tat320's Profile

最近真係好忙，黎到高街坐喺開揚對住大馬路嘅chill chill cafe，飲住嘢真係有種療癒嘅感覺，仲要真係好食。Egg Benedict驚喜發現包轉咗做大啡菇，菇味濃夠厚身Juicy，食落好fresh。 流心嘅蛋、恰到好處嘅荷蘭汁、牛油果同煙三文魚冇理由唔好食，開心食到滿分嘅Egg Benedict 。香煎牛腱板扒配蒜香黑椒炒意粉十分足料，好似將兩款main夾埋一齊咁。 牛腱板扒輕輕醃過，灑上辣辣地嘅香料好有風味，牛味濃郁。 蒜香黑椒炒意粉好有鑊氣，基本蕃茄口味加海量蒜同洋蔥。香蒜牛油鮮蝦吐司蒜香爆棚，蝦球炒得好香，食唔停口。 多士意想不到抹醬居然有蝦蓉，焗到脆脆，鐘意香口野岩哂。…Read More

一人燒肉開到成行成市，方便以外最緊要都係肉嘅質素，今晚真係有正宗日本燒肉嘅感覺。美國黑安格斯牛肉油花分佈均勻，juicy有肉香，本身已經有少少燒汁提味，推薦一定要加生蛋，沾上蛋汁真係昇華晒，有壽喜燒feel。日本和牛A4赤身肉質細膩嫩滑，燒出黎清爽又不失風味，入口即化，食到牛肉嘅天然甜味，配埋粒粒分明嘅青森縣白飯一流。帶子肥美厚實，輕易就燒到表面金黃色，大大粒好有彈性，軟嫩鮮甜。 蝦新鮮爽彈，燒到蝦殼同蝦頭都焦香，好香好滿足。不得不提最後嘅開心果雪糕非常高質，媲美Venchi水準，食到lam lam脷。…Read More

一直想朝聖懷舊酒樓，對手推點心車總係有種情意結，原來晚市都有得食。唔同時段會推出唔同款嘅點心，仲有啲坊間見唔到嘅款式。 蝦膠魚肚，魚肚夠厚身索晒湯汁，足料大份。 炸鮮奶熱辣辣，外脆內嫩，好似食緊脆皮燉奶咁。燒賣、奶皇包、叉燒包同牛肉球做到水準以上，燒賣大大粒保持到即蒸嘅口感，奶皇包係唔覺意就流晒出嚟嘅狀態。懷舊甜品焗西米布甸講真我係第一次食，好似葡撻咁窿窿地嘅表面好吸引，內裏嘅布甸同蓮蓉滑溜，唔會太甜。椰皇燉蛋表面仲灑左啲燕窩好矜貴，重點當然係燉蛋白夠滑有椰香，食點心同時可以食到高質甜品係開心嘅。…Read More

好多時食炒肉蟹都價值不菲，發現二人餐包星洲蟹都係六百幾蚊，性價比幾高。蒜香海蜇頭蒜香調味濃郁但唔會太重，帶點麻油香氣同微酸，海蜇頭爽脆彈牙。星洲黑胡椒蟹新鮮肥美，肉質嫩滑。 黑胡椒醬汁濃郁香辣，胡椒香辣辣地帶微甜，用手食啖啖肉，有係當地食嘅風味。脆脆咕嚕肉外皮透薄酥脆，內裡軟滑，咕嚕醬酸甜惹味，加大量彩椒同菠蘿，比一般嘅咕嚕肉更清爽唔會膩。蝦味魚子蝦球炒飯炒得乾爽，帶濃濃嘅蝦味，魚子卜卜聲令口感好豐富，簡單醬油、蔥花同蛋花已經夠好味。酸柑香茅凍滑溜冰涼，有好濃嘅香茅清香。…Read More

心心念念朋友提過山見好食，今晚一試的確肉唔錯，花款選擇多。Lv3牛肉有好多款，基本款質素都好好，嫩肩里肌肉大大塊有牛味，牛爽腩軟腍，卡樂BEEF油花香，月見封門柳滑溜柔軟。美國穀飼黑毛豬肥瘦均勻，同牛肉比都唔遜色。風味沙茶老鍋令啲肉增添咗啖啖沙茶香味又唔會太咸，今期香港主題嘅上品蟲草木耳鍋好有驚喜，有好濃菇味，用嚟淥菜個鮮甜度更上一層樓。麻辣鴨血、鹽酥雞同埋烤香腸都係水準以上，鬼馬炸油條即叫即炸，有啲似炸饅頭嘅口感外脆內軟，好似響鈴咁點一點沙嗲湯底都好夾。竹笙抱蝦滑細細條，但索晒湯底之後竹笙口感好突出，即刻encore。 黃金鮮蝦球名副其實有種食緊流沙奶皇包嘅錯覺。欣賞除咗台式飲品，仲有自家製手工雪糕，香濃幼滑。 …Read More

蔥蒜香蟹肉意粉係我期望以上嘅高級味道，首先蟹肉爆棚，每一啖都係滿滿嘅蟹肉，充滿海鮮甜味。值得一讚上面炸得香口嘅香蔥絲，撈埋一齊味道昇華咗，香味好豐富。明太子忌廉蝦肉三文魚籽飛魚籽紫蘇意粉忌廉汁多到滿瀉，非常Creamy香甜。 鍾意每一啖都有脆卜卜嘅飛魚籽，蝦肉多又爽，如果紫蘇葉可以再多啲就更好。松露薯條係好味嘅幼薯條，咬開係明顯嘅薯仔質感，松露醬好香。開心果牛奶麻糬係今日MVP，麻糬非常軟糯，重點係開心果粉極香，幼滑之中又食到粒粒脆口嘅開心果，會為左佢再黎。…Read More

收工喺海旁餐廳食個好味嘅晚餐，係忙碌生活中嘅小確幸。炭烤香茅西冷牛肉好似肉卷咁包住原條香茅咁燒，一咬落去香口又滴汁，香茅嘅煙燻香氣滲左入牛肉度好match。 泰式醬汁酸酸甜甜，用生菜包住牛肉同米粉一齊食，非常惹味開胃。大蝦冬陰功味道好正宗，夠晒酸辣過癮，大蝦新鮮彈牙，大隻厚肉，吸滿左湯底嘅酸辣精華，辣度啱啱好。泰式黃咖喱蟹肉醬汁香滑濃郁，蟹肉嘅鮮甜令人眼前一亮，配埋濃味嘅蒜蓉麵包，蟹甜味都係咁突出，份量又好多，係食過咁多泰式餐廳入面難得唔係靠濃味醬汁，而真係新鮮海鮮取勝。雞肉泰式乾炒河粉炒得乾爽彈牙，雞肉嫩滑多汁，有鑊氣得黎完全唔油膩。椰子雪糕帶點椰肉口感，甜度啱啱好，真材實料。 泰式黑糯米燉蛋值得一讚煮得乾爽煙靭，微甜有米香，連我少食糯米都食唔停口。…Read More

食西班牙燉飯係一個賭注，兩個人食一兜已經叫唔到太多其他嘢，好彩今晚係一個好食嘅燉飯。西班牙蒜油紅蝦性價比一流，一般tapas都預期份量比較少，估唔到有4大隻。 紅蝦好鮮甜，蒜香辣辣地一流。A5和牛沙巴當好腍滑，牛味濃郁，油花分布啱啱好，甘香但唔會油膩。 沙嗲荷蘭醬同西班牙煙燻醬創新又出色，前者香濃又有柔和嘅奶油感，後者係香辣嘅天然紅甜椒味，同和牛好夾。黑毛豬叉燒西班牙燴飯叉燒真係眼前一亮，第一啖就覺得好香口，除咗本身夠肥夠嫩之外，自家製醬汁好惹味，亦都燒到表面少少窿邊好香，值得單獨成為一個主菜嘅程度。 西班牙燴飯有好濃嘅彩椒蕃茄香，食落好清新。…Read More

出chiikawa展前想食好啲，揀間市區西餐，估唔到黎到係靚靚夜景燭光晚餐，非常有氣氛。法國藍龍蝦他他肉質鮮甜，鵝肝嘅濃郁、醃製蛋黃嘅咸香味同生蠔葉嘅香氣，同清甜嘅龍蝦肉形成對比又好夾，配埋脆口嘅雞皮口感豐富，味道好有層次。日本帝王蟹蛋泡沫輕盈嘅泡沫口感特別，帝王蟹同蛋鮮味爆棚，配24個月法國康帝芝士脆片同海膽加入左咸香同海味，食落有個奢華感。荔枝車厘茄凍湯好清爽，西班牙紅蝦彈牙、酸甜彩椒爽脆，成個組合好清新，飲落好舒服好岩夏天。熟成本地雞胸肉卷做得好滑又有雞肉香，其實單食已經好出色，龍蝦汁同炸鵝肝有提鮮作用，菊芋蓉亦添加左自然甜味，係近年食過最出色嘅雞肉主菜。香酥脆皮龍蝦外酥內嫩，龍蝦新鮮彈牙，熟度岩岩好，魚子醬同清酒忌廉汁令香氣提升，味道豐富但龍蝦鮮甜味依然突出。腐皮法式千層酥脆，配幼滑嘅豆腐忌廉芝士，淡淡香甜，清爽又滿足。…Read More

開心分享最近食到最高質嘅中菜，真係食到笑咪咪。西班牙黑豚肉叉燒皇 拼 江南熟醉蝦由用料開始取勝，叉燒軟腍有肉香，醉蝦大隻彈牙。花膠陳皮黃魚羹魚肉幼滑，食到淡淡陳皮香，重點係有大大塊厚身花膠，極養顏。廿二頭南非吉品鮑伴花菇欣賞鮑魚嘅質感做得唔錯，帶點煙韌，同花菇一樣食到食材嘅鮮味，加埋爽脆嘅生菜係完美經典組合。羊城辣醬湘椒炒日本和牛好有驚喜，第一次食到中式煮法嘅和牛，肉質自然係甘香軟腍，亮點係辣醬好香口，惹味到忍唔住食埋一齊爆炒嘅辣椒仔。15年陳皮皇子乳鴿好入味，幼嫩有肉汁，比起一般調味更加香醇，足半隻食得好滿足。香菇肉醬炒飯毫不馬虎，香菇肉醬香氣撲鼻，炒飯底乾爽粒粒分明，居然成為朋友全晚最愛。香芒草莓青蘋果凍同懷舊芝麻卷清爽唔會太甜，芝麻卷做得夠薄有層次。…Read More

經常搭車經過呢間新店顯眼嘅招牌，同朋友係附近行街終於黎試一試。椒鹽溏心鮑魚角、脆銀魚乾、琥珀核桃全部都好香口，炸鮑魚好彈牙，乾爽唔油膩。花膠海參魚茸羹有滿滿幼滑嘅魚茸，好清甜足料，間或食到軟糯嘅花膠海參，夠哂養顏。蟹黃銀針燴玉帶醬汁做得好好，大量蟹肉濃到好似食緊翅咁，帶子煎到金黃半熟，成個組合好好。20年古月龍山花雕蛋蒸虎蝦球名副其實有好濃嘅花雕同雞油香味，一啖連埋蛋一齊食，令蒸虎蝦更加滑。拔絲咕嚕肉係今晚最愛，脆皮做得好薄，調味酸甜岩岩好，最驚喜係底下墊左炸得酥脆嘅薄薄油炸鬼，冇諗過同咕嚕肉咁夾，有驚喜。香煎一夜鮮馬友魚蒸得好完美，魚皮脆卜卜，配蒸魚豉油同蔥絲幾好。最後黎一碗蝦子花膠濃雞湯拉麵，清甜嘅熱湯暖胃暖心。…Read More

Omakase最緊要係食材新鮮，今晚感受到用料好靚，會心掛掛想再黎。靜岡縣水果番茄簡單切開加少少鹽已經好好食，多汁清甜。白見貝新鮮厚切，超甜。帶子天婦羅配馬糞海膽，手卷咁食法口感好有層次，天婦羅同紫菜雙重脆口，帶子同海膽滑溜，個鮮味好突出，creamy嘅海膽將全部野融合埋一齊。深海池魚上面淋左山藥泥同蟹黃醋，滑上加滑，即使池魚係比較肥嘅位都唔會膩。北寄貝同赤貝同樣新鮮，拍一拍仲郁緊，前者柔軟爽滑，後者厚身爽口，有淡淡檸檬香提鮮。黑陸魚火炙過好香口，肉質軟滑。兵庫縣室津真蠔不愧為全日本第二，大隻飽滿，鮮甜到過左幾分鐘口入面仲有個甜味。北海道毛蟹望住師傅拆肉，一梳梳仲保持肉汁，鮮甜就唔洗講，最正係蟹膏好似大閘蟹膏咁香，鮮上加鮮。赤蝦加蝦膏同蘭王蛋賣相一流，驚喜地蝦膏極度濃郁，蝦味爆棚，赤蝦沾上滿滿蛋汁同蝦膏好rich，係我食過最濃味最鮮嘅赤蝦。慢煮南非鮑魚軟腍入味、煙煙韌韌，指定動作要點埋甘香嘅肝醬，全部精華食哂。魔鬼魚面肉天婦羅好嫩滑，紫菜汁清清地食返個原味。腦天喺築地留下嘅回憶麻麻地，終於打破咗我印象，原來吞拿魚頭頂呢個位置係好嫩滑，比起一般赤身更滑。赤身醬油漬輕輕醃左幾分鐘，赤身好幼滑，唔洗點咬就化開，魚味濃。A5和牛虎蝦卷一半生牛肉一半火炙，平時鍾意香口嘅我難得地覺得生嗰邊好食啲，食到個軟滑同牛肉香味，馬糞海膽濃郁creamy。汁煮蠑螺彈牙入味。…Read More

人老咗真係開始要養生，食個飯都會留意住夠唔夠營養均衡，呢間我會想再嚟。巴斯克燉雞係全晚最愛，雞髀扒有用香草醃過，表皮煎香、燉得軟滑又保持彈性，每一啖都沾滿濃厚嘅醬汁。 蕃茄、紅黃椒、翠玉瓜等熬成嘅汁有蔬菜清香，加上煙燻辣椒好惹味。刺客義大利麵有超大隻虎蝦，新鮮彈牙。 墨汁意粉係dating大忌，但蒜蓉辣椒炒埋好香，濃濃海味，食到成口黑哂都好值得。奈良栗子炊飯豚腩卷定食係好豐富嘅日式set，除左主食仲有番茄仔、凍豆腐、煎雞髀菇同枝豆。 豚腩卷燒得夠香口、有肉味，有日本串燒店水準。…Read More

全晚最愛邪惡嘅紙鷂雞皮同午餐肉。 紙鷂雞皮大大塊，每一忽好酥脆透薄，食落比平時串埋嘅燒雞皮更加爽。 午餐肉厚切，燒得香口仲灑咗啲香料，啖啖肉好滿足。雞皮手打鮮蝦滑外皮酥脆，內裏爽口彈牙，中心仲串咗隻蝦，口感好豐富。 翠玉瓜新鮮多汁。大蔥雞肉串雞肉嫩滑，食到京蔥嘅新鮮juicy，一人一串都有encore嘅衝動。 豬頸肉燒得幾香，唔會過分肥，如果再燒燶啲就更加好。宮崎去骨雞腿貨真價實食到係比較靚嘅日本雞，欣賞雞皮完整地成塊都好脆，全部油脂都已經燒晒出嚟，好味。麻辣薯條有驚喜，薯條熱辣辣新鮮炸起夠乾爽，重點係個麻辣粉真係好好味，唔會太辣但好惹味，每條薯條都好均勻地包裹上辣粉，配埋芝士醬，就算好飽都食唔停口。全晚串燒價錢都唔貴，仲有啲特別款式，例如燒乳豬、燒鮑魚、燒牛胸爽，同朋友嚟傾吓計唔錯。…Read More

間中想食個有質素嘅甜品，最好就由正餐開始已經有咁上下，可以一間過搞掂，呢度做到我要求。帶子海鮮喇沙意粉用料好澎湃，除咗煎到金黃嘅帶子之外，仲有貝柱粒、蘆筍同蕃茄仔，配料同意粉近乎一比一，好足料。 好鍾意喇沙味真係好夠，好似食咗輕盈版嘅喇沙湯麵一樣。蒜香牛油雞翼炸得好酥脆，雞肉嫩滑juicy，重點係個蒜香唔係得香味咁簡單，而真係有粒粒蒜蓉喺面，非常香口惹味。芝士焗薯蓉帶子表面焗到好香，薯蓉幼滑，如果留幾片薯仔增加口感會更好。藍莓鮮橙伯爵茶糯米窩夫冇令我失望，窩夫脆到好似切緊法包咁，內裡煙韌。 揀左椰子雪糕，成個組合一啖放入口好完美。…Read More