芭芭Chan's Profile

今日老公放假，可以接完仔放學去附近飲個茶先返屋企。11:20左右去到茶館，原則上已經有9成食客，所以樓面職員表示搭枱既安排。係入口等安排時已經留意到同剛剛開張時嘅擺位有分別，當進入所屬位置時強烈認知到自己對所謂擺位不同既感覺！茶館分隔既屏封好貴氣穩重，完全冇搭枱既尷尬，梳化座位闊落大方！真的很讚！係大圍分店食過返尋味既沙翁，今日係元朗分店要推薦比老公品嚐，而老公一見到牛骨髓話係必食。另外係叫左流心煎糯米雞、咖喱魷魚同2粒燒賣。價錢有返咁上下既佢，點心即製係有水準，壺茶用既茶葉飲落每口都回甘。…Read More

今日11點40去到餐廳門口，餐廳12點開⋯好開心唔使點等👏🏼👏🏼👏🏼平時收工同星期六、日見門外成堆人，諗到要等到傻果下都驚，所以真係怕怕。12點左右坐入餐廳，同老公淨係叫咗一個pizza既set lunch，因為想食炸雞，所以整多份6件辣炸雞，加杯Gentlement Lager🍺所有野應該都係即叫即整，唔會急急上菜，等上菜既呢段時間我就餵咗個仔食曬啲粥仔先黎set lunch碗daily soup，係豆腐麵豉湯味道唔錯，熱辣辣！之後就嚟個set lunch既蜜糖蝦披蕯，上面有啲合桃，芝士又夠多⋯⋯好好味！之後黎埋個炸雞，真係不得了！好乾身，唔係好辣，好鬼正！至於杯啤酒，老公就覺得一般般，我飲咗1/4，味道有少少苦澀，都可以吖最後杯咖啡（跟餐+18）都唔錯，值得試…Read More

今日去訂個蛋糕同個仔慶祝生日。櫥窗件裝蛋糕好吸引，所以都忍唔住買幾件返屋企止下癮先。純粹靠外表，我買咗呢三件cake。焦糖面個件其實係瑞士卷蛋糕底，我覺得呢件係最出色，蛋糕好香鷄蛋味，忌廉新鮮一d都唔覺得漏，加埋上面脆卜卜既焦糖，中間又有啲流心，有驚喜！之後士多啤梨蛋糕係今季限定於版，最上一層係三層班㦸皮，中間係帶酸既strawberry cream同海綿蛋糕，都幾好！最後蘋果款個仔最唔好食，9成mousses，中間似係糖水蘋果粒。坦白講，真係好麻麻，得個甜字！…Read More

復活節假期後嘅第一日， 11:30左右去咗老馮買外賣，見到門口已經有好多人等位。唔知幾時開始，老馮終於整返懷舊千層糕，所以十分開心。而家好少茶樓會做！外賣叫咗章魚肉餅飯、窩蛋牛肉飯⋯三個點心係懷舊千層糕、雞紮同埋潮州粉果。拎到返屋企，秒九將啲外賣盒打開，費事啲水蒸氣滴水落過千層糕。收到外賣嘅時候，已經留意到佢嘅外賣包裝好別緻，返到屋企逐盒逐盒打開佢都覺得好滿足，食外賣呢件事覺得好美好咁😅整體來講，章魚肉餅飯好味，好過窩蛋牛肉飯。由於老馮啲點心都係即叫即蒸，用料唔求其，所以一定唔會令你失望。不過，大家如果要買外賣返屋企的話，就預咗自己要喺門口度等20至25分鐘。好嘢係要等嘅…Read More

成日都見排長龍，其實真係唔乜心機等。直到有一次，差不多11點先飲完個早茶，行行下到1點半都未係好肚餓，但又好似係時候要食lunch⋯咁就第一次去磨飯買飯團。食咗一次，就知道咁多人等食係有原因，記得果次係買咗件芥茉醬雞紫米卷同埋芝士青瓜紫米卷⋯認真，好好好食！佢嘅紫米卷利用咗不同既配料（脆油條、肉鬆、芥末醬、青瓜絲etc.)做出好多層次感！前幾日收工，唔想下下碟頭飯、米線、Pizza⋯諗起去磨飯。去到門口有4組人等緊外賣，之後落咗個芝士肉燥雞扒鹵蛋飯（因為本身menu冇，所以加3蚊）、麻醬雞紫米卷加流心年糕串、一杯熱檸水、一杯熱奶茶。等咗大概廿分鐘，都還可⋯⋯走人。返到屋企，換衫洗手，即刻開餐外賣盒包裝好乾淨整齊，未食已經感覺好好。打開肉燥雞飯已經一個匙羹畢埋去整啖先好好味，肉燥唔係肥豬肉，汁量剛剛好，味道適中唔死鹹，一口健康加美味！之後就黎食流心芝士串，係串年糕包主蛋皮，上面加埋芝士醬同沙律醬，簡簡單好好味再開埋個紫米卷，唔洗講，水準依然，好幸福…Read More

某日既lunch時段，唔係好知自己想食乜，走去望下聞名已久嘅Dear Coffe & Bakery搵下輕食。本身自己係好鐘意食Bagel，材料簡單冇太多附加品，口感又好好，外面煙煙un，內裡軟軟彈彈咁⋯拉門入店，地方少少，左右兩邊兩張小枱分別已有女性朋友各據聊天，我就行前3步已經到收銀櫃枱，右手邊就是玻璃廚櫃，直接選購當天提供嘅麵包款式。本身係想食100%紫薯包，但當日已經沒有，所以選擇咗一個網上冇人介紹過嘅蒜蓉芝士Bagel（$35）。要求加熱，返回辦公室立即品嘗！麵包口感如我所想的煙un有口感😋咪道嚟講都係好唔錯，係用咗cream cheese 混蒜蓉，唔會太濃食完有種膩既感覺，算是享受！…Read More

星期日點零鐘去到古月聚，剛好有人埋單，有枱入。坐底叫咗碗紅燒牛肉麵、肉燥湯麵加配鹽酥雞、跟餐一杯凍奶茶&凍金桔檸檬冬瓜茶。紅燒牛微辣，老公好欣賞啲牛筋，話好淋，正！我個碗肉燥湯麵湯在就淡左啲，不過肉燥做得好，用啲汁撈埋湯度可以接受的。落單紙有標名冇落味精冇落雞粉，所以湯底偏淡，我都好欣賞，畢竟做生意，好少餐廳以健康為主能留住食客，所以其實都幾搏😅鹽酥雞係正嘅，乾身唔厚粉，冇肥膏，正！同路人行過要支持下！…Read More

之前成日間中經過BRO 3門口，都係好多人係外面等，所以肚餓先行去的話，實在係冇乜心機等！星期日下午點零鐘，又再一次專登過去碰運氣。今次見外面等入客既只有兩個人（相信係幾乎過曬lunch hour原故），咁難得當然等。好似大概等咗廿分鐘到，入得！餐廳冷氣都幾勁，我坐喺門口位都好涼快。坐低落咗2個午餐：咖喱吉列豬扒蛋包飯&魚柳包拼薯角，2杯凍央。2杯凍央黎到先，樓面好好走黎話我地知水吧整咗少甜比我地，試吓啱唔啱飲先。少甜味道都不錯，健康版其實好鐘意，好彩忘記叫少甜都上咗杯少甜（噤啱乍）食物即叫即整，首先遞上咖喱吉列豬扒蛋包飯，豬扒炸好砌開幼幼條，一件分兩口送飯剛剛好，豬扒鬆化，咖喱係日式口味微微微辣，好滑口，炒蛋雖然唔係包晒成個飯果種，但反而覺得冇咁油膩，好怕食到滯。魚柳包剛上枱時覺得包面燶咗啲，點知食落脆卜卜，配埋鮮炸魚柳剛剛好，魚柳包有芝士同他他醬，yummy！薯角熱辣辣，炸得乾身剛剛好，不過我覺得可以落返少啲鹽🗣 所有食物清曬！…Read More

母親節正日，約咗老公一家下午1點見。但係習慣放假嘆早餐，所以10點已經出門口，諗住hea個零鐘冇問題。三十幾度烈日當空加埋帶住外科口罩既情況下，實在行咗半個鐘頭已經焗到抖唔到氣，所以去元朗廣場逛。可能天氣太熱，所以行一陣都好攰，商場範圍外又冇coffee shop ，所以去咗Starbucks稍作休息！近呢6、7年去襯Starbucks 10居其9都係擠滿人。社運加疫症，騰出番好多機會比本地人去幫襯。去到Starbucks，已經係有七成坐喺度嘅客，不過感覺亦比以前少左七成客咁，因為冇再企滿晒店裡面所有既空間😌我點咗杯抹茶烏龍啫喱特飲兩個share。唔知係咪太耐冇飲過Starbucks，覺得d甜度適中偏淡，感覺健康咗。烏龍茶啫喱，清新有咬口都好味！…Read More

以前行經都見座無虛席，不過就從來冇幫襯過！由於支持黃色經濟圈既關係，呢幾個月都會行一段路去距離屋企比較遠既阿x冰室食早餐。某日既早上，想支持一下其他餐廳，所以去咗雞地找食。肺炎關係加上限聚令，所以見天王門口冇擺枱，餐廳裡面有兩枱客人，餐廳得一個樓面，做到踢曬腳落單、執枱、上菜、聽電話接外賣、接客量體溫⋯早餐價格定位$40樓下，食物質素係一般正常。老公唔係好欣賞，不過我覺得還可以！點都好，加油啦，希望良心小店捱得過，成功繼續努力生存！…Read More

放假想坐得舒服啲，所以去Outback食lunch。12點幾去好多人，等咗20分鐘左右入坐。最驚喜係見到Lunch Set有用「新豬肉」做既burger，唔洗諗我就揀咗！老公例牌order西冷牛扒。想提下個「新豬肉」漢堡，真係好似肉，完全食唔出係植物大豆做。不過覺得醃得太鹹，希望唔好整到啲食物咁鹹，就連跟餐薯條都好鹹，幾乎遮蓋晒個薯仔味其實我同老公都幾經常去Outback，牛扒整得好好，但越黎越發覺其他食物醃得太鹹⋯⋯好傷腎吖，希望有改善。…Read More

星期六同老豆細妹去寶福山掃墓。由於堅持去黃店又要兼顧腳痛唔係太行到遠既老豆，所以初初係諗住去「荳x」，點知認錯地方，行到去沙田新城市廣場5/F，搵唔到先知認錯商場。唔想老豆再咁行法，即刻search OpenRice，一望MiMila就有印象係黃店，所以就上多兩層去搵食🙌🏼🙌🏼🙌🏼7/F電梯對住已經係MiMila，唔洗老豆再辛苦行都托賴🙏🏼坐低做完一輪消毒工作，落柯打。老豆加我兩姐妹，食暈並不大，所以叫咗一碗🐓喇沙手撕雞摻摻，同一碗🦐生蝦撈麵，一個🥬生菜蝦網春卷，各人一杯飲品（檳城特色鴛鴦、馬來檸茶、薑汁奶茶）。因為阿妹心事重重，所以我冇hyper地影低食物相。等一次食MiMila，真係想講黃得黎又有質素，要大力讚！喇沙好正，手撕雞好似用新鮮雞，好好味；生蝦撈麵既生蝦係煎炸過，香口彈牙，蝦子撈麵好爽同入咪；春卷熱辣辣脆卜卜，真係冇得頂！飲品散叫無跟餐，但係飲過就知道講好值得👍🏻我要咗杯凍鴛鴦，佢真係好味到一個點，每個味道都好適中，阿妹杯薑汁奶茶又係水準高到極，薑味出但冇掩過奶茶既濃🤤痴線，就連杯檸檬茶都真係難以形既高質素，呢度茶膽認真一流！最開心係埋單走人既時候，係收銀附近有立體連豬摺紙攞，返屋企可以玩一輪！Like爆👍🏻…Read More

記得第一次經過老陳餅店時，係比佢個鋪名吸引，”老陳”好夠raw，我鐘意。之後上OpenRice望，知道”老陳”原來唔係賣中式西餅，係一間只賣戚風蛋糕既餅店！實話，我好支持有心人將自己專長嘅事做好，創一番事業，不求大富大貴，都起碼可以賺個錢生活到，但係呢度係香港，所以會諗：唔知有冇市場？今日再次路經，就決定試試。鋪內有5款口味（伯爵茶、芝麻、香蕉、朱古力、綠茶），個裝：$70、件裝：$14。舖面長方形，店員係收銀櫃檯內會簡單介紹產品：「牛油係用日本、低糖、芝麻味較香，其他味道聞未必太突出，食就會知道⋯可以買散裝試吓先。」之前留意過評語唔差，所以放心揀咗3個口味（香蕉、芝麻、伯爵茶）做下午茶品嚐。食後感：每款味道都好恰當，食到選擇既味道而且唔會好甜，蛋糕濕潤好香滑。不過始終係件裝，所以外層位置有輕微走氣（un)感覺，是正常的。喜歡戚風蛋糕既濕潤Q彈既食客，應該會喜歡上。如果要order一個裝可以先whatsapp留貨，用嚟招呼朋友或者生日唔想食咁重cream既好選擇！…Read More

係土瓜灣大，以前除咗去東京買蛋糕麵包，仲會幫襯小區麵包舖，再其後開始有美心進駐（當年覺得大牌子就係好）又會多咗去美心買蛋糕麵包。事隔廿年，其間多次慶祝活動都係買美心或是東海堂居多。前年我家大姐提出：「去東京買啦！東京既蛋糕仲正！」果次就係東京買咗個什果蛋糕，當晚感受冇乜，因為係食完圍餐先食蛋糕，根本飽到唔想再塞野落肚。前日同媽咪慶祝生日，去咗東京買個半磅粟子蛋糕（$75），講真今時今日半磅蛋糕已經唔多有，仲要咁街坊價，其實真係良心店。講到食，價錢係其次，最緊要係味道好先真係好值得去幫襯蛋糕鬆軟香蛋味，粟子蓉濃但又好creamy，蛋糕上既生果都好甜好新鮮買蛋糕時我亦買咗load合桃提子麥包（$15）做早餐，呢兩日食真係好有水準，唔係”空氣包”，好重身但又唔係死實實。合桃提子唔係好多，但係咁既質素已經值回票價。平時係A-1買開合桃/合桃提子（$28-$30），料係多少少，但我可能要食2/3先滿足。相反東京既出品，食一片半已經好滿足（阿姐幫我切左6份），呢下我真係估唔到希望香港繼續有用心整食物比香港人食既老店同小店。可以一直做一直陪伴成長一直承傳。…Read More

年幾前聽表妹講過緣聚放題超多嘢食，質素高，價錢低⋯不過自己唔係咁鐘意食放題，所以遲遲冇去食。今次有個藉口去試吓表妹既推介！午市放題有兩款套餐選擇，我同老公揀咗@$158，包埋任叫甜品、啤酒、串燒etc.每張枱都有張單，單上面有個QR code，要用手機scan一scan個code入menu度落柯打。唔知係咪午市關係，種類齊全但食物選擇少，不過又反問自己：百零蚊放題想點？！雖然如此，但整體上食物質素都唔錯，三文魚刺身新鮮、炸物乾身、火鍋版只有3款選擇都會上一個大鍋比你（for食客淥埋自助枱上既各種蔬菜、菇類、麵食）⋯爆谷竟然有水準！老公最鍾意係有Hoogaarden生啤。送食物速度正常，服務態度都滿意。畢竟唔太喜歡食放題，所以有緣會再聚！…Read More