OPPA韓國燒肉店

Open Now

Now Closed

傳說中韓國人落雨會特別想食炸雞，因為雨聲令佢地聯想到油炸聲。 今晚落住毛毛雨，我腦中亦響起鐵板既渣渣聲，於是老屈朋友陪我去韓燒。坐低就見到台面放左大麥茶、生菜同三款泡菜。 雖然可以無限refill但都冇交頹貨，大麥茶好夠凍、生菜夠新鮮，一見唔係普通既冰水已經暗中加左分。前菜有芽菜、泡菜同海帶，正常質素。 可能食開炑八既醋漬海帶，個種水潤滑溜既質感正到可以狂啪幾碟，而呢度既海帶就比較乾身，有少少失望。全個menu最吸睛一定係成隻牛放哂出黎既和牛拼盤，見Oppa和牛二人餐包左拼盤同Movenpick雪糕，就抱住未必夠飽要再加單既心態叫住先。Oppa和牛二人餐 ($308/位)A4和牛拼盤有日本A4牛肉眼、A4黑毛和牛肩肉、A4黑毛和牛背峰、A4黑毛和牛三角腩、澳洲和牛舌、雪花腩同封門柳。 睇完一次都唔知係咩黎，不過好貼心地以全牛托盤上台，牛肉屬於咩部位已經一目了然。一共七款牛肉色澤鮮明、油脂分佈平均，迫不及待放上鐵板，三兩下手勢幾秒內就食得。 牛肉係幾新鮮嫩滑既，不過韓式包菜配惹味豆醬既食法令牛味唔太突出。我自己就最鐘意較肥膩既雪花腩同三角腩，其餘部位就切得比較薄同埋多瘦肉，未有太大驚喜。