今年去灣仔倒數, 商量後決定黎呢間食, 返正我都未食過
90分鐘放題, 一如估計6點就已經第一round, 呢個鐘數拎飛就7點幾可以入座, 好彩呢日早放工可以拎定位先
佢有唔同價錢, 越貴啲肉就越靚, 而我地揀左最平嘅$158美國進口牛肉放題, 返正時間有限都食唔晒咁多種 (其實唔係食開嘅比靚啲都食唔出)
雖然唔係貴價野, 但係牛肉食落都幾嫩, 咬兩三啖就食到落肚, 豚肉都幾滑, 但係雞肉就第一round得好少, 之後又冇叫過, 所以無緣試下
湯底見到四川麻辣豚骨湯所以試下, 驚太辣所以雙拼左個骨膠原豬骨湯, 事實上四川麻辣真係比較辣, 好彩唔係太食辣嘅我都接受到
醬料係出面嘅枱度自己任溝, 不過唔想要太辣, 所以剩係要豉油同蔥, 另外加埋胡麻醬試下
除左肉之外, 出面仲有唔少配料可以落, 仲要有炒飯食, 小弟比較欣賞芝心丸, 因為入面啲芝士味真係好濃郁好甜
不過炒飯真係幾油下, 加上係飽肚食物所以食左一碗都有啲後悔
野飲都係任飲, 除左汽水之外仲有幾隻果汁, 仲會教你整fruit punch
其實都正正常常, 只係檸檬汁好重甜, 唔想再飲
除左野飲之外仲有雪糕, 不過食野都飽得濟所以冇食到
值得一提嘅係呢度有電話袋提供, 店員見你部電話係枱面就會問你要唔要, 而且佢地會主動問你加唔加湯
可惜今次做左大嘥鬼, 同行朋友細食左又拎多左, 真係罪過罪過...😞
