Jessy_foody's Profile

尋晚去左CWB行街, 食完飯打算搭車回家經過呢度又比佢吸左入去....本來有D想食隻芝士撻, 但岩岩先食到好飽所以真係食唔落, 打算決定棄權兼走人既時候又比我眼尾"稍"到呢盒新野...原來出左款新口味半熟芝士蛋糕, 加左茶味! 感覺幾創新...之前都未食過加左茶味既芝士蛋糕...一盒有五個茶味...玄米茶, 麥茶, 焙茶, 綠茶, 烏龍茶. 我之前成日買黃色盒既半熟芝士蛋糕食, 蛋糕賣相黎講都係黃色盒靚D, 因為每件都金黃色閃令令咁. 而呢盒因為加左唔同既茶, 賣相都係黃黃啡啡綠綠咁, 望落去都較暗啞既...不過味道黎講呢, 食落去又好正下, 五個茶味都好香, 每件除左有明顯既個別茶香之外, 又唔會冇左陣芝士香味, 呢樣真係好重要啦, 仲有蛋糕質感都係好滑溜同輕柔既...Overall我覺得呢盒同黃色盒各有各正, 想超級濃郁芝士味就揀黃色盒, 想有多D層次既香氣就揀呢盒啦.…Read More

前日去太子買完D野準備搭車返屋企, 臨落見地鐵口有間凱施就入去買個麵包返去食下, 點知比我見到有D幾靚既甜品一個個咁排喺個櫃入面, 霎下眼有幾個款例如raspberry, 紐約芝士, 朱古力慕絲等等...全部用個金色碟仔裝住都幾吸睛咁, $13唔貴就揀左個綠茶牛奶味既慕絲試下. 返到屋企用相機食先之後就試下味, 質素有D驚喜. 味道黎講, 綠茶味清清地, 唔會好淡又唔會太濃, 雖然我都鍾意綠茶味, 但太重口味我都未必岩, 呢隻清香我就相當buy! 而同時間牛奶味都夠, 正正係平時飲開既green tea latte果種味道, 奶味和綠茶味都兼顧到. 至於質地黎講呢, 不論忌廉或者慕絲部份, 都比想像中滑溜同埋輕柔, 整體好香滑, 真心唔錯,下次都值得翻兜同埋試下其他味! …Read More

前排見佢個午餐餐牌($48包熱飲)都唔太貴, 睇落又都幾多選擇, 就試下入去呢間泰國菜館食午市. 我叫左佢個馳名海南雞配香茅油飯, 其實都唔知係咪真係馳名...但諗住佢咁樣自稱應該都唔敢太差卦...之後碟飯黎到賣相都幾好, 擺盤幾美觀, D海南雞係雞翼部位, 肉質尚可, 唔係特別嫩滑但都唔會韌, 而且味道都唔錯, 跟既兩款醬汁都OK. 而香茅油飯幾好食, 入口一陣油香, 可惜D飯質地削左少少, 如果D飯煮得硬身番DD就perfect池! 另外呢間既侍應服務都唔錯, 餐廳地方整潔舒服, 整體滿意, 值得翻兜.…Read More

前排試左呢間新開張冇耐既餐廳, 見佢都有好多款既飯/麵, 仲有D小籠包生煎包醉雞既小食可以叫, 款款都幾吸引, 我就叫左個麻辣口水雞菜飯, D菜飯用左珍珠米煮, 雖然唔算太香菜味但個飯既質地都幾好, 米粒軟硬度適中. 不過碟麻辣口水雞就真係唔係咁吸引...望落口水雞份量都唔細份, 都有差不多6至7舊, 但我最重視既口水雞醬汁就煮得怪怪地...,以往食到好味既口水雞醬汁都係有花椒既麻味和香味, 但呢間既麻辣味就唔覺有, 食唔出有花椒味....反而食到豆豉或者麵豉的既鹹味...個醬汁上面有D花生, 芝麻同埋蔥粒咁..其實如果唔當係麻辣口水雞咁食, 味道都唔差嘅...又或者只係另一個口水雞做法而我未見過姐lunch包杯涼茶好似$43, 價錢都可以啦.…Read More

尋晚去左荷里活廣場行街, 行到五點九左右就決定早D食晚飯, 怕晏D食會等位, 點知黎到呢間元氣高速線已經見到有D人等緊位....我地兩個人拎完飛都仲要等大約十五分鐘先有得入...六點未夠已經要排隊 呢個場真係好旺下! 入到去發覺呢間高速線有上中下三條路軌, 點餐既平板位置有D特別, 掛在每個位既右上角, 感覺怪怪地, 我覺得放返低D會舒服D. 雖然全店爆滿, 但送餐效率都唔慢, 所以D食物都好似幾新鮮. 叫左油甘魚, 鰻魚, 火炙三文魚, 帆立貝, 牛肋骨, 吞拿魚蓉壽司, 仲有鰻魚芝士卷, 各款既味道都唔錯, 只係兩件帆立貝既色水唔係好靚, 望落比較暗啞D. 不過我留意到呢間高速線送餐既只係一個盤, 之前去太子始創果間食係一架車㗎 (但其實都冇乜所謂lol)....另外原來而家D壽司碟隻隻都有句鼓勵句子, 都幾得意吖. 埋單二百二十幾蚊, 價錢都同其他壽司店差唔多.…Read More

早兩日出左沙田太興食早餐, 太興既早餐選擇唔多, 叫左碗"輕盈香辣肉碎札肉湯米粉", $26包埋杯泡沫咖啡, 價錢都OK啦. 碗米粉一黎到, 我都有D灰灰地, 因為見佢好似一潭死水咁款, 賣相一D都唔吸引, 仲要得一塊札肉.....好彩用筷子夾起上黎先發現D配料原來埋藏喺個湯底入面, 有好多青豆粒, 有D肉碎同埋辣椒粒, 食落口個湯底味道都唔差, 食到一陣香葉既味道, 湯底又唔會一味死鹹. 而最正係個米粉都爽口彈牙, 唔係林patpat既口感, 而份量黎講呢, 望落幾輕盈, 得一塊札肉之餘仲要好薄身既.....但好彩食完碗粉再飲埋杯咖啡都剛剛夠飽. 杯泡沫咖啡就幾好飲, 真心唔錯.…Read More

前排去又一城麥記買新出既signature collection試下, 本身想買牛嗰款, 點知又賣晒...兩款雞之中揀一就揀左狂惹火辣脆雞. 買外賣拎到返屋企, 勁肚餓, 即食. 一打開個包, 就咁睇係見唔到有醬既...望落好似勁乾..個心已經灰灰地.. 直情打開塊包望望, D醬得少少...唉..買外賣都要照食架啦. 食落塊雞有D似麥香雞包塊雞, 但比嗰塊雞好味少少同埋厚身D既, 咬落唔算脆, 比較實身, 但亦都唔會好似脆辣雞腿包嗰塊雞咁油膩. 另外既配料就係一塊厚切菠蘿同生菜. 其實感覺都幾hea...頭幾啖食都完全冇醬汁...到食多幾啖終於食到醬喇, 嘩...果然係"狂惹火辣"..因為真係堅辣. 好少食到麥當勞包係辣成咁既....我開始諗其實整包嗰個員工係咪專登放咁少醬架呢, 好彩佢放咁少醬...否則我估真係辣到飛天...之後就一路好辣好辣咁拿拿聲食埋佢....我諗我一定唔會再食呢個包...…Read More

之前網上睇左篇文章介紹呢度, 有日放工就和一樣咁鍾意食米線既朋友黎試下. 因為唔熟呢頭, 舖頭位置都有少少難搵, 一去到原來間舖好細間, 見full晒以為有排等, 點知阿姐就示意叫我地去隔離...原來轉彎都有間舖位可以比人食野. 地方就簡陋D 不過望落都算乾淨既.呢度除左平時有既麻辣/酸辣湯底, 仲有款麻椒湯底. 我於是叫黎試下, 要小小辣, 加左豬肉椰菜餃同雞絲, total $44, 價錢都比譚仔果D貴少少. 碗野黎到, 一試..嘩..都幾辣. 似平時出面食既小至中辣...好彩我都勉強應付到. 但湯底係幾香既, 我幾鍾意個味道, 麻辣中帶有D甜味.  韭菜同芽菜都好多, 唔姑寒.  豬肉椰菜餃個餡其實幾好味, 但塊皮太厚, 如果塊皮薄D應該會好正. 而雞絲一D都唔鞋唔韌, 幾滑有雞味, 份量唔少添. 米線都好大碗, 米線質地還可以, 再彈牙D會好D. 另外仲叫個雞翼小食, 又係出面比較少見既烤花雕雞翼, 呢個小食好香, 烤得好好食, 花雕味唔算好勁, 不過係有既. Overall, 呢間米線下次都好值得翻兜.…Read More