cdreamcdream's Profile

叫咗個蕃茄湯底$78，但真係除咗蕃茄乜都冇，人哋通常都有啲薯仔、洋蔥咁，蕃茄亦唔算多，目測應該一個蕃茄倒，同幾隻細細車厘茄，所以其實除咗咸味，都冇乜特別，有啲失望🤦🏻‍♀️上菜好慢，個鍋底上咗黎成10分鐘都未見肉黎。牛味冇想像中咁重，亦冇話特別鮮嫩，好普通，同放題食嗰啲差唔多，真係好失望。而且唔算大碟，四款牛$188，每隻款大概得十塊，但長度係平時放題嗰啲一半長。環境方面，因為冇直接抽煙，其實都幾煙霧彌漫，啲煙係咁飄過黎，都唔食得太舒服，好熱好煩，成日想撥走啲煙。預咗唔係食放題，所以諗住質素應該有返咁上下，但食物質素同放題差唔多，但貴放題好多，咁嘅食物價錢，咁唔舒適環境，性價比真係太差，所以應該唔會再有下一次。…Read More

門面好細唔多起眼，但係原來入到黎座位寬闊舒適，仲要有圓枱位，可大班朋友一齊黎，有BB車都唔緊要，都夠位放。星期日路過，一家入黎食，冇諗過仲有午餐，價錢好抵，都係五十幾蚊，仲送洛神花或青檸水。泰式金邊粉好好味，唔會太辣搶晒其他味，亦唔會甜到好漏，各種味道配合得好好，食材味出晒，自己手揸小小青檸汁，酸酸甜甜好開胃。值得推介！海南雞飯好清新，雞夠滑，黃飯好入味，粒粒米都包倒黃油，但成個飯唔油，雞味濃。正！泰式乾炒河都唔錯，好多料，但食到一半先記得影相。值得讚賞係老闆同員工好友善，好主動會問客人需要，如要唔要碗仔分、冷氣夠唔夠，好有禮。見隔離枱應該係常客，仲會主動打下招呼，好溫情，難得香港有咁好嘅服務態度。一定會再回頭，係一間可以encore嘅泰菜餐廳！…Read More

鋪頭細細，枱椅都比較少，1點幾黎到都坐滿。上菜速度比較慢，都等左10分鐘左右先有野上枱。餃子大細適中，我哋叫嘅係清湯雙拼韮菜同粟米芝士，味道都唔錯，唔會話好咸，應該冇落味精，芝士嗰隻就係冇拉絲，其實亦唔特別有芝士味，但整體味道都夾嘅。而韮菜都中規中矩，冇話好特別，但個皮係薄同滑，食落口感唔錯。個湯底略嫌普通，唔會想飲，米線都係正常發揮。 而個煎餃反而幾特別，皮好薄，但居然唔會穿，好厲害👍本來叫豆腐餃，但佢冇，唯有轉成豬肉，味道可以。…Read More

真係平到笑，$1塊薯餅，$2隻烚蛋，我都唔知佢點為本，啲包仲要$2-$5就有交易，真係返返咗去十幾廿年嘅消費水平。份量又大大份，黎食過兩三次，真係慳家又想健康最佳之選。味道好住家feel，冇味精感，好原味感覺，會覺得好健康。CP值超高，自己煮都未必可以用呢種價錢煮倒。雖然係長者經營，但又真係唔輸蝕，上菜速度冇其他茶餐廳快，但係都還可以接受，不過如果趕返工嘅就避開繁忙時間黎比較好，因為開飯時間會排長龍，可能都要等等。環境比較細，有啲單人位可能較窄，都有對座位，但係一家大細去嘅話，就可能要等等位，因為座位數量唔多。…Read More

食過碧海藍天分店嘅點心放題，覺得唔錯，又抵食，所以近近地就行黎呢間試下，點知好失望。一入到去，午市居然得幾枱有人坐，都覺得奇怪，入到黎就點野食，點知點完15分鐘都先上一碟一口豆腐上枱，食完再等15分鐘覺得唔對路，就寫多張加單，終於等咗35分鐘倒先開始有煎炸野，跟住等等等，先有蒸野食。上枱啲野食都熱嘅，但係個牛肉腸啲肉紅到好似冇整熟，老公冇睇食咗一半我先發現，之後就冇食到，建議都係叫叉燒腸穩陣啲。啲嘢食都幾麻麻，個菜苖餃個皮黏糊到夾唔倒，一夾就散晒，饀都唔結實，見倒都唔太開胃炸魷魚就粉多到太糊口，真係好麻麻不過蝦餃、燒賣就正常嘅，如果想返本就每人5籠蝦餃、燒賣應該都差唔多，但其他真係冇乜好食，真心唔會回頭註：收加一及茶錢$12/位…Read More

外面望落去好似好簡陋，但係又坐滿人，老公想食刨冰，見佢有，就入去試吓啦，座位方面係比較狹窄嘅， Menu都好似好少嘢食，但係價錢都好抵，所以決定一試。一上枱個剉冰真係驚喜，$45居然有咁大兜，分量十足，材料豐富，仲有薏米感覺好健康，啲冰唔係只係水整，應該係用咗煉奶水整，食落去會甜甜地，唔會食到尾冇味，加埋唔同配料，夏天食一流！值得推介！不過佢有人均消費$30 ，我哋兩個人，所以就嗌咗珍珠奶茶同埋鹽酥雞，個鹽酥雞好好食，脆卜卜，裏面又好Juice，唔會話好油膩，外脆內軟。珍珠奶茶就普普通通，$23都可以接受。價錢好抵，性價比高，又唔駛加一，佢仲有飯同蛋餅，下次可以再試。…Read More

星期日起咗身冇野做，同老公撐枱腳，去食個晏，去到時都唔多人，音樂都柔和，不過店內得一個人收銀同沖咖啡，都好忙，要自己去櫃位攞Menu，自己買嘢食，自己搵位，不過之後都會有人送野食黎，侍應哥哥都幾有禮貌。老公叫咗個炒蛋質感不錯，頗Juicy，入口香滑。香菇、香腸和豬肉味道還好，有水準。只係吐司面包太硬，影響整體感覺。我就叫咗個三文魚班尼迪，都係個包太硬，如果佢脆啲會好好多，三文魚同班尼迪都ok。價錢方面，Cafe黎講，都尚算合理嘅，如果去嘆同坐耐啲就呢個價位係可以接受，不過我哋純粹醫肚就覺得稍為貴小小，同假日冇set，要另叫野飲，野飲就都$50以上，所以都冇叫就走咗…Read More

中午經過，就入去醫下肚，三個人叫咗三樣野，兩碗13隻嘅大餛飩，一碗粟米，另一碗韮菜，仲有就係一個香菇飯連10隻小餛飩。每人再叫多咗三杯豆漿，好抵，$5杯，去7-11買水都唔得。先講下大餛飩，啲皮都幾滑，不過就上枱時有一兩隻穿咗，個涵跌咗出黎，味道都可以，值得一讚係粟米肉餛飩，佢啲粟米明顯唔係急凍粟米，食落係新鮮粟米嗰種有啲口感，亦唔係粒粒一樣，應該係自己從新鮮粟米拆出黎。不過料唔算多，一淡就冇晒啲涵。而小餛飩啲涵真係好細，一隻手指尾大小倒，不過皮都仲好滑，都好食嘅，但食完會有唔夠喉感覺。好彩佢套餐跟碗香菇飯，都可以頂下肚，但香菇飯其實冇乜味，飯又硬硬地，作為塞飽個肚都仲可以嘅。整體而言，不過不失，醫下肚仔冇所謂，但應該唔會好需要特登再試喇…Read More

點幾兩點，冇乜特別野做，想me time放空下，去下深水埗一帶Cafe食個晏，揀左素年因為想食下齋，去到都已經坐咗好多人，好彩最後一張枱有位，咁我就坐咗近門口位置，裡面都幾特別，有啲寄賣物品響一邊，中間就放左啲擺設，感覺都幾晒位，不過要營造Cafe氣氛又的確需要有空間感嘅。但係環境比較嘈，一來人多焗住左啲聲，二來背景嗰種hip hop歌，真係同Cafe嘅優閒格調好唔襯。叫咗個burger，連一杯玄米茶，杯茶真係見倒有渣架喎，感覺都幾落重料。個burger 份量都夠，塊漢堡係Impossible素肉，口感都唔錯，啲薯條比較特別，扭扭狀，點茄汁都好食。不過性價比就爭少少，一個咁餐成百幾二百蚊，但環境又嘈到唔會令人想坐耐啲，真係食完就想走。總體而言，素食有較創新做法都係少有嘅，食物味道其實冇乜驚喜，不過感覺都健康嘅，都值得有多啲呢種餐廳，不過價錢略嫌偏貴，環境有小小令人失望，同未去過嘅朋友一齊試下打卡十還可以，但係自己就應該唔會再回頭喇。…Read More

食完飯都仲想食啲野，就去搵下周圍有咩甜品食，咁啱下午茶時間，見倒之前有人食評爆醬西多士，就過黎試下。平日下午茶3點幾冇乜人，入黎大把位任坐，冇諗過鋪頭細細，啲位又唔會太窄喎，坐得都好舒服。叫左個爆醬阿華田西多士，上枱時feel倒熱，即整真係特別好食，西多上面有啲華田醬水，仲有啲華田粉響周圍，賣相都幾好。一切開就流落個西多裡面，都幾好食，華田又唔會太甜，口感唔漏。佢包一杯熱飲，飲埋杯野，超級大滿足！…Read More

天氣熱熱地，想食得冇咁heavy，又唔想食粥咁鬼熱，清淡啲就揀咗大家食，1點幾可能啲人已經食完飯，唔算多人，可以隨便揀位坐。叫左個八聚會，又唔錯喎，好多餸，芽菜超多，其他配菜都唔少，有八個餸都好抵食。湯底雖然係清湯，但又幾有味，唔淡亦唔會咸到一食就知係味精，食完都唔駛飲水，感覺都幾健康。我叫咗削麵，啲麵大概2cm闊，少少厚身但又唔會話好un身，都幾好食。不過加野飲就要俾$7，我冇加錢，食完出街買野飲。…Read More

響open rice度見倒咁多好評就黎試下啦，但去到億利大廈係連水牌都冇佢個名，打電話又冇人接，但一場黎到就照膽粗粗上咗4樓睇下先啦，點知真係有開門喎，就幫襯咗喇。入到一黎就會問你係咪工廠大廈員工，記得話自己係，佢根據私人條例係唔會fact check你係唔係，但你答唔係，佢就唔可以服務你，因為佢設響工廈，理應只服務工廈。入到去間鋪其實擺設好簡單，冇乜特別裝修，簡潔。係自己搵位同用QR code黎落單同俾錢。食物選擇方面唔多，其實就係吐司得雞同豬你揀，各有四種配塔，然後就係得一種肉燥飯，同幾種小食同三款糖水芋圓類甜品，野飲選擇都只得得3種，係烏龍可以揀凍熱。食物質素方面，招牌吐司情況，老實講，冇其他人講得咁驚艷，芝士好普通，冇乜好重芝士奶重味，反而俾啲酸酸甜甜嘅汁蓋過晒啲味道，但如果一心只係想食拉絲同流心嘅話都尚算合格嘅，係有小小拉絲，而隻蛋其實好細隻，流唔流心都冇乜分別。塊豬扒有兩塊，但都好薄，未到乾，但唔軟淋，其實咁細塊鞋唔鞋都唔會太覺。冬瓜茶普通啦，同平時手搖嘅差唔多。總結而言，以貴過一餐飯嘅價錢得兩塊方包夾住啲芝士、兩塊肉、一隻蛋，響呢區都算係貴貴地，性價比唔高，但攞黎朝下聖打卡，一次起兩次止，就都還可以嘅，但我就應該唔會再幫襯喇…Read More

熱食很豐富，味道亦很好，咖哩都有好幾種：牛油雞、雜菜、羊、魚，可以配薄餅或印度飯，鍾意食咖哩嘅人會覺得好好味！又唔太辣。另外亦有好多唔同國家美食，中、西、韓、日都有，當然少不了魚生，不過負責魚生嘅廚師係一位傷健人士，要用手指俾佢睇，我覺得咁幾好丫，傷健共融！飲品可以任飲，除果汁、咖啡，還有不同茶、柚子熱飲、薑茶等，仲要係人手即時調配。當日係老公生日，我仲問佢攞生日牌自己裝飾蛋糕。甜品也不少，朱古力有好幾種，我估如果單買酒店嘅手工朱古力，都應該唔平，記得食多幾粒。雪糕是Häagen-Dazs，有雪條和雪糕杯！正！…Read More

價錢合理，食物品質唔錯，熱食夠熱，午餐同下午茶仲可以加配唔同野，如小食或蛋糕。不過可以揀嘅野飲比較少選擇，但好就好在凍飲可以唔駛加錢。地點方便，附近有好多鋪頭，食完野可以行下街。鋪頭細細，但環境還可以，燈光較暗，枱間隔較密，有隔板。如果唔怕疫情，行過可以試一試！或者疫情關係啦，堂食都唔駛等位，即刻可以入去食，店員都好殷勤，雖然唔多店員，但服務有禮同快手。不過要留意，只收現金，冇電子付款方法，所以記得㩒定錢先好黎食，免得尷尬…Read More