岸潮B's Profile

春回大地 ... 鹿鳴春 ... 很有意景的店名, 是間已於尖沙咀迄立數十年的傳統京菜館. 第一次跟朋友去的時候, 朋友說這店是他父母由年青時食到現在, 店內裝潢數十年如一, 轉變不大, 而我雖然沒有食了數十年, 但都食了十數年, 都覺得店內的時間仿佛停頓或行得特別慢.  除了裝修, 伙計都是, 每位伙計都是很有年資. 唔似西方管理那般客氣的服務態度, 而是像街坊朋友般有傾有講.到鹿鳴春每次都是人山人海, 尤其大時大節, 如果想確保有位, 建議早些訂位比較好. 店舖位於麼地道, 所處大廈有經營賓館, 感覺就像於外國旅行時到中國餐館吃中餐一樣, 到達2樓內進後, 見到的裝俢與環境, 感覺更為強烈, 餐廳樓底較低, 迴音教響, 比較嘈雜, 但亦可視之為熱鬧. 去鹿鳴春多數食午餐, 因為比較抵食. 人少的話可選午市特價小菜, $58一款送白飯一碗 ; 唔想食填鴨的話可選'五和菜'餐, 四款小菜, 一款羹送四碗白飯 $280, 想食鴨的話可選'中午填鴨餐' $650, 今次就是選這個餐. 前菜有酸菜同/或花生(視乎人數)(要收費), 酸椰菜真的很酸, 但再食幾片就會食到甜味, 作為前菜空口食唔覺得好開胃同好食, 反而食完飯後先食可以減少肥膩感. 花生有少少麻油味, 唔脆但唔腍, 有咬口, 飯前一邊閒聊一邊食都幾好. 每次去到, 唔駛睇餐牌, 唔理幾多人, 唔理會叫咩, 都會第一時間同伙計講:要隻燒雞先, 而佢哋亦唔會幫你落單住, 會話:睇睇仲有冇先, 有就幫你落. 因為燒雞是限量供應的, 售完即止. 燒雞是將整隻雞先燒再用湯汁煮, 上菜時會幫你拆肉. 雞肉軟腍唔柴, 由於雞皮燒過, 食時會有焦香, 湯汁吸收雞汁之餘有花椒八角等香料香味, 就算只用湯汁的話都可以食幾碗飯. 白切肉粉皮 - 白切肉即豬肉, 白灼切片配粉皮. 豬肉比較乾, 唔夠腍, 粉皮夠爽, 配上蔥,蒜,芫茜, 辣椒豉油, 很惹味. 清炒蝦仁 - 蝦仁很爽又大粒, 配浙醋食更能帶出蝦鮮味. 一碟蝦仁滿滿的, 唔會只有寥寥數粒, 可以裝到滿滿的一碗然後大啖大啖的'爬'入口, 很是滿足. 賽塝蟹 - 蛋白炒得滑之餘又唔會好油, 蛋白中有小干貝粒, 口感豐富.烤北京填鴨(原隻) - 上填鴨時, 師傅會於食客面前或附近片填鴨. 一隻鴨大概片到兩碟. 填鴨皮脆肉嫩, 鴨皮充滿鴨油香味. 餅皮是自家製的, 不同於坊間一般薄薄的餅皮, 鹿鳴春的餅皮是厚的, 但很軟, 厚軟之中又充滿著麵粉香味. 雖然厚, 但當塗上甜麵醬, 配上京蔥, 青瓜, 鴨片, 一起吃的時候, 會發覺它們非常之夾, 餅皮吸收了鴨油及鴨肉汁, 口感豐富之餘又唔覺膩, 會令人想一吃再吃. 八寶炒鴨崧(生菜包) - 鴨肉, 菜甫, 炸菜, 芹菜等材料切至小粒同炒, 配上生菜包著吃, 很惹味爽口. 津菜鴨骨湯 - 鴨肉食完鴨骨都唔會浪費用以煲湯. 鴨湯煲至奶白色, 充滿鴨同津菜的甜味, 津菜又吸收番鴨的肉味, 津菜好食湯又好飲. …Read More

沖繩, 古代稱為琉球國, 日本最南的縣, 藍天白雲, 水清沙幼, 當中名物包括苦瓜, 海葡萄, 海鹽, 黑糖, 石獅子等 ... 樂宴主打的是沖繩菜, 在香港, 日式餐廳多如天上繁星, 但主打沖繩菜的日式餐廳卻寥寥可數. 餐廳位於登龍街永光中心內, 登龍街的變化相當快, 從最初一條平靜的小街, 先有人龍店豚王於始開業, 接著到 Jamie's Italian, 到現在已經有很多食店開業於此, 永光中心亦一樣, 整棟大廈都有很多食肆, 選擇繁多. 由踏入樂宴開始, 即仿如身處沖繩居酒屋. 店員多說日語及英語, 只有帶位的小姐是說廣東話. 餐廳到處都放滿陶器及石獅子等沖繩名物, 很有特色, 而最注目的莫過於一張長方形三面環繞的吧枱. 吧枱很大又很闊, 吧枱前面放了很多酒樽及大酒瓶作裝飾, 實用之餘(店員真的會取枱上的酒樽倒酒)亦略避免不相識的食客對望而感尷尬, 特色又貼心. 坐落時, 店員會送上熱毛巾及枝豆. 枝豆軟腍, 微微的鹹味與豆香, 很開胃. 以為是送的, 但原來是要收費的. 先點飲品, 左:沖繩黃薑茶(冷) , 右:沖繩四季桔果汁. 可能黃薑茶是冷的, 所以黃薑味比較淡, 很淡很淡, 四季桔汁很香桔味, 酸酸甜甜, 很好飲. 下酒菜比較細碟算是居酒屋的特色, 因為大家到居酒屋主要都是飲酒談天. 食沖繩菜, 當然要食出名的苦瓜炒豬肉啦. 苦瓜與豬肉都切得很薄, 加蛋汁和煎過的豆腐同炒. 苦瓜微甘且爽, 伴以豬肉和豆腐同吃, 甘爽軟腍, 口感豐富. 先苦就後甜, 跟著上的是沖繩風紅蘿蔔炒蛋, 紅蘿白絲很清甜, 軟硬適中, 配以洋蔥韭菜雞蛋同炒, 唔老, 唔乾. 接著沖繩風燻豬手伴酸汁上場,  豬手煙燻味很重, 很香, 一咬之下十分驚喜, 豬手非常軟腍, 想像唔到燻豬手竟然會好似炆豬手般軟腍, 豬手一咬即開, 滿口骨膠原黏著嘴, 如果想清爽些可點酸汁吃, 能減少膩感. 最後到汁燒沖繩雞軟骨肉餅. 燒汁醬油味香濃, 甜甜的, 配上有雞軟骨碎粒嘅肉餅, 沾上蛋黃, 滑嘟嘟, 啖啖肉. 本來已經食完, 但真係忍唔住想食, 所以加多個輕燒沖繩和牛.    和牛上桌時呈漂亮的粉紅色, 急不及待, 先嚐一片不沾汁的. 牛肉很嫩, 差不多不用咬, 入口即溶. 牛肉沒有調味, 只輕輕的灑上少許鹽. 張牛肉包上少許蔥及蘿蔔蓉再沾汁食, 又另一番風味, 比較惹味一點及減少肥膩感. 為美味的晚餐劃上完滿句號的就是沖繩黑糖年糕. 年糕上的時候不覺有甚麼特別, 一咬, 原來是熱食, 雖然只是微熱/暖, 但都夠意外. 年糕非常柔軟唔硬, 感覺少少似煙韌版涼粉, 有黑糖香但唔太甜, 亦唔會被濃香豆味的綠豆粉蓋過, 又軟, 又香, 又甜, 又好味.  覺得餐廳很細心, 上菜應該有安排過次序同時間, 先苦後甜, 由乾至濕, 從淡到濃, 唔會一次過上哂所有菜, 又唔會等太耐都上唔到菜, 整個用餐時間都食得好舒服. …Read More

得悉文華東方酒店其下的快船廊推出以海鮮及甜品做主題的自助晚餐, 很感興趣. 八月廿多號致電留位, 已經爆滿至九月中, 可見受歡迎程度. 快船廊的坐位間隔有些特別, 正正像凹字形, 食物主要放於凹字左方但坐位不多, 如坐於凹字右方, 會略感遙遠或不便. 冷盤海鮮有龍蝦, 麵包蟹, 青口, 阿拉斯加蟹腳, 翡翠螺, 鮑魚及生蠔等. 海鮮非常搶手, 除了鮑魚只 refill 了一次, 其餘 refill 得算快. 生蠔較細, 蠔味較淡, 鮑魚, 龍蝦肉唔韌, 阿拉斯加蟹腳多肉鮮甜.刺身由師傅即叫即切, 雖然種類不多:帶子, 甜蝦, 油甘魚, 吞拿魚, 三文魚等, 但尚算鮮甜, 反而壽司款式比刺身多. 熱盤方面都有多樣海鮮選擇:蒸魚, 扇貝, 蜆, 蟶子等, 味道一般但不差, 不過蟶子唔夠爽. 蔬菜款式都有幾樣:紅蘿蔔, 四季豆, 薯仔等. 石班魚炒飯唔錯, 好大件石班魚.有湯, 有粥. 乳鴿很好味, 皮脆肉嫩,  避風糖蝦一般. 沙律吧蔬菜新鮮, 配料及醬汁選擇豐富. 麵包款式多樣, 望落鬆軟, 很是吸引. 同場還有片皮鴨, 即煮米形意粉 (Orzo pasta) , 等特式食品. 另餐廳會奉送每位客人一客煎鵝肝, 鵝肝香軟滑溜, 記得留肚啊! 甜品方面種類非常多, 據稱有約四十多款可供選擇. 文華酒店甜品一向出名, 水準不用多說,  所吃的每款都覺得濃淡適中, 甜而不溜. 雪糕中有款青蘋果雪芭, 清新爽甜又好味. 由於相片所限, 還有很多好味食品如燒牛肉, 冷盤, 即煮粉麵等都未能介紹. 不過基本上到文華酒店其下的餐廳如今次的快船廊用膳, 有酒店餐飲管理, 味道都不會太差. 加上有文華酒店出名的甜品做其一主題, 平時於餅店買一件蛋糕都差不多要四十五元, 現在可以任吃之餘, 仲有海鮮同鵝肝, 真說得上物有所值. …Read More

於糧友パン工房初開時很喜歡食佢哋嘅麵包, 差不多每日都食, 尤其四重芝士米燒, 月見軟心芝士餃子. 後來食食吓覺得四重芝士米燒嘅芝士同開業初比愈來愈少, 就停咗一輪冇食. 剛好逛一田經過, 忍唔住打咗個轉, 見個包咁吸引, 一於買嚟試試. 一開始以為個包係芝士包, 但睇吓個牌先知原來係 黑芝麻蕃薯包 ($32). 麵包用天然酵母發酵所以非常鬆軟, 一粒粒正方形金黃色嘅唔係芝士, 係蕃薯, 香甜嘅蕃薯加上一粒粒嘅黑芝麻混合於鬆軟嘅麵包中, 咬落散發著少少嘅麵包麥味, 都幾好味. …Read More

如果到九龍城食飯, 就算食咗甜品都好, 都會到嚐樂外買碗腐竹薏米返屋企食. 一開始是朋友推介的, 話嚐樂嘅腐竹薏米好好食. 最初都半信半疑, 因為覺得食開嘅另一間糖水店嘅腐竹薏米已經好好食 ... 但一試之後, 從此轉店. 嚐樂嘅 白雪腐竹薏米 (堂食$22, 外賣要收盒錢, 唔記得$0.5 定$1) 強調係用樹記腐竹. 樹記腐竹出名豆味濃郁, 用佢哋嘅腐竹嚟煲糖水豆香四溢, 味道香濃.糖水可選冷或熱, 夏天喜歡吃凍的, 冰涼啲. 糖水呈米白色, 只係望都會覺濃而不稀, 因為選凍的, 甜感會比熱的減一些, 但香味亦會比熱的減一些. 糖水一飲, 就飲到濃濃腐竹味, 除咗飲到煲到溶哂嘅腐竹, 仲會食到一片片, 特登唔煲溶嘅腐竹, 加上煙煙韌韌嘅白果同薏米, 口感豐富, 又香, 又甜, 又好味.   …Read More

曾經有一兩次於九龍城見到啲間泰國菜館已經好想試, 今次終於有機會, 但 ... 只能說期望與現實不一定相符. 因為到達九龍城時已經差不多晚上八點, 平時常去嗰間泰國菜館已滿, 突然諗起, 之前路過金蘭花, 見門外貼了很多藝人雜誌等介紹, 已經想試, 所以即時去睇吓有冇位, 又有喎, 就咁決定. 店舖坐位唔算好多, 但因為係兩鋪雙連, 變相增加咗坐位. 店員態度一般, 唔會推介你, 唔會唔理你, 唔算冇禮貌, 但佢應咗你又會唔記得, 要叫兩或三次. 有人想食 D 樣, 有人唔食嗰樣 .. 結果叫咗 : 明爐烏頭魚湯 ($148), 泰式燒雞半隻 ($68), 鹹魚芥蘭炒飯 ($58), 泰式炒通菜 ($52). 食泰國菜的話, 叫明爐烏頭魚湯大人細路都會好開心, 魚型火爐好得意, 一邊淋住酸酸嘅熱湯, 一邊熱住一邊食, 火光熊熊.  原條烏頭上面鋪滿香蔥, 香茅, 唐芹, 辣椒, 梅子, 底部已經放有些椰菜同湯, 隋著湯開始滾, 香味亦開始散發. 魚肉本身冇醃過, 淨食會食到魚嘅肉味, 浸湯後食酸酸之餘, 有香茅同梅子香味, 比較開胃. 泰式燒雞(半隻) 皮唔多脆, 肉雖不至於'鞋'但都唔嫩, 一般. 鹹魚芥蘭炒飯 炒飯唔算好乾身, 油咗啲啲, 鹹魚有鹹魚香但唔會好鹹, 配芥蘭炒飯整碟鹹味適中. 泰式炒通菜 通菜夠爽, 味道適中. 整體嚟講啲餸唔難食, 但冇特別嘅話又唔會好想再嚟食. 可能係我哋叫嘅菜式比較普通, 唔係佢哋嘅出名菜式, 所以試唔到有幾好食啦. …Read More

"這絕對不是天上掉下來的禮物", "我們永遠不會去(大陸)"... 為表決心而於臉書公開拒絕之後, 多份報章傳媒加以報導, 從而得知'程班長'這食店. 看見老板程班長對食物與品質的堅持與用心, 好奇也好, 支持也好, 決定一試. 地點為於荔枝角的工業中心, 與地鐵站距離唔算遠, 行入工業中心後才發現除了'程班長'外, 還有很多其它食肆, 有機會要試試. 大概下午二時多到達, 午飯人潮已散去些但依然有好多人. 雖然食店設於工廈但店舖並不算大, 坐位亦唔太多. 點餐屬半自助形式, 先於點餐紙上選食物, 再到收銀處買食物, 坐好後店員稍後會送上餐點. 過膠的點餐紙能遁環再用, 不用浪費紙張, 環保又省成本. 最先送上的是 冬瓜茶 (跟餐+$8), 清甜冬瓜味唔算好甜, 但略為細杯. 跟著上的是 萬巒豬腳冷盤(小) $38. 豬腳好腍, 滷水味淡, 但沾上蒜味重且微辣嘅醬汁同食就好好食, 加上醃菜, 爽爽的, 幾好食. 不過醬汁蒜味很重, 食完會很'大口氣'啊. 清燉牛肉麵 ($50) 上場. 先飲啖牛肉湯, 牛肉味濃, 頗鮮甜, 飲完唔覺口乾. 牛肉用的部份不是一般台灣用的牛腱/金錢腱, 而係用牛腩/牛肋肉. 牛肉軟腍無渣, 好易咬開, 但始終冇牛腱咁好咬口. 麵條係扁身麵, 雖然又粗又厚, 但麵質好Q(彈牙)又唔粉, 就算食得慢麵都唔會變得糊口. 紅燒半筋半肉麵 ($52) 湯面有層紅辣油, 湯有牛肉味之餘仲微辣. 牛筋很腍, 很黏口, 牛肉一樣軟腍無渣, 同多了一點微辣. 食完麵已經飽, 但人又為食, 所以外帶 台灣鐵路系列嘅 滷豬排便當 ($45) 和 紅豆芋圓 ($28). 便當外型一如台灣鐵路便當, 很台式. 因為便當於晚上翻熱才吃, 可能影響真正味道, 但就算翻熱吃依然好味, 滷豬排軟腍唔韌, 滷肉, 滷蛋入味, 肉燥汁伴飯好味, 再加上椰菜同配菜爽爽的, 好味唔膩. 紅豆芋圓 糖水唔太甜, 紅豆有少少起沙, 煲到好腍, 黃色芋圓有少少地瓜味, 芋圓煙韌有咬口, 整體感覺頗清甜. 以味道來說, 因為大部份調味料和部份食材都是從台灣買入, 煮嘅方法又地道, 所以有九成台灣風味. 唯一不同係牛肉用嘅部份同肉質, 因為程班長說堅持用新鮮的牛, 所以無法用台灣黃牛, 而是那裡新鮮就用那兒的牛, 肉質方面有所不同, 亦令整碗麵嘅風味有所不同. 不過, 在香港可以食到咁接近台灣風味嘅牛肉麵和食品已經好好.用心做就有好品質, 擇善固執嘅程班長努力呀 ! …Read More

自從丹麥餅店轉咗 set menu 之後就少咗幫襯, 但突然想食炸脾, 所以去買隻食. 餅店位於一條名為'鐵行里'嘅小巷內, 巷內外都有好多其它食店. 比較喜歡之前嘅 set menu, 可以揀包(如豬扒, 魚柳, 熱狗...等) 配意/通粉, 但現在已經唔同咗. 如果唔多客人, 可以坐入店內等外賣. 店內坐位唔多, 用好多舊店嘅黑白相佈置, 懷舊又富特色. 裝雞脾嘅外賣袋內層係錫紙, 可以保溫. 雞睥係即叫即炸, 雞皮香脆, 雞肉唔柴仲保持嫩滑, 一咬, 雞脾香味出哂嚟, 鹽味適中唔太鹹. 店家仲貼心地用錫紙包住雞脾骨頂部, 方便大家攞住食. 希望遲啲個 menu 會再轉吓啦. …Read More

每次想食一頓好嘅刺身 lunch 就會諗起尚善. 雖然佢哋嘅 set lunch 定價唔平 (我覺得), 但知道其實餐廳扣除成本開支後會全數撥款協助有語言障礙嘅小朋友, 都算曲線做善事, 所以間中去吓都唔錯. 餐廳位於上環區, 因附近多商廈寫字樓, 所以星期一至五嘅 lunch time 都好爆(滿), 如果想食都係預早訂定位好. 話到明想食刺身, 所以諗都唔諗就 order 咗 刺身定食 $280, 友人就 order 咗 香蔥吞拿魚腩飯定食 $210.刺身定食共有7款刺身, 由師傅發辨. 刺身好新鮮, 切得又厚, 所以每一啖都食到鮮味. 基本上刺身只要新鮮就好食. 不得不提佢哋嘅山葵, 係用磨嘅而唔係用普通嘅膏, 用山葵蓉配刺身鮮味好多, 好食好多. 定食跟有白飯, 味增湯, 蒸蛋, 沙律, 醃菜及煮物, 非常豐富, 味道都好但唔算特別, 所以唔多作介紹. 至於 香蔥吞拿魚腩飯定食, 吞拿魚腩剁到好滑, 份量又多, 差啲蔥吞拿仲多過飯. 將蔥, 吞拿, 飯一齊放入口, 又軟, 又辛, 又滑. 餐後喝一口咖啡, 嚐一小件和果子甜品, 超滿足. …Read More

每次到澳門旅遊, 覺得至少要有一餐食葡國菜先算係去過澳門. 因為想試多啲唔同嘅餐廳, 所以就揀咗從未試過嘅澳門陸軍俱樂部. Since 1870 嘅澳門陸軍俱樂部本為私人會所, 及後為推廣葡國傳統文化, 部份設施如餐廳等對公眾開放, 所以就算係遊客, 現在都可以於俱樂部內食到正宗嘅葡國菜. 俱樂部外觀設計呈歐陸風, 粉紅色牆磚配白色圓柱, 優雅浪漫, 但進入餐廳後又發現用色以紅白為主, 木製桌椅, 地板與吊風扇, 情調懷舊, 低調又艷麗. 封面很華麗嘅餐牌 餐前的麵包, 如果唔係麵包比較乾同凍, 擦上牛油, 橄欖油 & 橄欖蓉, 應該唔錯. 左:芒果汁, 右:木爪汁 $30 (1杯) 完全無添加, 純果汁, 好飲 傳統葡國青菜湯 $43一見到'傳統葡國'幾個字, 即視之為首選, 而且之前未試過, 所以點嚟試試. 上湯方式都係先將有材料嘅碟放喺客人面前, 跟住再倒入熱湯. 少少爽口嘅菜葉, 加上少少鹹, 切細粒嘅葡國腸, 配上好熱嘅著仔湯, 幾好味. 莞茜豬耳沙律 $58 豬耳爽得嚟唔硬且軟, 豬耳肉煙煙靱靱, 配上黑椒, 欖油, 與莞茜同食, 又香又好食. 炸馬介休球 伴眉豆沙律 $66 馬介休球炸得香脆又唔油, 魚味很香魚又夠多, 唔會薯仔多過魚, 好味. 眉豆沙律啉啉哋都幾好食, 可以減少炸嘢嘅熱氣感, 但屬可有可無. 葡式蒜蓉炒蜆 $98 蒜蓉香但味比較淡, 一般咗少少. 葡式蔬菜 $98 以為係普通一碟嘅焗蔬菜或炒蔬菜, 冇諗過賣相咁特別, 好靚, 好意外. :) 蔬菜好甜, 好爽口. 因為蔬菜多種類又切到細細段, 口感好豐富. 烤八爪魚 伴欖油薯仔 $268 一般叫 main 都係豬牛羊雞鴨鵝魚蝦蟹得等, 見到有烤八爪魚咁得意決定一試. 最初朋友係反對的, 驚唔飽, 但上菜後再冇擔心. 2 條八爪魚腳超巨型但非常啉, 一啲都唔靱, 好易咬開之餘又入味. 除咗八爪魚, 伴菜嘅菜心同薯仔都非常好味. 縱然今次冇試到甜品, 期望下次 encore 時有機會再試. …Read More

由2014年開始躍升成為澳門米芝蓮三星, 長期打入澳門開飯排行榜頭幾名位置, 8 嘅實力當然無可置疑. 喜歡去 8 係因為環境同食物質素都好高, 到現時為止, 8 係每次到澳門時必到嘅餐廳.以中菜廳嚟講, 8 嘅座位唔算多, 但就算座位唔多, 枱與枱都有適當嘅距離, 坐得舒適之餘, 亦沒有一般中式餐廳嘅喧鬧嘈吵. 這一點好奇怪, 唔知係咪好彩, 一般嚟講, 中式餐廳係會比較熱鬧同嘈吵, 但每次去 8 都唔會有咁嘅情況, 所以係其中一個鍾意去嘅原因. 服務當然唔駛講啦, 咁樣級數嘅餐廳係唔會有人對你視而不見, 避開為你服務的. 相反, 就算佢哋好忙, 都會 keep 住禮貌同笑容為你服務的. 雖然價格同之前比有所調整及提升, 但與香港同級數&同質素嘅相比, 依然覺得物有所值. 因為當日想食點心多啲, 所以冇叫小菜. 未上點心/菜前, 餐廳會送上餐前小食 : 前 - 黑豚肉粒盞, 後 - 柚子鮑魚 啲肉切到咁細粒, 係咪黑豚就食唔出啦, 不過連同個脆盞一齊啪, 脆脆嘅口感, 都幾好食. 至於柚子鮑魚, 細細隻, 但連同底下個層柚子啫喱一齊放入口咬, 陣柚子味好香, 又甜, 又好咬, 得一隻真係唔夠. 藍天使蝦金魚餃 $72金魚造型好得意, 藍天使蝦好爽甜, 成隻餃都係蝦, 啖啖蝦肉好滿足. 脆香叉燒包   $48 強推 ! 真係好好食, 食咗N次都冇次失手. 脆香即係煎, 煎叉燒包. 第一次食時真係諗都冇諗過咩係煎叉燒包. 其實叉燒包係可愛小箭豬造型, 但因相片數量所限, 同應該其他食家可能都有箭豬叉燒包相, 所以決定剩係比個底大家睇. 叉燒包底煎得金黃香脆又唔油, 底脆之餘個面依然 keep 住軟墊, + 上熱熱哋嘅叉燒餡, 真係好味到試過一次自己'隊'哂一碟(3隻). 日本青瓜漬叉燒腸 (星期一至五供應) $60 '漬' 即醃製嘅意思, 可用醋, 鹽或米糠等等. 青瓜漬即係醃青瓜, 配上叉燒做成叉燒腸, 少少鹹鹹的, 比平時嘅叉燒腸少咗啲啲肥膩感, 都幾有趣. 薯蓉蟹餅琵琶蝦 $60 將薯蓉, 蟹肉同少少西芹撈埋, 再 + 成隻蝦一齊煎. 蝦味比其它2種材料重, 口感豐富, 又係啖啖肉之選. 瑤柱蒸魚形蘿蔔糕 $48造型為主, 味道就係一般瑤臘味蘿蔔糕味, 不過不失, 但同其它點心比就普通咗. 龍蝦小龍包 $108 餐廳職員推介. 味道與想像不同, 龍蝦肉夠爽但唔夠鮮甜, 龍蝦肉味亦唔強, 只算 ok 好味, 及一試無妨. 原隻乳豬焗飯(半隻) $340 (需預訂) 相中嘅乳豬焗飯係切件後嘅樣. 乳豬燒得皮脆肉嫩, 配上醬油臘味飯同焗, 飯吸收咗豬嘅肉味, 豬又吸收返臘味嘅香味, 兩者同吃, 又香, 又脆, 又軟, 又惹味. 唯一美中不足嘅地方係啲飯唔夠熱, 如果啲飯可以再熱啲會更 + 好食. 燕液蛋白杏仁茶 $60 就算食到幾飽都好, 點都一定會叫埋個杏仁茶食. 杏仁茶香滑得嚟唔太甜, 杏仁味濃, 燕液份量都唔算少. 黑白芝麻布甸配芝麻雪糕 $60 布甸又香又滑 : 白芝麻布甸比較滑, 但芝麻味冇咁重 ; 黑芝麻布甸芝麻味香, 但冇咁滑, 兩者擺埋一齊, 就又香又滑. 至於芝麻雪糕, 雪糕面上 + 咗好多黑芝麻粒, 連埋超脆餅底一齊食, 又凍, 又脆, 好有咬口. 就算唔叫甜品都唔緊要, 餐後, 餐廳會送上餐後甜品 奶茶及燕液椰果杏汁糕奶茶超甜但茶味好濃, 感覺似係拉茶, 燕液椰果杏汁糕造型漂亮, 花朵上鋪上金箔同燕液, wow ! 好矜貴呀 ! 齋睇未食都覺得靚咗 ...  (講笑) 杏汁糕杏汁味淡淡的, + 上煙煙靱靱嘅椰果同滑嘟嘟嘅燕液, 甜甜的, 為美味嘅一餐畫上完滿嘅句號. 一邊打食評, 已經一邊諗緊下次食咩好 ... …Read More

隨著澳門嘅開放與發展, 澳門嘅餐飲業都變得多樣化同高水準. 除咗豬扒包, 葡撻等當地特式小色, 星級 fine dining 嘅餐廳亦不少, 御膳房就係其中之一. 寫啲篇食評嘅時候真係好苦惱, 因為個腦剩係諗到啲幾個形容詞:好味呀!好味呀!, 好靚呀!好靚呀! 等 ...  其實一直唔明點解御膳房只得一星 , 因為論食物質素, 賣相, 環境, 價錢, 性價比都好高, 可以話一星嘅價錢, 三星嘅享受. 先講環境, 餐廳環境同氣氛非常舒適寧靜但又唔會令人覺得拘謹, 樓底好高, 每枱都有足夠距離, 食客都好有 manner, 唔會大聲高談闊論, 可以好舒適遊閒咁享受一個 lunch. 價錢方面, 可選 3, 4 或 5 個 course 嘅 set lunch : 3 course $348, 4 course $428, 5 course $498 (未計加一). 每次都好爭扎要 4 定 5 嘅 course 但每次都忍唔住會叫 5 個 course set lunch. 未上餐之前, 先奉上一籃麵包籃, 麵包有分軟包同硬包, 可添加. 因為要留肚, 所以只係食咗罌粟籽軟包. 麵包香軟, 混和罌粟籽一粒粒脆脆的口感, 好味. 餐廳送的餐前小食, 慕絲好似話係用椰菜花打成的, 配上切到好細好細粒嘅雞肉同青瓜, 好清新. 前菜 : 法國頂級三文魚配香草汁餐廳職員推介嘅前菜. 據稱佢哋係選取法國當地水質清澈嘅野生三文魚作為食材, 用低溫慢煮嘅方法嚟煮.果然, 魚肉保持鮮嫩, 就算煮過都好似刺身咁滑, 入口即溶又唔腥, 配上香草汁, 3 件真係唔夠, 立即開胃. 湯 : 香草蟹肉粟米湯餐廳職員會先將有蟹肉及粟米等材料嘅碗放喺你面前, 跟住再倒入熱湯. 現在係粟米收成嘅好時節, 粟米又大又香又甜. 將粟米打蓉做成湯, 粟米味非常之香濃, 湯身幼滑, 配上蟹肉嘅鮮甜及原粒粟米嘅咬口, 清甜味鮮.  海鮮 : 燒焗龍蝦配野菌伴咖哩汁龍蝦煮得彈牙爽口, 與野菌嘅質感非常夾. 雖然係配咖哩汁, 但咖哩汁打成泡沫, 一啲都唔辣, 只係有淡淡嘅咖哩香味, 溶合著野菌獨有嘅菇味, 再加上龍蝦嘅海鮮甜味, 口感層次豐富. 肉類 : 法國鵪鶉配茄子蓉及橄欖油上菜嘅時候嚇一跳之餘亦非常驚喜. 我等平凡之輩只會諗到鵪鶉係斬件隻上, 最多係斬得細件啲, 但點都連骨, 食嘅時候未免狼狽. 但上菜時見到鵪鶉已經去骨, 圓柱形2粒肉好得意, 唔話你知你都估唔到係鵪鶉. 鵪鶉去骨起肉, 將肝臟等內臟鑲入肉中, 再卷起慢煮, 令鵪鶉肉保持嫩滑. 因為鵪鶉肉鑲有內臟, 所以令肉味提升, 但味道濃而不羶. 配搭方面亦見心思; 茄子蓉同茄子片, 鵪鶉同鵪鶉蛋. 茄子蓉有很重茄子味等就不多說了, 但將鵪鶉蛋黃混和與蛋下的青紅椒蓉同食, 就好他他 feel. 甜品 : 法國櫻桃配朱古力慕絲及可可雪芭 法國櫻桃香甜, 朱古力慕絲幼滑等不多說了, 最想講係可可雪芭. 一般食雪芭都係生果味如青檸, 野莓等, 可可雪芭真係好少食, 一食, 嘩, 估唔到咁好食, 可可雪芭都可以咁 fresh, 朱古力味濃得嚟唔太甜, 睇落唔覺咁凍, 但放入口就覺的好夠凍, 正 ! 餐飲 : Ice Lemon Tea, 附送 : Macaron個 Macaron 好煙靱, 好好食. 餐廳送的小甜品莓味啫喱糖, 熱情果味泡芙都好好味, 最好味係焦糖爆谷朱古力小蛋糕, 朱古力小蛋糕超軟熟, 焦糖爆谷好脆, 整粒啪入口先咬, 又脆又軟, 非常好食. 就係咁, 食吓, 傾吓, 影吓, 好快, 就享受完一個舒適, 休閒, 愉快的摘星午餐. …Read More

某天, 於友人堅持晚餐要食秦國菜(泰國菜)嘅情況底下, 結果去咗曼谷泰菜. 雖然曼谷泰菜好似係好多地區都有分店, 但就從來都未試過. 未食之前覺得應該都係集團式味道; 即唔會太難食但又唔會好好食. 完全冇期望, 但就係咁, 反而有意外 ... 意外地覺得好食囉.   店舖坐位唔算好多, 分店內及開揚區. 近門口開揚區的特式小枱, 須然有少少頂腳, 但幾有泰國 feel. 泰式海南雞飯 $76平時食雞都會去皮, 但今次都忍唔住, 要連皮食. 可能好彩係雞脾位, 所以雞肉嫩滑唔'鞋'. 雞已去骨, 所以可以大啖大啖食. 油飯真係食到雞油味, 又夠軟熟, 加上個海南雞汁, 酸酸辣辣, 勁開胃, 清哂碟海南雞飯真係冇難度. 隨飯附上的冬瓜湯都好好味. 串燒沙嗲半打(三雞三牛) $78 沙嗲半打可選雞,牛或豬, 但最多只可揀2款. 好多時食沙嗲牛串燒, 都係食師傅刀功 -- 啲牛肉切到有咁簿得咁簿, 但又唔就返燒嘅時間燒到乾哂. 不過今次咬落件串燒牛嘅時候嚇咗一跳 : 嘩 ! 好似食緊簿牛扒咁. 佢嘅厚道分分鐘有可能厚過早餐食嘅超簿牛扒. 可能大家覺得誇張, 但用串燒計, 算幾厚喇. 不過厚唔=好食, 如果燒得'鞋', 成尺厚都冇用, 今次嘅串燒牛雖然未至於 juicy, 但起碼夠啉, 唔'鞋'又唔靱. 串燒雞方面, 雖然冇牛咁震撼, 但都算軟熟唔'鞋', 仲有陣微焦香味. 泰式炸雞翼 $56 雞翼炸得乾身又脆, 炸粉唔厚, 感覺好似炸牛油雞翼. 經過今次'意外'之後, 已經諗緊幾時再'意外'多次... …Read More

平時去太平館多數係晚餐時間, 好少會午飯時間去. 今次就因為喺午餐時間去, 所以試到啲平時好少會 order 嘅嘢. 去太平館嘅話, 多數會叫冇得輸嘅瑞士汁雞翼, 瑞士汁炒牛河等, 但今次決定試啲比較少會係晚餐主餐牌上會叫嘅嘢食, 結果主食方面揀咗烚鹹牛脷飯同咖哩蝦球意粉(可選飯或意粉). Lunch set 除主食外, 仲有湯(羅宋湯或粟米忌廉湯)或鮮蔬沙律, 及餐飲. 隨餐湯附上的甜餐包, 餐包微熱, 塗上牛油後食, 回憶中的味道. 羅宋湯, 微酸, 微辣, 好惹味開胃, 湯身稀杰適中, 蔬菜煲到好軟, 好味. 咖哩比想像中同睇到嘅辣, 咖哩味香濃, 蝦球係炸過嘅, 但當然唔係即叫即炸, 所以係啉的, 但都 ok. 薯仔係用焗薯嘅薯仔, 口感係黏而唔係粉, 同咖哩好夾.烚鹹牛脷係第一次食, 賣相很清, 碟餸一上枱你會有少少心裡一沉 feel, 諗緊大鑊, 會唔會同白烚冇分別? 但當你咬第一啖時, 雙眼就會碌大 ... e ... 好味喎, 鹽醃嘅鹹味啱啱好, 牛脷又夠厚切, 啖啖肉, 鹹得嚟感覺又好清, 用嚟送飯都唔會因為冇汁而覺得 dry, 真係驚喜嘅新發現. 餐飲不是太平館嘅賣點, 凍咖啡凍檸茶不過不失啦.好有 feel 嘅舊相, 低調地提提你餐廳嘅實力.雖然, 好味嘅程度有別於餐廳出名嘅大熱菜式, 但有時, 就算幫襯同一間餐廳, 都要跳出匡匡, 試多啲餐廳嘅其它菜色, 咁先可以了解多啲餐廳嘅'食力'. …Read More

在各大報章雜誌, 電視台, 網上, 面書等的洗版式報導後, 已十分期待 BAKE 嘅開張. BAKE 係由北海道札幌市洋菓子老店 KINOTOYA 所開設的芝士撻專門店, 為慶祝香港新店開張, 會於開業初期 (28/8/15 - 4/9/15) 推出買五送一優惠, 嘩, 咁 so, 梗係要嗱嗱聲去試啦.  一開始都有心理準備會有超長人龍, 果然不出所料, 早上 11:30 到達時已經有一條長人龍在恭候, 人龍須長, 但大家都好守秩序. 須然芝士撻每日限售 3,000 件, 但也規定每人限售 6 件. 這個規定好好, 可讓更多的人買到芝士撻, 而唔會只讓一少部份的人大量購買, 令其他人少咗/冇咗機會買. 大約在差不多兩小時後, 我終於買到了一盒期待已久的人氣芝士撻.    特別設計的盒子; 盒係長方形唔係正方形, 分兩層放, 一個個芝士撻獨立放好, 唔會容易撞散一堆, 就算攞住行街, 都唔難拎. 隋盒附上的小咭, 建議芝士撻的不同食法BAKE 建議嘅 4 種食法全部都試哂 : 出爐嘅時候食, 當然係最好味啦. 知道介紹話軟心芝士餡料係由三種芝士配搭而成 : 包括北海道函館產輕味芝士, 別海產濃味芝士及法國產鹽味忌廉芝士, 可惜本人味覺冇咁敏銳, 分得出三種芝士層次, 只能表達咬落去時, 芝士撻芝心微流, 聞到同食到好香甜嘅芝士味, 芝士味唔會過於濃烈, 輕輕的, 唔會有'溜'嘅感覺. 撻皮鬆脆之餘, 又有淡淡嘅牛油香味, 據稱係由於用上"二重燒製法", 先燒脆牛油曲奇餅底, 之後才加入芝士慕絲, 掃上蛋漿再焗之固. 這個做法令芝士撻真的底脆面軟又唔'溜', 一次過啪多幾個都冇問題. 雪凍食, 同放冰格冷藏後食分別唔係好大, 因為芝士慕絲雪實咗, 口感就如介紹般似食芝士蛋糕, 芝士慕絲很滑, 但芝士味同芝士香味都減少咗, 撻皮亦冇咁脆, 但當芝士雪糕食嘅話, 啪幾個都唔係問題. 用多士焗爐加熱後, 撻皮回復香脆, 但脆嘅感覺又有別於剛出爐嘅脆, 因為始終雪過, 撻皮會乾身少少, 所以佢嘅脆屬乾脆, 更為脆身, 至於芝士慕絲, 加熱後個面會微焦, 內裹何只流心, 簡直全溶化, 情況就像吃小籠包咬開皮後湯汁流出嘅情況一樣, 一咬, 芝士慕絲流入口中, 芝士味, 芝士香味再次湧現. 不過熱食, 比凍食和出爐食多少少飽肚感, 啪唔到太多個. 未親身試過都唔信 BAKE 嘅芝士撻有幾捧,點解可以一次過啪幾個, 試過之後真係唔想講, 只想食. 如果不用排隊的話, 可以講係值得一食再食, 但如果真係,硬係,要給一個排隊時間嘅話, 我希望會係 0 ... 1 分鐘. …Read More