舊年經過已經見到呢間餐廳，難得大埔有間扒房，諗住入去試吓。但咁啱週末，爆晒棚，冇得食，心諗遲啲一定要再嚟試。
上星期放工突然想食餐好，自己一丁友行吓行吓嚟到呢度，決定去會下佢。入到去冇人，諗住可能因為係平日所以先至冇乜客。見佢專做扒，價錢又唔平，心裡面有啲期望😋。
我揀咗Prime Black Angus Ribeye，$138/100g，扒重+/-300g。配菜可以揀兩款，我要咗大啡菇同埋薯仔，另外叫咗杯紅酒。
落完單冇幾耐，侍應拎塊扒黎俾我睇， confirm係300g。我見到塊扒就已經覺得伏伏地，因為完全見唔到油花咁。
隔咗一陣個扒嚟到，一切落去，一如所料，好實😫！除咗因為冇乜脂肪，亦都因為我叫五成熟，但佢起碼七成，亦唔覺得有牛香味。大啡菇、薯仔、紅酒就正常。但呢度係扒房，配菜好食到識飛都冇用。
埋單差不多$500 ，咁嘅質素完全overpriced!! 侍應問我覺得如何，我話太熟，佢先至話下次有咁嘅情況，可以同佢哋講，佢哋會煎過一塊俾我。其實佢呢番說話，係咪應該喺客人落單嘅時候講呢？況且一間專做牛扒嘅扒房，應該對控制牛扒嘅生熟度好有經驗，完全唔應該係咁。所以一定冇下次！🙅🏻♀️
The above review is the personal opinion of a user which does not represent OpenRice's point of view.
Like
HinPangKam
真係唔識嫁wor🤡 偶有失手就算去到再高級啲都有機會生熟度出事 但係一定係要出聲講 然後開頭塊扒話望到都麻麻又係唔出聲 咁你唔出聲邊個知你有問題？
frenchfries_foodie
餐廳menu只會寫咩部位同重量，質素嘅嘢邊度有得guarantee 同拗？講就有用嘅話，咁啲難食嘅餐廳就晨早執晒，唔使咁多食客中伏啦 🙄做食客嘅，只有自己試過好唔好食，決定係咪再回頭幫襯，極其量講俾啲friend知，或者喺呢度share，等大家自己衡量架姐。
deathdoll
有冇相可以分享下？
frenchfries_foodie
本身冇諗住寫食評，所以冇影相。食完返嚟覺得咁嘅質素呢個價位唔值，所以先至寫，等大家多個參考。
Date of Visit
2023-03-21
Dining Method
Dine In
Spending Per Head
$480 (Dinner)
