六記粥麵

Open Now

Now Closed

數日前，香港各界正密鑼緊鼓籌備回歸活動；在一水之隔嘅濠江，我亦準備我自己嘅「回歸」工作。與我一齊到澳門搵食嘅同事，知道我即將要離開後，提議响我臨走之前，進行一次「掃街」活動。講到食，我就梗係當仁不讓啦。是晚我地嚟到俗稱「十六浦」附近，試吓一啲响香港已經比較少機會食得到嘅嘢。第一站我地嚟到「六記」，呢度有不少飲食雜誌都介紹過。據朋友提議，餐牌上有彩照嘅食品都係值得一試嘅。結果我地叫咗「炸雲吞」、「豉椒炒蜆」、「蝦子撈麵」、「雲吞麵」、「水蟹雞粥」同埋「米通鯪魚球」。呢度嘅「竹昇麵」係賣點之一，食落又果真有啲功架，「蝦子撈麵」嘅水準拍得住元朗嘅老字號「好到底麵家」；「雲吞麵」嘅湯底清甜，不帶有半點味精；雲吞餡入面嘅豬肉同蝦嘅比例適中，用料亦新鮮。「米通鯪魚球」係我嘅強力推介，鯪魚球本身炸咗，配合魚肉入面嘅陳皮已經係好香了，再加上香口嘅米通，令人挾了一粒又一粒。「炸雲吞」、「豉椒炒蜆」都有街邊小炒嘅味道。相比之下，「水蟹雞粥」就比較失色，粥比較淡，亦唔夠綿。埋單落樓，共銀三百四十九蚊，即人均消費七十蚊，十分相宜。大家捧著大肚子，向住下一站出發。