猪仔包一直都保持水準，由焗爐出嚟，皮脆而帶溫熱，係一個好好嘅 starter，不過就次次都食到成枱麵包碎！:)
跟住嚟嘅係牛尾，今次炆得好夠淋，好容易就將肉同骨分開，肉亦都好入味，但係今次嘅牛尾就少咗啲牛肉嘅香味。薯仔亦都唔入味，可能係怕炆得太淋，所以最後先放入去。:)
跟住嚟嘅係雜菜，係我食咁多次最差嘅一次，菜淋到開始爛，個芡汁太杰，馬介休肉大大條好似薯條咁粗，但我覺得切得細啲融入啲雜菜裡面仲好食！
本來想叫炭燒魚，不過原來魚販未開工，冇鮮魚供應，就隨便叫咗沙旬魚，有啲後悔，沙旬魚真係唔會太好食，腥味重魚肉鞋魚肚又苦，所以隨便食完就算。
最後就係重頭戲嘅大蝦，淨係呢牒蝦就係成張單嘅一半價錢，原本係$240一份，但係我哋叫咗最大嘅蝦，要$320一份。芝士焗得啱啱好，表面有少少燶好香口，芝士仲有濃濃嘅奶香味！蝦頭係我最喜歡嘅部份，可惜今次少咗啲膏。有鮮味又彈呀，水準之作！
