磊犇 (Closed)

放假約左朋友係旺角睇戲，近近地見到附近有呢間石燒牛，就入左去試啦～價錢上黎講都幾親民，但係選擇就唔算好多，得三種牛肉，三種重量揀。不過牛肉既價錢已經包左沙律，前菜，白飯，同飲品，仲係任裝添！我叫左300g牛肩肉，朋友叫左200g西冷。呢到既牛，全部都係厚厚一大舊～視覺上同口感都唔錯，因為大大啖肉丫嘛！牛肩肉既肉紋比較粗，口感比較紮實啲。雖然有啲筋，但係都唔算好誇張，而且肉味都頗濃郁。西冷既肉紋就比較幼細啲，入口比起牛肩會好咬啲，同樣肉味都頗濃郁。調味料方面有玫瑰鹽，黑椒粒，燒汁，芝麻汁，黑椒汁，都算多選擇，而且幾乾淨。特別要提既係佢地既前菜腌蘿蔔同泡菜十分之好食！！夠入味，又唔會太咸，泡菜都似係新鮮泡菜，係我鐘意個款～～我同朋友都夾完又夾，真係好好食！另外朋友話呢到既白飯係用珍珠米，都幾好食。我無食飯就唔知啦～～飲品方面，我揀左洛神花山楂茶，唔會太甜，可以解下膩，唔錯！