dorislly's Profile

一直都知道荃灣二陂坊三陂坊一帶勁多好食嘅餐廳。趁新年期間就同朋友去醉潮館摸住戰鬥碗底聚一聚！每一樣炸物小菜都想食，奈何兩個女人食唔到太多，極力克制下叫左口水雞、酸菜魚、乳鴿同一碟唔記得乜魚炒芥蘭。口水雞夠作為前菜開一開胃，再黎一盤超滑超厚魚肉嘅酸菜魚，真心未試過一間酸菜魚嘅魚肉係咁好食！又嫩滑又大件，每人食左十幾件都仲有魚，加上入面幼薯粉亦索晒d湯，大盤到兩個人都食唔完。最鐘意係乳鴿，個皮炸得極香口，好食過唔少酒樓，極推薦！下次再訪一定想叫多幾位朋友，叫多幾款小菜同炸野🙌🏼…Read More

睇戲前喺觀塘覓食，見到呢間零負評嘅清湯腩店於是就黎試一試佢。趕得切下午茶時段堂食，跟餐送飲品，凍飲加3蚊。可惜本日崩沙腩同坑腩沽清，就叫左個清湯腩（半肥瘦）雲吞河同腐乳通菜。不得不提個湯頭真係世界級！由新鮮牛腩同牛骨熬製而成，飲落好清！加少許辣椒油更加出色！幼河粉亦好夾個湯，唔會碎唔鞋口！牛腩可以叫肥/瘦/半肥瘦亦可以照顧個人喜好非常好👍🏻唯一個菜肉雲吞冇乜特別，下次可以唔使叫。整體都非常出色，湯連粉好快清晒！…Read More

2年前到訪過一次，之後一直念念不忘東歐餐廳，一直好想再去。難得正日拎咗一日假，早餐都冇食就黎東歐餐廳食平日限定嘅business lunch🙌🏼今次同男朋友叫左兩個set：招牌芝士焗牛脷+香燒豬肋骨。每個set都包左餐湯，是日沙律，主食同餐飲。真係超鐘意以紅菜頭為主嘅烏克蘭羅宋湯！唔會有一般紅菜湯嘅腥味，好好飲！ 而主菜芝士焗牛脷大大啖牛脷香軟好食；另外留意返business lunch嘅香燒豬肋骨係冇專人上菜嘅火燒效果，要火燒記得點正價主菜呀！但即使冇左呢個咗打卡able嘅效果，豬肋骨都係咁軟諗入味食到舔舔脷！唔好以為lunch set細份d唔夠食，係飽到捧住個肚離開架！最後仲送左兩個烏克蘭🇺🇦拼色口罩。希望大家盡快結束戴口罩嘅日子，下次再訪東歐唔洗坐低除口罩先食得野；更希望烏克蘭嘅人民可以唔使再受戰爭之苦，亂世中大家都要平平安安🙏…Read More

星期日特登搭車去牛頭角覓食，就係想試下呢個炒飯係咪真係咁好食。如果想食快餐嘅話就唔好嚟，因為佢真係即叫即炒，起碼等返20分鐘先有得食。叫左一個椒鹽豬扒炒飯+一個招牌蝦頭油炒飯，兩個人食都冇可能食得完，D炒飯份量超大！兩款炒飯都係粒粒分明，但聞落嘅香味同食落嘅味道都因為蝦頭油嘅香而完全唔同！兩款都勁正，各有千秋！同埋啲菜甫都好好食，加埋入炒飯一齊食係昇華咗！暫時真係食過最好味嘅炒飯！由於炒飯都比較濃味，配埋杯凍檸茶就一流！…Read More

知道呢間店係tonick有份投資嘅店都一直想拜會一下，可惜身邊唔算太多肯陪我食辣嘅朋友，又咁啱有同事食完話有得揀辣度好friendly，先終於的起心肝訂位拜會一下！2個人點左3樣菜式：酸菜魚、乾煸肥腸、炸饅頭。酸菜魚揀左中酸少辣，D寬薯粉好煙韌勁好食，魚嘅份量又勁多！炸饅頭必點因為架乾冰船真係好IGable👍🏻 但今晚最正嘅係乾煸肥腸，炸得夠香口，炒得夠惹味！大推！必點！下次決定叫多幾個fd子，配埋啤酒點多幾樣小菜會更開心！一定一定會encore!…Read More

平時冇咩事都懶得過海嘅我，一早聽聞銅鑼灣嘅Burgeroom好好食，而且食物份量都幾大，不過就一直懶去，係近年美麗華店開左，先至食有機會品嚐。呢度採取先去收銀櫃檯比錢落order，店員再送餐嘅制度。上次已經食過大啡菇沙津覺得個大啡菇烤得好出色，今次就將個大啡菇放入漢堡，叫左大烤菇芝士牛肉漢堡，另外配個普通田園沙津、芝士旋風薯條。所有食物依然係大大份，2個人share都夠晒食。沙津嘅source係酸酸地好開胃，材料亦夠新鮮。呢個旋風薯條4個人share都仲得，好大份，食極唔完，炸得夠脆夠乾身，唔會油膩。唯一係個芝士愈食愈咸，到最後都係食唔晒放棄左。主菜嘅大烤菇芝士牛肉漢堡包，成個包好高身，係冇可能一口咬晒所有材料。大啡菇依然烤得夠香夠juicy，而牛肉漢堡扒同樣滿溢肉汁。由於我唔習慣用刀叉優雅咁食漢堡包，於是一咬落去嘅時候，d汁漏晒出黎成手都係都幾狼狽，不過真心好好食! 自從食過一次呢度嘅漢堡包就番唔到轉頭，每隔一排都會黎，係令人一試愛上嘅美味!…Read More

位於金馬倫道嘅元朗冰室，主打厚切豬扒，食肉獸可能都會感興趣，行下行下唔知食乜好，就決定入去會一會傳說中嘅厚豬扒。2人同行，一人叫左一個餐。分別係Double厚豬扒飯同大雞脾配辛辣麵+蒜蓉多士。講番塊招牌厚豬扒先，的確係夠晒厚而且肉質又軟腍得黎唔會太淋或太韌，煎得又幾香口，確實唔錯嘅。不過配菜就hea d咁，同埋冇諗過係配鼓油汁，雖然都唔差嘅，但總覺得配番蒜蓉汁呀黑椒汁之類好食d。至於辛辣麵就普通辛辣麵，多士係淋嘅，而雞脾亦炸得唔乾身非常油，所以我成個皮起左冇食。價錢都係一般冰室價中規中矩，唔會因為開喺尖沙咀就貴左好多。不過真係除左塊招牌厚豬扒外，冇咩可取之處咁。…Read More

位於土瓜灣，並非連鎖經營嘅點心小店，僅此一間。每次經過都想幫襯，但都會被林林總總嘅食店吸引，而放棄呢間貌似走fusion路線嘅點心店。剛剛星期六心血來潮就拉埋男朋友去試下，2個人叫左6樣野。好就好在蝦餃同燒賣可以2粒或4粒咁叫，令我可以一嚐唔同點心嘅味道。小店面積唔大，有10張枱左右點心紙蝦餃入面好多蝦，夠晒足料，皮亦夠滑，唔錯。燒賣入面除左豬肉，蝦佔嘅比例更高，食到啖啖蝦肉，又係足料之選。推薦!好似話係必食嘅木魚花蘿蔔絲腸粉，又真係幾值得一試! 名不虛傳! 木魚絲嘅香味，加埋滑溜嘅腸粉皮，入面包住炸香嘅蘿蔔絲同蘿蔔，再淋少少鼓油上面吊一吊味，入口層次豐富亦香口，估唔到呢個組盒咁夾。再黎店舖推薦話係必食嘅吮吮包。其實就係放大左嘅小籠包，內外都有湯，所以比條飲管你飲咁。但當然個小籠包做到咁大，個皮都唔能夠做得太薄所以都有d厚。而皮入面嘅豬肉都幾多，不過我個人都係比較鐘意傳統小籠包多d，同埋飲管飲湯，好易燙到舌頭，一定要等涼左先入到口，但總係冇左小籠包食落口前吮湯嘅爽快感。最後就係間中轉款式嘅包點，今期有煎豬包，可選擇蒸或炸。而我咁鐘意食香脆野就緊係揀左炸啦! 外表真係好吸引好可愛，夠晒心思，大人細佬都會鐘意! 入面係奶黃餡料，如果可以做到流心就更加好味喇呢度冇加一又幾好，埋單只係100蚊。外賣仲有8折添，堂食期間眼見不少街坊都會買荷葉蒸飯番屋企食，隔離枱又食緊荷葉蒸飯，好似好受歡迎。下次一於試下呢個蒸飯就知龍與鳳!…Read More

以前去親九龍城就一定係食泰國菜，但其實呢度仲有好多好野食。今次同朋友約左喺城南道嘅一間Cafe晚餐，被佢嘅甜品吸引而黎。心大心細最後點左一個意粉Dinner Set同丹麥酥Pizza Set。荔枝綠茶 焦糖咖啡我點嘅C餐黑松露野菌意粉 ＄98跟set可選餐湯或沙津，我揀左當日嘅忌廉粟米湯，唔記得影相。講番意粉本身，初時以為係磨菇醬汁形式加埋黑松露嘅意粉，冇諗過係乾炒黑松露意粉，未試過咁食法，都我自己而言係幾新鮮。黑松露唔算多，所以味道唔係咁突出，但加埋野菌同炒得乾身嘅意粉麵條，總算香口。朋友點嘅夏威夷Pizza丹麥酥 ＄88其實就係丹麥酥上面加左菠蘿，煙肉同芝士，焗成香脆嘅口感，呢個係一流嘅配搭好好食。食得漏漏地嘅時候，再食一口伴碟嘅千島醬沙津中和番，就剛剛好喇。慢慢食下傾下就傾到人地關門本身仲因為甜品而黎，但最後食完意粉同丹麥酥已經覺得好飽，冇叫到甜品，朋友仲食剩半塊丹麥酥添。亦好彩冇叫2人餐，份量大到隔離枱2位女士係需要成大碟意粉打包走，但前菜嘅大啡菇望落個樣都幾好食，下次會叫位大食嘅朋友一齊去試! 或者4個人share再加小食拼盤都應該係唔錯嘅選擇。…Read More

Lunch Time偶爾都鐘意去鐵牛食台灣菜，同事例牌點招牌紅燒牛肉麵。而我每次都會點鹽酥雞滷肉便當或香酥排骨便當。招牌紅燒牛肉麵 ＄59湯底夠濃郁，牛肉夠入味夠軟腍，加上蔥花更提味，麵條軟硬適中，口感唔錯。鹽酥雞滷肉便當 ＄59可惜鹽酥雞唔夠脆，食起黎比較粉，扣分。好彩滷肉飯好惹味又唔會太咸，入面嘅滷肉亦肥瘦比例適中。飲品+$6揀左珍珠奶茶，同唔洗加錢嘅檸檬紅茶2個Lunch set加埋$121。當然冇喺台灣食台灣菜咁平，但香港黎講，已經係抵食，而質素亦都不錯嘅選擇。…Read More

趁住中秋節公司收早，聽聞附近呢間日本料理午市定食做緊買一送一，就決定同同事食個豐富午餐做節。店入面嘅裝潢清新優雅令人覺得好舒服，同時亦開始期待呢度嘅食物。由於當時已經接近下午2點，店內已經剩低幾枱客人，更可以寧靜咁享受午餐。同同事一人叫左一個$198嘅Lunch Set，分別係花木壽司(六點壽司、小卷、細烏冬)，同埋花木御膳(三點刺身六件、壽司三點、天婦羅野菜餅、細烏冬)。每個定食都包括左沙津、漬物、味噌湯及白飯。壽司嘅飯應該係加左赤醋調味變成啡色飯，更能帶出海鮮嘅鮮味。而所有刺身靜係睇個樣都知新鮮，果然入口感動，非常鮮甜味美! 個人最鐘意係帶子! 非常好味!而彈牙嘅烏冬，配合甜甜地夠晒濃味嘅鰹魚湯，間中咬一口炸得香脆嘅天婦羅野菜餅，再食一啖烏冬，令人忍唔住一口接一口好快就食晒。由於有午市買一送一優惠，埋單只係每人$119，但已經食到無論味覺定視覺都係最高享受嘅日本料理，Staff嘅服務亦非常細心，一餐飯嘅時間已經自動為我倒左好幾次茶，值得讚賞。即使優惠結束後，要我正價黎食都會再黎…Read More

Happy Friday 本身同朋友想去旺角食飯，但冇book位嘅情況下周圍都咁多人，真係等到9點都唔會食到，果斷決定轉場去九龍城食泰國菜! 去左朋友提議，位於城南道嘅【泰屋】，由富豪東方酒店巴士站行去都好易搵。2個人點左三樣野。是日推介嘅【咖哩海鮮包 $68 】法包上淋上香矛同九層塔味都幾濃嘅咖哩，入面有蝦、魷魚、九層塔同南瓜。其實個汁同配菜幾好食，但個包口感一般，本身上碟時已經唔脆，雖然混合咖哩汁食其實都會淋晒，或者另外叫一法焗脆左嘅法包/蒜蓉包點黎食會好d。【船河 ＄40】朋友大推呢個，但佢點錯左河粉，平時食開金邊粉會更好味。湯底微辣好濃郁，的確好食！ 而且好大碗！【椰菜苗炒豬頸肉 $98】同樣係朋友大推嘅菜式，蒜蓉上湯炒得幾惹味，豬頸肉亦好軟腍。一陣間就掃晒成碟。朋友事先有講明呢間野衛生情況一般，亦冇乜裝修，勝在抵食又好味！ 事實的確如此，食完就拿拿臨轉下場去食甜品，唔想再坐落去😂…Read More

Happy Friday喺尖沙咀食完晚飯，都只係9點左右，就梗係去食個甜品繼續傾計啦！諗起好耐之前食過Via Tokyo嘅外賣焙茶雪糕，心思思想再食就提議去呢間主打日本抹茶/焙茶雪糕嘅甜品店。星期五晚果然好多人，流住汗等左差不多30分鐘先有位，但店員叫號碼時極度細聲，明知門口企左成20幾人都冇向唔同方向確認，我同朋友完全聽唔到，差d錯過左號碼。呢度最低消費要一人一個甜品，所以我地一行4人就點左2個雪糕+2個刨冰。【白玉焙茶雪糕 $49】焙茶味有但唔係好濃郁，仲甜左少少，冇左之前食過果種驚喜嘅感覺，仲有D失望。雖然都夠滑，但越食越甜……而白玉係煙韌好食嘅。【黑芝麻雪糕 (杯裝) $37】呢個反而有驚喜，啖啖都充斥住非常濃郁嘅黑芝麻味！不過食到一半都幾膩，我諗配筒食會好D。【芒果草莓沙冰 $85】我自己最期待呢個刨冰，賣相真係好靚，顏色鮮豔奪目。紅色嘅士多啤梨汁加橙黃色嘅芒果汁，唔係假嘅人造果汁，而係真水果打出黎再淋上刨冰上面。當中亦加左唔少芒果粒同士多啤梨粒落去，芒果係甜嘅好食嘅，只可惜士多啤梨勁勁勁勁酸，每個人食完個反應都係眼耳口鼻拿埋一舊，酸到一D甜味都冇果下厲害……【宇治今時抹茶沙冰 $75】抹茶嘅苦澀好夠，食食下先發覺刨冰底部仲有紅豆，紅豆嘅甜味加抹茶永遠係黃金配搭，中和左抹茶苦澀味，但呢個刨冰嘅紅豆未免太少，好似尋寶咁。加上食到中途已經溶晒變左成碗水唔想再食落去…整體質素就不過不失，未必會想再黎食。…Read More

食過一次總會心思思想去食嘅譽麵坊自從上年男朋友帶我黎食過南乳雞球就深深中毒，每隔2，3個月都會黎一次。👇次次都係衝住呢個名物而黎，我點嘅【南乳雞球米線 $34】大大件炸雞件連埋雞皮，一碟有成4大件好抵食 ！成件雞半點油膩感都冇，炸漿亦做得好靚，加上廚房處理油溫處理得好，迫晒多餘油份出黎，脆口到一啖咬落去就會聽到清脆嘅聲音，但入面嘅雞肉依然好Juicy。點埋南乳醬汁食，令到炸雞嘅味道完全昇華去另一層次，正到不得了！米線就係普通一碗清湯米線加左蔥花同雪菜。👇男朋友點嘅【鼓油王中翼撈米線 $34】雞翼非常入味。只係因為點錯米線嘅關係，完全索唔到D鼓汁，覺得好水。見到隔離枱點左其他比較吸水嘅粉麵冇呢個情況，男朋友極度後悔點左米線😂整體都係好味，抵食，CP值高，會繼續幫襯！…Read More

位於觀塘地鐵站，步行2分鐘就到嘅距離，非常方便易搵。仲有個專屬嘅門口，沿住佈置得好靚嘅樓梯行上去就到，一D工廠feel到冇。亦因為係工廈，地方夠晒大，坐得好舒服，無論同朋友家人定男朋友黎食飯相信都好適合。為左答謝自己一星期工作加班嘅辛勞，同朋友2個人食好少少，一早喺openrice book左8點15分嘅時段送salad bar(惠顧滿$188 加一前)點完野食就即刻去拎沙津喇！因為9點沙津吧就停架喇。同朋友一人一盤，夾左好多蔬菜，仲有令人懷念嘅啫喱糖！朋友仲夾左D日式螺，我最後仲夾左D水果添正餐方面點左2個set同1個小食，可能Happy Friday胃口特別好。每個set都有嘅自家製餐包同2款餐湯選擇，同朋友都揀左【忌廉南瓜湯】，冇揀到羅宋湯。麵包好鬆軟暖暖地，加左牛油食好好味。而南瓜湯亦夠滑夠香濃。【泰式椰香辣椒炒青口】大大隻青口啖啖肉，配埋微辣嘅醬汁，好過癮，食完一隻又一隻，好快就食晒。【德國烤原隻豬手配薯角及黑椒汁 $186】個皮唔算烤得好脆，有少少可惜，所以切嘅時候有D難度。整體係好食嘅，入面嘅豬手肉亦好入味，夠軟腍，如果個皮脆番少少就perfect。薯角亦夠脆夠香口唔油膩。【香煎帶子黑松露雜菌意大利飯 $168】勁好食呢個意大利飯！！！碟上面有炸金菇、飛魚子、煎香嘅帶子、芝士粉同黑松露意大利飯。意大利飯嘅軟硬度剛剛好，撈埋咁多樣野一齊食，完全唔會覺得膩，口感非常豐富。同埋望落細細碟，其實食落都幾多，夠晒飽。餐飲只係簡單點左檸茶同檸水所以就冇特別影低。埋單500有找其實好抵食！份量夠，又好味，慢慢坐、慢慢傾、慢慢食，一定會再黎。…Read More