cindychik01's Profile

當日喺大角咀附近整電腦, 知道附近好多好食又平嘅餐廳, 諗住係openrice搵下有咩好食推介, 就搵到金船長餐廳.我朋友話佢有聽過呢間餐廳, 幾年前成日話幾出名, 經常話要特地去食,但係佢都冇試過, 於是我哋就借呢個機會一齊去食.餐廳裝修有啲似港式西餐廳, 係用啲膠皮枱布, 有D痴立立. 燈光暗暗, 一入門口就望住廚房, 廚房係好光猛而且廚櫃都係鐵色, 冇門冇布遮住, 感覺有啲唔夾.前菜叫咗黑松露菌及牛肝菌配野菌忌廉汁意大利雲吞, 有驚喜! 個忌廉汁幾好味, 食得出奶香, 調味好到位, 雲吞裡面有肉碎, 雲吞火侯煮得岩岩好, 夠彈牙, 加埋一齊好好味! 另外點左個店長推介黑松露馬卡斯芝士夾心薄餅, 賣相好得意, 外面少少脆裡面軟軟地, 有d似食緊釀左芝士黑松露既烘麵包咁, 食倒淡淡既芝士味, 可是黑松露味唔係幾食倒, 薄餅上面有類似麵包糠/芝士粉, 增加左成個薄餅既脆度, 呢個菜式係一個幾特別既配搭, 我覺得如果芝士同黑松露味再濃d就更好! 另外叫左炸軟殼蟹南瓜意大利飯, 意大利飯煮得幾好, 林林地又有d咬口, 係我喜歡既口感, 好有南瓜甜, 可惜鹹味唔太夠. 不知為何個軟殼蟹有d凍同腥, 唔似新鮮炸起, 而且飯量幾多, 相對之下軟殼蟹太少, 結果我地食淨晒d飯, 可惜.我覺得餐廳服務幾好, 可能同裝修有反差掛, 服務員都好有禮貌, 而且斟水收碟都好快, 值得一讚!呢度其實好適合大夥兒黎食,因為價錢唔貴, 而且份量好大, 選擇又多. 可惜我今次只有兩個人黎食, 想試佢出名既菜式同甜品都冇機會. 雖然今次食既野唔係特別好食, 但佢有好多菜式我有興趣想試, 經過既話會再黎食.…Read More

前幾日同朋友係尖沙咀搵嘢食, 係openrice見到呢間餐廳 係灣仔開到嚟尖沙咀既法式料理. 見到唔使排隊, 就去試下, 可惜結果令我大失所望.餐廳位於商場中層,裝修摩登, 窗口對住大街,好光猛開揚. 座位有少少逼,不過幾個女仔坐都可以.法式bistro出名食法式蕎麥薄餅galette,  係咸薄餅, 最經典配搭係芝士蛋火腿, 可是想叫嘅時候佢竟然冇曬, 當時係午餐時段中午十二點半, 剛開店冇幾耐,邊有可能咁早賣曬? 結果迫住同朋友叫咗忌廉菠菜野菌 galette.前菜係湯或沙律, 菜都幾新鮮, 咬落去幾爽脆, 湯都ok, 幾稠幾滑. 個galette賣相都幾好, galette皮好薄, 林林地唔係特別脆, 有蛋香, 可是忌廉野菌同菠菜完全唔夠味, 我同朋友落咗非常多黑椒同鹽先有少少味, 感覺我喺街邊食鹹pancake都仲好食, 碟野仲要份量唔大, 女仔食完都唔太夠飽. 我另一位朋友叫咗三文魚galette, 除咗三文魚之外, 裏面冇乜調味, 只有一隻生蛋同埋菜, 食落成個galette乾爭爭, 只有煙三文魚嘅油香味, 除左個galette係比較特別外, 其他食材, 三文魚, 菠菜, 生雞蛋, 感覺好似可以自己都整/買倒, 冇乜心思.我印像中餐廳係外國人執業,我感覺唔倒佢既誠意.我唔係拎佢同真正法國菜比, 但我覺得街頭賣法式薄餅既小店都整得有抵食/好食過佢,或者係佢法式口味唔岩我掛, 但實在令我太失望了!值得一提我哋當日係食lunch set, 比起晚市平宜. 我見佢都幾多好評, 而且大部份朋友仔都係食brunch或者晚市, 可能午市唔係佢主力掛??…Read More

今日一家人去咗旺角食午飯,去到旺角moko, 茶樓太多人, 閒閒哋都要等二三百張枱, outback正正係兩間茶樓旁邊, 人齊就可以入去, 見到lunch set幾抵食, 就一家人入去試下.Outback每間分店裝修都係差唔多,中間有個吧枱, 有電視睇,有少少似酒吧, 座位幾寬闊 ,有外國人拖住喼去食都冇問題.首先叫咗小食拼盤,  炸薯條,豬肋骨,炸雞翼都幾好味. 每人都叫做一個餐, 頭盤沙律同湯都幾好食, 沙律菜幾爽口幾新鮮, 而且個湯唔似係罐頭, 幾好. 佢個黑糖包真係好好味, 甜甜地, 質地又鬆軟, 煙煙靭靭, 又有麵包嘅烘焙香味, 上餐時熱辣辣,每次食都覺得好好食. 叫咗 香芒雞沙律, 份量真係好大, 雞肉蕃茄炸脆條生菜兩號均勻,每一啖都食到唔同味道, 芒果醬汁酸酸甜甜, 加埋雞肉食幾好味, 如果芝士更加多會更好. 另外叫咗燒春雞, 份量好大,雞肉醃得好入味, 燒雞皮好正! 薯條都係新鮮炸, 外脆內軟! 亦都叫咗outback最出名嘅牛扒, 牛扒 有牛香, 調味到位, 五成熟剛剛好, 火候控制得幾好, 抵食又好食. 可惜旁邊嘅配菜, 有點凍, 西蘭花腥腥地,好似擺咗好耐, 要扣分.旺角呢間outback, 有番佢正常嘅水準. 之前食過黃埔分店, 非常一般. 旺角分店挽回outback嘅面子, 嘢食意粉量嚟講好抵食,味道又唔錯, 坐得又舒服,下次去moko經過既話,我會再嚟食.…Read More

新都會廣場翻新左一段日子, 同朋友行完街想食D輕食, 就揀左SIMPLY LIFE食, 因為佢食物水平一路保持得幾好.我唔係第一次食SIMPLY LIFE, 我都知佢係美心集團. 呢間SIMPLY LIFE都係開放式廚房, 木製傢俱, 但呢間店特別既地方係, 佢樓底好高, 有落地大玻璃, 可以望倒樓下既街景, 而且都望倒對面少少山頭, 夠開放, 光猛, 就算坐位比較細都唔會有壓迫感, 令人食飯都開心D!叫餐既頭盤係沙律或南瓜湯, 沙律菜新鮮, 口感豐富, 除左醋似落多左少少外, 都幾好食. 南瓜湯食倒南瓜溶, 有誠意.主菜叫左燒雞肉沙律, 牛油果, 蘆筍, 加黑醋汁. 有次食過個醋汁好酸, 酸到食唔倒, 大家要記得叫佢分開上! 沙律份量好大, 好岩一大班人SHARE食, 菠菜幾新鮮, 加埋牛油果同蘆筍一齊食幾好味. 雞肉, 牛油果同蘆筍份量都OK, 但菠菜實在太多, 整個沙律味道同口感有點單調, 如果可以加少少蕃茄或一些爽甜既蔬果, 應該會更好! 另外點左個火腿墨西哥辣椒芝士PIZZA, 非常之好味! 我覺得比起好多以PIZZA為賣點既餐廳好味好多! PIZZA係薄脆皮, 批邊好似餅乾咁脆, 仲要有烤焦位, 好新鮮好有烘焙味! 蕃茄醬, 芝士同火腿好足料, 啖啖都食倒, 分佈好平均, 墨西哥辣椒少少辣好惹味, 令到你食唔停口, 要連批邊都食埋, 正! 另外叫左蕃茄蟹肉手工扭扭粉, 非常失望, 雖然扭扭粉真係好煙韌, 可是蟹肉好明顯係非常之唔新鮮, 極度腥, 就算加埋蕃茄醬一齊食都食出好大陣腥味, 失望!總結黎講, 我覺得間餐廳幾好, 環境開揚, 野食唔錯, 價錢OK, 可能會再黎食.…Read More

是日母親生日, 約左一大班親朋戚友黎食自助餐, 幾年前公司聚會食過W 酒店既自助餐, 印象好好, 所以決定係呢度食. 事實上, 呢度都係個唔錯既選擇!餐廳位於6樓, 樓底高, 裝修好摩登,而且可以同時望倒西隧車景同無敵海景, 而且座位鬆動, 枱凳都夠大夠闊, 適合我地12-95歲既親朋戚友, 可惜去拎野食要行幾級樓梯, 對老人家黎講唔太方便, 好采侍應同食客都好友善, 會幫我地將食物送上枱.老實講海鮮選擇真係唔多, 同我幾年前食既差天共地, 我印象中有龍蝦, 青口, 生蠔, 蟹腳, 麵包蟹食, 但係當日冇蟹腳, 而且麵包蟹不知為何切到碎濕濕, 睇落好小氣, 色水又唔新鮮, 唔開胃, 令人相當失望!頭盤有驚喜, 所有沙律菜佢都有, 可以自己整, 另外提供已經整好既沙律, 有羽衣甘藍, 紅菜頭呢類比較少見既菜... 食落幾新鮮, 紅菜頭唔知係咪醃得好, 冇乜草青味, 幾好食. 頭盤仲有一個蛋既菜式Deviled eggs, 係半隻烚蛋, 蛋黃部份係釀左其他醬+蛋黃+煙肉, 幾好味...我食左幾隻. 另外值得一讚既係呢度既芝士, 因為佢唔係平時見倒既車打,高打芝士, 而係Brie, Cendre, Buffalo, Morbier 同埋 Fourme d'Ambert…部份係D比較少見既法國, 連配佢既餅都唔係淨得Cracker餅, 仲有個長方形薄脆既麥餅, 有誠意!魚生幾好, 新鮮, 同出邊食既差不多. 熱食方面, 有牛肋骨, 牛脾, 幾有牛味! 燒味幾好食, 燒肉真係脆卜卜!可是點心方面令人失望, 點心非常難食, 未試過食餃皮咁厚又冇味既蝦餃, 燒賣, 鮮竹卷雖然用左蒸籠裝住, 但食物樣子, 食材略見普通, 唔太吸引… 其他仲有炒時蔬, 焗雞扒, 鱸魚之類, 正正常常.甜品方面, 款式都算幾多, 所有野味道都幾好. 朱古力BROWNIE, 海鹽焦糖朱古力蛋糕, 忌廉泡夫, 檸檬撻, 紅莓奶凍, 法式焦糖燉蛋, 麵包布丁, MOVENPICK雪糕, 朱古力噴泉, 牛油香橙蛋糕…之類之類, 每款甜品味道賣相都好到位, 應甜則甜, 蛋糕同佢既配料味道幾夾, 食得出有精心考慮過. 個人覺得最好食海鹽焦糖朱古力蛋糕, 真係有甜有鹹又有焦糖既香烤味, 而且味道好均衡, 唔會冇左朱古力味, 夠濃, 正! 另外一讚係檸檬撻, 好多時檸檬撻都好易太甜或酸, 但呢個岩岩好, 酸得黎帶點甜, 而且個撻皮好薄脆, 整個甜點大小剛剛, 好適合一啖咁食, 於是唔覺唔覺食左幾個! 雪糕只有4隻味, vanilla, chocolate, strawberry同 salted caramel, 全部movenpick, 超好味! 另外酒店會送一個朱古力甜品比生日之星, 佢係一個空心朱古力球, 旁邊有熱熱既黑朱古力醬, 讓你一倒落去將整個朱古力球溶掉, 就見倒裡面有個特濃朱古力蛋糕, ,好有心思. 而且朱古力醇度適中, 非常適合喜歡食黑朱古力既朋友, 推介! 相比之下個人覺得朱古力BROWNIE, 法式焦糖燉蛋 同 忌廉泡夫 略為遜色, 係出面蛋糕店都食過更加好食既, 細食既朋友仔可以考慮唔洗試.總結黎講, 呢個自助餐係一個唔錯既用餐經驗, 環境靚, 服務一流, 食物味道幾好, 用料新鮮, 特別係頭盤, 食材配搭經過考慮, 但以食物種類黎講勝價比不太高, 如果佢做特別優惠既話我會再食多次.…Read More

今日本身想去THE ONE某新開既餐廳食飯, 點知滿左, 於是就去左旁邊既美麗華搵野食, 知道佢3-4樓果度開左好多餐廳, 搵既時候經過Pizza Express, 印象中海港城果間既Pizza都幾好食, 於是就入左去食.當時係7點左右, 但裡面冇乜人. 裡面既裝修同一般既Pizza Express一樣, 白色/藍色, 幾摩登. 我地叫左SET DINNER, 包一個沙律, 小食, 主菜, 兩杯野飲. 沙律叫左主廚精選沙律, 我覺得幾有誠意, 用料都幾新鮮, 裡面除左沙律菜, 仲有蛋, 芝士粒, 雞肉, 車厘茄… 而且比例岩岩好, 每啖菜都有其他配料一齊, 夾埋味道幾有層次, 好味! 小食叫左蕃茄醬肉丸, 蕃茄醬味道幾好, 酸甜味平均得幾好, 感覺裡面有真蕃茄, 肉丸比較普遍, 好食過宜家家居, 但好惜我食倒一粒有隔夜味… 另外叫左黑松露油野菌PIZZA, 有點失望, 唔係食倒黑松露味, 上邊既芝士同蕃茄醬分佈好唔平均, 而且蕃茄得好少, 好似得D水係上邊, 野菌又唔夠多, 成個PIZZA淨係食倒批皮味, 佢仲要已經係薄皮… 正當我想比個差評時, 經理禮貌地走埋黎問我地食物好冇味, 於是我朋友就一輪咀咁將佢既意見講晒出黎… 講到蕃茄醬有幾失望, 點知經理話會同廚房反映下, 仲多謝我地既意見, 話睇下點樣可以改善, 最重要係, 佢送左PIZZA EXPRESS自己製既蕃茄醬, 話希望可以挽回番我地既信心! 雖然食物一般, 但我真係人生第一次感受倒意見得倒重視, (之前去過合和中心某自助餐食, 有STAFF在收錢時講左D好侮辱既說話, 我就投訴佢, 但經理都只係送左張卡片就打發我地走), 今時今日咁用心既服務態度邊度搵?所以我為住呢位經理而比個笑臉佢, 真心希望佢生意興隆!…Read More

今日約左朋友去黃埔睇戲, 就係附近搵野食. 黃埔/紅磡周圍其實都好多野食, 所以冇特別上OPENRICE搵有咩好野食, 見今OUTBACK多人排隊, 就羊群心理一齊排隊食, 呢個舉動實在令我好後悔.唔係第一次黎OUTBACK食, 一直都覺得佢係類似DAN RYAN, RUBY TUESDAY之類既食扒/美式西餐廳, 食過味道都唔錯, 但今次實在令我太失望了. 當日有LUNCH SET叫, 叫左燒雞肉芝士夾餅 (廚師推介), 果然廚師推介都係伏, 薯條幾好味, 新鮮炸起外脆內軟, 唔錯, 但係個夾餅味道同急凍果D夾餅一樣, 雞肉冇味, 芝士冇拉絲, 裡面真係淨係得雞肉同芝士, 連調味用既洋蔥, 青/紅/黃椒, 蘑菇…咩都冇, 急凍果D都有啦, 佢仲意思推介, 大失水準, 究竟係我要求太高定點? 另外朋友叫左個烤牛肉串白汁燴飯, 白汁燴飯味道OK, 裡面有豆, 青/紅/黃椒, 蘑菇, 用料都足, 可以每啖飯都有菜係裡面, 炸牛肉串好有牛味, 因為裡面好生, 我估得3成熟, 佢下單時冇問我地要幾成熟, 服務係咪有少少問題呢? 當然中意食生既朋友應該OK, 但我個人喜歡8成-全熟, 完全食唔倒…OUTBACK黎講, 呢個食物質素實在太令人失望了, 可能餅/意粉/飯主菜類唔係佢主打掛? 我記得以前OUTBACK都幾好味, 食完今次之後, 但我係以後都唔會黎食, 質素好似愈黎愈差……Read More

今日約左幾個朋友食飯, 大家都想食D輕食, 有人推介左咖啡弄. 對上一次食都已經1-2年前, 果陣食咖啡弄至少要排45分鐘隊, 今次去到, 發現原來訂位服務, 朋友話已經實行左好一段時間. 雖然我地7.15去到, 但可能落大雨關係, 冇乜人等位. 可是用餐時間只限1.5小時, 於是同朋友等齊人先入去.我地叫左鴨胸沙律, 一如以往既幾味道, 菜同青/紅/黃椒好爽脆, 夠新鮮, 鴨胸肉鹹香幾入味, 肉好實淨, 有少少咬唔開, 不過都OK! 另外叫左總匯三文治, 原本以為會好似茶餐廳公司三文治咁, 但比我想像中足料, 蛋, 火腿, 肉, 青瓜, 蕃茄, 要有既都有齊, 仲有少少沙律同粟米片(味道似係超市買倒既DORITOS)伴碟, 特別要讚下個蛋, 煎得又滑又鬆軟, 加埋個烘得脆脆既麵包一齊食, 一流! 身為甜品FANS, 特地叫左兩個waffle, 草莓冰淇淋鬆餅同埋葵瓜子芝麻冰淇淋鬆餅, 草莓雪糕OK, 雖然唔似有真草莓係裡面, 但味道OK, 旁邊既草莓伴碟大大粒, 微甜, 質地都實淨, 幾好, 窩夫熱辣辣, 外脆內軟, 加埋配料一齊食幾好味! 葵瓜子芝麻冰淇淋鬆餅, 有驚喜! 雪糕好有芝麻味, 感覺好似芝麻糊, 而且唔太甜, 旁邊有一杯仔芝麻醬, 非常之香, 感覺似係有真芝麻係裡面, 有誠意! 另外有個黃色好似雪糕既物體, 一食之下先知原來唔係雪糕, 類似栗子溶, 食倒有少少夥粒, 似係新鮮製, 這個配搭幾有新意, 而且同平時食開蛋糕上既完全唔同層次, 好味, 加埋窩夫一齊食味道非常之夾, 好似吉士醬咁, 但絕對唔油膩, 推介! 另外因為最低消費, 每人叫左杯野飲, 我叫左熱既洋甘菊果茶, 茶冇乜特別, 係平時茶包沖出黎既味, 要讚既係佢生果分開上, 唔似部份餐廳會將生果放入個茶壺裡面, 焗到林晒, 沖出黎會有渣, 我食左佢D生果片, 幾脆口幾新鮮, 中意飲果茶既可以試下!真係要一讚咖啡弄既質素同我1-2年前食既一樣, 幾好味又抵食, 想係尖沙咀搵倒呢個質素, 真係好難. 值得推介, 我一定會再黎!…Read More

星期五晚上, 特別想大吃特吃, 食肥膩, 重口味既野食! 於是在附近搵左間韓式燒烤, 上OPENRICE見倒都幾多好評, 門口又竟然冇人等位, 就入左去食.餐廳裡面其實同一般既韓燒/日式燒烤一樣, 枱凳都係細細窄窄, 每張枱都有長條形既抽油煙機. 可能我地比較早入去, 所以唔係好大陣油煙味, 感覺OK乾淨.首先要提既係, 佢泡菜係特別好食. 我本身唔喜歡食泡菜又霉又辣又酸, 但唔知點解呢度既泡菜味道特別清爽, 好好味! 身為食肉獸, 叫左特級蔥蒜牛五花餐, 油脂分佈平均, 而且個汁好入味, 煎完之後, 入口即溶, 味道岩岩好, 好味到我地特別叫多左碟, 超好味!!另外叫左五花腩, 一大片黎, 然後自己切, 肉汁鮮味冇雪味, 口感十足十半肥瘦燒肉咁肥瘦均稱, 入口有少少咬口又夠林, 又係特別叫多左碟, 超正! 另外叫左個牛仔骨, 肉質鬆軟唔鞋, 質素幾好! 蛋同沙律係送既, 蛋加左芝士同埋粟米好好味, 粟米粒唔覺有雪味, 沙律材料OK新鮮, 爽口, 顏色望落唔覺有瘀黑. 蛋我地特別REFILL左一次, 因為真係好好味!總結黎講, 我覺得呢度食物味道真係好唔錯, 而且個賣相/味道都幾用心, 計埋餐廳環境既話價錢略貴, 因為都唔係話特別靚/坐得舒服, 但中意韓燒既朋友絕對可以黎試下.…Read More

去開太古果邊, 聽講話有間米芝蓮推介既沾麵, 做完野就特登行去鰂魚涌試下. 唔知係咪因為米芝蓮既關係, 個心特別期待會好好味, 可是好多時食米芝蓮推介餐廳都會希望愈大失望愈大.舖頭既裝修同大部份拉麵店一樣, 都係開放式廚房,自助點菜裝水. 點餐紙可以揀濃味定淡味, 仲可以揀麵量 (都係同一價錢), 貪心地揀左周月沾麵濃湯熱沾麵300g (麵量最高). 另外加左叉燒. 上菜速度幾快, 唔洗10分鐘已經有得食! 上菜時拉麵係熱辣辣, 而湯係溫既, 唔燙口, 出面天氣咁熱, 我覺得咁樣仲易入口, 呢方面我覺得佢都幾細心.  麵係粗身拉麵, 煮得剛剛好, 夠咬口, 我中意! 沾麵既醬油湯味道好濃, 真係陣陣既醬油香, 上邊浮住一層厚厚既油, 裡面既肥豬肉好林好入味, 可惜個湯有點太鹹, 味道單一, 雖然佢加左海鮮煮出黎, 但被鹹味蓋過, 唔係幾食倒鮮味, 而且有點油膩, 加埋D麵一齊食, 味道其實好似醬油米餅咁, 我覺得如果其他材料味道突出點就更好. 我個人覺得這個拉麵味道不太突出, 但如果大家係特別中意食醬油既話, 係可以一試既!…Read More

最近好似流行一些摩登新中菜, 將廣東點心UPGRADE一下, 外形特別整得花巧別緻, FUSION港式或西式材料/醬料, 或者加一些展現刀工既菜式. 同朋友祝生日, 佢話想一堆人一齊食好味既中菜, 於是就想起這間唐宮小聚.人多自然多野食, 首先叫左點心5小碟 味道幾好, 有螺, 茄子, 秋葵, 糖醋魚… 我地叫左多野食乳鴿只係幾$29一隻, 實在太抵食, 我地一行十人每人都叫左一隻, 一黎到大家都帶起手套, 成個野人咁齒開黎食, 真係幾好味, 乳鴿皮脆, 而且非常Juicy, 好好食! 呢度既皮蛋豆腐都好出名, 豆腐切得好薄, 加埋上邊少少皮蛋一齊食, 好味, 可惜皮蛋太少, 完全唔夠分. 黑金流沙奶皇包當然唔少得, 非一般既靚同格調, 而且味道同外貌一樣好! 手抓煎餅有驚喜, 煎餅酥脆鬆軟, 加埋肉鬆一齊食, 甜甜鹹鹹咁, 好好味! 另外值得一提係炸尤魚鬚係好好味, 炸醬夠薄, 個尤魚夠鹹味, 夾埋一齊唔知點解有少少鹹蛋黃既味出左黎, 好好味! 泡菜燒賣, 聽落有點怪既配搭, 但食落好, 幾好味, 果種鹹鹹地又少少辣, 好惹味! 鮑魚黑松露飯, 真係原粒飽魚係上邊, 味道幾好, 意料之外既配搭特別有新鮮感. 唔知邊個叫左士多啤梨沙律, 雖然呢度食中菜, 不過都OK, 菜同生果都好新鮮.我覺得唐宮小聚好值得一班人一齊食, 因為菜色全部都好特別, 而且好適合打卡! 如果你想找一間坐得舒適, 又靚既中菜, 我會推介你黎呢度…Read More

$300可以食倒Marriot既自助餐, 抵食到你唔信! 有朋友係機場做野, 話附近酒店食自助午餐好食又抵食, 極力推介Marriot. 因為有朋友結婚係果度擺酒, 試過佢既中餐都覺得唔錯, 又心郁郁想係暑假食餐自助餐 (慶祝放假?), 加埋hsbc卡有全單9折, 就叫埋一埋親朋戚友黎試! 老實講我感覺有點矛盾的, 因為marriot一向都以質素見稱, 但價錢咁平, 都有少許擔心會一分錢一分貨, 而且午餐自助餐一般選擇較少, 可能到頭來唔岩食, 咁就唔抵了.去到餐廳門口, 見倒有個小丑同小朋友玩, 仲好有心機咁扭波波 (佢竟然可以扭倒幾像真既機關槍). 餐廳裡面, 小朋友雖然多, 走黎走去, 但係全部都好自律好有禮貌! 餐廳環境好光猛, 地方都幾大, 枱同枱之間不是太近, 可能因為大部分地方都放枱, 放食物既地方有點細, 拎海鮮要排隊拎, 但食客都好斯文好禮讓, 值得一讚! 食物方面, 沙律吧既生菜都算齊全, 羅馬生菜, 火箭菜, 羽衣甘藍…都有, 食落口夠凍又爽口, 感覺係新鮮生菜. 意料之外旁邊有個芝士位, 有cheddar, gouda同埋emmental, 要自己切果種, 格黎提供埋cracker餅比你夾埋芝士食,有誠意! 魚生選擇唔多, 一般三文魚, 吞拿魚, 八爪魚…都有, 帶子, 海膽…貴價食材就冇喇! 魚生味道幾好, 同出面酒店自助餐食既冇分別, 好味! 冷盤唔小得既煙三文魚都夠新鮮, 鹹味同油脂都好夠.海鮮位有青口, 蟹腳, 海蝦, 需要排隊, 蟹腳有驚喜, 拆肉出黎好易(新鮮), 而且隻腳都幾粗, 絕唔係平價細蟹! 青口完全冇味, 唔好食.熱盤方面, 因為本身唔太中意食中菜, 只係食左少少. 但我見佢中菜位後面既開放式廚房, 真係師傅即煮完後放入前面既盤裡面 (當時我見倒炒飯), 我覺得喜歡中菜既一定會喜歡食新鮮熱辣辣既食物, 好有誠意. 我當日試左咕嚕肉, 幾好味, 炸得皮薄又脆, 肉本身冇隔夜味, 咕嚕汁甜酸適中, 正! 燒賣好食過好多中菜廳, 鮮嫩多汁, 好好味!! 另外食左個炒豆角, 裡面好juicy, 咬落去仲唔小心吱倒對面既朋友, 哈哈…!我本身好中意食甜品(西式), 芝士蛋糕, 朱古力brownie, 忌廉筒, 棉花脆脆米通, 葡撻, 心太軟…食晒所有之後, 我覺得葡撻同埋朱古力brownie最好味, 葡撻有牛油同蛋香, 而且撻皮又薄又鬆軟, borwnie甜味同朱古力味都好足, 而且質地軟滑又實淨, 有d似食緊軟心朱古力, 正! 另外芒果糯米飯同豆腐花都好味, 豆腐花滑到好似食緊燉奶咁! 心太軟本身都滿心期待的, 質地幾好, 可是太甜了, 可可味冇乜! 另外雪糕是haagen dazs, 只有3款, 朱古力, vanilla 同cookie & cream, 味道同出面食既一樣, 冇乜特別.總結黎講, 呢個用餐經驗好好, 呢個價錢食今酒店質素既食物實在太抵食了, 而且選擇又多, 我一定會再黎食!!…Read More

一路都聽過Jamie Oliver既Happy Hour好平, 野飲5.00-6.00下單既話係$10一杯, 加埋1都係$11. 而且佢既小食都唔太貴. 當日早左放工, 所以就同朋友呢度飲野, 順便小食當晚餐. Jamie Oliver剛開業既時候, 好多人慕名而來排隊食, 而家風潮過左, 人流比較少, 所以環境靜靜地, 幾好. 裝修用左好多油木, 燈光好情調, 感覺好舒適, 好適合飲野傾計. 佢有cocktail, mocktail, wine, beer, 每種至少有3款飲品, 選擇非常之多! 3款mocktail我都試過, 全部都幾好飲. Ginger Mojito, 比較甜但青檸酸味都夠, 亦都好有薄荷味, 薑味都好足, 飲倒有少少薑汁辣味 ; Lemonade, 反而冇mojito咁酸, 甜度適中, 有自家製既感覺; Refresher 係elderflower飲品, 我個人最中意呢個, 檸檬同紅莓酸甜適中, 有種特別既甜味 (我當佢係接骨花味), 加埋梳打水真係好清新!食物方便, 我覺得尚可, 叫左Mini burger with skinny fries, World's best olive, 同埋8” Margherita Pizza. Burger with fries算係西餐常見既菜色, 味道Ok, 漢堡包身夠脆, 漢堡扒有幾有牛味, 薯條味道都OK, 唔太鹹, 少少暖又夠脆, 算新鮮, 可惜味道未見突出, 本身都有點期待名廚出品會有d特色…另外漢堡包好似係室溫放耐左, 凍凍地, 感覺唔新鮮, 不過以98$黎講算唔錯了! Olive, 第一次就咁生食Olive, 我覺得幾好味, 而且食落口幾清爽, 加埋薄脆既都包片一齊食, 感覺幾得意! Margherita Pizza, 令人有點失望. 整個pizza味道唔夠, 蕃茄醬食唔倒蕃茄甜酸味, 芝士亦太少, 加埋個又硬又韌既Pizza皮, 有d似食緊紙皮咁, 老人家一定食唔倒!總結黎講, 我覺得happy hour實在太抵飲, 5.00-6.00內下單, 野飲只係$10/杯 (加埋服務費都係$11), 就算6.00-7.00下單, 只係$20/杯!!雖然野食唔太好味, 但醉翁之意不在酒, 呢個價錢, 地點, 裝修, 食物質素, 可以係邊度搵?…Read More

同朋友係朗豪坊食完飯, 想食個飯後甜品, 見地道既港式糖水舖發記門口都未係好多人排隊, 就入左去食.可能太耐冇食港式糖水, 而家旺角發記裝修得幾摩登, 夠光猛, 而且乾淨左好多, 餐具枱凳都算新淨. 坐位都係少少迫, 但我都理解旺角串金尺土, 不過女仔坐既話一定冇問題.見倒佢餐牌既熱門推介係榴槤飄香小丸子$58, 見格黎枱果碗好似幾正咁, 想試下食港式榴槤糖水, 就膽粗粗叫左黎食! 榴槤飄香小丸子真係幾好味! 整碗糖水既味道唔太甜, 而且裡面真係有幾舊榴槤肉, 絕對唔係"榴槤製品"! 雖然榴槤味唔太重, 但我覺得以價錢黎講已經叫有誠意! 丸子偏林, 未算彈牙但係都有少少咬口, 加埋上面既西柚粒一齊食, 感覺都幾OK! 好可惜個糖水唔係好夠凍, 好似放左係室溫一陣先送餐, 感覺唔係好新鮮. 另外, 我覺得整個糖水奶味比較重, 因為本身佢唔係用重味既榴槤, 幾舊感覺唔係好夠喉, 如果榴槤肉再多點, 味道會更均衡!總結黎講, 我覺得用餐經驗唔錯, 以$58可以食倒真既榴槤肉, 今次我會比個笑臉佢! 其實榴槤糖水好多港式糖水店都有, 發記既榴槤飄香小丸子其實同其他店整既其實幾相類似, 未見突出, 而且糖水唔夠凍, 感覺唔新鮮, 令我未至於特登會黎食多一次...…Read More

當日係THE ONE食完飯, 想搵間甜品店又唔想去厚福街排隊, 就直接係商場裡面搵野食, 見GRAM PANCAKE & CAFÉ唔洗排隊, 就入左去試下.一睇之下先知原來最出名係梳乎里班戟, 每日限定, 當日去到已經好晚, 門口都寫明售罄. 於是我地叫左推介既意大利芝士蛋糕班戟,想睇下個班戟有幾好味. 賣相其實唔錯, 幾塊班戟疊起, 每層中間有TIRAMISU既芝士忌廉, 上面灑左咖啡粉, 睇落比厚福街既港式甜品店好, 但唔係特別有心思, 而且同MENU張相有D唔同. 但最令人失望既, 係個味道. 班戟連埋中間既忌廉一齊食, 得個甜字, 完全食唔倒任何咖啡味, 蛋味, 牛油味…芝士忌廉只有甜字, 冇芝士既奶香, 一點都唔正宗. 於是我點左一下上邊既咖啡粉, 一點苦味都冇, 已經分唔倒佢係可可粉, 咖啡粉定係平價即沖朱古力粉, 完全冇誠意! 就連個班戟, 都係又凍又乾身, 我明白要夾埋TIRAMISU芝士忌廉唔可以熱班戟, 但未至於又凍又乾, 感覺好似放左係雪櫃好耐, 完全食唔落口! 明明間餐廳係以班戟為賣點, 但佢其他班戟就咁令人失望, 非常可惜! 結果我為左唔做大晒鬼, 架硬食左一半, 直到今日我仍然好後悔揀左呢間餐廳.總結黎講, 提拉米蘇班戟是一個失敗既菜式, 提拉米蘇冇奶油香, 咖啡粉唔苦, 班戟又凍又乾. 可能佢梳乎里班戟好好味, 但我以後都唔黎呢間野食.…Read More