菲比熊's Profile

12月29日, 喺聖誕節假期中, 晏晝落街睇下有乜好食, 我地成家都hea下hea下咁最好搵間野嘆下坐下, 呢間喺天后轉彎角嘅coffee shop, 除咗咖啡之外, 都有一d熱食set lunch好似漢堡包、crepe咁, 我都想飲杯咖啡, 所以就入咗去~::: Crepe with Truffle ::: $88估唔到一間小店都會有crepe食~ 呢個crepe份量唔算大, 不過中間嘅料都好豐富, 令到個crepe本身唔係好夠. 個餅有少少薄身, 香脆度都十分夠, 配上中間嘅白汁底好好食~ 白汁之中又菇同芝士咁厚度十足, 味道都幾濃郁, 可謂用料豐富~ 還有少量沙律菜伴碟refresh一下個口, 唔錯~在咖啡店唔飲一杯咖啡對唔住自己, 咖啡味聞落香濃但係入口唔算特別, 呢d地方我鐘意飲齋啡, 都好彩成杯都易入口同冇乜酸味~::: Cheese Burger ::: $78芝士漢堡份量有d似mini size嗰d, 睇埋個塊芝士漢堡扒, 直頭有d失望... 漢堡扒太薄冇口感, 芝士只係好似普通嗰d塊芝士, 又冇半溶唔漏. 再加埋生菜叫做夾硬堆厚個包... 要食漢堡包我地一定會揀對面, 好食好多.呢間coffee shop雖少, 但係咖啡豆嘅用料應該都幾靚, 飲杯咖啡都可, 不過熱食就可以有更好選擇~…Read More

12月21日, 平時在鰂魚涌都有食過呢一間叫坐忘嘅日式咖喱店, 人流多嘅原因其實食過都知道, 佢唔會係一d食炸豬扒或者一d比較多油嘅嘢, 佢嘅主打咖喱係以健康為主~ 咖喱唔會好重口味, 配以唔同嘅肉, 而特別係有大量蔬菜, 呢一樣就吸引咗好多OL, 鐘意食日式咖喱而又想食得健康, 加上又標榜冇味精~ 而近日喺天后又開咗一間分店, 我地今日都襯機食下~::: 豬頸肉咖喱飯 :::呢隻咖喱其實唔太辣, 所以嗜辣者可能唔會鐘意~ 不過就好家庭feel, 因為味道唔濃得嚟仲好好多菜. 菜類來說有西蘭花、脆玉瓜、蘿蔔同薯仔等, 真係平時喺街食飯都唔會叫咁多菜~ 豬頸肉份量自然唔夠菜多, 不過味道都幾唔錯, 又幾有肉味同有豬頸肉嘅彈牙感~ 而飯都唔係普通嘢, 有粟米粒喺入面, 真係健康得不得了~ 飯好好味撈埋咖喱就更惹味~::: 豬軟骨7小時定食 :::呢度嘅招牌菜之一，用足七個鐘去燉煮嘅豬軟骨軟淋入味，肉質堪稱入口即化，配料好豐富而且健康，有西蘭花、椰菜花、紅蘿蔔、翠玉瓜等等，加埋還有粟米粒嘅飯，有蔬菜有肉有纖維嘅飯，感覺就是健康～ 要爭一下佢哋嘅肉汁，濃郁得嚟唔會好油膩，撈飯食到停唔到口 ！一間十分親切嘅日式咖喱店, 冇味精又多菜食, 咖喱本身都十分惹味, 亦都有杯凍或熱茶, 食完都唔會好口渴, 真係唔怪之得咁多人食, 仲有好多喜歡健康餐又鐘意食咖喱嘅OL~ 真係排幾耐隊都值~…Read More

12月14日, 本身都已經少來到尖沙咀, 每來幾次, 可能相隔幾個月, 就會想來食一下峰壽司, 來懷緬一下以前去銅鑼灣排隊食峰迴轉壽司~ 現在雖然分店少了, 但食物都尚算保持水準, 所以我地都仲好鐘意食~::: 池魚 :::望落都幾新鮮幾有光澤, 肉質唔算太油潤, 不過都幾彈牙爽口~ ::: 挪威三文魚腩 :::雖然係推介, 不過見到佢連皮咁, 白色嘅筋過多, 味道唔係好鮮同埋筋過多, 有d韌...::: 千尋海老 :::個蝦係唔錯, 鮮甜得嚟亦都好彈牙~ 面頭嘅蟹籽有少少多餘, 唔多又唔係到味.::: 帶子 :::帶子依舊好好味, 佢未到特大帆立貝嘅級數不過都已經好大件~ 味道鮮甜亦都冇帶雪味, 好味~::: 北寄貝沙律軍艦 :::北寄貝沙律就十分之凍, 應該係啱啱喺雪櫃攞出來未解夠凍, 味道唔夠只係雪味... 食到少少酸味, 應該係沙律醬味.::: 長腳蟹碎軍艦 :::這個雖然都係推介, 不過好普通, 蟹肉真係好碎, 但係都只有成舊壽司嘅一半, 另一半就係塊青瓜... 蟹肉撈埋一大pat沙律醬都唔係好食得出肉味.::: 火炙蟹棒 :::蟹柳都係普通料, 唔會差得去邊, 都算係比較好食嘅一樣~::: 軟殼蟹卷 :::呢個軟殼蟹卷等咗差唔多10分鐘, 證明真係即叫即炸, 熱辣辣嘅軟殼蟹十分香脆, 加蟹籽脆卜卜十分配合, 呢個軟殼蟹卷保持得到水準~可能呢個時間冇乜人, 所以有d食材唔係即時有, 有少少食物保持水準不過有少少就失準咗... 不過咁, 我地次次嚟食都唔係太多客, 希望下次我地來佢仲在業啦~…Read More

11月30日, 呀菲生日~ 有呀比帶我去食好野! 去咗港島香格里拉大酒店嘅Lobster Bar嘆咗個Sparking Weekend Lunch~ 一踏進餐廳就已經被呢度高貴典雅嘅藍白色環境所吸引，由於我地帶住小朋友，餐廳安排咗一邊嘅梳化位比我地，坐得好舒服~ 餐點分為3 courses ($688) 或4 courses ($788) 配無限氣酒供應，我地揀咗3 courses一個4 courses ，再配上豐富嘅麵包籃，忍唔住要快快開動啦!::: Assorted Bread Basket :::麵包籃內有成4款包包，有軟有硬有純味有朱古力卷~ 軟嘅就啱哂B豬食，硬包搽牛油食又夠香，雖然唔係特別新鮮熱辣，但總算唔錯~::: Appetizer (Selection from the buffet) :::頭盤自助餐台選擇不多，但質素好。沙律菜新鮮爽脆、海鮮冷盤鮮甜味美、仲有d凍肉肉、巴馬火腿配蜜瓜、壽司卷等都唔錯~ 特別要讚蟹腳夠鮮甜，可以食多幾隻幫助翻本!::: Second Course :::接住當然要一試呢度龍蝦濃湯啦! 隨湯附上一條麵包棍~ 龍蝦濃湯果然係超濃郁，飲到龍蝦新鮮甜味但唔會過鹹，仲食到大大粒龍蝦肉豐富口感! 真係好好味~ ::: Third Course :::第二款龍蝦食品就係呢個香檳汁意大利飯配龍蝦及蜆肉，份量唔係好多，除咗有香檳汁意大利飯、龍蝦肉及蜆肉外，面頭仲有一層泡泡~ 意大利飯煮得有d軟，似燴飯多過應該有咬口d嘅意大利飯，但香檳汁吸哂龍蝦肉汁，燴飯都好好食! 另外，龍蝦肉同樣鮮嫩彈牙~ 絕對對得住龍蝦吧呢個名!另一道主菜揀咗烤美國特級西冷牛扒配薯條、法邊豆及紅酒汁，可能預你食頭盤同甜品關係，份量都唔係好多。但我地又的確已經有d飽，每人兩件牛扒剛剛好! 美國特級西冷牛扒牛味非常濃郁，烤得外脆內嫩火候到位，配埋厚切薯條更加夠哂飽肚~ 點綴嘅法邊豆同番茄仔可以減低食完咁多肉嘅膩感~::: Dessert (Selection from the buffet spread) :::甜品款式有唔少，但呀菲麻麻地d士多啤梨呀mousse cake 嗰d，所以都無試哂全部。幾歡如朱古力餅、芒果布甸蛋糕、麵包布甸、鮮果千層酥等都幾好味~ 尤其喜歡朱古力濃而不膩，好味~ 最後仲有餐廳送上嘅生日蛋糕! 簡簡單單已經好好~走嘅時候先發現，呢度除咗高貴典雅嘅藍白色裝潢，原來有一邊嘅牆仲有魚缸養住d好靚嘅魚同埋彩色珊瑚~ 好似去咗水族館食飯咁~…Read More

10月26日, 早上來到西灣河, 想食個平早餐, 喺地鐵站附近又唔想周圍搵, 就入咗去熟食中心嘅茶記食早餐~::: 沙爹牛麵 + 煎蛋多士 + 凍檸茶 ::: $25沙牛麵正常, 牛肉份量都幾多, 加上大量沙爹汁, 成個湯底都好夠味~ 麵底係公仔麵, 上枱時個麵都仲未淋, 湯唔夠熱要浸好耐先淋番.煎蛋有d求其, 蛋已經幾熟咗大半冇乜蛋汁. 多士都可以因為夠脆又夠厚~凍檸茶有甜有酸味, 只係茶味唔算濃, 好在檸檬夠多有成5片~::: 沙爹牛通 + 煎蛋多士 + 凍奶茶 ::: $25平時慣咗盡量叫d唔同款嘅早餐,但今次一齊揀咗沙爹牛肉湯底都冇揀錯,因為呢個沙爹湯底確實唔錯!濃濃的滿有沙爹味~ 通粉煮得彈牙唔淋,加埋用上坑紋通粉更加加強吸湯能力,讚!另外多士都幾好,脆身得嚟好欣賞佢牛油搽得夠混勻~ 要彈就係煎蛋油咗少少...西灣河其實都好多平食, 所以熟食中心又唔見得比其他平, 加上呢度同街市魚檔同一層, 仲係對正出面, 所以環境都有一陣魚腥味, 唔慣嘅人會怕. 不過呢度有樣好係佢有中式港式, 除咗呢d麵呀三文治早餐之外, 仲有腸粉同粥, 都幾多選擇~…Read More

10月15日，平日午飯時間嚟到鰂魚涌周圍都係人，選擇縮窄就揀咗呢間越棧～ 門囗有好多櫈就算要等位都有得坐住等，等一陣就可以入坐.::: 豬頸肉撈檬 + 凍奶茶 ::: $48撈檬大大碗，豬頸肉係一片片粉嫩顏色，皮脆肉軟嫩好惹味！配料陣容豐富，有青瓜片、番茄片、酸蘿蔔絲、生菜絲、蔥粒、炸蒜片同花生碎，非常足料！檬粉條條分明，撈埋少甜微辣嘅檬汁食好味～我嘅凍奶茶叫咗少甜少冰，都叫做達到要求！::: 香茅豬扒撈檬 + 凍咖啡 ::: $48豬扒感覺炸得唔夠香脆, 不過香茅味道都夠, 肉質幾唔會好嚡口~ 最鐘意撈檬有炸蒜增加幾分口感味香味~凍啡味道甜多少少, 啡味都尚算突出, 唔錯~越棧呢間越南嘢都算幾啱我地口味～ 去過幾間唔同分店水準都平隱，餐點配搭選擇多，小食主餐都唔錯，可以encore！…Read More

10月11日, 近日韓國食品在香港大行其道, 再不只是以前的韓燒, 現在新式的正宗韓燒、炸雞、紫菜卷, 還有就是這個什麼什麼雞, 雖然不知道這個奶奶雞的由來, 但係近來咁多人食我地都要來試一下~::: 辛安東元祖奶奶雞 (半隻) ::: $138叫了原味不辣的半隻雞來食, 賣相好像重慶雞煲, 都係有濃濃嘅醬油, 有洋蔥青瓜紅蘿蔔做配菜~ 味道其實都好像, 醬油味好重, 配上雞食好入味, 如果叫個白飯撈汁都一定會好美味~ 雞肉幾淋幾滑, 之但係個汁太濃雞味唔太食到. 反而蘿蔔青瓜呢d索味野索咗d汁後好惹味~ 半隻雞2人食嘅份量剛剛好, 不錯~::: 朵朵蔥蛋飯 ::: $58因為個奶奶雞嘅汁太惹味, 我地都要叫個飯來撈~ 這個飯以石頭飯形式上枱, 上枱時仲吱吱聲咁響, 蔥味蛋味十分豐富, 加上少少飯焦, 好香好惹味, 一定要熱辣辣咁食~ 非常欣賞佢個蔥粒, 成為成個飯的亮點~::: 柚蜜雞翼 ::: $38這個小食份量唔多, 只有2隻雞翼, 柚子味道太重以致有少少酸, 個柚蜜味只在表層, 食到中間的肉就只有白烚味, 雞味亦不夠.今次試的奶奶雞雖然話係韓國菜, 不過其實同重慶雞煲太相似, 又有d似平時屋企食嘅炆雞... 味道尚算不錯, 但係價錢唔平, 所以這個都是試一次就夠了.…Read More

9月28日, 簡單喺屋企附近食lunch, 呢間小店呀菲之前都同朋友食過幾次, 都覺得呢度不論環境同食物都係有心經營. 今次帶埋B豬嚟食, 估唔到佢又幾baby friendly~ 除左有好舒服嘅high chair, 仲有kids menu提供!::: 白汁火腿意粉配溫泉蛋 ::: $ 68Lunch set配搭同Simply Life有d相似, 餐飲都係定好嘅果茶. 不過就再豐富d抵食d~ 唔洗揀有齊湯加沙律同脆卜卜蒜茸多士! 沙律菜好新鮮, 再配上d時令生果, 輕盈清新~ 忌廉湯有粟米粒, 味道濃而不膩, 仲有淡淡粟米甜香.白汁火腿意粉配溫泉蛋都十分對辦, 溫泉蛋係騰騰震嗰隻! 意粉夠彈牙, 混入白汁同溫泉蛋汁口感creamy, 味道濃淡適中~ 唔錯!橙茶味道豐富, 帶甜橙汁加茶好味~::: 西班牙牛肉小鍋飯配溫泉蛋 ::: $88以鐵鍋承載加上溶化芝士同溫泉蛋, 齋睇賣相已經好吸引! 慷慨嘅牛肉醬包住晒每粒飯, 牛味番茄味濃郁惹味~ 撈埋芝士同溫泉蛋味道更豐富! 又因為而鐵鍋裝住所以飯身可以保持溫熱, 食到尾都仲暖好好~今次B豬仲細, 未食得佢地豐富嘅kids menu... 但都享受到呢道嘅staff對小朋友到好歡迎嘅態度~ 成日經過都見到佢有d新款式新優惠, 寫食評之時發現原來SB已經踏入10週年, 希望呢間心機小店可以繼續撐落去啦!…Read More

9月27日，今日嚟咗Hysan Place搵食～ 又比呢度嘅麵包吸引住！::: 卡邦尼汁煙肉蘑菇意粉 + 粟米湯 + 凍檸檬茶 ::: $72 + $12 + $45好喜歡呢款日式粟米忌廉湯，香濃甜美！仲有粒粒粟米～ yummy～卡邦尼汁煙肉蘑菇意粉亦係一貫日式風格，忌廉味較重，煙肉好大塊、蘑菇片亦都好大塊，意粉都夠彈牙，唔錯！最讚當然係塊丹麥麵包！輕輕烘過嘅麵包牛油香、麵包脆～ 超惹味！但又食包又食意粉確係有少少飽⋯凍檸茶就正正常常～::: 夏威夷漢堡扒飯 ::: $65呢個飯有半碟都係薯條, 所以就算佢唔俾碗飯, 都已經幾夠下~ 漢堡扒肉地幾嫩, 唔會煎到好實好熟咁, 個汁就好似洋蔥汁, 甜甜地都幾開胃~ 叫得夏威夷, 又點會冇塊菠蘿. 不過就好薄唔多汁, 麻麻地... 配菜除咗薯條之外, 仲有沙律菜同粟米, 呢餐真係澱粉質豐富! 沙律菜幾新鮮同粟米都爽, 薯條唔係炸得好熱氣有少少淋. 整體都十分不錯~每次食完都好想買埋d麵包吐司返屋企再encore～…Read More

9月27日, 諗起雞蛋仔, 我地都會想起細細個在街上看見的炭爐車仔, 一底一底咁烘出熱辣辣嘅雞蛋仔, 有炭燒味又有豐富蛋味~ 但隨住呢D小食入咗舖, 水準就好似冇以前咁好. 但近年又掘起番雞蛋仔風, 唔單止傳統雞蛋仔味, 仲加入唔同其他味道, 甚至加埋雪糕變成中西式fusion甜品, 好唔好味就見仁見智. 我地都係鐘意傳統雞蛋仔多d, 今日經過筲箕灣, 知道呢頭有間好出名嘅雞蛋仔店, 我地就買咗一底食~:::  ::: $14叫咗雞蛋仔後都要等大概5分鐘先有, 熱辣辣不能即刻食~ 要說味道唔算太特別, 但係脆卜卜嘅口感, 加上雞蛋仔裡面都足料, 包住成粒都食到蛋, 唔會齋空氣~ 可以話粒粒都夠料唔留手, 應該係佢受大讚嘅原因~呢店嘅蛋仔都食得過, 之不過好似以前細個食嘅雞蛋仔滋味d~…Read More

4月13日, 今晚有朋友相約去又一城食飯，原來係要試呢度千兩旗艦店! 呢期開始提供春季魚鮮，當造的油甘魚油脂豐餌，用以化作不同料理實在非常精彩~::: 香蒜炸甜蝦 ::: 先來一碟開胃小吃香蒜炸甜蝦~ 炸得乾爽無油、香脆得連蝦殼都可以食埋! 送酒一流~::: 味淋魚乾::: 另一道小吃叫了味淋魚乾，甜甜地好好咬，不禁一條接一條食到停唔到口!::: 蜜柑味油甘魚刺身 ::: 春季特選中我最愛是這道蜜柑味油甘魚刺身! 據說油甘魚平常也以蜜柑作飼料，令魚身也有帶有蜜柑味道，配上柚子醬、三文魚籽與鹹脆的蒜片，口感豐富味道特別，推介~::: 炙燒柑橘味油甘魚刺身 ::: 輕輕炙燒過的油甘魚微熟，油份包著刺身，更添魚香. 配上三文魚籽和蘿蔔茸同吃，跟蜜柑味油甘魚刺身又是另一種感覺.::: 蜜柑味油甘魚壽司 + 炙燒柑橘味油甘魚壽司 ::: 一向都鍾意油甘魚充滿油香，配上香甜的壽司飯食更好味!::: 朝捕晚嚐海の幸 (大盛) ::: 充滿霸氣刺身盛，分別盛載著不同種類的油甘魚刺身，款款都鮮甜嫩滑，完全滿足晒刺身慾望!::: 千両特色四點盛 ::: 四款壽司包括大吞拿魚腩、極上佐賀和牛、北海道海膽、千両壽司, 淨係賣相已經令人垂涎欲滴! 四款壽司皆用上最上乘新鮮食材製作~ 大吞拿魚腩刺身厚身，肉質軟嫩富油香，味道鮮甜，超讚! 北海道海膽亦是上佳之品，紫菜夠脆海膽鮮甜，入口即溶無得彈~ 千両壽司則是以上兩者混合，味道更豐富更有層次! 極上佐賀和牛肉味濃郁，可惜有少少筋比較吞…::: 鍋燒牛油馬刀貝::: 一路燒住等牛油慢慢溶化滲入每一片馬刀貝內… 牛油好香，帶起了馬刀貝的鮮，再夾上紫菜同吃更添鮮味. 要讚一下火候預得剛剛好，在馬刀貝剛熟的時候蠟燭便燒完了!::: 清酒拼盤 ::: 四款清酒分為薰酒、爽酒、醇酒、熟酒，味道從清甜到剛烈，淡口到濃味，不同的酒配以不同刺身，帶出不同的化學效果~ 重點是價錢不貴，可以一次過品嘗四款清酒的清酒拼盤，平時少飲的我算是大開眼界!位置座落溜冰場隔離，樓高兩層餐廳比其他分店更有格調，樓上更有VIP房，私隱度更高，無論同人傾心事抑或大班人開心飯聚都非常適合~…Read More

9月17日, 今日呀菲同呀比都放假~ 咁壽司癮起... 又要去元氣止一止癮~ 我地平日lunch time過後先到, 所以都唔係好洗等位~::: 三文魚壽司 ::: $14今次個三文魚無乜光澤, 紋理亦較淡, 亦算薄身, 味道一般般..::: 北寄貝沙律軍艦 ::: $14北寄貝沙律份量好多, 味道好夠~ 要讚下佢d紫菜都新鮮爽脆! 保持水準~::: 海膽軍艦 ::: $25@ x2淨係賣相已經要減分... d海膽有少少糊狀, 色澤偏淡. 但本著佢係元氣出品都勇敢放入口~ 但係腥苦味架... 好失望...::: 炸蝦卷 ::: $20炸蝦卷最緊要炸蝦夠脆啦~ 呢份做得到, 而且都卷得工整, 味道都唔錯~::: 厚燒玉子 ::: $12@ x2厚燒玉子份量比普通玉子多好多, 飯較少. 甜蛋部份做得唔錯~ 軟綿綿又香甜, 好味~::: 赤海蝦壽司 ::: $10@峰蝦肥大鮮甜, 肉身嫩滑~ 抵食!::: 牛油果軟殼蟹卷 ::: $20水準每次都好少令我地失望~ 軟殼蟹多肉脆口, 牛油果、青瓜同松子仁令成件卷物味道層次更豐富~ 每次我地嚟元氣必食!::: 帆立貝壽司 ::: $16@正~ 可以話係喺其他壽司連鎖店食唔到呢個質素! 帆立貝size厚得嚟肉質鮮甜嫩滑~ 我地最愛~今次壽司質素略為參差, 尤其是海膽真係大大拖低總分. 希望佢只係偶然失手啦~ 因為元氣始終都係我地最愛嘅壽司連鎖店!…Read More

9月11日, 今日係我嘅生日, 呀菲帶咗我嚟呢間都想食好耐嘅酒店餐廳, 睇嚟佢地嘅lunch set都好吸引, 但係有一d就好似更吸引, 無論如何都要試一試~ 我地要咗2個3 course set, 中間仲有d小食配搭~::: Assorted Bread :::不得不提嘅當然係呢度嘅牛油, 來自法國的品牌仲有分原味同有鹽牛油, 香軟濃郁~ 有牛油就梗係要配麵包啦！侍應捧著一大盤排列整齊焗得香脆嘅麵包比你揀, 有軟有硬有厚有薄嘅各式選擇~ B豬都食咗好多, 掛住食都唔記得影相！::: Amuse Bouche :::先來一連串嘅餐前小食~ 總共三款分別有鵝肝珍寶珠、炸豬肉丸同茄子蓉盤栽. 最特別嘅當然係鵝肝珍寶珠~ 用beetroot jell-O包住香濃軟滑嘅鵝肝, 十分滋味!::: Aubergine :::先來一個頭盤, 賣相靚到好似一幅畫咁！最底係bell-pepper jell-O, 上面加上蕃茄粒、豆同食用花, 味道都幾清新, 食完之後好開胃~::: Sea Urchin :::呢個海膽要加錢的, 但係上枱就知道係超值,一個好似海膽型嘅兜, 裹面嘅海膽份量好豐富, 加上魚子, 感覺就是高貴~ 味道來說, 十分鮮甜, 海膽可以大啖大啖咁食, 周圍係龍蝦汁啫喱, 都好鮮甜好襯個海膽~ 魚子就反而唔太食得出個味道, 只有淡淡鹹香.::: Tasmanian Ocean Troute :::塔斯曼尼亞鱒魚配上一條好出色嘅千層薯仔酥~ 魚味道似平時食嘅三文魚, 配上少少調味醬, 味道唔算濃但係可以帶出魚嘅味道~ 而薯仔酥好香好脆, 食落好惹味, 不過有少少乾身~::: Wagyu Tongue :::這個主菜也要加錢的~ 和牛舌本身冇煮到全熟, 大概5成吧, 以突顯肉地入口即溶, 香濃嘅牛肉味在口中徘徊~ 汁用上日式燒汁, 配上紫菜碎, 來帶出日式風味, 唔錯~ 除咗牛舌之外, 配菜仲有蕃茄塊, 俾我地喺濃郁嘅牛味之中清新一下~::: White Peach :::呢個桃加面頭嘅一球清酒雪糕, 味道清清地帶有甜味, 幾fresh, 加上有少少炸米粒, 軟中帶脆~::: Bahibe Milk Chocolate :::呢件甜品就係一條朱古力mousse, 加一球鹽味焦糖雪糕同蜂蜜脆脆~ 朱古力mousse唔算太甜, 反而雪糕好似仲比較甜, 加上蜂蜜脆脆口感對比幾有趣~::: Coffee :::餐飲我地要咗普通咖啡同cappuccino~ 咖啡幾香好濃, 呢類餐廳嘅咖啡我喜歡唔加奶唔加糖, 呢度嘅咖啡質素比其他地方好一點~::: Petit Fours :::最後, 當然因為係我生日, 呀菲都額外準備咗一個生日甜品拼盤, 其實平時都會有嘅軟糖、鬆餅、馬加龍同一d曲奇, 整體唔算好特別, 最特別嘅算係面頭寫上嘅生日祝福語!呢個生日餐都幾好食, 海膽和牛水準都好高~ 加上座位係梳化, 坐得好舒服~ 而小朋友嘅用餐設備例如high chair同餐具都安排得好好, 要讚! 試過一次都十分之滿意~…Read More

9月6日, 今日同B豬返完playgroup, 時值tea time, 就諗起呢間茶木~ 上到去見到長長人龍, 都暗呼洗唔洗咁誇張呀? 好彩B豬熟睡中, 我地兩個大人排下隊都無乜所謂~::: 芒果香草蜜糖磚塊 ::: $68排咗咁耐隊, 難得有個位坐就梗係要試下呢度d名物大大件吐司啦~ 我地叫呢個係已經切開一片片再疊番埋一齊嘅芒果雲呢拿蜜糖吐司! 三層吐司塗上蜜糖, 唧上大量忌廉, 再放上一球芒果雪糕, 伴以士多啤梨同芒果粒... 仲體貼地比咗個小鐵拑比你夾多士添! 成個甜品外表係幾靚嘅... 但係食落口就得個甜字, 多士熱到d雪糕話咁快就溶, 加上我地本身又唔係好好忌廉, 芒果雪糕亦係平時牛奶公司貨色... 除咗個多士係幾脆之外都真係無乜可取...::: 愛爾蘭咖啡 ::: $32呢一杯咖啡其實都係啅頭多, 甜度比啡味更濃, 一大堆cream喺面頭, 配朱古力可以接受, 因為都係甜碰甜, 但係配咖啡就個人麻麻地... 加上士多啤利同朱古力卷, 就變得好少女... 講番味道, 咖啡味唔重, 甜味居多, 話佢似mocha就差唔多.唔知係d食物唔胃口, 定係呢度真係一般般... 其實無乜再翻兜嘅意欲...…Read More

9月3日, 喺銅鑼灣誠品入面, 最多人流嘅唔係賣書嘅地方, 而係成日都排長龍嘅天仁, 今日我地都第一次排下睇下佢嘅奶茶係咪咁吸引~::: 913鮮奶茶 ::: $22這隻奶茶用上天仁出名自家的913茶, 再加上鮮奶而不是用奶精~ 913茶味濃郁, 飲一啖先係濃賣郁嘅鮮奶味, 跟住茶味就淡淡流出, 又甘又香~ 平時飲嘅奶茶只係有甜味同濃濃奶精味, 呢杯就完全冇呢d味~ 應該係我地飲過嘅最好台式奶茶~雖然價錢比起其他台式奶茶貴少少, 但係以質素來說贏幾條街, 唔怪得有咁多人排隊都要飲~ …Read More