BKK

聽日係公眾假期，所以今晚放工之後就同朋友嚟PMQ搵間餐廳食下嘢傾吓偈，同埋感受吓呢度嘅藝術氣息，好耐冇嚟過PMQ，都覺得佢係有啲唔同咗，係估唔到平日放工之後嘅時間都人流唔錯，同埋呢度佈置得比以前我黎既時候有特色 。今晚叫咗兩個小食、兩個主菜，同埋一個甜品， 加2杯嘢飲，兩個人最後飽到傻咗😂樣樣嘢都好好食，特別鍾意佢哋個自家製蝦餅，真係切嘅時候已經feel到佢係彈牙嘅，同埋好大舊，啖啖肉，最鍾意炸蝦餅喺呢種質感同厚度。蟹肉炒飯一啲都唔呃人，真係見到一嚿嚿大大嚿嘅厚實蟹肉，而唔係蟹肉碎，配埋啲肉鬆碎，花生碎，再灑啲新鮮青檸汁，成個飯就好惹味。燒牛肉串真係用炭爐燒㗎，燒到脆邊，仲要係一碟有四串，啖啖肉，點埋佢哋自家調嘅酸甜辣汁，夠晒好味！虎蝦紅咖喱，好奇佢個餐牌寫住係紅咖喱，但係冇加辣椒公仔嘅，點知真係唔辣㗎喎，好啱我哋唔算食得辣嘅人 。虎蝦每條都好大條，已經將啲殼開晒邊，容易切，而且份量唔算少。甜品揀咗個椰子雪糕兩份食。椰子雪糕伴以烤焗花生粒、鮮椰子肉，同埋粟米粒，令到甜品好有口感，唔止啖啖有椰香，又有果仁香！呢度越夜越多人，好在我哋今晚早嚟，可以安排卡位坐 。服務員好勤快，亦都好細心周到