餐廳準時9點開門，被安排坐晌窗邊位簡直喜出望外，望住個海景食早餐還是生平第一次，枱與枱之間有一定距離，樓底高加上無敵海景，坐得非常舒服。
價錢真的好抵，HK$398可選Menu內6款點心，價錢亦包醬芥茶(另加10%服務費)。以這個價錢，食物方面酒店亦絕不馬虎，樣樣即叫即做，上枱碟碟熱辣辣，而且上枱速度亦相當快，服務員細心有禮，整體真的不錯。
1) 白菌雞粒盞 : 有點兒似迷你雞批，酥脆香口，6款點心當中最喜歡這個
。2) 冬筍鮮蝦餃 : 蝦新鮮彈牙，Size是一口一粒，若然Size能夠做大一點，這款點心就無得彈。
3) 蜜皇义燒包 : 外皮鬆軟，攞上手亦不會散開，內裡餡料味道剛剛好，醬汁不多，亦不會過於濃味，好食。
4)瑤柱雞粒鹹水角 : 相對其他幾款點心比較失色，不知是否外皮用了南瓜定點點咖哩粉溝成，帶點點黃色令賣相好像有點深，好彩是做成啤梨形狀，可愛指數可以加點分數，但皮較厚所以唔係好食得出餡料味道。
5) XO醬炒腸粉 : XO醬味唔算突出，但由於上枱時仍非常之熱，煎香味就好夠，呢味如果能夠配辣椒醬及甜醬上枱，可以提升整個點心味道。
6) 揚州炒香苗 : 非常足料，食到义燒及蝦的味道，雖然上枱時有用蓋蓋住，但可能我們放了一陣先食，無咁熱，如果剛上枱食應該再好食D。
這次已是我第二次到港灣壹號用餐，食物同環境真係無得輸。服務相當殷勤有禮，收碟速度亦相當快。整體質素超出預期！
2
