小曼谷泰國美食 (教育路) (Closed)

唔講唔知呢間小曼谷原來係九龍城好出名嗰間嘅分店。實在有太多餐廳以「小曼谷」開頭好難分辨。聞到隔離枱好香嘅冬陰功，即刻要點！聞到冬陰功嘅味就諗起喺泰國嘅回憶。味道上，少辣剛剛好，符合香港人口味。湯料有原隻大虎蝦，菇等等。泰式醃豬頸肉沙律，豬頸肉多過菜，正！豬頸肉烤過，邊位仲少少脆多滋味。仲有必食嘅蒜蓉包，面頭有好多蒜蓉，作為重口味人士我係鍾意蒜味，好彩朋友都係姐。原本都諗住叫咖喱，不過而家2個人食唔曬就冇叫，所以蒜蓉包就配冬陰功食。泰式拼盤有春卷、蝦餅、魚餅同雞棗，一次過可以滿足多個願望。蝦餅爽口彈牙。魚餅內有唔同香料，好惹味，一食就會知係泰國嘅味道。春卷香脆。比較少見係雞棗，就係細細粒嗰舊炸物。雞棗係指將雞肉及雞軟骨剁碎成膠，配上杏仁碎係面，再炸。食落口感幾特別首先係食到杏仁嘅脆口，之後就係內裏嘅雞肉膠。串燒有牛舌、雞肉。肉類燒得外脆內嫩。本身有用香料調味，單食唔點醬都好入味。牛舌最忌係煮得韌，呢到唔會。飲品叫咗沙冰，分別係芒果椰汁沙冰同埋椰皇沙冰。芒果味重之後就有椰汁味，係解渴解辣佳品。椰皇沙冰就比較清甜。食得飽飽，重拾係泰國嘅記憶，同樣一邊吹水一邊食嘢嘅時間。