vanessakwo's Profile

呢間元朗嘅德國餐廳真係好掂，食物質素高，但係價錢又唔貴，可以encore。先講呢個豬扒意粉，好少見呢啲幾十蚊嘅餐啲豬扒煎得咁好，真係煎到外層脆而入面啲肉又唔會韌，睇相就知塊豬扒都幾大塊，而且一碟竟然有兩塊豬扒，至於意粉就唔係白烚完就咁俾你，而係茄汁意粉。紅酒牛尾配薯菜份量足，你睇吓幅相入面幾多牛尾就知道，另外啲牛尾煮得夠林夠入味，係好食嘅。包埋餐湯同埋餐包，啲餐包仲要係一啲都唔求其，跟餐仲有飲品，粟米話唔超值。…Read More

芋角依家真係好少地方有得食，仲以為係好食，最基本就係要熱，第二就係外層個蜂巢夠鬆脆，當然如果炸完出嚟滰乾油先上枱就真係超級難得，呢度真係做得到， respect。呢度嘅油炸點心控制油分都真係控制得幾好，呢個鮮蝦腐皮卷嘅腐皮夠脆，而且油分真係算少，入面啲蝦都幾新鮮。蝦米腸反而一般，我嫌佢唔夠香唔夠滑。鳳爪嘅肉質唔錯，夠厚身，林得來有彈性。叉燒包都係一般，叉燒唔夠香。招牌蝦餃就好掂，隻蝦夠大夠新鮮夠彈性，最重要係價錢合理。梅菜肉餅飯中規中矩，呢間茶居啲點心整體真係唔錯。…Read More

天氣熱熱哋胃口就自然冇咁好，本身就已經決定食碗麵就搞掂，點知呢間上海麵店竟然有冷麵，所以就叫嚟試下。佢呢度嘅冷面有三款，我就揀咗麻醬雞絲冷麵，未算好驚喜不過味道ok嘅，個麻醬都幾香，雞肉亦都算多，唯一缺點係個冷面唔係我想像中嗰隻冷麵。另外叫咗一客鍋貼，呢個整得幾好，鍋貼皮唔會好厚，亦都唔會煎得太燶，因為好怕煎到好燶會有一陣苦味，唯一缺點係油咗少少囉。再加杯豆漿，豐富的一餐。…Read More

因為冇book枱，好彩老闆娘肯俾我哋快事，6:00坐低7:30交枱，梗係殺啦。我哋兩個人叫咗兩個餸，兩個都好好食，怪之得呢間小炒經常排長龍，目測基本上如果冇book位都實冇位。 上睇啲人話必食咕嚕肉，所以梗係要叫啦，佢嘅咕嚕肉做到外脆內軟，個質感非常之好，封咗個汁之後外面嘅皮仍然有微脆，注入麵包住嘅肉都算嫩滑。菠蘿係用新鮮菠蘿，所以食落去特別鮮味。連佢啲青椒同埋洋蔥都炒得好食果下先至勁。跟住要咗個鐵板通菜，熱辣辣上枱夠晒香。…Read More

呢間粵菜館真係可以話係滄海遺珠，價錢合理，而且出品質素高，但係又好少人會講，今晚真係食得好開心。最有驚喜嘅菜式，就係佢哋嘅小炒王，炒得少油又夠乾身，銀魚仔芋頭絲脆卜卜，雖然百幾蚊一碟，但係個size真係超勁大。桂花炒魚肚有一啲舊式粵菜，用上大量嘅芽菜但係又唔會濕納納，事關芽菜最麻煩嘅地方就係一邊煮一邊會出水，所以控制水份係好緊要，呢個餸炒得好靚。我自己非常欣賞佢哋嘅太爺雞，出面好多太爺雞記煙熏味都唔夠，呢度做到恰到好處，入面啲骨都有煙熏味嗰下勁，煙燻得來啲肉又夠嫩滑，師傅功力非常勁。個前菜幾特別，花生雲耳同埋鹹菜都好食，最後仲送咗個甜品，應該係薑汁撞奶、不過未「鯨」得好，味道都OK嘅。…Read More

跟住OpenRice搵食就最好，就好似呢間餐廳咁樣，基本上都係英文點餐，同埋啲印度菜真係唔知邊啲係邊啲，不過睇OpenRice啲食評又有相，就可以好方便叫到自己想試嘅嘢食。就好似呢個非常特色嘅印度小食，看圖識字最簡單，佢外面嗰個波波係炸球，中間空心嘅，就放咗啲蔬菜粒同埋有個特色醬汁，配埋類似媽咪面嗰啲麵碎喺面，食落味道唔錯。跟住呢個炸餅都好特別，感覺似係平時食到嗰啲印度薄餅咁樣，不過呢個版本係炸咗嘅，佢會跟埋一碟鷹嘴豆咖喱，素食嚟嘅，食落去有少少似薯蓉，所以都飽肚，背住個炸餅夾住啲鷹嘴豆咖喱，其實幾好feel。我哋另外叫咗芒果印度奶昔試吓，唔會好甜，味道都幾好。…Read More

呢間餐廳嘅set lunch真係超值，喺Airside返工嘅我終於搵到間平少少嘅餐廳，唔使幫襯麥記又或者行去新蒲崗先至有平少少嘅lunch食到。我就揀咗石燒紐西蘭肉眼扒，$118，肉眼扒有八安士，份量足，肉質都唔錯，佢仲有一個係高級美國肉眼扒，都係石燒嘅，不過嗰個就要$188，我試咗呢個平民版，覺得真係抵食。侍應仲好細心提供一次性圍裙，等啲油唔會彈到件衫。飲品就試咗鴨屎香檸檬茶，超級大杯，佢係用啤酒杯裝嘅，味道都唔錯，值回票價。呢間新開嘅餐廳裝修都幾靚，幾好坐，lunch最平$60，對於我哋呢啲低級打工仔嚟講絕對係喜訊。…Read More

墨魚漢堡真心好食，見墨魚滑打出嚟嘅墨魚餅，超級厚身，入面仲有粗粒墨魚，所以咬落去係有少少層次感，同一般墨魚餅好唔同，呢個好好食。加$45轉套餐就可以揀埋呢個火炙明太子薯條，味道好Rich，明太子配薯條真心正。湯烏冬又係好好食好精彩，最正係個魚湯，一飲落去就知講得少，似乎係用新鮮魚自己煲嘅魚湯，所以飲落去feel到有好多條魚嘅精華喺晒入面，簡簡單單加上魚蛋魚片頭，已經好好食。佢個魚湯烏冬仲會配一個小食，呢個似乎係八爪魚沙律，少少Wasabi味，好fresh。兩個餐都跟埋飲品，我就覺得幾抵食。…Read More

放工同同事一齊食餐勁，近近地就揀咗呢間，係幾正嘅，海鮮+刺身+打邊爐，一門三傑。呢度價位唔算平，不過真係物有所值，D海鮮、刺身同D火鍋配料都真係新鮮，而且選擇種類都真係好多，另外佢D牛肉都幾靚，整體唔錯，而且地方都算好坐，可以一邊食一邊講是非好開心。…Read More

今晚決定食雞煲， search OpenRice見到呢間喺石門嘅雞煲店好似唔錯，於是坐兩個站港鐵嚟呢度食。原來除咗麻辣雞煲之外，佢仲有其他雞煲，不過一心一意想食麻辣雞煲，所以都係叫返個辣嘅雞煲刺激一下味蕾。佢啲雞嘅肉質都唔錯，食落覺得都幾新鮮，佢雞煲入面嗰啲配料都好香，洋蔥芹菜蒜仔大蔥等等好惹味，另外我自己好鍾意佢入面加咗上海年糕，煙煙韌韌，吸埋麻辣雞煲嘅精華，令到食嘅時候特別滋味。我哋另外嗌咗個菜、芋頭件同埋一份紅薯粉。食雞煲點少得啤酒，呢度有隻德國嘅麥啤幾好飲，同麻辣雞煲個味好夾。…Read More

先來個冷盤小食：鎮江淆肉。跟手黎個湯：砂窩雲吞津白。個高湯味道香濃，雲吞係上海菜肉雲吞，都幾好食。津白好入味。接住係山東燒雞，個蒜香好掂，個汁嘅味道都調得唔錯，個味夠出但係又唔會好鹹，都幾大碟，份量都幾足，雖然有啲人當佢係冷盤小食，不過我覺得似係主菜多啲。上湯豆苗清清地好味道。松子黃魚唔算好大條，佢個酸汁都做得好好，條魚都幾厚肉。蒸素餃一籠有10隻，食落好清爽。高力豆沙係送嘅甜品，熱熱地係幾好食嘅。…Read More

今晚試咗公司附近嘅雞煲店，食麻辣雞煲。諗住一收工衝落去實無人，點知已經有兩枱食緊，估唔到咁早已經有人打緊邊爐。個雞煲嘅配料好多，所以食起上嚟特別惹味，呢度嘅侍應都好好服務，見過雞煲滾起就幫我哋兜一兜入面等佢唔好燶底。佢一路撈個雞煲，入面啲香味升晒出嚟真係好正。呢度雞嘅質素唔錯，肉質有彈性，而且都算多肉，唔係夾親都係雞胸雞骨。雞煲入面落咗上海年糕，吸晒啲麻辣味好正。呢度嘅響鈴都幾脆，而且冇油膱味。呢度我韭菜餃幾好食，啲韭菜好新鮮。…Read More

今天來一趟高級的happy hour，唔飲啤酒要飲吓紅酒，仲要配埋好正嘅cheese platter同cold cut，過一個非常relax嘅下午。佢呢度嘅cheese platter一共有4款芝士，除咗隻blue cheese之外，其他嗰三款我都唔係好識分辨係乜嘢芝士，總之就係飲住紅酒食芝士好正啦。佢個blue cheese幾好食，個味道唔會太濃。cold cut就有意大利風乾火腿同埋辣肉腸，兩款都幾好食，又唔會好鹹。 happy hour紅酒白酒同意大利起泡酒free flow都幾正。…Read More

咁大個女真係第一次食用白鱔嚟做嘅炸魚薯條，佢個炸粉漿好薄，所以一啖咬落去嘅時候唔會食到成口粉，而相對地入面嘅白鱔肉味道就更加出，食嘅時候有一種魚油喺口腔入面爆發嘅感覺，始終白鱔係真係比較多魚油嘅。佢個口感非常好，脆得來白鱔嘅肉又非常有彈性，另外佢嗰個特別為炸白鱔條配嘅蒜乾豆豉醬亦都係非常出色，豆豉味唔會太搶，所以食嘅時候又食到豆豉味又食到白鱔嘅鮮味。仲有要讚一讚佢啲薯條同埋沙律伴菜都非常新鮮，薯條應該係新鮮炸嘅，沙律菜亦都係好fresh好有水份。…Read More

呢一間小菜館出品真係唔錯，絕對係其中一間被忽略咗嘅隱世小店，我哋叫咗四樣嘢四樣都好好食。蠔皇蝦子油皮超正，有皮炆得夠入味，而且好軟熟，呢啲功夫菜外面好少有機會食得到，蝦子溶入油皮入面好和味。胡椒豬肚湯浸雞亦都唔錯，胡椒豬肚湯嘅胡椒味又唔會搶晒啲味，雞都好新鮮，唯一缺點係少肉多骨，半隻雞份量都幾大碟。豉椒牛肉粒粘米粉亦都係做得唔錯，米粉煎得夠薄夠乾身，啲煎米粉放面就唔會俾啲汁整到腍晒，牛肉粒亦嫩滑。大芥菜煲嘅芥菜新鮮好食，落咗火腩落去一齊煮，令到成煲嘢嘅味道更加出。小食係腰果，另外原來佢有兩間舖所以都坐得幾舒服，唔會好迫。…Read More