erictong226's Profile

近排想食中菜，都會諗到呢度，是其中一個好選擇。早雨星期有老友外地返嚟飯聚，一於幫襯下，坐得舒服，招呼到位。星期二晚都座無虛席，全靠老婆幫手訂枱，一早幫我預訂餸菜；預訂咗個冬瓜盅，清甜足料；火焰奄仔蟹鮮味多膏；脆皮雞嫩滑有雞甜味；白灼蝦新鮮彈牙；金沙四季豆鹹香惹味；椒鹽九肚魚嫩滑;豉油王炒麵冇得頂；仲叫咗兩碟菜。老友們十分欣賞，全枱疊疊清，而且價錢唔貴，絕對無投訴。原來其中一個老友都有同屋企人嚟午餐食點心，我下次都要試下。…Read More

今個星期又去飲茶，叫咗5款點心。鮮蝦腐皮卷，皮脆蝦肉彈餡料豐富。臘腸卷，軟熟皮包住多汁臘腸。牛肉腸粉，又薄又滑的腸粉皮包住足料的牛肉。XO醬鳳爪醬汁味道及濃稠度剛剛好。粉粿，餡料滿滿，伙記主動俾碟潮式辣椒油點嚟食，十分惹味。總括嚟講呢幾款點心都好有水準。比較起上星期去咗中環士丹利街的老牌茶樓，這裡雖然相對比較貴，但食物及服務都優勝，就算是茶都比較好飲，這裡的鐵觀音有回甘香味，中環的老牌樓收$42位茶同是鐵觀音，無茶味。伙記們都十分有禮貌，招呼到位。枱與枱的距離不太近，絕對唔會感覺迫刧。…Read More

去到陸羽門口, 突然有位女士彈出嚟, 叫我地從則邊樓梯上2樓, 星期日1點半差不多坐滿, 好彩都仲有位, 伙記叔叔指咗張枱俾我地。張點心紙好傳統, 選擇不多(之後發現熟客係有多D選擇), 叫咗4款點心。牛柳絲春卷, 牛肉嫩滑。蝦餃, 蝦肉鮮彈, 傳統餃皮比較厚？鮮牛肉球, 食到粒粒鮮牛肉,鮮甜。糯米雞, 唔太多醬汁, 可以食到好香荷葉味。整體食物唔差,2樓伙記叔叔都好友善。老茶樓就有老海鮮。話說我用支付寶, 原來要落返去樓下收銀俾。我推門入去, 收銀位叔叔及企係傍邊的叔叔(我估係經理)望一望我, 我即刻話想用支付寶俾錢, 收銀叔叔同經理講"嘩, 真係巴L閉！", 經理回咗句"真係要睇實個門口, 走咗你都唔9知呀。"本來我想回應句, 算吧, 不會再來, 2個人4款點心要差不多5百蚊, 可以有更好的選擇。…Read More

放工同老婆晚餐，點了2人餐。主菜 薯蓉伴燉牛尾，卡邦尼意粉。前菜的蘑菇湯，煙三文魚沙律，兩個都略為咸咗少少，如果拌麵包食應該幾好。主菜薯蓉伴燉牛尾，薯蓉好香牛油味及好滑，牛尾炆得好淋有牛味，但係伴菜硬咗d。另1主菜，卡邦尾意粉，充滿芝士及煙肉，意粉軟硬度是我喜歡的。跟餐甜品，不太愛吃甜的我覺得有驚喜，芝士蛋糕配焦糖醬估唔到幾好食喎，朱古力慕絲夠軟滑。2人餐冇得用OpenRice 75折優惠，飲品有買1送1，埋單6百幾，好食又抵食過上星期太古城的CIAX多多聲。…Read More

十多年前舊同事帶我嚟食，從始年年都一定最少嚟幫襯幾次，因為位置在舊式街市無冷氣，只可以等秋涼後嚟食。我通常都叫細絲蓉麵，雪菜肉絲配上海雲吞麵。一般都會覺上海雲吞是主角，我就推介雪菜肉絲先係，加埋醋及辣醬，好味開胃 有時我都會叫絲抓麵，即係鳳抓配雪菜肉絲麵，鳳抓爽口入味，當然都要加醋及辣醬啦另外，會係隔嚟合記叫杯茶加件油多，食油多或鮮油多一定要加沙糖，咬落去索索聲，正啊講真，唔係好食到嘩嘩聲，不過耐無食就會囉囉攣😄…Read More

無晚市堂食，無晚市堂食，無晚市堂食。。。，想出街食，想出街食，想出街食。。。，唯有食午餐。我地點咗3樣嘢，沙律，pizza，牛扒，當然要加飲品要有啤酒。3碟食物中，pizza最有驚喜，唔知係咪傳統pizza，好食，好食，好食。沙律個汁都幾好，唔錯。牛扒煎得好香，可惜食落唔夠牛味，但都算合格。環境唔錯，疫情時間幾多客，地點有少少吊腳，啤酒只得支裝peroni，如果有生啤，我必定會加分 …Read More

星期日瞓醒，唔知食乜好，太太提議呢間餐廳，好，雖然遠咗少少，都一於同太太試下。入到村交通都幾繁忙，避車倒車讓路，前後都搞咗一二十分鐘先泊好車。我地選擇在室外用餐，環境十分舒適，員工有善有熱誠，值得一讚。點了2份午餐，揀咗鵝肝焗豬扒飯，西冷午扒。頭盤有湯/沙律。。。都係果d啦，但係個蕃茄湯加肉碎再配脆脆蒜蓉多士又幾特別喎 ，個煙三文魚沙律都幾好。到主菜，第一個先嚟報到的係我好祈望的鵝肝焗豬，香，好香，即試。。。第一啖。。。噢。。。好羶，覺得唔太夾，試多啖。。。又好似易接受dd😅，講翻個豬扒及個飯底真心唔差，可以做正常的蕃茄或咖喱焗豬會好好多，純熟個人意見😅好，另一主菜牛扒上枱，賣相一般但好香，立即試，脆邊有少少焦香，正，如果多少少牛味就perfect，但以兩舊零的價錢嚟講整算是好食。餐茶我要奶茶，老婆要咖啡。奶茶唔我最like的港式，用咗錫蘭茶?唔識但又幾特別喎。咖啡都幾香。原來午餐set有跟甜品，椰汁紅豆糕。紅豆及甜品從來都不是我杯茶，但老婆好欣賞，所以都好食2份午餐差不多5舊水，講真唔平，仲要無雷公咁遠。如果有時間，想輕鬆過半日都係一個幾好的選擇。…Read More

瞓到自然醒的星期日，瞓醒都仍然發緊夢咁，諗唔到食乜，太太話想試下附近間咖哩，好。。。出發差不多一點，午餐時間竟然無人 ，有點擔心，但印象中幾年前試過1次，order啦。叫咗3樣嘢食，素菜咖哩角，忌廉咖哩牛肉，牛油味烤薄餅，加2杯拉茶。餐廳送咗2件薄脆，十分香脆，帶少少辣。跟2種醬，1款似香草，另1款甜甜酸酸，都好味。咖哩角，裡面裝滿咖哩雜菜容，都幾惹味， 尤其是熱熱地食。忌廉咖哩牛肉，好香咖哩味，可能是加了忌廉，不太辣，牛肉夠淋夠入味。牛油味烤薄餅，個人覺得一般，沒有牛油香，不夠香。拉茶，應該是加了肉桂，近幾年減飲甜所以無唔落糖，第一啖，唔掂，但太太竟然話好味，無理由㗎，我試佢果杯，甘甜好味喎，原來落少少糖分別好大。這杯拉茶有驚喜，不過要襯熱飲。…Read More

今晚突然想去九龍城食泰菜，無預先上網搵餐廳。見到有咪錶，即刻泊好車，就係附近搵食，經過泰仔，6點幾都有幾枱客，一於試下。點咗3樣食物，炭燒豬頸肉，生菜包碎肉，青口粉絲煲(原來想點大蜆粉絲煲，可惜無大蜆)。推介炭燒豬頸肉，香味十足，肉嫩滑不乾，醬汁酸酸辣辣，好食。生菜包碎肉，比一般的辣，普通。青口粉絲煲，青紅黃好甜好食，但青口無味，可惜。補充，每枱都有碟炸蝦片，香脆，加杯冰凍泰國啤酒，一流配對。可以再幫襯，下次要搵多幾個老友去，可以試埋其他食物。…Read More

原本想去附近食台灣牛肉麵，但係無開。老婆話附近有間麻辣米線經常都有人排隊等位，不如去試下。去到，剛好有位，唔洗等。我叫咗個酸辣米線，小辣，魚腐，麻辣雞肉，豆卜。老婆叫咗麻辣米線，微辣，麻辣豬脯肉，鮮腐竹。仲有叫咗鴛鴦雞亦4隻。米線配酸菜，一流的夾。麻辣雞肉及麻辣豬脯肉都好味。豆卜及鮮腐竹索咗d湯，無得頂。辣度不是太辣。魚腐及雞亦就麻麻地。魚腐無味兼太淋。我好鍾意食雞亦，所以一見到有雞亦就即點，鴛鴦雞亦即係2款味，麻辣及炸醬，雞亦不夠入味而且煎得不夠乾身。另外，因為好多人等位，食得比較趕。…Read More

第一次幫襯，食物味道好，店員態度好。我叫咗個京都炸醬墨丸撈麵，老婆叫咗個雲吞冬菇湯麵，一心只諗住求奇食下填飽個肚，點知原來意想不到，京都炸醬野味，肉條比一般食開粗及長，墨丸好味爽口。雲吞一般，我唔食冬菇，俾唔到意見。有一樣一定要讚，員工態度十分有善，客人食都食得開心d。…Read More

其實嚟過好多次，燒雞翼，燒牛舌都係致愛。燒雞翼外脆內juicy，燒牛舌軟綿綿有牛味，推介。另外，烤薄餅都好正，餅身鬆脆，而且有好香的牛油味。今次老闆娘有新介紹，燒和牛，燒神戶牛。燒和牛，係第一次聽，第一次食，好味，好有牛味。燒神戶口，充滿油香。淨食已好好味，配生蒜蓉及熟蒜粒又意想不到的夾，另外加少少飯一齊食，可減少油膩感。又一新發現。食串燒當然要飲杯啦，我就梗係飲啤酒啦，太太就愛這裡的自家制梅酒。…Read More

早兩晚去食，2位，原本諗唔到食乜，是但去附近食碗車仔麵，路過此店，未食過，就入去試試。冬陰公湯，不太酸，辣度剛好，蝦夠彈牙泰式炒菜，清淡咗少少，不合我口味串燒揀咗雞同豬，燒得好香，皮脆卜卜，個沙爹醬好好味海南雞飯，雞肉算是嫩滑，個油飯都ok，跟飯有個湯，不過太甜，味道不自然老闆好好人，招呼幾好，份量算十足，我兩不大食，食到好飽，會再幫襯，不過可惜無影到相，下次補翻。呢個舖d食店成日換，真心希望佢做得住啦。…Read More

堅尼地城四圍都係酒吧西餐，女友話想食日本嘢，記得之前嚟食過晏，都幾好，一於試下晚餐。叫咗d壽司，炸物，串燒及一個鍋物，第一碟三文魚壽司的確唔錯 ，新鮮肥美，之後其他都一般，另外個泡菜豚肉豆腐鍋都幾好，足料，個湯底好似麵豉湯，配合埋其他食材，又出奇地夾 。…Read More

星期五晚約舊公司好友聚餐，無揀錯，好地方。地方就腳，店員服務態度親切，可以韓燒，可以打邊爐，有熟食，汽水啤酒任飲，加埋一都係兩舊多少少，絕對抵食無投訴，但係唯一缺點係冷氣太大風，可以改善下就好。推介煎餃子，外皮金黃香脆，內裡充滿肉汁，好食! 另外，韓國燒酒，相當易入喉，推薦大家一試，不過要加錢。三幾個朋友歡聚好地方，會再去。…Read More