富，唔會太鹹，最重要鵝件嫩滑，一啲都唔靭。而且肥瘦適中，食落好香👍🏻。鵝腸拼墨魚本人唔食鵝腸，但屋企人對呢個餸菜讚不絕口，又新鮮又香，冇食過一間咁好食👍🏻！墨魚都好嫩滑。除咗食物好食，最難得係呢間舖頭嘅店員好好傾，好感受到果份人情味，招呼亦十分周到。呢種互動，喺成行成市嘅連鎖食肆係唔會搵到嘅🥰。難得有一間好食、招呼好又唔貴嘅小店，覺得好值得支持，所以一定要寫個好評推薦下，等佢哋長做長有！不過因為座位有限，唔想等都係預先book位會好啲。…Read More

呢間潮州嘢聽聞幾出名， Booking都要一個月前。家人特登book咗一齊食，期望有佢獨特之處，但估唔到獨特嘅地方係未食飯，先受氣 😤第一輪叫餸，已經有幾樣食物話冇，連蝦都冇，好訝異。等上菜之際，叫咗個姐姐仔嚟加飲品。講咗唔夠幾秒，就眼骨骨好寸咁話：「你講慢啲啦，寫唔切呀！」。我哋逐一再重複，佢就話：「冇橙汁，我哋有嘅飲品已經喺晒個menu入面！」。之後啲嘢食得七七八八，諗住再加餸，叫個生炒骨，呢個姐姐仔又話冇，仲要邊執嘢邊行咗去咁講：「你哋book枱嘅時候已經講咗俾你聽，有啲食物係要預訂架啦！」。當日店舖打嚟confirm Booking嘅時候，係講過有幾個餸要預訂，否則可能冇。但我哋之前全部想叫而佢又冇嘅餸菜，喺個電話完全冇講過嘅！仲要我想請問，究竟邊間小菜館連生炒骨都要預訂？佢先至唔出聲。真係火都嚟埋！好難想像一間咁多人幫襯嘅菜館，啲服務態度可以差成咁，就算啲食物幾好食都係假！仲要老實講，食完佢啲嘢，唔覺得特別好食。咁嘅價錢，其實好多選擇。…Read More

我很喜歡上Cafe！那一份寧靜，那一份悠閑，配上滿室的咖啡香氣，實在是一種純粹的享受！可惜，在寸金尺土的香港，縱然不難找到咖啡室，但滿滿的卻只是擠逼、嘈吵，與咖啡室的環境與本意都充滿著巨大的違和感。那天與朋友聚舊，隨意的進了半路咖啡。那沒有半點商業裝潢、反之帶點藝術氛圍的環境，已經給人一種很舒服的感覺☺️。牆上掛着大大小小的照片，都是昔日香港的足跡，那份淡淡的懷舊情懷，與泛黃的燈泡和七八十年代的天花板吊扇相互呼應著。店員禮貌地帶我們到座位上，再給予餐牌。這裏主食只有三款，選擇不多。我選了茄汁大蝦意粉+伯爵茶，朋友則選了特色的牛油果煙三文魚溫泉蛋酸種麵包+泡沫咖啡。食物的各樣材料也十分新鮮，尤其是麵包的那個醬汁，絕對是畫龍點睛之作，咖啡的味道當然也不在話下，看得出廚師和咖啡師的那份認真和熱誠。這裡還是動物友善餐廳，見到有狗主與一隻金毛尋回犬到來。可能是中午天氣炎熱的關係，狗狗不停地喘氣。這時候店員竟主動地遞上一盤清水給那隻狗狗，實在太有愛了🥰💖！就這樣，我與朋友促膝詳談了三個多小時！這份寧靜和悠閑，深深地在我的腦海裏盤旋！深究這裡人流不多的原因，我想除了是因為平日，就是食物選擇不多。於我來說，就算給我整本的菜單，如果出品都是粗製濫造，完全沒有質素可言，那又怎樣呢？這裏就像是一個綠洲，給人在這個節奏急促、街道繁華的鬧市中一個喘息的角落！有機會，我一定會再造訪！…Read More

之前OpenRice搵食見過呢間扒房幾多like，咁啱今日下午四點幾經過，原來五點前仲係Lunch Menu，平鐵牛扒+薯條+飲品都係$185（未加一），所以就擇日不如撞日，一丁友都試下。牛扒我叫medium，但一切開竟然係medium rare。雖然牛扒質素唔差，但以扒房黎講，控制牛扒嘅生熟度係最基本嘅嘢，咁都失手着實令我有啲失望。環境冇乜特別，侍應招呼麻麻地，配菜蒜頭都唔香，試咗一次就夠了。…Read More

見到呢間餐廳餸菜嘅presentation幾靚，而且呢排午餐都有八五折，所以同朋友試吓。上到去餐廳本身已經唔大，唔知係因為想私隱度高啲，定係隔聲嘅緣故，每對座位之間都有板間開， 感覺好逼夾，視野都受阻。我同朋友都叫咗set lunch，頭盤要忌廉南瓜湯。個湯好幼滑，濃稠度適中，南瓜甜味豐富。器皿係熱嘅，一路飲個湯都唔會好快凍，呢個要加分🥰麵包有兩款，牛角包非常不錯，牛油味香濃得來唔會太漏或者油淋淋，而且仲係香脆，又可以免費追加。要俾個讚👍🏻見頭盤咁出色，我哋追加左個鵝肝多士。鵝肝份量唔細，旁邊嘅柚子粒粒加上鵝肝一齊食，有種清新嘅味道。但係鵝肝缺少咗份獨有嘅油香，着實令人有啲失望。主菜方面，我同朋友叫咗豬鞍同埋比目魚。魚皮煎得香脆，豬鞍亦唔似平價貨，但兩樣都overcooked之餘，仲要咸得好犀利😳，真係唔知seasoning係咪double咗，之後真係好難再幫襯😩。…Read More

Bookmark左呢間大排檔好耐，見到好多like，成日想去試，不過因為疫情，無奈一拖再拖。上星期突然醒起佢，於是同朋友走去試。我哋叫咗好多個餸，但老實講樣樣都麻麻哋，而且份量唔多。菠蘿咕嚕肉，林嘅😞。黑椒薯仔牛柳粒，個牛柳有啲韌，薯仔又唔脆。椒鹽九肚魚個脆漿唔得。豉椒炒蜆，大蜆細蜆一齊炒，生熟有啲唔均勻，同埋一啲蜆味都冇。薑蔥生蠔煲，蠔雖然尚算飽滿，但一啲都唔香口。埋單一人要二百幾蚊，性價比非常低。咁嘅價錢，其實可以有好多選擇。…Read More

舊年經過已經見到呢間餐廳，難得大埔有間扒房，諗住入去試吓。但咁啱週末，爆晒棚，冇得食，心諗遲啲一定要再嚟試。上星期放工突然想食餐好，自己一丁友行吓行吓嚟到呢度，決定去會下佢。入到去冇人，諗住可能因為係平日所以先至冇乜客。見佢專做扒，價錢又唔平，心裡面有啲期望😋。我揀咗Prime Black Angus Ribeye，$138/100g，扒重+/-300g。配菜可以揀兩款，我要咗大啡菇同埋薯仔，另外叫咗杯紅酒。落完單冇幾耐，侍應拎塊扒黎俾我睇， confirm係300g。我見到塊扒就已經覺得伏伏地，因為完全見唔到油花咁。隔咗一陣個扒嚟到，一切落去，一如所料，好實😫！除咗因為冇乜脂肪，亦都因為我叫五成熟，但佢起碼七成，亦唔覺得有牛香味。大啡菇、薯仔、紅酒就正常。但呢度係扒房，配菜好食到識飛都冇用。埋單差不多$500 ，咁嘅質素完全overpriced!! 侍應問我覺得如何，我話太熟，佢先至話下次有咁嘅情況，可以同佢哋講，佢哋會煎過一塊俾我。其實佢呢番說話，係咪應該喺客人落單嘅時候講呢？況且一間專做牛扒嘅扒房，應該對控制牛扒嘅生熟度好有經驗，完全唔應該係咁。所以一定冇下次！🙅🏻‍♀️…Read More

同朋友相約飯聚，佢話想食上海菜，於是喺OpenRice搵到呢間都幾多人讚嘅餐廳。一睇Menu，好多食物都售罄。星期五晚仲要只係七點，唔知點解可以咁。我哋分別叫咗：鮮肉小籠包 - 唔係特別出色，但尚算正常。醉雞 - 一啲酒香味都冇，唔知點解可以叫醉雞。隻雞又肥，完全唔好食。排骨擔擔麵 - 個排骨一嚟到炸到過晒火，又乾爭爭咁，實在不能接受。同侍應講，換一碟返嚟先至正常啲。擔擔麵同樣好唔得，冇嗰種花生同擔擔麵嘅香味，個麵亦都太林。清炒萵筍絲 - 太多油。總括一句，多like都可以好伏，好多時真係要試過先知龍與鳳。…Read More

近日終於感受到絲絲秋意🍁，遇上好天氣，決定要到西貢走一走。落車見到呢間cafe，從打開嘅窗戶睇到內裡佈置，被佢簡潔嘅木系裝飾所吸引，不其然就入左去🥰店舖以Earth tone 為主，大堂及入面部份位置都將幾層打通，樓底極高，有種寬闊同埋冇束縛嘅感覺。右面有一大幅木造葉紋嘅通花裝飾，令人聯想到有好多棵樹喺度咁，再配埋枱上嘅綠色植物，令我好似置身於大自然一樣🌲🌿☘️。對面幅牆掛左好多顧客嘅即影即有相片，配以黃黃嘅燈光，俾人一種homey溫暖嘅感覺。想要寧靜同私隱一點嘅位置，可以選擇行入一啲嘅order 枱，又或者二樓嘅座位，啲枱唔會密質質，空間感依然。周圍放左好多唔同嘅書同埋擺設，無論係想me time 放風，一個人睇睇書📙，定係約朋友談談天說說地👭🏻，呢度都好適合。Cafe 黎講食物選擇幾豐富，我同朋友揀左$118嘅All day breakfast🍳🥓🍞，包咖啡、果汁或茶。食物黎到顏色配搭好吸引，好有放假開心嘅感覺。雖然材料離不開都係果幾樣，但正正因為咁更加高下立見。大啡菇大大嘅一個，一啲都唔吝嗇，而且有好濃郁嘅菇味，食得出唔係平價貨。炒蛋唔會好似其他餐廳咁落左好多牛油去整，難得口感依然軟滑，又唔會散開晒。煙肉腸仔各有香味，絕對唔會好似街外果啲咁要以高鹽份去遮蓋劣質肉味。沙律新鮮非常，個dressing 好醒胃，食完肉有佢balance 返剛剛好。食過無數All day，呢度著實俾到我驚喜！喺人多車多樓多嘅香港，呢度俾我嘅感覺係石屎森林中嘅一片綠洲🏝，食完心情都放鬆左好多。下次黎西貢，我相信都一定會encore😊…Read More

見到有個app 呢間餐廳做緊平日下午5:30 主餐牌食物75折，又好耐冇食過串燒，所以二話不說就卜左。去到果度，原來係酒吧 cross over 串燒，吧枱位置仲有部電視，絕對適合一眾波友邊睇球賽邊食串燒啤啤佢。我地叫左以下食物：🍶金紋純米吟釀食串燒點可以唔飲酒，呢隻清酒幾易入口，唔會太嗆喉，女仔都啱飲。🍹咸柑桔檸蜜太多咸柑桔，落晒杯蜜糖都好咸。🍢一口和牛串有筋，唔似和牛，不過$29串，差不多啦。🍢鹽燒雞翼燒得有啲over左，所以少少乾。🍢鹽燒雞皮一樣燒得over左，燶嘅位置直情有啲苦。🦑燒原隻魷魚串燒呢個ok，香口得黎唔會靭。🍡燒牛油帆立貝帆立貝燒得剛剛好，內裡依然保留肉汁，唔錯。🐙炸大八爪魚足八爪魚有份量得黎唔會炸到老晒，好彈牙，炸漿亦唔會一咬就跌晒出黎，加埋個酸甜醬，要黎送酒一流，好食！🍢薄牛京葱串個薄牛都係燒到有啲燶同苦，而且太薄，京葱就幾新鮮多汁。🥖炸拉絲水牛芝士條炸到金黃色好靚，但水牛芝士唔係好香濃，有啲遜色。🍛燒黑松露帶子珍珠飯有四粒都幾大粒嘅帶子，而且煮到半熟所以好嫩滑，個飯如果多啲汁會更好食。食物黎講一般，但坐得尚算舒服，環境都乾淨，又唔會黑蚊蚊，而且啲哥哥都好有禮貌，見未多客就俾多張枱我地擺野，又會定時定候收左啲空碟，酒吧黎講呢個服務非常不錯。…Read More

約左朋友去觀塘食飯，見到Cobber 有好多like，所以就去試下。佢係世貿大樓一樓，但搭𨋢竟然唔可以直接去到，要搭去二樓再行落一層，有啲麻煩。入到去填紙子，女侍應企到好似不耐煩咁，但果時只係五點幾，個場只有幾枱客，根本一啲都唔忙，唔明態度點解可以咁。餐廳都幾大，但梳化位有啲笠左落去，所以坐得唔係好舒服。Anyway，我地叫左以下食物：🥘明太子忌廉大蝦燉飯個飯一上枱已經好eye-catching，粉紅色嘅燉飯放喺一個好似有軌迹嘅大圓盤上，顯得更突出，不過上面嘅香葉就放得太多，有啲破壞美感。食落醬汁雖然比較稠身，但卻完全包圍飯粒，同朋友一齊分享唔會感覺好漏。蝦大隻爽口，飯粒唔會煮到太林，幾好食。呢個kick off 唔錯。🍝Cobber Noodles一啖食落去，唔係食到蕃茄汁嘅味道，而係甜！感覺係落多左糖，仲要份量不少，所以就算大蝦同意粉ok都冇用。🐙炸魷魚鬚配芥末籽蛋黃醬本來冇諗住叫，但見到隔離枱叫左，好似好好食咁，所以都忍唔住。果然，佢不負我望，魷魚炸得香口得黎一啲都唔靭，亦唔會一啖咬落去啲炸醬跌晒落碟，最重要食落感覺唔油膩，配埋個他他醬真係一絕！黎到飲品：🍹夏季大三角呢杯其實係藍橘西柚檸檬梳打，個藍色好靚，如果換一個特別啲嘅mocktail 杯，一定更吸引。味道不俗，又幾解渴。🧋薄荷朱古力咖啡碎冰朱古力咖啡味幾香濃幼滑，配上沙冰好正！🍹士多啤梨乳酪碎冰士多啤梨味幾香，初頭飲幾好味，但飲到一半就已經覺得太甜，食住野飲都好漏。走嘅時候見到有條樓梯可以直落地面，但原來係後巷，位置比較暗，衛生亦唔好，加上呢度服務麻麻，所以就算食物可以，都應該冇下次了。…Read More