Video
Read full review
2020-07-05
366 views
近幾個月飲食界最熱搜的，應該都係點心放題，總之但凡做開中菜的，不論酒店、中菜店、酒樓都紛紛推出點心放題，價錢由幾十到三百左右都有。好幾年前點心放題未流行，凱悅酒店的凱悅軒已經率先做左，價錢唔算平，當時都食過兩次，質素甚高，所以一直都對點心放題好感興趣。今次試個相對平價的，就係尖沙咀中菜店「南海一號」，星期一至五$168，周末及假期$188，另收人頭$25茶錢，同每枱$28一籃蝦片（就算唔要都要收錢），計埋加一，每人總計要$250（周末價錢）。另外佢分兩個時段，第一段11:30-13:00，第二段13:15-14:45，每段限時1.5小時，其實幾趕。菜單上有29種菜式可選，如果真正只計點心的話只有10種，選擇比其他店少，其他都係小菜同炒粉麵飯，不過整體質素都不俗，最優勝嘅係，呢度無遮擋的維港兩岸景觀，樓底亦高（佔左兩層），所以毫無壓迫感。我試左菜單上9成菜式，雖然每樣都少少（可以自己點分量），但都飽到上頭頂。蝦餃燒賣：正常發揮，蝦餃皮都算薄唔韌，啖啖蝦肉。金蒜蟹肉菜苗餃：幾清新，夾雜左蝦肉，但蟹肉少左啲。小籠包：皮厚左少少，但肉餡豐富，湯汁豐富鮮甜。葡汁鱈魚酥：店方獨有點心，外皮脆脆，裡
今次試個相對平價的，就係尖沙咀中菜店「南海一號」，星期一至五$168，周末及假期$188，另收人頭$25茶錢，同每枱$28一籃蝦片（就算唔要都要收錢），計埋加一，每人總計要$250（周末價錢）。另外佢分兩個時段，第一段11:30-13:00，第二段13:15-14:45，每段限時1.5小時，其實幾趕。
菜單上有29種菜式可選，如果真正只計點心的話只有10種，選擇比其他店少，其他都係小菜同炒粉麵飯，不過整體質素都不俗，最優勝嘅係，呢度無遮擋的維港兩岸景觀，樓底亦高（佔左兩層），所以毫無壓迫感。
我試左菜單上9成菜式，雖然每樣都少少（可以自己點分量），但都飽到上頭頂。
蝦餃燒賣：正常發揮，蝦餃皮都算薄唔韌，啖啖蝦肉。
金蒜蟹肉菜苗餃：幾清新，夾雜左蝦肉，但蟹肉少左啲。
小籠包：皮厚左少少，但肉餡豐富，湯汁豐富鮮甜。
葡汁鱈魚酥：店方獨有點心，外皮脆脆，裡面啖啖鱈魚粒，配葡汁好惹味。
春卷、鳳爪：滿意，水準之上。
蘿蔔糕：煎得幾香口，只係蘿蔔絲分量唔多。
黑糖馬拉糕：似普通馬拉糕，黑糖味唔重。
豉油王炒腸粉：腸粉滑身，色水夠，味道夠，惹味。
陳醋雲耳：好醒胃的前菜，酸味剛好，雲耳爽脆。
話梅石榴：本來冇期望，但出奇地幾好食，石榴口感似梨咁爽，話梅粉提升左石榴清甜味，好適合食完肥膩菜式後食。
咕嚕肉、辣子雞球：呢兩個小菜真係唔錯，咕嚕肉剛剛好掛汁，酸甜味恰到好處唔嗆喉；辣子雞球一點都唔辣，但勝在有椒麻味，唔錯。
鮮筍肉末四季豆：好有鑊氣，又唔油唔鹹，送飯的話一流，我食左兩轉。
麻婆豆腐、蝦仁炒蛋：呢兩道就失色啲，唔係唔好食，只係豆腐唔辣，炒蛋係滑，但得一粒蝦尾。
蟹肉冬蓉羹：食左兩碗，都撈唔到蟹肉，但只當佢係蛋白冬蓉羹的話就好好飲，濃稠度剛好，又清甜。
香芒果凍、南瓜西米露：兩款都唔錯，唔會好甜。
豆沙蘋葉角：個名有點奇怪，但其實係豆沙糯米糍，外皮煙煙韌韌，帶點葉的香味，豆沙餡微甜，有驚喜。
收費蝦片：係幾香脆，佐酒一流，不過太多嘢食，食唔晒要打包。
去的當日天氣非常好，又恰好被安排坐窗邊位，真係好舒服，只不過由於時間太趕，都無太多閒暇欣賞景色，不過坐的位置剛好望到半島酒店頂樓，成日睇到直升機升降，都幾好睇嘅。服務方面都幾好，侍應有禮，收碟有效率，漏單亦冇出現過，算唔錯了。
Post
