舔舔俐's Profile

火鍋控經常都想打邊爐，今次去咗新蒲崗一間高質火鍋店。一心想試佢地嘅雙龍吐珠海鮮鍋，大份又多海鮮，湯底滿滿鮮味，喜愛龍蝦嘅一定唔可以錯過呢！一上枱見到2隻開邊龍蝦已經讓我流晒口水，咁大份成個湯底都只係做緊優惠價$328，不過就要提早訂座預留返會穩陣啲。除咗龍蝦，仲有大大隻鮑魚同蝦，好滿足啊！食晒湯底嘅新鮮海鮮後，當然要點啲火鍋配料烚下烚下。手切肥牛係必點，每次食都覺得相比和牛更對味。黑柏葉唔係間間火鍋店都有，口感食落好爽啊！脆鯇魚腩食得出新鮮，所以口感係好爽脆嘅。蟹籽墨魚滑好彈牙啊！餃類我都係打邊爐必點的，朋友推介佢嘅韭菜餃，試完真係有驚艷，韭菜超香又滿滿餡料係入面。朋友仲點咗豬潤拼豬粉腸，兩款我都覺得唔錯的。…Read More

今次嚟到鬼金棒副線主打牛骨拉麵嘅呢間尖沙咀分店，拉麵用咗少見嘅牛骨湯，好吸引我啊！第一次來到當然要點招牌嘅辣麻牛骨拉麵，我依款仲有味玉嘅部分。牛骨湯濃而不膩，飲得出來自牛骨嘅脂香。拉麵幼幼的都比較掛湯，而面頭嘅料都唔少，有牛肉片代替平時嘅叉燒，顏色仲帶微粉，腍嫩中散發香濃嘅牛味。另外仲有牛筋、粟米荀、洋蔥粒等。而味玉中間都有少少流心，蛋黃味道好濃。朋友點咗為芫茜控而設嘅芫荽辣麻牛骨拉麵，滿滿嘅芫茜鋪面，夾起啲麵先慢慢見返內裡有啲咩內容物。兩碗配料都一樣，見朋友食得津津有味，芫茜控認證啊。我哋仲加點了一份牛筋，估唔到份量都幾多。牛筋好入味，滿滿膠質的口感，配埋拉麵一齊食好正啊！…Read More

依間鐵板燒每次去到都full house，仲有好多日本人幫襯，坐吧枱睇住師傅料理特別吸引。今次朋友生日就突登帶佢嚟感受下啦！鰻魚玉子燒好嫩滑蛋香十足，仲有鰻魚粒係中間無咁單調啊！一路睇住師傅整雞排，滋滋作響好吸引，雞皮位煎到好香脆，將脂肪逼出食落唔油膩可伴以柚子胡椒或蘿蔔蓉汁一齊食，超推柚子胡椒醬，辣辣地幾刺激味蕾！豪華大阪燒可以一次過品嚐大蝦、帆立貝及八爪魚，面頭仲有好多蔥花，夾埋大阪燒一齊食好香口又好鮮味。最後當然要叫個主食-炒麵，同樣用咗大阪燒醬汁去炒，十分有風味！仲加入咗豚肉同椰菜絲一齊炒，麵質有咬口。食住大阪燒飲住生啤真係讓人好想念日本啊！…Read More

最近發現筲箕灣開咗依間川菜餐廳嘅新分店，嗜辣嘅我就即刻相約朋友去聚一聚順便去試吓。食辣一定會諗到酸菜魚同水煮魚，今次就揀咗招牌酸菜魚。桂花魚軟嫩無刺，湯底酸菜味好出之餘仲有薯粉係底。前菜嘅選擇超多，其中古法牛心頂我超愛，薄薄一片但口感十分過癮，超爽脆，真係大推！夫妻肺片都係必點，切得大大片，味道香辣入味呢！萵筍我都好鍾意，所以點咗碟份量幾多嘅腩肉炒萵筍。另外藥膳醉雞煲都好吸引，湯底濃濃藥材味，雞肉唔柴又足料！最後不少得點碗桃膠冰粉作甜品，口感清甜又有解辣作用啊！貼心位係菜式都可以選辣度，怕辣或嗜辣嘅朋友都可以照顧到。環境又闊落，好適合親友聚會啊！…Read More

生活太難就係0+3我都無得飛啊⋯放工當然要對自己好啲，食個宮崎A5桜花牛極上燒肉放題當去咗日本啦。入座會先上和牛拼盤，每塊都油花好靚，當然由淺入深慢慢品嚐啦！當中係赤身至霜降級別，包括五花腩、牛肋肉、肩口肉、肩里肌、內後腿肉、外後腿肉、肉眼扒、壽喜燒、和尚頭及前腿肉。除咗係唔同部位之外，仲有特別啲製法嘅和牛壽喜燒，由店員代勞燒過嘅肥美和牛再沾上滑溜蛋黃汁，兩個字幸福啊！最後食埋肉眼扒就飽飽啦～大大塊有質又有量，外面輕輕燒完再剪開，依據自己鐘意嘅熟度再燒多陣，油香十足又腍嫩。另有鹿兒島黑豚、地雞、內臟等選擇，我超愛佢地嘅內臟，牛肝、雞心、雞腎超好食，前者濃香後者超爽口。另外雞冠同雞皮都係必食啊！各款肉品之外，其他小食或蔬菜都包羅萬有同埋好高質！每款沙律我都嗌勻晒適合解膩～仲有明太子菇同埋生食超甜白粟米。小食方面可以任食蟹味噌甲羅燒真心正！蟹膏甘香帶絲絲蟹肉，配脆脆米通食真係超夾！吉列蠔都必點！店員推介我地點黑松露和牛餃子，外脆內juicy。飲品都幾多口味選擇，梳打類相對較多。而甜品有3.6牛乳布丁好滑溜又濃奶香。…Read More

見好多人最近去咗依間餐廳食放題，好多活海鮮任夾任食打邊爐，真係十分吸引！咁啱又要同朋友聚餐就揀咗依度試試佢啦～位於旺角幾近地鐵站嘅地段，餐廳座位闊落，食物種類都幾多。今次揀咗上忍之卷嘅放題套餐，有齊肉類、海鮮、自助吧、飲品等等。每日嘅海鮮都唔同款，今日就有大連鮑魚、草蝦、藍花蟹、賴尿蝦、沙白、青口，總有一款啱食啦！湯底選咗鴛鴦湯，一邊係店員推介嘅蕃茄羅宋湯，湯料相當多，蕃茄味都幾濃郁，另一邊就係清啲嘅鰹魚清湯。一嚟梗係夾咗海鮮先，感覺到海鮮好生猛，賴尿蝦仲好大呢！款款鮮味，而懶人嘅我就最鍾意食鮑魚，因為易離殼啖啖肉又爽彈。而草蝦都好鮮甜，紮實嘅蝦肉真係令人好滿足！除咗有外面夾嘅海鮮，仲可以落單點啲生蠔嚟食住先添。肉類都唔少，有日本國產和牛、牛板腱、牛舌等等，其中最鍾意國產和牛好腍嫩又大片。即叫即製嘅小食都可以用QR code落單，我地就點咗雞軟骨、蝦天婦羅嚟一試，香脆可口不禁就食咗好多。出面自助吧有蔬菜、丸類，飲品都好多款。最後當然要食個甜品埋尾，有movenpick嘅咖啡味仲有豆腐味嘅雪糕球。另外仲有奶茶、抹茶味等等嘅甜品呢！…Read More

早排聽朋友推介依間拉麵店，見屯馬線搭過去幾方便就去咗一試。本身好怕店內會有侷促嘅吧枱位，但去到發現全係table枱，整體幾舒服。湯底選擇算多，經典同創新的都有，我就點咗鮮味嘅鳴海老。櫻花蝦粉撒係面幾香，有兩大塊火炙過嘅叉燒，紫菜、溏心蛋、木耳都有齊，如果有埋荀就更佳。拉麵偏幼，我個碗係正常硬度，真係好剛好，合我口味。湯底有鮮味之餘仲有少少濃厚，唔係稀個種，幾欣賞。全隻溏心蛋令人滿足，流心度同味道都屬中等。朋友點了鳴虎，最經典一款，魚介湯都幾濃，配料都一樣，男士食後都有飽足感。加小食及飲品只需$25性價比幾高，芝麻雞翼炸得超脆，同平時食到嘅唔太一樣，依款係帶辣勁，更過癮。食物質素唔錯，都有幾多街坊幫襯。…Read More

最近要囤各種貨，恰好經過IFC發現呢間香港本地曲奇品牌售賣多款充滿香港特色嘅曲奇餅。店舖環境同店員嘅服務質素都相當唔錯，讓我都安心逛了一會兒。雜錦曲奇($208)最吸引我，有8款口味，可一次試勻趣怪新奇嘅配搭真係超啱鍾意嘗鮮嘅我。雜錦曲奇內容物有XO醬曲奇、香辣蝦米曲奇 、蔥油雞曲奇、陳皮子薑曲奇、杏脯迷迭香曲奇、提子花旗蔘曲奇、七味粉曲奇、紅棗曲奇。我最鍾意就係蔥油雞曲奇同埋紅棗曲奇，前者有港式雞仔餅風味，後者食落幾養生。而最驚喜係七味粉曲奇，辣勁幾突出，夾雜埋堅果更增加口感。本身以為香辣蝦米曲奇同XO醬曲奇會好似，食後發現XO醬曲奇多咗陣油香同埋瑤柱嘅香氣。迷迭香平時用開嚟整西餐，加入曲奇再襯埋杏脯原來都幾夾，香料味溫和唔會搶咗杏脯嘅味道。提子花旗蔘曲奇嘅花旗蔘味香而不苦澀，都值得一試！另外佢地最近出嘅全新口味有4款，分別係鹹蛋蝦膏曲奇、特濃朱古力曲奇、香橙夏威夷曲奇、南乳秋葵曲奇。我有試咗其中兩款，香橙夏威夷曲奇係果乾同堅果嘅結合，鐘意香橙粒係入面幾清新！而鹹蛋蝦膏曲奇咸香十足，蝦味突出仲有脆脆嘅碎屑好似櫻花蝦嘅香脆口感。…Read More

荃灣開咗愈來愈新食店，今次去呢間有閣樓嘅cafe，裝修好文青，食物選擇都算多。雖然唔係下就有日光時段去影靚相，但晚餐可以試到佢地嘅質素都唔錯。主食點咗慢煮牛肩蝴蝶粉，當日無蝴蝶粉供應而用咗貝殼粉取代，牛肩慢煮過呈粉色，食落牛味都幾重。貝殼粉份量幾多，亦煮得頗入味，醬汁蕃茄味好出食落又無忌廉汁個啲咁易膩，整體都唔錯！小食香煎蟹餅好吸引，一大塊內裡絲絲蟹肉，仲可以點醬食更提味。飲品推介芒果茉莉綠茶，清香得嚟飲落仲帶芒果味，愛果香同茉莉嘅朋友唔好錯過。…Read More

最近遇到一間高質日本料理，環境、服務、食物質素都超讚呢！首先嚟個小食燒鱈魚干，鱈魚干超脆口，薄脆好似薯片咁涮嘴，蘸埋醬後讓人食唔停口。日本料理唔少得刺身，乾脆點個花宵刺身拼盤滿足一下，數一數都好多款刺身呢！帆立貝超鮮甜，甜蝦甜糯漿口感讓人感覺好幸福！魚類中葉血引係我地第一次食，魚皮位有彈性同咬口，魚味都幾濃，好特別！另外嘅油甘魚、吞拿魚等都好高質，想食刺身嘅心都被滿足了！仲點咗兩款壽司，分別係火炙左口魚邊壽司及火炙銀鱈魚壽司。前者入口即溶，重點係魚油香，後者魚肉細緻嫩滑。串燒嗌咗幾款，免治雞肉配月見同埋厚切牛舌都係必點item，食得出師傅燒嘅功力，燒得剛剛好。燒白鱔皮燒到超脆，魚肉好鮮，厚中帶爽彈。雞心比較少見，咬落愈嚼愈香。鮑魚面頭有濃郁嘅醬，鮑魚肉食得出鮮味又有彈牙口感。鹽燒大頭蝦都可以係度食到，大大隻鮮蝦只要鹽燒就已經好夠，肉好爽口仲帶膏。…Read More

最近發現尖沙咀有間新鐵板燒餐廳係openrice做緊優惠，有唔同價位嘅鐵板燒，今次就揀咗A5宮崎和牛鮑魚一人前鐵板餐試一試。一入餐廳感覺好簡潔，安排咗係吧枱位置，可以欣賞到日本師傅嘅烹調技術，咁近嘅距離更令我地享受其中。先有前菜三小點，三款食物都好精緻唔馬虎，分別係海膽天婦羅、酸汁豆腐、雞肉刺身。海膽天婦羅配上粉紅岩鹽，而豆腐先煎過再淋上特製酸汁，所以有煎過嘅香、酸汁嘅開胃，仲有豆腐嘅滑溜調和埋一齊。雞肉刺身係第一次食，雞肉本身帶微咸，酷似煙燻鴨胸嘅味道，口感適中更可蘸上檸檬，食落更清新！之後就係令我好驚喜嘅鐵板燒鮮活南非鮑魚，活南非鮑魚十分新鮮，烹調時間唔會太長以保持鮑魚鮮嫩彈牙，今次仲食到鮑魚邊爽脆嘅口感。配搭上亦非常創新，用上海藻醬淋面，鮑魚片就好似係清澈帶海藻嘅海面浮游，好有意境！下面嘅昆布簡單調味帶微咸都可以配搭一齊食。之後就到沙律部分—香辣大蝦沙律，見住師傅將每隻大蝦煎香，海鮮氣味撲鼻好享受啊！一邊煎大蝦嘅同時亦炮製香辣醬汁，個醬炒至乾身，食落香口惹味。來自北海道嘅季節時令生蠔肉厚又creamy，鮮甜之餘尾勁仲帶有礦物味，層次頗豐富。食完生蠔仲有刺身，分別有油甘魚、吞拿魚—赤身、Toro及牡丹蝦，其中特別鐘意甜糯爽滑嘅牡丹蝦。茶碗蒸都一點唔簡單，面頭一層原來係魚湯，仲連帶魚翅好矜貴。蛋液部分十分滑溜，原來係師傅嘅擇善固執，係客人食完上一道菜先會開始預備呢個茶碗蒸，所以剛剛蒸起當然口感唔同啲。鐵板燒蔬菜用上全日本到貨嘅蔬菜，種類都幾多，有秋葵、蘆筍、南瓜及營養價值好高嘅舞茸菇。主菜可以二選一，我地就揀咗深海野生白鱈魚，師傅將魚肉同魚皮分開，魚皮輕壓煎至香脆，最後擺盤以脆片伴邊形式呈現。白鱈魚煎至金黃內裡魚肉仍保留肉汁，緊實中仍有鮮嫩嘅質感，旁邊醬汁唔會喧賓奪主配搭得恰到好處。全晚亮點一定係A5宮崎和牛，油脂分佈均稱，於師傅嘅細心烹調後和牛仍帶粉嫩。蒜片新鮮即製食落清脆加分。和牛更可隨意配搭特製酸汁、洋蔥汁、味噌汁及喜馬拉雅山岩鹽，個人就最愛原味。櫻花炒飯先將櫻花蝦及木魚絲炒香再加入白飯，炒飯最考驗到師傅功力。炒飯除咗粒粒分明外仲帶飯焦，見到師傅更抹上紅色嘅醬入去炒，食落酸酸地，正好平衡食完和牛油脂嘅口腔。炒飯特別之處係一飯兩食變成茶漬飯，好有特色。最後當然唔少得暖胃嘅味噌湯及甜品。當晚甜品可揀選咖啡凍及雲呢嗱雪糕，我地各選一款。雲呢嗱雪糕擺上少許雜莓，草莓甜度幾高，相信係用上日本草莓，加上香濃雲呢嗱雪糕真係完美嘅ending。而朋友點嘅咖啡凍份量幾多，仲好動L而咖啡味都好香啊！…Read More

最近深深愛上日式居酒屋，鍾意佢嘅氣氛同埋食物都令人彷彿置身日本咁。今次嚟到位於尖沙咀，地方神神秘秘係地庫嘅呢間居酒屋，一入去見到有魚缸有串燒嘅吧位又有壽司吧位，提供幾多種類嘅食物選擇。見到有限定嘅鹽燒白鱔當然要試下，鱔幾厚肉，咬落仲有汁，鹽燒後都唔會蓋咗本身嘅味，唔錯！唔夠味仲可以加枱上嘅山椒粉呢～厚燒牛舌芯食落爽又彈牙。擺碟靚靚嘅焦糖白蘭地鵝肝煎帆立貝都係限定食品，鵝肝薄薄一塊但味道都濃郁，帆立貝幾鮮。佢地都幾多款唔同壽司或拼盤，其中特上壽司盛有10貫好抵食啊，有唔同壽司，有啲火炙過有啲就咁握壽司，我自己就鐘意左口魚壽司啦！軟殼蟹卷份量大大個，軟殼蟹好香脆仲有膏，不過醋飯部分就失色咗少少。黑豚溏心蛋串燒有驚喜，醬汁甜甜地加上本身溏心蛋流心效果配合薄燒豚肉幾推介！燒日本枋尾豆腐外脆內軟，如果熱少少就更正啦！明太子雞翼食得多，雞皮餃子第一次見，雞皮作外層，幾薄脆，內裡餃子餡都唔錯，整體配合幾好！…Read More

見朋友介紹呢度晚市omakase好抵食，只需$1280/位，立即就book位試試佢啦！位於銅鑼灣區都可以做到呢個價位又包咗25道菜真係頗佛心。不過去到問師傅佢就話未知呢個優惠價會幾時做完，所以有興趣真係要手刀book位啦。人均低咗就有啲budget嗌下清酒飲啦，問問店員有無好介紹，話有一款生酒好特別，所以我地就果斷點咗啦。飲落都幾清爽易入口，唔會太甜口。之前就上第一道菜，開胃菜—水茄子刺身，同平時淋淋嘅茄子質感，呢款可供生食嘅水茄子就較有口感，好似瓜同某啲水果嘅質感，配埋酸汁食落就令人胃口大開啦。之後就係沖繩特產—水雲，配上松葉蟹肉，好嘢嚟架！水雲營養價值高、對腸道有益，似係海藻、紫菜等，食落滑潺潺，配埋土佐醋汁同埋一絲絲松葉蟹肉又幾夾。海膽蒸豆腐都係第一次食，鮮甜馬糞海膽置頂，豆腐都有微微海膽味又順滑，仲有德國黑魚子加持。北海道北寄貝，食落爽口，肉厚更滿足。淡路島嘅水八爪魚，切到一片片仲有吸管位，注意一片片嘅邊位彎彎地就証明夠新鮮，面頭擺咗啲醋啫喱可以配埋一齊食，特別深刻係吸管位好爽口，海水味唔會太鹹，完全係恰到好處。食到中途師傅仲比我地試佢地嘅漬物，醬油漬蒜頭，第一次試，平時食得多味噌漬蒜頭，但原來醬油漬蒜頭仲特別呢！咀嚼過後仲有微微黑蒜嘅後勁。今日食咗好多來自沖繩嘅食材，呢個係沖繩島嘅車海老，師傅只係煮咗佢15秒嘅車海老只有1成熟，透白嘅色澤，仲輕輕刮咗啲柚子落去，用咗青色嘅夏天柚子，好香呢！ 食落就唔會太生仲突出咗海老嘅鮮味。淡路島小池魚—由於油分好高所以師傅切咗一條條，再撈埋紫蘇花及蔥花等，食落口感豐富咗又食到魚嘅嫩滑同魚香。地金目鯛壽司係比一般金目鯛貴，魚油味好香，炙燒後更加分。日本嘅湯葉配上晶瑩通透的三文魚子，豆味十分濃，仲有種奶滑感，量唔多更覺罕有，唔夠喉呢！seasonal嘅燒白貝不用太花巧已取勝，鹽加埋清酒煮已經帶出到貝類嘅鮮味，飲埋個湯仲好甜。蜜柑鯛細味下真係有蜜柑味，皆因用上蜜柑果皮去飼養，細緻嘅味道所以唔洗多花調味已經令人印象深刻了。赤貝兩大塊，爽口中咬落仲有啲水潤感。北海道縞蝦，每日返貨量有限，飛機貨果然係唔同啲，食落鮮甜且黏口。來自島根縣嘅春香岩蠔海水重，夾埋辣椒蘿白蓉、柚子醋及醋啫喱，好飽嘴超滿足～赤鯥亦係用上炙燒做法，油份被逼出，空氣彌漫住脂香味真係好幸福呢！好罕有嘅富山灣白蝦，上面仲放置好似綠寶石嘅wasabi魚子，加上些許岩鹽提味，頗特別啊！也太幸運了，遇上活紫海膽，師傅仲拎左整個未開嘅海膽出嚟比我地睇，海膽仲郁㗎！紫海膽鮮甜不在話下，配搭上仲有我都好愛嘅三文魚子，雙重鮮味衝擊味蕾呢～呢排食omakase幾常遇到銀鱈魚，刺身級數所以微微燒過表面後更帶出魚鮮味，面頭有炸蒜及鰹魚豉油幾惹味。粒貝爽脆加上瀨尿蝦有獨特嘅鮮味肉質鮮嫩，瀨尿蝦雖然係本地貨但卻一點都不失色。兩大片磯煮鮑魚裹上蟹膏，鮑魚慢煮了4個鐘相當腍嫩，薄薄蟹膏已經十分濃郁。除咗刺身壽司，估唔到仲有炸物呢！和歌山香魚bb造型超可愛，乖乖企係碟上等待我地食佢呢～師傅話香魚係7-8月會大啲，10-11月仲會有魚春嘅部分。所以呢個size已經頗大㗎啦！食落魚肉仲幾嫩口，外脆內嫩啊，近頭嘅部分帶甘味。吞拿魚壽司醃漬後食落比較腍，赤身都一樣可以咁正！Toro手卷超肥美，光閃閃嘅魚肉入口即化，仲有脆紫菜加持。玉子布甸係介乎玉子燒同布甸之間，質地實過布甸可以夾得到，蛋味幾香，第一次食覺得好特別。甜品環節也太令人滿足了，有齊果物同卷蛋，日本嘅哈蜜瓜好甜呢～卷蛋係最近火紅嘅日本草莓味卷蛋，細細件已經幾止癮，莓味又唔會膩。30張相所限，仲有好多相都想分享但post唔到呢！當晚真係好滿足又盡興，聽到隔離枱係嚟慶祝生日仲有折扣添，呢間omakase真係抵食又服務好，多謝B師傅整晚對食材嘅介紹，十分詳盡亦令我地長知識啦！…Read More

次次經過都覺得入去食野飲返杯應該會幾chill，今次Happy Friday就約定咗朋友係銅鑼灣覓食，想起呢間居酒屋就即興去咗食。餐牌選擇好多，花多眼亂就交比無選擇困難嘅朋友幫忙決擇啦！嚟到居酒屋當然必食係串燒，叫咗個FireBird雞肉串燒盛合，必備當然係免治雞肉棒仲配上一顆蛋黃可以蘸。另外仲有唔同嘅雞肉部位及秋葵，可以試到唔同串燒好滿足～更可撒上七味粉更惹味。餐廳其中一個menu有唔同嘅鯛魚食品。今次揀咗釜飯試吓～日本產鯛魚釜飯店員會幫助拌勻釜飯 ，將食材均勻分佈再分埋碗上比我地，好貼心！鯛魚肉唔會鬆散又唔榎口，絲絲魚肉係釜飯中好加分，魚汁滲入飯粒中，加埋三文魚籽嘅鮮味仲美味！唔少得釜飯嘅飯焦，量都唔少，同飯形成對比，咬到脆脆地好過癮。另外見佢有和牛壽喜燒就忍唔住點嚟食，仲用上日本產霜降A4和牛呢！和牛油脂分佈均勻有致，食落腍嫩，油脂感唔會太重。壽喜燒配料都唔少，有豆腐、蔬菜、菇類等，湯底裡仲有啲牛肉粒，好香口㗎！我地仲追加咗一份烏冬，份量幾大，食落好飽肚呢！Cocktail都有幾款，最吸引我就係Strawberry Yakult Cocktail，好似塔嘅形狀，慢慢飲見佢慢慢降低好療癒呢！見佢有落好多草莓汁就知草莓味都好出，Yakult配搭酸甜草莓好夾啊！成杯好大杯兩人分享都夠飲呢～FB自家製草莓大福佢地自家製嘅大福好大一顆，草莓咬落帶汁甜度適中，配搭甜蜜蜜嘅紅豆真係甜品控必點！外層大福皮煙韌又厚薄度剛好，真係配合得好好！人均3百幾但食落好滿足，食物質素又高，是會回頭再光顧的餐廳！…Read More

最近比較常去居酒屋，唔少得呢間位於中環嘅居酒屋，刺身、卷物、串燒應有盡有呢，仲有唔同嘅cocktail可以配美食。點餐時間店員恰好介紹嘅刺物拼盤都係我地想點嘅item，拼盤有5款刺身。塊塊厚切相當吸引，海膽鮮甜大瓣，仲可配埋紫菜、三文魚籽一齊食。帶子、甜蝦、油甘魚、三文魚好豐富！油甘魚海膽松露醬卷卷物排列整齊顏色對比下望落更讓人垂涎欲滴，油甘魚同海膽再加埋松露醬好夾，油甘魚都幾肥美。喜歡油甘魚的我們還點了薄切油甘魚配柚子麵豉汁，柚子汁好加分，魚油香配清新柚子味，唔錯！叫咗個廚師精選串燒拼盤，有5款唔同部位嘅串燒，雞腎、豬腩肉、雞翼等。雞腎好爽，雞翼外皮燒到幾脆，另外有串係雞肉連住雞軟骨嘅部分，脆口軟骨幾過癮。鵝肝鰻魚炒飯炒得好香，炒飯粒粒分明，鵝肝同鰻魚粒融入炒飯，每啖都會食到料呢！仲有客炸豆腐，外層薄脆內裡勁滑，用滑豆腐好鍾意！Until Last Drop超對我胃口的cocktail，賣相美美的，菊花同果味幾出又唔會沖淡酒味，gin同梅酒做底，加入egg white飲落滑啲但又唔會腥，太愛了。最後嚟埋個甜品拼盤作結就完美啦，兩球大大嘅抹茶雪糕更配埋抹茶味雪米糍襯返。旁邊雜莓適當解膩，唔錯！…Read More