咖喱榮 (Closed)

嚟到澳門梗係行到邊食到邊，咁啱經過呢間咖喱榮見佢一串一串好似麻辣燙咁，好吸引，點知揀完嘢食畀錢嗰陣先知中伏。點咗生腸、牛柏葉、山根、蘿蔔、尤魚同一兜細牛雜，竟然索價$150！！！未試過食幾串街邊嘢食到咁貴，睇返餐牌，尤魚竟然要$60！我哋呢啲平民食平民嘢畀開平民價錢，成間嘢真係太貴太高級！佢味道係冇問題嘅，都係將材料燙熟然後加咖喱汁，咖喱汁少少辣，蘿蔔都煮得算入味，牛雜中規中矩，牛肚好多，其他部位較少，但啱晒只係想過下口癮嘅我。食到最後本來都只係覺得太貴下次都唔會再嚟，當我食到最後發覺點解我只係食咗一舊牛柏葉，以為男朋友咁衰自己食晒，一問之下，佢話佢都係食咗一舊咋！究竟消失的牛柏葉去咗邊度呢？