GourmetChats's Profile

又一城Muji晚餐麵豉雜菜湯 麵豉味濃有些微嘅蕃茄湯底味，鹹中帶甜味，雜菜款式多有海帶紅蘿蔔椰菜香菇，白蘿蔔立立雜雜乜都有啲，係屬於有啲誠意嘅餐湯。海鮮沙律頭盤蝦仁肉質脆嫩，但係食唔到蝦嘅海鮮味，粟米仔夠晒爽脆冇菜腥味，牛油果就比較淡口無味一般般，沙律油混合熱情果果汁味道清爽，而帶子夠新鮮但可惜冇海鮮味，有口感缺口味！青魚Mackerel 魚肉燒得香口，用甜豉油配搭柚子汁味道配合得好好，可惜魚肉較為乾身唔夠油份，青魚本身屬於皮韌肉粗，但係魚肉香味獨特好食口味強勁，魚皮又煙靭香口，甜豉油搭上柚子汁味道酸酸尾尾。秋葵有少少老身但係都夠外軟內脆，口感夠晒特別。香煎封門牛柳試食咗一舊牛柳，口感及味道一般，而且肉質嚡口兼overcooked ，下次可以唔洗再試。16穀米飯粒粒分明香味與飯味略為淡薄，但係口感非常之好，比日本白米更有口感。蒸餾咖啡Arabica coffee style微篋帶苦味，not my coffee❗️食店設計充滿日本及台灣文青氣息，簡單明亮，侍應勤力有禮貌，碗筷清潔乾淨，店舖內有好多靚仔靚女打卡食飯購物，食肆環境別樹一格。…Read More

蘿蔔爽茶座午市套餐牛油麵包三種唔同款式嘅麵包，第一隻夠煙靭，第二隻有蕃茄香味，最後一隻小豬仔就夠軟熟兼帶微微牛油酥香。至於塊麵包牛油係unsalted Butter，有淡淡牛油香酥，入口唔覺得肥膩。麵包有質感而且一啲都唔黐牙，好食過好多麵包名店。香煎花瓜Pan fried 花瓜質感非常軟糯，鵝肝入口油香四溢，用無花果與酸梅陳醋汁一齊，口感味道細緻特別，真係天作之合最佳拍檔，一啲都唔覺得有肥肥滯滯感覺，可惜花瓜烹煮有微微過咗火。煎鱈魚扒鱈魚上枱時已經香氣撲鼻，未開始進食已經被佢嘅香氣征服咗，色香味以[味]排第二，好耐都未曾有呢一種嘅感受。鱈魚肉嫩香滑精緻，用泰式醬汁帶微微酸辣伴碟，開胃醒神，烹調火候掌握到位，魚皮外脆魚肉內juicy。薯蓉牛油香酥味濃厚，而芒果伴菜則稍為嚡口，芒果青檸汁夾埋薯仔蓉口味夠清新，大廚用東南亞口味加法式烹調算係一個成功例子。海鹽焦糖咖啡真係香濃軟滑，焦糖味滿滿，海鹽更豐富咖啡濃郁香味，提升到另外一個更高層景界，千祈唔好錯過e杯咖啡呀！焗蛋糕啤梨雲呢拿雪糕雲呢拿雪糕軟滑偏甜，雲呢拿香味豐盈，啤梨軟甜帶水果清香味，同蛋糕一齊口感豐富，水準都OK。屬於豪華式露天Cafe設計，位置在商場大堂旁邊，枱凳寬闊座位舒服，侍應殷勤有禮貌，不過上菜時就欠缺高級餐廳應有嘅禮儀。價錢不便宜，但係享用到好好嘅食物，就當係獎賞自已一次啦！…Read More

沙田新城市廣場一人一鍋午餐壽喜燒牛肩胛火鍋壽喜燒汁夠甜兼帶淡淡木魚味道，而牛肩胛肉就嚡夾粗糙，不過牛肉味道濃郁，雖然嚡熠熠，好彩有蛋漿補救缺陷，幫助嘴巴與牛肉之間有較良好溝通，感覺牛肉配胡麻醬好味好多，有較佳層次香味，而柚子醋就開胃好食冇咁濟。牛肩胛用蕃茄湯煮味道都可以，但係壽喜燒汁更加適合做湯底。黑毛豬蕃茄湯鍋黑毛豬肉幼嫩，豬肉味道香滑，口感豐富肉香油脂又香，唔似美國佬牛肩胛皮粗肉韌，黑毛二師兄配蕃茄酸酸尾尾，非常之合襯，值得一食再食，更勝牛肩胛壽喜燒。而前菜菠菜麻醬太甜，味道牽強好一般。南瓜及蔬菜配壽喜燒食味可以，南瓜一煮好快就軟綿兼入口溶化。芋絲就煙煙韌韌要靠湯底增味，烏冬則OK不過唔夠軟韌一咬就斷。一人一鍋又係屬於大集團出品，價錢屬於有點貴，食物質素比較好而且又夠新鮮，食店裝修簡單日式年青化設計，餐具碗筷清潔乾淨，而店員有禮貌，非常勤快主動添加湯汁，午市特價餐都要收百多個大洋。…Read More

勁量級餐肉煎蛋出前一丁午餐肉軟腍充滿AI科技形態，口感有點似3D人工打印麵粉糰感覺。出前一丁煑得較為有點過火，口感軟腍，而湯汁同我屋企煮嘅出前一丁味道差少少，味道略為淡薄兼唔夠麻油香氣。太陽蛋不過不失算係有交代。咖啡帶些微酸澀味，咖啡香氣唔足夠，質地亦未夠滑溜，但係夠濃郁，水準勉勉強強。好耐冇試過街邊檔食早餐午餐，e家春天時間都可以，如果夏天就越食越出汗!雖然係街邊檔口，枱凳狹窄坐得有啲辛苦，地面不平枱與凳坐坐吓都識會自由行。碗筷都算清潔乾淨。茶檔屬於一家大細全包宴生意，別有一番地道情趣。…Read More

裕泰牛雜越南河牛雜河粉河粉幼身容入口，連五香牛雜汁一齊美味香滑。五香牛雜汁味厚帶清甜牛骨底味，再有神仙粉嘅配合，味道不同凡響。金錢肚有咬口未夠軟腍，草肚軟腍有香味好食，草肚真係比金錢肚更加濃陏味美。牛蒡味俗兼口感粗嚡，質素唔合標準。牛肺都夠軟腍，可惜缺乏牛味。肥牛腸香味四溢，又腍又香又好食。腐乳通菜通菜鮮嫩清爽，腐乳汁鹹味濃度調配啱啱好，簡簡單單通菜腐乳卻食味超凡，值得一食。檸檬茶檸檬夠多有茶色但茶味唔特出，水準一般。已經多次品嘗此店之食物，每次都有啲唔同，水準經常上上落落，今次牛雜及五香醬汁味道較淡，而且烹煮時間似乎未足夠，牛雜有咬口。粉麵店裝修傳統老積簡單，座位及空間非常狹窄，清潔程度一般，有待改善，店員及店主態度勤奮有禮貌。…Read More

深水埗咖喱咖喱牛腩燒烤餅晚餐前菜馬荳Fried waffler只得一小塊，薄餅夠薄又夠脆，不過就非常之鹹。烤餅香軟煙靭，唔點咖喱汁剩食烤餅都好好食。而主角咖喱有不少香料在內，味道有層次而口感較粗糙，比起平時食開加奶同埋椰油嘅南洋咖喱汁分別頗大。此深水埗咖喱微辣帶甜味，濃郁度數為中等，同埋烤餅一齊食口感較米飯更加優勝。薯仔同埋牛腩炆得夠腍夠入味，牛腩肉味加埋咖喱味道屬於可以接受，但係份量太過少，只有一粒薯仔再加多四粒牛腩，而可樂亦要另加十個大洋，價錢唔算抵食。餐廳門面及位置頗為不顯眼，裝修可以講話係超簡單，清潔衛生及侍應服務一般，欠缺個人特色！…Read More

牛雜魚餅豬紅撈麵豬紅有煙靭咬口，似係食雞紅嘅質地，平平無奇下次可以唔使再試。炸魚餅有鯪魚肉香味，魚餅軟韌有口感，味道調校得較為重手，不過幾好食。草肚軟腍味道可以有咬口，帶淡淡五香汁味道，而牛蒡軟腍恰到好處，牛蒡味香好食，肥牛腸味道非常淡薄而且韌度十足，牛肺則夠軟腍，可惜五香汁味又係淡薄咗。五香牛雜整體表現一般，牛雜味及五香醬料香味薄弱，而烹調及掌握軟腍度合格。豬油醬油撈粗麵濃郁惹味，雖然油膩但係絕對係天作之合，有機會下次要試吓佢地嘅油麵。而炸餃子則唔知係乜東東，但係餃子都夠薄脆。咖啡香味足夠兼味道濃厚，淡奶香滑咖啡帶微微苦澀，算係一杯較多誠意嘅咖啡。…Read More

沙田紅茶冰室紅酒燒汁鴛鴦扒午餐傳統茶餐廳格局，平價食材加上神奇嘅烹調補救，再嚟多轉花呢花綠裝修，做就出親民大眾化嘅高級茶餐廳。紅湯紅湯以羅宋湯為藍本但帶酸辣味，蔬菜份量與濃度有少少稀疏，餐湯以辣味為主角，肉味就太過輕飄飄，覺得傳統羅宋湯好飲好多。鴛鴦扒肉量足夠，二師兄雖然乾身兼身材淺薄，但係經過神奇粉粉處理後，入口非常鬆軟，蕃茄紅酒汁配上豬肉開胃易入口。炸雞扒則皮香肉軟腍，雖然肉味唔出眾，但係肉汁夠晒豐富補返數，雞扒醃漬味濃郁好食。意大利粉為幼身天使麵，烹調軟硬度掌握得啱啱好有口感，比一般餐廳更勝一籌。曲奇餅底蛋撻同場再加多個蛋撻做甜品，餅底薄夠鬆軟，嘴𥚃充滿牛油香酥味、唔知係咪有另外一款神奇粉粉橫行霸道，雞蛋香味感覺唔出，蛋撻口感及味道算OK啦！檸檬茶有茶味，紅茶味及檸檬份量足夠，屬於一杯有誠意嘅凍檸茶，可以一試咪走雞。餐廳裝修設計用料金光燦爛多樣化，款式較爺爺嫲嫲look，都算係另外一種表現。座位通道闊落，但係散客就要互相對住塊膠板開餐，雖然清潔衞生較好，開餐時就非常唔方便，店員有禮貌做事快手快腳勤力，親和與笑容有進步空間。…Read More

太子海記合桃方甜品綠豆沙芝麻糊綠豆沙芝麻糊甜味十分足夠，屬於傳統嘅味道及煮法，依家潮流興健康偏淡少甜，此店較為偏甜的一類。綠豆煑得夠晒時間起沙，如果加強黏稠濃度則更加完美，海帶嘅香氣及味道就啱啱好，綠豆沙有水準。綠豆沙芝麻糊兩溝之後味道及香氣唔係太過突出，可能係因為芝麻糊唔夠香，兼且唔夠幼滑，唔知係咪用攪拌機打芝麻，如果用磨機會有唔同嘅效果，芝麻糊會非常軟滑綿密細膩。小店裝修簡單清新明亮光猛，座位枱桌則較為逼夾，食完後不合適久留。碗碟匙羹清潔衛生合格，店員服務態度有禮貌。…Read More

劉興記生煎包晚飯套餐上海排骨菜飯菜飯唔油膩，軟熟口感啱啱好，少少碎菜夾埋米飯配合及味道冇特別驚喜，如果再多啲蔬菜或加少少雪裡紅會較好。豬扒夠鬆軟，炸䊢亦都厚實鬆化，唔會太油膩肥騰騰，肉質略為薄身兼且乾身。豬扒醃料汁液本身唔鹹，不過已經足夠掩蓋晒二師兄嘅味力，以炸豬扒質素嚟講算OK。生煎包生煎包賣相扁撻撻唔吸引，皮厚度都算合格，生煎包底部餡皮鬆化酥脆，唔係好似傳統生煎包模樣，湯汁上枱時冇穿漏，豬肉味唔係咁濃，一啖咬落去口感豐富。豆漿清淡黃豆味而且夠晒濃度味帶微甜，自己則喜歡飲開平時濃度較輕盈款豆漿。餐廳裝修簡陋，店員服務都算可以，衛生程度唔係太過理想，而且座位及枱凳距離非常迫喼，但係都有好多人排隊堂食同埋外賣。…Read More

Sensory Zero 午餐上月中去尖沙咀文化中心聽音樂，預好時間泊車後再去食飯，五點幾鐘餐廳仍然有午餐供應，一於齊齊叫午餐，可以慳返少少錢。南瓜湯清清南瓜味，較為粗糙唔夠creamy，味道及烹調簡單直接，冇乜花巧。慢煮鴨腿linguine Linguine軟硬度適中有口感，慢煮鴨腿味道濃郁，鴨皮無油膩嘅感覺，鴨腿絲肉質層次豐富，雖然係午餐嘅價錢但係份量足夠，汁液量適當味道較清淡，加埋洋蔥矮瓜蕃茄仔增添不少味道。和牛溫泉蛋飯牛肉味滿滿，肉質鮮嫩多汁好好食，和牛肉似用澳洲牛肉，醬汁另上可以任意隨便添加，配上溫泉蛋口味更加豐富無比，珍珠米晶瑩剔透粒粒分明，軟糯有口感。鰻魚滑蛋飯鰻魚飯擺砌精緻簡單，上枱已經香氣撲鼻，鰻魚肉味濃濃，燒汁滲入軟腍鰻魚肉口感十足，滑蛋軟滑好味，雞蛋與白飯夢幻相遇回味無窮。Americano咖啡咖啡濃郁味微酸，冇苦澀味道，屬於一杯有誠意嘅咖啡。Chocolate mocha 咖啡味道稍為淡薄，而朱古力CoCo味都未見突出，咖啡香氣味亦稍薄，CoCo香氣算係可以，屬於普通水準餐廳設計簡約，全開放式嘅擺設，中央有一張長長嘅豬肉枱，非常似我讀書嗰陣時開餐嘅大飯堂模樣。…Read More

味千拉麵 gopark滑蛋吉列豬扒飯蛋漿滑口軟嫩，略為有啲鹹。吉列豬扒肉質鬆軟帶淡淡豬肉味道，而炸漿脆口乾身少油膩。煎餃子豬肉餡料味濃少鹹，餡皮煙靭可惜煎煮未夠香口，配柚子汁酸酸甜甜好味算補返數。涼拌菜酸甜惹味，夠醒神開胃，份量略為太少。例湯欠缺誠意，似飲鹽水湯，下次可以唔使考慮。白飯味道濃郁有飯味，口感軟糯帶點點粟米味道，似乎係使用東北大米代替珍珠米。餐廳日式設計，簡潔明亮座位略為逼夾，碗筷杯碟自助形式，碗碟清潔乾淨。…Read More

iza’bis Semi-lunch buffet上月中陪老婆行街，有一張買一送一嘅特惠券就要到期，所以專登揸車去銅鑼灣食下午飯。之前都嚟過呢間餐廳食過幾次飯，雖然價錢唔算平，食物都算可以，而且仲有泊車優惠，可以慳埋泊車費。蘑菇忌廉湯有濃郁蘑菇味道兼入口夠creamy，做得幾好飲，只差蘑菇嘅香氣較為薄弱。火腿薯仔沙律薯蓉入口軟綿綿，火腿清淡少鹹，凍薯仔沙律口感特別可愛。雜菜果仁沙律果仁同乾果配搭恰當，新鮮蔬果爽脆，醬汁味帶微酸，配料配合恰到好處，好食兼口感十足。冷盤燒牛肉火腿雞肉燒牛肉質地OK，火腿同埋雞肉比較乾身，而西班牙火腿比較好，油脂軟滑香口而且唔係太鹹，可以食多幾片。House Wine 紅酒聞起木桶味重，厚重帶輕微果酸，酒味於口腔中亦較為長久，同芝士一齊更加合拍。豬扒Sausage炸薯條豬扒煎得好靚仔，唔會油膩肥騰騰，肉質略乾身嚡口，好彩仍然夠鬆軟，而豬肉味淡，應該係雪豬扒。配用燒汁可以彌補缺陷。Frankfurter香腸質素一般般，超級市場隨便可以買到。薯條用新鮮薯仔做，鬆化好食不過不失。黑松露蘑菇Risotto 黑松露香氣稍為淡薄，蘑菇味道亦淡淡，risotto夠Creamy。可惜飯粒煮得過腍過熟，無咗嗰種咬口嘅特色。薑汁豆腐花同場仲加演薑汁豆腐花，有豆味，薑汁味較淡而甜味重，豆腐花算滑口但有啲實淨。Latte咖啡咖啡香氣十足，而味道濃郁美味冇苦澀及酸，略爲少少嚡口，係一杯好有誠意嘅咖啡。餐廳擺位及空間寬敞，而餐具和環境乾淨清潔，侍應服務勤快有禮貌，但有一位較為木口木面。…Read More

潮州點心午餐星期日三人行去咗尖沙咀飲茶食午飯，都有好幾個月冇去過金燕島，所以特登去食潮州點心。潮州芋絲春卷春卷皮超薄好脆，但係有少少油沾唔夠乾身，春卷帶濃烈芋頭香氣，芋絲餡好鬆軟香口，比一般廣東春卷更加吸引。柱侯牛孖筋牛孖筋落紅辣椒吊味牛味道濃郁但唔咸，炆得夠腍口感軟腍癡牙，老人家好容易食得到。煎筍粿筍粒蝦米沙葛組合爽脆夠複雜，味道調校精緻好味，微微焦香帶淡淡筍味加上蝦米粒鮮味，味道e支班。鮮蝦煎水瓜烙餡料用鮮蝦花生韭菜再配水瓜絲口感特別，薯粉漿煙靭有咬口而且一啲都唔糊口，配料及煑法看似簡單，但好難整得好食，如果再煎多少少時間就更香口好味。潮州粉果外皮稍為厚大，蝦米筍粒花生用料配合恰當，味道稍為較淡，唔夠煎潮州筍粿香口好食。糯米卷外皮粉皮夠薄細緻，糯米入口煙煙韌韌略為過甜，外邊酒樓少見到可以嘗試當甜品。魚翅灌湯餃有得睇冇得食！四寶雞扎魚肚應該先用高湯餵煑濃郁鮮味超正，雞肉雞味稍淡但軟嫩多汁，而芋頭粉嫩兼吸收湯汁精華由配角變成女主角，雞扎滋味好食。…Read More

台北棧下午飯套餐擔擔牛肉麵寬粉絲牛腱肉質軟腍，配上湯汁一齊更添風味。湯汁濃郁帶沙茶醬及甜味，與一般傳統味道大不相同。而寬粉絲煙靭有咬口，口感豐富特出，配上脆朴朴烤乾過嘅蟲草花做法新穎，只係冇乜特別效果。沙茶豬軟骨豬軟骨烹煮得足夠軟腍，肉香骨軟層次複雜味濃郁，湯汁微甜有少少似糖醋骨味道，而沙茶味就未能品嘗得到，豬軟骨份量足夠，大大嚿質感夠晒實在，墊底芽菜增加層次感，同白飯一齊係天作之合。拌飯涼菜花生豆卜軟腍適合，食味稍淡還算可以。而蘿蔔涼菜充滿清香蘿蔔味道，但有少少鞋身。大米白飯烹煮程度恰當，欠缺米香飯味。流心滷水蛋賣相及顏色吸引，蛋黃黏糯蛋白軟滑，滷水汁冇蓋過雞蛋香味，做法簡單但好好食。例湯味濃，味道似有微微嘅當歸配料，例湯食味都算有啲誠意。栗子麻糬撻飯後再多加order一個甜品，麻糬撻用Cookies餅皮做外層及撻底，好似食cheese cake嘅口感，撻底牛油酥味重，栗子味太淡味道偏甜，有薄薄一層煙靭麻糬做底增加口感，屬於整色整水嘅甜品，但未夠精緻，同法式Mont Blanc 相差十二萬九千里!蜂蜜綠茶茶味稍薄帶淡淡蜂蜜甜味，味道平實。食肆裝修簡潔，設計款式新潮，採用不同顏色及燈飾傢俬配襯，整體雜亂無章。餐具碗筷清潔乾淨，碗碟款式比較雅致。而店員服務態度勤快有禮貌。可惜食客仍未完膳就開始收碗收筷子有待改善。…Read More