MeFood的個人專頁

灣仔/銅鑼灣區開咗好多唔同嘅烘焙店，今日去咗呢間由本地人氣<享樂烘焙>為其獨家設計及供應嘅<Buffee >。 <Buffee >除烘焙產品外，咖啡會是另一主打賣點。 雖然店內空間唔算大， 但除外賣外， 店內亦有提供少量座位給客人堂食 。今日我去到嘅時間可能比較晏， 柜內麵包款式未有預期般多，買了件我好想試嘅濃厚朱古力撻，另外再加多一件抹茶蛋糕，一杯<White > 咖啡。朱古力撻內饀混合了朱古力及伯爵茶， 店員會幫客人將撻預熱，因此食時內饀仍暖，入口順滑味道濃郁， 但略嫌朱古力味被伯爵茶味分薄了不少 ，可以的話朱古力味道濃郁些會較啱我。件抹茶蛋糕外層海綿蛋糕軟綿有彈性， 內餡嘅抹茶cream 夠杰身而軟滑， 另外蛋糕放上了蒟蒻，令蛋糕食時多了份層次， 口感更加豐富。…查看更多

喺灣仔區搵到間幾特別嘅素食餐廳。今晚專登帶媽媽去試吓。 入到店內有種寜靜舒適感， 原來店家希望利用店內空間能提供一處讓人暫時遠離煩囂，治愈心靈的地方。 店內晚市供應一款<素食晚宴> 套餐，每位$298 已包含席前小食， 沙律，湯，主菜， 甜品， 另外可選擇其中一款由店家調配拼配茶飲。 看過餐牌後， 有點期望，但好食與否，要試過才知道。店員介紹咗幾款佢哋自家調配嘅草本拼配茶，並推介兩款<揚眉草本拼配茶> <安逸草本拼配茶>給我們 。茶葉混合多種不同草本調配，一杯茶嘗得出甜、甘、澀味道 ，幾特別幾好飲。兩款前菜— 沙津及小食食材新鮮，味道酸酸甜甜清新開胃 。湯品— 夏天最啱飲清熱袪濕嘅清補涼 ，湯料多得很，味道清甜。蔬菜天婦羅— 脆漿可以更薄，但在一間素食小店食到這種水準，唔差絕對收貨。主菜 (2款)<香草素雞 ， 野菜 ， 山藥慕絲＞<松露帶子貓耳朵粉>兩款主菜都有驚喜，由擺盤，食材配搭 ，份量，到味道都滿意。甜品茉莉菊花雪莉凍 (另加$22)麗楓秋栗 (另加$28)整餐飯以兩款精緻甜品作結， 菜式上雖然未算太有驚喜， 但大部份食材都以天然食材為主，食材新鮮， 製作亦有花心思， 味道亦唔我囗味感滿意。…查看更多

今日約咗位朋友在沙田食飯，喺新城市廣場行來行去唔知食乜之時，俾呢間以菌類做賣點sell 養生嘅火鍋店吸引住。之前我早有聽聞過呢間店， 但就未有機會試過， 咁就決定試吓呢間。店內佈置格局唔錯，但餐枱與走廊間距離較狹，食客及侍應等走上走落時 ，確實會有點擠迫感。除此之外， 大致上用餐體驗都ok舒服。餐單上有好幾款菌類食材，平常我都會經常食得到， 但既然菌類是呢度主角， 當然會點來試試， 但除菌類食材外， 其他食物款式對我來講未算太大驚喜。最後只點了四季菌雙拼（黃牛，美味），文昌雞，黑虎蝦滑， 黑豆腐拼鮮腐竹，蔬菜籃子，火腿野生菌炒飯等。素食野生菌湯底，味道清甜， 另外所有揀選嘅幾款食材， 質素和份量都感滿意，至於那個火腿野生菌炒飯更是意料之外好食。 …查看更多

好多地方都可以食到All day breakfast , 而呢間喺佐敦嘅Cafe就是以All day breakfast 做出名堂，成為人氣Cafe。呢度有十多款有創意， 有水準嘅早餐款式可選擇，大部份食物會是餐廳自家製作，更是由朝早到夜晚都可以食得到。餐牌上最過癮是每款早餐會以世界唔同地方城市為名。 看餐牌後有幾款早餐都有興趣想試，今次叫咗份以 《Bangkok》為名嘅一款，份餐會有厚切煙肉，炒蛋， 茄汁豆， 酸種麵包， 沙律菜等 。 份餐嚟到， 無美式早餐應有般大份但都豐富。最期待想試吓塊厚切煙肉，煙肉本身是選用豬腩肉來做， 經自家醃製後慢煮再煎香，再厚切上碟。 煎香嘅煙肉充滿油香，入口juicy夠香口，味道會偏甜。 炒蛋亦做得嫩滑唔太乾硬， 口感柔軟， 算ok, 其他配料算是正常發揮。…查看更多

砵甸乍街（又稱石板街）斜路梯級兩旁，有間具型格來自澳洲嘅雪糕甜品店叫 《MESSINA》， 在我眼內呢種一新一舊嘅配搭， 真係襯到絕。雪糕店地方闊落舒適，買杯雪糕坐在一邊涼著冷氣一邊食， 非常舒服 。另外雪糕款色有幾十款之多， 一桶桶放滿在幾個雪櫃內， 睇見開心之餘亦唔知揀邊款味道好。最後揀咗幾款無咁濃味嘅味道 《焦糖奶醬》《椰子荔枝》《開心果仁糖》 。做出來嘅雪糕奶味較重，入口非常順滑，味道濃郁但會偏甜，應該完全保留澳洲人甜品嗜甜口味。我㨂嘅3種味道中，最喜歡 《開心果仁糖》，牛奶雪糕配上開心果醬，再加上開心果仁糖。自家烘焙過嘅開心果仁糖口感脆脆，加上開心果醬味道，融入牛奶雪糕後，食時變得無咁單調。…查看更多

喺啟德體育園逛完，忽然好想食Cake, OpenRice 睇下附近有無啱口味嘅Cake shop,搵到呢間。記得上次幫襯呢間餅店都已經十年前。一間本地品牌算有水準嘅餅店。以前Napoleon 是呢間店其中一款signature 糕餅, 今次當然再要買一件試，見餅櫃內其他糕餅都非常吸引，在選擇困難症下再揀多3件。 平均每件都要$60, 即管看看味道如何。《Sun Shine Muscat 》呢類果撻，我通常都會生果和餅底分開食。提子甜，份量算多，面層蓋上薄薄一層醋桃味啫哩，造形賣相一流，杏仁餅底鬆化。《Sweet Heart 》切落去，心心入面有荔枝mousse 混合raspberry 奶油， 酸酸甜甜，配上杏仁蛋糕墊底。味道幾豐富，配上底層蛋糕一切食， 唔會太膩。《Cherry Napoleon 》千層酥皮食落鬆化香脆，Custard Cream做得夠順滑杰身， 但略嫌味道偏淡唔夠甜， 再配上我喜愛嘅車厘子， 食得相當滿足。《Chestnut Sphere 》喜歡吃栗子的我， 我會特別欣賞用栗子造嘅食物。鬆軟海綿蛋糕外鋪滿栗子 Vermicelli， 蛋糕內滿載幼滑油奶，再加入Crunchy Pearl, 食時口感豐富， 味道濃郁， 但吃後確實有點膩。 試過呢幾款餅，餅嘅造型賣相唔錯， 味道上搭配得宜， 可以話好睇又好食。 餅嘅甜度亦唔會太甜，較適合香港人甜度口味。…查看更多

入到去地方算大，乾淨企理，坐低後更感受到傳統糖水店嘅味道。餐牌上選擇果然是傳統糖水居多，好多款都是我由小食到大嘅糖水。試過好幾款糖水，味道及火喉都唔錯，甜度對我來講亦剛好，很有在家煮的味道。而且非常足料。除了傳統糖水外， 亦見到有楊枝甘露， 三色芋圓小丸子等嘅選擇。不過依我所見大多數客人都是吃傳統糖水較多。《蓮子桑寄生蛋茶》 很熟識嘅味道，雖然唔太難整，但已經很少地方可以食到。 隻雞蛋煮到入晒味。《馬來喳咋》 《楊枝甘露》 加 三色芋園…查看更多

呢間店我都去食過好幾次，地方唔算大，人多用餐時會坐得比較迫，食物水準整體算唔錯 ，不過我就覺得食物味道上會偏濃味。《綿綿魚肚黃金雞湯麺》非常喜歡呢個黃金雞湯底，好似佢哋介紹咁話，每喝一口味道甘香濃郁，黏口而不膩，確係令人回味無窮。加上其他豐富配料（魚肚，去骨雞件，雲吞），非常真材實料。 但可惜麵條用上我不大喜歡的幼身麵條。 《原隻鮑魚. 汁煮洋薏飯》　用咗鮑魚汁汁煮方式來煮白飯，再加入洋薏米。每粒米吸收晒濃郁鮑汁精華，食時飯粒惹味，煙韌，有咬口 。不過碟飯味道上就鹹了點，應該調味上可作改善。《紅蝦油櫻花蝦湯麵》又係呢度另一招牌嘅湯麵。主角換上了蝦 。湯底用上鮮蝦，鮮魚熬製，味道濃鮮惹味，再配上彈牙原隻蝦。吃罷口腔仍然留下濃郁蝦味。《海南雞飯》真奇怪，而家好多食店，將雞拆咗骨都會叫海南雞。呢度嘅雞又係完全拆晒骨， 不過雞又真係做得唔錯。 至於雞飯嘅飯就唔係太啱我口味。《黯然銷魂刈包》《雞蛋雞肉沙律菜》…查看更多

過咗去啟德體育園行吓，行到餓想搵嘢食，見未去過呢間《麵鮮醬油房 周月》食過佢哋嘅拉麵/沾麵，就走去試吓。 知道呢間店係米芝蓮推介嘅沾麵專門店，所以都會有少少期望。個餐牌本身幾大個，揭起睇時真會有點唔方便 。 食物唔算有太多選擇，原本打算嚟試吓呢度嘅沾麵， 最後都係叫咗兩碗湯拉麵。 蕃茄湯麵 (粗麺)，另一碗周月拉麵，兩碗麵送到面前，聞起來非常之香。《周月拉麵》- 用上自家特製醬油雞湯底，飲落醬油湯底味道相當鮮味，味道亦唔會過鹹，飲咗一啖會想繼續飲落去。配幼身麵條，麵條食落就較為普通，唔算特別出色。黑豚肉燒得香口 ，但咬落就過硬。 《蕃茄湯麵》湯底茄味唔算濃郁，但整體來講湯底仍算美味 。配粗身麺條，粗麵質感算較為煙韌彈牙。 呢度拉麵嘅價錢算中等，但水準較我預期中普通，但下次有機會都會再來試吓佢哋嘅沾麵。…查看更多

今日去試咗呢間新開嘅星加坡過江龍食佢哋出名嘅海南雞飯。之前去星加坡時，有試過好幾間餐店嘅海南雞飯。 但記憶就真係冇試過試間。店舖嘅位置都算方便。 睇睇餐牌上食物及價錢， 中午時段餐牌會有1人/ 2人套餐可選擇。 我點咗份1人套餐 $128（海南雞+油飯+ 1蛊燉湯）。 呢個價錢喺香港食過江龍來講我認為尚可接受，但唔算抵食。碗油飯聞起來夠香，又夠味，幾好食。至於碟雞未食我已有點失望，碟雞係雪凍咗，雞肉變得過硬。 雞本身嘅味道其實唔錯，雞味都重。但我唔太識欣嘗食雪凍咗嘅雞肉， 不過相信可能係呢間店嘅特色。至於用來點雞嘅黑醬油味道真好。 另外那盅燉湯味道雖好， 但份量似乎比較細少， 舀兩匙飲晒。畢竟計番價錢都要$40 , 咪咁孤寒。…查看更多

近排天氣較熱，令到個人冇乜胃口，所以我都會多去咗呢間店買Poke 食 。大大碗 Poke, 食完舒服飽肚又健康。呢度嘅 menu 除咗有幾款已set 好的款式外， 客人亦可自己配搭食材做出啱自己喜歡嘅Poke ｡ .部份食材雖然都是比較大路嘅款式 ，但款式種類都唔算少，而且食材夠新鮮。而我個人較喜歡自己配搭食材揀啱自己嘅Poke。.素食人仕亦可以按自己喜愛配搭做出啱自己嘅素Poke。 喺店內涼住冷氣， 食住碗Poke再加多杯凍飲， 簡直係我一個不錯嘅解暑方法。…查看更多

灣仔區想起食日本拉麵，呢間拉麵店會係我心水選擇。耐無食過又經過附近，又見唔使排隊等位嘅話， 都會走入去一趟食番碗。《黑龍豚骨拉麵》 《櫻海老沾麵》《雞皮餃子》《章魚燒》等都會係我較喜歡之選。 《黑龍豚骨拉麵》麵嘅硬度可隨自己嘅喜好選擇，通常我會點基本硬度， 麵條已有足夠咬勁。 至於個豚骨湯底師傅淆製得相當濃郁， 飲入口帶點漿口，味道又濃又甜。配合麵條一切食， 真係食到瀡瀡聲。《雞皮餃子》剛炸起嘅雞皮餃子，食時非常香口，包在裏面的饀料有肉汁唔會太乾。 而我更喜歡將餃子沾上湯麵嘅豚骨湯來食， 除無咁熱氣外， 雞皮吸入湯水後， 食起來會有另一味道。 …查看更多

有日從軒尼詩道步行去中環途中， 俾一間幾有風格嘅店鋪吸引而停下腳步， 看清楚原來係間食星馬麺食嘅餐廳。 上網 check 過，得知餐廳更是長期人氣排隊店。 真係失敬 ！餐廳俾人有cafe感覺，以黑白色佈置為主，舒適簡單。 同時餐牌一樣簡單， 只賣幾款食物：《優質蝦麵》 《娘惹濃厚叻沙》 《 干叻沙》 《 咖央多士》 《金杯》， 另有幾款飲品。 就係咁多。叫咗碗《優質蝦麵》，一份《咖央多士》。碗麵送到面前已聞到好香嘅豬油渣香味。 湯底豬骨湯嘅味道較重，蝦味比例較輕。 另外有蝦肉，燉豬肉，芽菜等配料再配上蛋麵加米粉。食時非常惹味豐富，回味無窮。記得之前去星加坡時曾經都有食過當地嘅蝦麵，呢碗蝦麵我會形容為升級版。另外《咖央多士》，用上班蘭葉做成嘅咖央醬，塗在多士中間，入口多士香脆，帶凍嘅咖央醬順滑濕潤，味道唔太甜，雖有點膩，但簡單又好食。不過價錢就真係貴咗些少。…查看更多

行街經過呢間餃子店時，俾佢哋個店名吸引住望多兩眼，再睇睇店外玻璃貼上嘅餐牌，就咁入去幫襯咗。 所以話改名嘅嘢真係幾重要。叫咗碗大嘅《元貝豬肉湯餃》， 湯餃嘅湯會用佢哋店嘅招牌＂狀元九鼎湯＂上。 又係一個聽起來好勁嘅湯，但其實即係粉葛煲鯪魚湯。一碗有十大隻水餃，每隻水餃睇見都係脹卜卜。 飲咗啖湯覺得個湯比較淡， 有點兒失望。 至於主角水餃， 餡料調味唔會過濃，食得到元貝，豬肉嘅鮮味， 餃子皮厚薄適中，一碗真材實料，幾好食嘅水餃。最後，買多份生餃《野生松茸素餃》返家自己煮。…查看更多

呢次又再來到巴黎人自助餐廳食buffet 晚餐。 我覺得呢間餐廳幾適合一家大細嚟食，餐廳環境都算大， 場內裝潢唔算特別Grand, 食物選擇還算可以 ，但無乜特別令人驚喜又值得推介嘅食物，質素方面個人認為算是中規中矩。冷盤有好多唔同選擇中式熱輋選擇其實唔算多，而且食物款式都比較普通，無乜令人驚喜 Encore嘅嘢。至於甜品方面，會有好多細細件，外形造得精緻吸引嘅蛋糕。每款都想試下，唔覺唔覺就食咗8，9件。味道亦算唔錯。對我來講，甜點會是呢個自助餐嘅賣點。…查看更多