Jadec's Profile

份量細，食物一般，而且偏貴，出菜混亂，服務中下水平，每次有問題的回答=無答，只有一個後生嘅經理真係有常識。另外散叫不化算，如果中午食套餐會好些，因為發覺份量和散叫差別不大，但價錢差好遠，不知價錢是怎樣界定的。整體分數：6/10，僅僅合格而已。…Read More

見食評都唔錯就去試吓，叫了：蟹粉小籠包，腥的，皮厚；涼菜有素鵝，不過不失；海哲頭還可以，陳醋味突出；片皮鴨半隻，可食可唔食，沒有驚喜；雲吞雞鮑翅，$798，二至四位用，味道非常普通，啲翅碎到無朋友，收咁嘅價錢唔值；黑豚肉蒸蟹，蟹肉唔夠爽滑鮮甜肥美，所以肉餅索唔到蟹既鮮味，失敗；鹹肉津白最正常；最後亦係最最最失敗既高力豆沙，個皮好似食麵包咁厚咁硬，救命！4個人食咗$2500人手唔夠，上菜速度太快，侍應無表情好耐無寫食評了，但不吐不快…Read More

很久沒有寫食評。這店初開業時已經來過一次，那次服務和食物沒有令我留下深刻印象，以為初開業有待改善。隔了兩年再來午餐，真的不能不說失望，點了海鰻天婦羅，所有前菜味道普通到不能再普通，湯：好腥、主菜：南瓜和茄子各一小片，好大塊海鰻但好腥，飯是珍珠米但份量很少，我食完好快肚餓。食評仲信吾信得過？…Read More

因為有親戚由外國來港，一早已經訂了檯吃片皮鴨，當中有第一次來港的外國人和老人家。坐了十多小時飛機，只想安排一頓好吃的晚飯，但這裡安排超差，現場環境非常混亂，交唔到檯就一早講啦，淨係話埋緊單，下張就有，等了又等，等了半小時有多，埋單埋咁耐?最後決定走人。做唔到就唔好收訂檯啦，呢啲都係大部份酒樓的通病，幾時改下呀？唔該…Read More

午飯時間一個人行行下行到擺花街，經過呢間都幾多人推介主打牛湯既越南粉。舖面好細，大多數座位都是吧位，食物選擇非常之少，湯粉只有兩款﹝可選河粉或金邊粉﹞，而撈檬只得一款，小食就有兩三款。叫咗個生牛肉河﹝$78﹞，份量不是太多，牛肉只有4片，湯底好濃。整體只是中規中舉而已，各方面都未能令人有回味的感覺，試了一次便可以。唯一深印象的是有一個男職員，面穠穠非常惡，好趕客啊。…Read More

同朋友慶祝生日，一早BOOK了6:30pm，Confirm時話限食1.5小時。哇，心想咁爆，一定好好食啦又咁多個Like，點了：溫泉蛋蟹肉意粉味道正常，意粉有咬口，但咬落就有啲生麵粉嘅味道！芝麻糊點熱的，第一次拿出來係完全唔熱嘅但個碗就好熱，估到佢點樣番熱啲食物啦，收$38好大碗，但係大碗用咩用呢？稀流流又難食！黑松露墨魚汁雞飯超超超難食，又係唔熱嘅，件雞扒超大件，但就好大陣好大陣雪藏味，根本食唔落口，攪到啲飯都有陣雪味！唔明白點解咁多笑臉，以後都唔會相信，以後都唔會再來…Read More

真係樣樣都好難食，點了炸豬扒麵，豬扒有豬”SO”味，湯底又好咸，食咗幾啖已經食唔落。炸魷魚，炸粉一舊舊，魷魚有陣味又好靭，試咗兩舊已經食唔到。杯珍珠奶茶仲難飲，吐都吐唔切。整體完全唔可以接受，請做一間良心食店吧！…Read More

今日心血來潮想食天婦羅，天秀食過3次，但今次想快食所以就彭彭聲衝上去一宝，因中午只做walk-in，所以等了大概15分鐘。午餐只有數款選擇，但來到一宝當然是食天丼啦。前菜有沙律不過不失、蟹肉燉蛋都幾滑，另外杯綠茶好好飲。主角來了，不是用珍珠米而且份量較少，天婦羅有南瓜、茄子、秋葵、白魚、大蝦和流心蛋。樣樣食材都新鮮，略嫌粉漿過厚而且頗咸，食到三份一時外皮已經唔脆，流心蛋應該是處理過，所以蛋白部分比較靭。整體食物尚可，但個抽風系統真係要大大大大的改善，食咗45分鐘，濃濃既油煙味足足跟著我整個下午呢。…Read More

點咗個周月拉麵淡湯小油，有3小片豬腩肉，4條筍，半隻糖心蛋，好少好少蔥。個湯已經選淡味但係都好咸，而且都蓋過唔到拉麵既梘水味！D湯都算夠熱，但豬腩肉和蛋都是凍的，而且蔥花既份量比較吝嗇。整體是不合格的，不回再來。…Read More

已經很久很久沒有寫評語，因好多都不值一提，而且各人口味不同，你覺得好食唔代表其他人認同，我都試過去一些有好多笑臉的餐廳、酒樓，奈何期望越大失望越大，所以索性唔寫就無謂誤導人啦！但今日唔寫就不吐不快了！！ 我份人好中肯，一樂的燒鵝確實美味 (但曾經有段時間亦有失準!)，皮脆肉滑，外賣隔一段時間食個皮依然鬆脆。今日心血來潮又想食，佢細細盒賣$45，啱我胃口小的人。今日老闆娘收$48，我問係咪加咗價，佢竟然好大反應好惡咁話：「已過去既我唔知，我淨係知今日係48蚊，我唔會答你係唔係 (加價)，亦唔知點答你。」，我話可以好簡單直接答「係/ 唔係」，但係佢又重複之前佢一堆廢話都係堅持唔肯答。我覺得佢好攪笑又好可憐，依家個社會加價時常都發生好平常，好多大連鎖食店唔覺唔覺一年加咗幾次都過咗骨啦，但佢地加價加得咁鬼鼠又唔認是否心中有愧？定係加得唔夠多賺得唔夠多條氣唔順想保留再加既藉口？我發覺有好多食店自從取了咩星星之後就被名利沖昏頭腦，個個變到不可一世，好似唔憂做咁, 你去食到係你既榮幸, 不是它的光榮, 但作為一個消費者, 點解我要咁委屈比錢去睇佢地面色和受氣？！所以我亦從此絕跡依啲所謂或自以為的星星食店。故勿論依位惡老闆娘係點都好，我就知我唔會再幫襯，當然以佢既囂張態度唔志在少我一個食客仔，但我只是想吐一吐氣吧了！…Read More

有朋友推介這間餐廳，見食評又幾好，和honey偷得浮生半日閒，優閒地食個lunch獎勵下自己。Set Lunch：2 course $138，3 course $158，飲品另加$25，不算相宜。頭盤可選湯或其餘3款前菜。豬肉腸薯仔沙律：老實講對依個沙律有些失望，豬肉腸竟然切都碎哂，完全無咬口，薯仔沙律非常普通無驚喜。Egg Brandade：依個唔錯幾特別，唐心蛋下面係鱈魚蓉和一塊多士，未食過咁既配搭，味道清新。main course：Slow cook pigeon, pasta with black pepper sauce，以為慢煮既乳鴿啲肉會好淋，但又唔係喎，雖然外皮煎得香脆，但皮下脂肪較多，所以比較油膩；pasta係手製一粒粒的，用黑椒汁炒過，可能過咗火，有啲燒焦咗，整體都係較油膩。另一個main course選Rib Eyes with Fries要另加$70，塊肉眼扒都幾大塊，炭燒的，要medium rare是剛好不過火有肉汁，honey話塊扒100分，薯條是幼身的那種，較普通。甜品選Pink Tiramisu又另加$20，不是傳統的Tiramisu，有士多啤梨、呍呢拿和野莓雪糕、和有塊好脆好脆既餅，好似食士多啤梨新地咁，一試無妨，但要加錢就不用了﹝因為3 course 已多$20+$20，所以total加了$40﹞。除非想食一啲比較有特色既dish外，價錢較貴，到此一遊夠了。…Read More

聽講自從銅鑼灣開多間舖和熱潮過後，排隊的時間比之前縮短了許多，甚至有人話唔使排隊添。星期日差不多1點見有少少人龍，等了大概20分鐘入座﹝10分鐘在室外，10分鐘在室內﹞，等位期間已派紙點拉麵，可以配合個人口味分別選擇麵條的軟硬度、香油、辣醬及青蔥等等配搭，安排算有秩序不混亂。一入座放下order紙3分鐘左右拉麵已到，熱騰騰既湯底，合格！麵條我點了普通，個人口味而言，軟硬度適中，對辨。但係塊义燒就強差人意了，太薄唔似义燒還有些少豬膻味，差！食完後友人叫我一定要去看看個洗手間話好靚和個座廁好先進，看完後總結：食物和洗手間都係「不外如事」！…Read More

在中環這種飯店選擇不多，既然在此處開分店，當然要捧下場啦。生炒骨：甜酸度適中外脆內有肉汁，每一顆排骨都掛滿醬汁煎咸雞：香口惹味，雞皮煎得香脆，雞肉嫩滑仍保留肉汁，最正係煎過既蒜片脆脆的又唔太辛辣，但嫌雞件斬得太細腐乳雞煲：同事一早訂了，相比起咸雞這個就不夠入味，而且腐乳味也不太突出，只有咸味，個汁也太杰豬潤浸時菜：當日浸勝瓜，勝瓜有苦味，豬潤好明顯係想用熱湯浸熟使其嫩滑無渣，好可惜此處未能掌握火喉，而且豬潤切得太厚，大部豬潤都未能浸熟，番煮又太老，浪費了許多煎蓮藕餅：豬肉唔熟，調味太甜，蓮藕唔脆，非常失敗失敗之作有些菜跟灣仔店尚有距離，仍雖改進。…Read More

近期真係愛上韓國食品，可能疏菜和肉的比例疏菜較多，而且伴菜又有好多疏菜，泡菜既酵素對人體有益又有美容作用，真係食到停唔到口！見到有新開既韓國餐廳係公司附近當然要試下啦。環境比較迫，waitress係菲律賓人，廚師係韓國人，點了辣雞肉飯，啲飯係紅糙米飯，雞肉醃得幾入味，前菜就比較少，依度既疏菜和肉的比例就五五啦。同事點了牛肉拌飯，佢話味道都OK，但如果啲飯熱些會好啲喎，我就試了拌飯的辣椒醬，酸味較重，應該會好開胃，所以我同事不經不覺KO了一整碗拌飯了。論價錢和附近餐廳比較偏貴，服務平平，所以不用等位，偶爾一試也無妨。…Read More

雖然天氣炎熱，行到上SOHO都幾係嘢，但上到來又係另一番景象，出期地寧靜呢！:)鰻魚定食有鰻魚和蘆筍豬肉各2串，鰻魚肥美，蘆筍豬肉稍微乾了些，飯既份量比平時少了，好在反映後店員慷慨地為我們添加，麵豉湯沒有特別可以唔飲。中環區只為了這個$98元的鰻魚串燒定食還是值得再來的。…Read More