迅猛如雷's Profile

今日嚟試一間曼谷泰菜試下佢下午茶, 佢下午茶嘅款式都多, 而家做緊小食買一送一優惠。咁我哋兩個人分別叫咗個豬扒撈檬、一個芒果糯米飯、另外送嗰個就係泰式鳳爪, 豬扒撈檬份量夠夠兩個人, 食味道唔錯；個芒果糯米飯正常發揮, 冇乜特別；個鳳爪唔係話佢唔好食但係佢嗰個酸汁唔係太啱我個人口味, 係食得落口, 嘅但係未處於話好好食嗰個情況。現場都多人食下午茶而佢哋嘅服務亦都可以講得上係貼心, 地方清潔不再話下, 服務員有錯單漏單會即刻同你跟進, 總括嚟講我會再返嚟食多次。…Read More

連續去咗一星期茶泰食下午茶, 今日先至記得寫食評, 佢嘅下午茶都有好多選擇:有船粉、飯、小食類。今日就叫咗兩個船麵, 有正常嘅豬扒船麵同埋另一個加$3轉冬蔭功湯嘅, 味道不過不失, 下午茶份量啱啱好, 另外加多15蚊有一份兩串嘅串燒, 今日食咗牛串, 所配嘅沙嗲汁偏甜, 但係都好冧好好食, 凍飲分別嗌咗檸汁檸檬茶同埋凍嘅椰香咖啡。普通湯底偏淡, 而冬蔭功酸辣適中, 兩份加曬都係102$。如果想食埋多一份茶餐基本上150$夠落樓, 時間做到夜晚六點, 當早少少食晚餐都不失為一個好選擇。…Read More

好友聚會, 選址暹羅苑, 交通便利, 收工搭半個鐘電車响健威花園落車, 過馬路穿過商場已到, 附近仲有滙豐可以撳錢, 認真方便。環境正常企理, 入内已有多枱開餐中, 今次朋友打點, 我纯粹坐响處飲飲飲加食食食, 全程出品ok👍🏿, 員工服務態度熱心有禮, 招呼到位。個人認為泰式豬頸肉沙律、炸鱼、同甜品芒果糯米饭最好食, 大伙把酒言歡, 大吃大笑🤣, 真心過瘾👍🏿, 今次已約定下次再在此相聚。整體評分:全4分價格每人約$4xx…Read More

鄉下仔行街街想搵地方竭竭腳, 經過北角見馬六有吉位, 反正好耐未過馬拉嘢, 所以揀咗佢。入內有多個卡位, 但疏化較冧, 難坐小小, 整體寬闊整潔, 待應服務正常。下午茶有多項選擇, 有喇沙, 肉骨茶, 有乾有濕, 包餐飲, 凍飲+$3。Order咗喇沙無骨海南雞摻摻, 湯汁味濃小辣, 摻摻係黃麵溝米粉, 配隻懶係糖心蛋, 同啲好細嚿嘅海南雞, 整體味道幾好, 最後連湯都飲埋, 今次配咗杯凍馬拉薑味手拉奶茶, 有薑味但茶味欠奉, 不過不失, 埋單$51, 價位正常, 份量個人認為十足, 可再幫襯…Read More

放工好眼瞓, 所以搵處下午茶加晚餐一炮過食, 然後返歸搵Mr.Chow。今次揀咗新森林, 下午茶A or B set包熱飲, 凍飲+$3, A B set分別係多個小食, 價錢$39/$47； 我當然揀$39喇…下午茶有多項選擇及配搭, 我就叫咗個鮮茄焗豬飯+煎餃子配央走。焗豬正常操作, 以下午茶份量算大份量, 螢光橙色汁味道唔錯, 豬扒正常鬆軟, 飯粒分明；煎餃熱辣辣, 味道無乜好講, 正常水準, 熱央走咖茶味分明, 味道ok, 埋單$39, 只收現金。環境：6/10, 味道：7/10, 服務：8/10…Read More

六點半前到達, 已有1X人排隊等入內, 時間1830-2145。環境中等大, 座位距離雖有膠板但仍略嫌太近, 不過座位係舒適嘅。一開波箭步去海鮮區, 有生蠔、麵包蟹、虎蝦、 小龍蝦、青口、海蝦、翡翠螺。紐西蘭生蠔味道淡了些但可接受, 麵包蟹有肉有鮮味, 虎蝦肉質緊實有咬口, 青口海蝦正常操作, 小龍蝦相信用加入香料的水勺過, 味道一般, 徙時間剝殼, 翡翠螺鮮甜飽滿完勝, 失望在無龍蝦同長腳蟹腳。刺身類有5、6款, 質素正常；片皮鴨唔錯但嫌皮太厚扣小小分。香煎鵝肝肥美, 羊架肉嫩, 燒牛肉若配黑椒汁太鹹, 肉質正常水準。印度香飯及咖哩雞水準之上, 冷麵有多款配菜及汁可供配搭, 芝士焗扇貝普通, 似白汁扇貝多啲, 其他熱葷類一般。甜品有馬卡龍, 榴槤班戟, 鐵觀音梅酒啫喱, 白桃啫喱同雪糕等, 但實在太飽放棄咗雪糕。整體環境:8/10, 服務質素:9/10, 食物種類:6/10, 食物質素:7/10, 價錢:5/10, 若在旺角行街可再光顧…Read More

一個人行灣仔搵食, 出地鐵站沿電車路東行行約六、七分鐘, 去到三角街見食開嘅旺記打冷打晒蛇餅, 無乜耐性等位, 反正一個人, 見鄰舖燒味精神靓仔, 地方光猛企理, 於是幫襯咗盒义油雞飯行街。搵到靓位開飯, 义燒肥瘦適中, 相信用五花腩製作, 蜜汁香甜再加上小許燶邊, 食落口鬆軟無比, 相當可口；油雞食正脾位, 皮爽味適中, 肉質嫩滑帶小小油脂, 亦相當有雞味, 相當滿意兩樣燒味品質, 消費52蚊性價比合理, 下次有機會試下其他出品:)。…Read More

旺角捐完血, 行咗去搵李錦基(唔係李錦記), 深夜廣告就睇得多喇, 第一次離到本舖, 啫咗安心出行入內坐低, 地方寬闊清潔, 目測有二十張枱左右, 一半入座率, 好快就由李錦基本尊落單:生牛治, 豬肉卷撈檬同米紙蝦卷。約十分鐘上齊三款食物, 生牛河跟青檸辣椒金不換, 湯夠熱, 牛肉河粉正常但份量一般；豬肉卷撈檬同蝦卷均跟越式魚露醋, 豬肉卷香脆, 檬粉撈埋魚露醋及配料同食, 味道酸辣可口, 可以一試；蝦卷包有蔬菜, 蝦正常size, 配上魚露醋同食, 味道口感豐富, 惜分量只有四件略嫌小了一點。埋單連加一約二百頭, 整體性價比一般60/100, 味道不錯75/100, 服務正常70/100, 可以再試。…Read More

去唔到旅行, 用Asia miles 積分換西環港島太平洋酒店三位午市自助餐試吓, 搭地鐵出車廂行好遠先到, 建議巴士電車方便啲, 餐廳佈置正常, 賣點大海景, 天朗氣清ok la。食物選擇正常, 魚生有三文, 吞拿同鯛魚, 質素唔錯, 新鮮好味可encore；燒牛肉過咗火非常乾；熟海鮮得蝦蜆青口；蝦大隻鮮味, 蜆同樣出色但有小小沙,唯獨青口一般；反到熟食焗青口,蒸魚同海南雞飯唔錯, 又可以翻飛；炸物一般；自助沙律選擇正常, 食草嘅無乜好挑剔；無試豬腳薑, 最後用黑白(芝麻糊加豆腐花)收尾。整體質素一般, 會食得飽嘅, 唔會特登食多次除非有人請或價格十分吸引, 待應有禮；食物質素60/100, 服務質素70/100。…Read More

好耐無食過魚生飯，又循YouTuber腳印嚟到銅鑼灣廣場2期，未夠12點已經開始入客，我1條友被安排單邊兩人檯，張檯其實幾細，如果兩個人食放题可能一次唔可以點太多，但我一個食午市自助定食又無乜所謂。環境正常，光線比較柔和，檯與檯距離適中，人多時比較嘈。午市有定食，有放题(兩嚿水唔洗食三粒鐘)，今日專程嚟食定食，有多款揀，價格合理，另外每日有一款牛特價定食，今日叫咗＂珍宝赤蝦角切魚生丼＂，盛惠$55，未上飯前出去攞咗任食沙律吧同一啲前菜：中华沙律、味付螺肉同墨魚仔，眼見仲有鹵水鷄翼尖、煎餃子、魚旦、泡菜、味噌湯同糖水，沙律菜新鲜，有多款汁醬自己撈，中華沙律同味付螺肉及墨魚仔正常操作。剛食完沙律，就上魚生丼，上菜速度快，聽到staff講今日全場大部份嗌魚生丼，魚生丼嘅珍宝蝦一大一細，新鲜無雪味，解凍做得唔錯，肉質有Q彈，角切魚生亦唔錯，古語有云：蝦有蝦味，魚有魚味(笑)，加小小豉油，好快KO咗碗飯，飯偏酸小小但我ok，米粒分明，唔錯。再嚟多round沙律加味付後，見到現場有多款甜品，但我只K0了4盒迷你百福豆腐花，整體低食，食物質数中上，埋單無加一，職員唔會催埋單，一定有下次。見到有人食放题，目測唔錯，聽到評語新鮮好食。…Read More

返内地食酸菜魚是其中一個行程，太二祿鼎記漁夫人一定有一個在我行程内，可惜疫情關係，已經近1年無法返內地探佢哋。朋友發掘了一间在香港的酸菜魚連鎖店，正好一解相思之苦，晚上6點到達，店内面積不大，目测可容納50人左右，每檯2至4人，有隔板有电子测量體温，每檯距離尚可。用手機落單，先點了人見人愛酸菜魚(小辣)、葱油伴麵、口水鷄、靓仔各1。約10分鐘菜已上齊，主角酸菜魚果然無令人失望，魚片厚薄尚可，酸菜酸度適中，混和花椒及酸湯撈飯，可食兩碗靓仔，味道有内地7成水準；口水鷄正常操作，略嫌多骨小肉，只有4份1隻，份量唔上唔落；葱油伴麵只此一次；最後追加乾煸肥腸+靓仔一個，今次要成廿分鐘先上菜，紅噹噹滿滿辣椒乾，伴上有孜然粉嘅炸大腸，味道不錯，但只有11-12嚿左右，性價比低。服務正常，店員態度正常，埋單連加一剛$500，當然比内地價格略高，份量也略細，但整體味道滿意，店内亦有乾鍋供應，下次可以一試，離開時全場爆滿，有人排隊等位，下次試吓其他分店。…Read More

陪外母出巡，行遍灣仔及銅鑼灣，我提意上皇室堡迎喜晚膳，一行四人八點入座，正廳全滿，打邊爐居多，我們被安排坐邊廳，起初得我一抬客，陸續有多人入座， 防疫期間四人一檯，距離相當好。自助水機已成招牌，普洱一般，沒期望，點咗四個餸：酸菜魚，豉椒炒蟶子，椒鹽鮮魷，燉湯一個。酸菜魚當然比唔上大陸好食，但味道 都幾好可以一試；炒蟶子略嫌蟶子大細隻；椒鹽鮮魷正常操作；燉湯材料豐富，有花膠有雞腳，雞腳燉到連骨都可以吞埋，唯獨是茶位費 連加一要接近五百蚊埋單，性價比低，都係早茶下午茶比較抵食。…Read More

遲來的評语，又係跟據YouTuber啲片，限聚令前去試飲茶放题，电話訂位有折，$150 x 3。評测：人手不足，拖單，食物無樣熱辣辣，但飽肚(因為一肚子氣)，無下次，完…Read More

打風去銅鑼灣皇室堡迎囍飲茶， 都係疫情關係 每張枱只限錯兩人， 環境不用說-清靜，入座率50%。手機點餐，蝦餃燒賣保持水準，鳳爪叉燒包正常操作，叉燒酥可以一試，櫻花蝦炸両 新鮮脆口，值得推介，黑松露叉燒飯叉燒瘦得呢鬆化，上面有一陣黑松露味，效果唔錯，至於竹絲雞黑蒜湯，唔係個個人接受到，我個人 接受到，大家不妨一試。整體體驗不錯， 襯市道低迷，可以飲多幾次臨走幫襯咗兩張月餅券，好奇怪，雜錦流沙連職員都唔知裏面係乜嘢味道？所以只係買咗雙黃白蓮蓉同紅豆系列 。淨飲茶240落樓有找，月餅270，搵日放假我會再來。…Read More

根據youtuber報料，今日獨食嚟咗北角海逸軒 嘆中茶buffet，時間由11點食到2點半，eshop買300蚊全包有找，環境清幽，地方寬敞，衛生程度中上，侍應有禮貌，工作態度良好。飲茶嘅食物通常都係嗰啲~蝦餃燒賣之類，今日差唔多試曬佢點心紙上面嘅食物，蝦餃豆苗餃燒賣义飽水準之上，反而粟米蟹肉羹冇youtuber講得咁好(水準一般)，另外試咗佢嘅蟲草花胡椒魚片湯，大家可以不試。 小菜點咗西蘭花炒帶子，正常操作，反而個泰式柚子蝦沙律，我就覺得麻麻，食曬啲蝦淨番啲柚子同沙律，其他叉燒酥同香芒蝦春捲，我覺得幾好味，重點推介傑哥叉燒，一定要試，最後叫咗楊枝甘露、杏仁茶、桂花糕同雷沙湯圓收尾，都係正常操作。總括而言，呢餐我覺得值230蚊度，其餘嗰啲算係加一同服務費，一個月可以去一次，大家不妨試一試。抗疫成功…Read More