Leo_Chan的個人專頁

假期路經沙田，被這店的裝飾及餐牌設計吸引了， 進來一試。店員好像完全沒有意欲接待客人一樣， 被指喚坐了一個位置。了解完餐牌內容，正睇睇手機訊息， 還未落單，餐牌就被店員迅速收走，果然超高效率👍🏻等待餐點期間，見到店員倒瀉了飲品，她們用戴著手套的手+紙巾去清潔地板，隨後沒有做任何消毒/更換手套的動作便戴著手套出餐，此時才心知不妙食物方面，牛腩麵的牛肉如像擦紙膠一樣，韌到好難咬開，手工麵也是硬的; 湯底標榜無味精，但無奈同時也是無味，紅蘿蔔、白蘿蔔也是淡淡的，與白烚無異。滷豆腐只得表面有味道，中間也是如未經烹調般清淡，份餐最正常係只有冬瓜茶，夠凍有甜味。下午茶埋單50元正，價錢不貴，但也絕對不值。奉勸各位不論去哪裏也好，千萬不要嘗試這裏，會後悔的。…查看更多

與朋友聚餐，經openrice預早訂枱，一行7人準時被安排入座。餐廳係用QR code落單，店員處理confirm booking時服務態度正常，過程中無需與客進行互動，出餐速度大約5-10分鐘屬正常。食物賣相、食材質素算係對得住價錢，感受到店家對材料選擇係有要求；但各式餐品份量方面都共通地略為偏少，對於大胃王嚟講，一份餐加埋小食，都應該未能滿足。餐具直接放在枱面無遮蓋，有違衛生觀感。此店沒有限時交枱，亦不另收加一服務費。餐廳環境算精緻企理，適合朋友及家庭聚會，如再經開石門，應該會再嚟試其他餐品。…查看更多

朋友經openrice訂座，時間正值星期日14:00，到後在門口等待安排入座，期間店員已問搭唔搭枱，我們3人明確表示“唔搭枱”；等待大約十分鐘後，被安排坐去一張六人大枱。我們已表示可以等，有細枱先俾我哋，係店員話‘’唔駛等、唔駛搭，你哋可以照坐‘’。如常開始出去叫點心、睇車仔嗌嘢食，用餐過程大約 1小時15分鐘，期間超過5次被人安排喺同枱入座新客。 一次又一次表示入座時講明唔搭枱，而又一次又一次打斷我們朋友之間的傾談內容；sell月餅就sell咗起碼3次，每次拒絕都係換嚟一個輕蔑嘅表情，呢餐真係貼錢買難受食物款式唔多，質素同一般酒樓無異，環境氣氛可以，服務質素完美復刻舊有趕客模式，不敢恭維。…查看更多

經歷完半日風假收工，想對自己好啲，就嚟呢間餐廳享受一人之境，晚市等咗大約20分鐘順利入座。由帶位至埋枱，從咗嗌句口號之外，基本上冇服務可言，同以前唔同，事緣今次擺袋架被收起了，非常狼狽地要自行取出，成功方可使用從自助落單到出餐，等咗大約15分鐘先有嘢食，期間見到枱面同烤肉鉗有黑跡、櫃桶有飯粒，即時清潔工上身搵濕紙巾；但又發現包濕紙巾上圖案已甩晒色，似係被輪迴過好多似食物方面，以價錢量度烤肉肉質、味道正常，連醬汁同胡椒海鹽食一定餸到飯。蘿蔔牛肉湯搵唔到半點蘿蔔同牛肉應有特色同味道，沙律菜正常發揮。落單時冇為意，原來而家係食飽先俾錢，亦同時加收10%服務費。…查看更多

早喺月幾前已經book埋呢間餐廳，但因為黑雨關係所以嚟唔到，同太太夾到時間就再訂枱嚟試。準時十二點入座，環境氣氛舒適，場內音樂播放曾被改編成香港或台灣流行曲的日文原作，有熟悉感覺店員細心講解餐牌差異，brunch menu主菜原先揀咗串燒同刺身， 他亦細心地推薦我們先叫free flow 部份，以免食完主菜後食唔到太多free flow菜式。 食到一半，覺得串燒連烏冬已經食唔落😅，要求轉做刺身都沒有拒絕🙏🏻餐飲咖啡出咗小問題，即時主動了解及表示抱歉＆會跟進，細心週到值得表揚的確所有小食都係中高質素以上水準，全部能夠獨當一面，較令人失望嘅有帶子刺身，同其他食評睇到相片係有唔同，呢隻感覺偏乾偏實，唔鬆軟而冇乜彈性； 其次串燒雞軟骨屬於比較普通。意想不到成餐飯最失望部份，竟然係主食嘅特選刺身， 整體食材肥美鮮嫰嘅程度竟然連一般放題店嘅基本質素都比不上 我哋只能怪自己眼闊肚窄，有伏變咗齊齊中🫠已同太太確認係會有下次幫襯機會，只不過主菜冇可能會再揀刺身，壽司也好、鰻魚飯也好、串燒亦好，總之一定係試其他。…查看更多

剛剛睇完戲，見到呢間麵館，當時心中又未有計劃食乜好，就入咗嚟試。全程無招呼、無需交流, 放低張餐牌就俾我QR code自助落單。叫咗份疑似屬於招牌菜嘅‘’全家福火鍋麵‘’，湯要小辣，加配凍豆漿，大約十分鐘後上菜。湯底勁油，根本好難就咁飲一啖落口試湯味；但可以非常肯定唔夠熱，係即製湯麵嘅死罪小麵麵質又軟又腍，無需幻想有任何麵香可言。每樣配料係有數得出嘅兩至三件，但食完成碗$68嘅麵加埋$9嘅豆漿，都係未能解決飢餓感覺埋單$77，店員零禮貌作結，希望佢可以喺呢一個市道之下，仍然能夠繼續生存。故事教訓自己，喺進入餐廳之前，真係要先行三思🥲…查看更多

因為太太從網上見到呢間川菜店，位於九龍城泰菜重鎮，仲有賣沙巴躉做嘅酸菜魚，經Openrice 訂座20:00時段。開餐當日OT關係未能準時到場，打電話改遲10分鐘到，男店員好禮貌亦冇托手踭嚟到坐低睇menu, 舖仔細細款式算多，女店員幫手落單考記性，我哋就咁嗌半份酸菜魚都識推介招牌沙巴躉，唔加配料盛惠$308。湯底連底料食夠酸夠味，魚肉確實同其他食開酸菜魚有不同，肉質較厚、肉較鮮甜美中不足之處是魚肉煮唔入味，兩者未能融為一體。涼拌魚皮: 同出面食開淨係得麻椒辣味不同。此店魚皮顯然切得較幼細、魚皮質感較煙韌，個汁係酸酸地開胃菜，但麻油似乎落得過咗火位，令到整體有點膩。辣炒萵筍絲: 夠熱夠味，除咗$78有啲貴，真係冇乜嘢好挑剔，三爬兩撥好快食曬。炒米粉: 成餐飯嘅MVP 夠熱夠鑊氣，米粉炒得鬆軟而不算太油膩，料頭受火足夠，啲蛋去到燶燶哋嘅程度更顯得香口。難怪聽到有好幾枱堂食同埋好幾張外賣單，都係有叫炒米粉兩個人都清得晒！記憶點停留在炒米粉，如果有機會再幫襯，會試試其他唔同組合。…查看更多

對上一次幫襯已經係大約五年前，今日路過見到定價比之前收斂咗，加上條街開始落雨，避雨同口痕互相驅使下入嚟排隊幫襯而家嘅營運模式已經見唔到邊啲送新鮮，就嗌邊樣，改成以營運效率為依歸嘅自助點餐機同qr code落單，損失了一個香港特色。餐廳內過半數客人都係講國語，播緊嘅係GEM因舖頭唔大，但每張座位上面都只有坐人同隔離放住喼+一袋二袋，所以個環境係相當逼夾同嘈吵。三豬麵套餐+雞翼 配凍檸茶：100%呈現港式味道，油麵底加上豬皮大腸豬紅，全具代表性產品設計相當高分， 三款配料都係記憶中嘅味道: 偏甜嘅豬紅、索湯嘅豬皮、夠腍夠味嘅豬大腸手多多加配咗嘅兩件滷雞中翼味道失色，滷水上唔到味。凍檸茶正常發揮，十成滿呈現。後記：食完之後成日想要飲水…查看更多

晚上行經附近，搵搵附近有咩餐廳可以試，發現呢間隱蔽嘅食堂，就算揸住個地址，都要捐窿捐罅先至搵到😅時間晚上接近八點，餐廳內入座率約四成。眼見全自助式服務，加上自己用qr code落單，單純點了招牌菜滷排骨便當一試。等候時間大約15分鐘，期間見到有自助吧可免費享用，即時被極唔新鮮嘅沙律菜嚇怕了 斟咗兩杯唔同口味嘅茶就算。食物齊備憑單取餐，認同滷排骨嘅觀感夠震撼，炸得外脆內嫩，調味不會過鹹；但奇怪明明等候需時，件排骨唔係好熱。飯底係又濕又爛，都係唔熱 ；份炒蛋有經過調味，都係唔熱；粉絲凍嘅。埋單$76，試過就好了…查看更多

因為工作需要，午膳時間嚟咗呢一間新開嘅燒漢堡店一探究竟，時間係星期一嘅13:15，餐廳接近90%滿，唔駛等位可以直入。餐廳採用全自助式落單加付款服務，基本上都難以享用到與店員交流的服務，但收費上卻已計算10%服務費，牆身標價有點誤導。漢堡上餐時聲稱只係八成熟，客人可按需要用眼前煎板再煎熟一點。漢堡雖軟身有彈性，但全開放式的煎爐可見肉味跟原著炭燒還原度有一定距離，只可說調味正常。原著用嘅蘭王喺呢間餐廳見唔到，差之毫釐，可能係成本問題。引以為傲的日本米被存放在廳面的地面上，忽略了專業考量。配上嘅湯調味一般，顯得可有可無； 水雖然浸住一堆生果，但因為埋生果無限復活，所以其實杯水係冇味🫠。單人收費兩件漢堡加個飯，連埋上述嘅配料索價$104，同樣價錢絕對可以有其他更好選擇😅。[IMG:2][IMG:4][IMG:6][IMG:8]…查看更多

星期日下午茶時段，到觀塘附近有任務在身，順道嚟試試呢間易手見報嘅巨型冰室，見識點解可以取代“代表性茶記”。茶餐價錢定位$40-$50之間，較之前見識嘅同類餐廳屬合理水平，店面黃色格調明亮坐得舒服。場內客數都較預期多，畢竟重商業區嘅星期六、日應該都有啲難做。店員幫手落單，都係單向形式冇特別互動或交流。生炒美極牛肉飯 - 粒粒分明，炒出嚟夠熱，鑊氣尚有。美極味略為薄弱，牛肉嘅質感同味道“乸”得過咗火。碟底冇油。西多士 - 只可單點，飲品要分開落單，值得提嘅係個糖漿與別不同，店家係有放心思調製過/取材。件多士本身就係正常貨色。菠蘿包 - 皮脆，包偏實。$9而言係合格水準。凍檸茶 - 甜味同坊間不同，相信有蜂蜜成份。茶底較薄唔夠濃，但個調味幫佢攞返分:)。如果經開附近，係會打算再嚟返尋味，試試此店仲有啲乜嘢係與別不同嘅地方。…查看更多

經開附近工作，見到此店門口排隊，時間正值星期六下午茶時段。近來睇新聞見到呢個集團業績彪炳，之前食過體驗一正一負，今日就試試呢個大阿哥。排咗大約五分鐘成功入座，下午茶價單大約$45至$70不等，較一般餐廳為高。既然餐廳以燒味作為招牌菜，又推廣緊自動炒爐水準穩定，今次就揀咗個雪菜鵝絲炆米去試，跟配冰鎮奶茶。一開始嚟錯嘢飲，同侍應直接溝通，但姐姐好似聽唔明廣東話一樣，再強調‘’我係要冰鎮奶茶，唔係呢杯‘’佢先至半句說話都冇講情況下將杯錯誤嘅飲品拎走😅。雪菜鵝絲炆米 - 夠熱，唔夠鑊氣。做出嚟效果太濕， 味道正常鹹淡適中，料頭中混入青椒感覺有點奇怪， 與各種食材格格不入。呢碟產品連飲品$65，數埋唔知有冇十條所謂嘅鵝絲，肉乾柴冇香味，屋企樓下嘅雪菜火鴨絲炆米都贏佢。冰鎮奶茶 - 茶底薄，唔夠香濃，奶量甜度適中。暫時感覺阿哥同細佬都輸曬，之後都係食返雞飯算。…查看更多

本應係打算嚟大圍試傳說中嘅星期六沙嗲牛肉麵，撞正舖頭特別休假冇開，摸門釘白行一趟。喺附近搵搵有冇新餐廳可以試食，就見到呢間夠晒新嘅新記，相信本身經營者公司係由雞粥作招牌，早餐時段除咗招牌嘅港式外，仲有粥類早餐可以選擇。環境方面裝修新淨企理，拉開櫃桶發現裏面嘅餐具 都仲係濕立立😅 店內員工短髮姐姐屬於熱情好客嘅一種，對客態度有禮貌，亦能夠關注到客人需要。 失色之處係全店員工鍾意一對手套走天涯，同埋喺客身邊咳嘅時候冇遮口遮鼻。艇仔粥 - 算係足料，粥底味道、濃稠程度恰好，但實在沒有太大特別賣點；最大嘅扣分位係塊豬皮唔記得咗安排做脫毛手術，唔想擺落口😅豉油王炒麵 - 麵質、炒出嚟嘅軟硬度較一般粥店出色，但實在太鹹，就算加甜醬去混和都唔太幫到整體味道。熱奶茶 - 茶底夠厚，但帶有過老嘅苦澀味道，落奶份量唔夠。…查看更多

同好耐冇見嘅朋友聚餐，嚟返呢一間多人一齊食先爽嘅有鑊氣 都係預先打電話嚟訂位，嚟到現場正常入座。一貫地環境相當擠逼，都唔緊要，始終呢個場都係冇收加一，不能要求太多。場內有飛蟲經常伏於枱面、餐具面而趕不走，都唔緊要，始終小動物都係冇人性。坐到中後段先至舐嘢，嚟咗一行四人似係老闆嘅朋友，擘大喉嚨搏晒命咁講嘢，說話聲音高於90分貝，可能佢哋認為自己包咗場，貼正佢哋背脊接近一粒鐘，對耳仔極度受罪 同場其他客人都一臉無奈。班人把口郁之餘個身都仲要一齊郁， 坐喺佢哋背脊嘅櫈與櫈之間碰撞係極度困擾:(講返嘢食，一如以往性價比係高，今餐MVP係小炒王同冰鎮咕嚕肉，朋友食到讚不絕口生炒糯米飯夠香夠味👍🏻 酸菜魚較以往失色了，唔知係咪因為四週圍都有得食，而家已經冇咗嗰種經為天人嘅感覺，普通水準。 沙爹金菇肥牛煲滾住出場！沙薑豬手夠惹味…查看更多

此店近期網絡曝光率高，同一派系頻頻開店，加上再搵返食評內容傾向正面，因此特登慕名而來一試。 時間係星期日中午時段12:15，由等位至入座需時半個鐘頭。不幸地被安排坐於中間圓枱，基本上係椅背貼椅背， 可動空間極度狹窄！全程同樣都係qr code落單+自己睇menu，同店員間無需互動。餐牌上並無茶餐廳必備飲品，全是罐裝樽裝貨色，有點失望。點選了 蝦頭油炒飯 及 鮮茄蜜桃焗豬扒飯，並無點飲品。蝦頭油炒飯 - 蝦仁、櫻花蝦、蠔仔等配料非常足夠， 炒飯調味做到有蝦香效果，細心品嚐會發現以上所有食材，都只係被安排落同一碟上，它們互相並無任何連繫的元素，甚至乎有冇一齊被落鑊炒都成一個疑問。足料+能夠打咭確係此產品的一大賣點，而令到配料都有被炒香嘅感覺，相信此產品會長賣長有。鮮茄蜜桃焗豬扒飯 - 鮮茄份量足，蜜桃在產品上並無法發揮任何影響力，只係獨立三片多出嚟嘅食材。 炒飯底濕糯唔香口，冇得另用碟起飯令到個飯死得更快。 有驚喜嘅係塊豬扒，先用脆漿炸完再焗仍然有脆口感覺，美中不足係切得太大件，食起上嚟好論盡。場地雖小亦維持爆場，但廣東話嘅聲音並唔多，櫃檯側邊見到店家貼住人民幣兌港元一對一結算，可知此店廣受遊客歡迎的程度。…查看更多